Mk 10

Za a ne tyam aluk

(Mt 19:1-9; Lk 16:18)

1Eyoñ a kôlôya vôm ate, ane a nga ke e si ya Yudé, e kindi'i Yordane ya yat. Ane jama bôt a nga beta zu mane tôkane nye bebé. A nga beta ye'ele be, aval ane a mbe a bo'ok. 2E nde Befarizieñ be nga zu na be lame nye a sili nye na: Ye fam é ne fo'o ngule ya suu minga wé' 3Ane a nga yalane be na: Môze a nga ve mia *atiñ aya' 4E nde be nga jô na: Môze a nga ve ngule na be tili kalate ya suu minga, éyoñ éte nje ba suu nye. 5Ane Yésus a nga yalane be na: K'amu ayete minlem denan, e nde a nga tili mia atiñe te. 6Ve atata'a ya ntéane ba biômô, Zambe a nga kômône be nnôm baa nga. 7Ajô te nde ñhe fam ja ye li'i ésaa baa nyia, a ke lat a ngale wé, 8a ba ye bo nsône wua bebaane. Be nji fe bo bôte bebaé, be ntoo nsône wua. 9Ajô te, e jôme Zambe a maneya lat, môt a bo'o teke kandé je. 10Eyoñe be nga ke kui e *nda, e nde beyé'é be nga beta sili nye minsili, mi tina'an a ajô te. 11Ane a nga jô be na: Nge môt a suu nga a lu'u minga mfe, a bo *mejian a minga ate. 12Nge minga ki a kôlô e be nnôm a ke lu'u fame fe, nye fe a bo *mejian.

Yésus baa b'ayôme bongô

(Mt 19:13-15; Lk 18:15-17)

13Ane be nga zuu nye ayôme bongô na, a nambe de. E nde beyé'é be nga viane bame be. 14Ayene Yésus a nga yene nalé, ane a nga yaa be a jô be na: Jôka'an ayômô bongô e zu be ma, te kamane de, amu éjôé Zambe é ne jôm avale bôte dap. 15Ma bele fo'o ane ma jô mia na, e môt ase a bo teke nyoñ *ayoñe Zambe ane mone mongô, a ye bo teke nyiin été. 16Ane a nga nyoñe be a be'e be e mo yôp, a botane be, a beté be mo.

Yésus baa nkukum môt

(Mt 19:16-30; Lk 18:18-30)

17Valé Yésus a ndôme fo'o téé dulu, e nde môt éziñ a zu ke so mbil ôsu, a kute meboñe si, a sili nye na: A Mba Ñye'ele, ma yiane bo jé ane me ne nyoñ ényiñ ya melu mese' 18Ane Yésus a nga jô nye na: Wo loone me mbamba môt amu jé? Teke môt éziñ a ne mbamba môt, sesale ve Zambe étam. 19Ke wo yeme metiñe mese: Te wo wôé, te wo bo *mejian, te wo wup, te wo bo ngaa minsos; te wo wôs éza biôm; ô semé'é ésoo baa nyua. 20E nde nye k'a nga yalane na: A Ñye'ele bôt, e mam mese ma, ma ba'ale me aso mongô. 21Yésus a nga fombô nye ne tooñ, *a nye'e nye; e nde a jô nye na: Jam daada e li'iya e jemba'ane wo: kelek, e biôme bise ô bili, ku'ane bie, a ve bie minzôzoé, nalé wo ye bi akum e yôp, éyoñe te ô zu wo tôñe ma. 22E nde ôtat ô nga bo nye asu a nkobô ôte, ane a nga ke ôlun ôlun, amu a nga bili akum abui. 23Ane Yésus a nga lôbô mbôma'ane, a jô beyé'é bé na: Etua ayaé fo'o na e bôte be bili akum abui be nyiin *ayoñe Zambe! 24E nde beyé'é be nga si'an a vembe bifia bié bite. Ane Yésus a nga beta jô be na: A *bon, e ne fo'o étua ayaé ya nyiin *ayoñe Zambe! 25Da dañe tyi'ibi na kamel a tulan *abé ndôndo alôte na nkukume môt wo nyiin *ayoñe Zambe. 26Ane be nga beta dañe dañe semé, ba ke ba jô e zañe jab na: Eyoñe éte za fo'o e nye a ye bi ényiñ' 27E nde Yésus a nga fombô be ne toñ, a jô na: E be bôt, jame te e se ngul ya boban, ve sa ke be Zambe; amu e be Zambe, mam mese me ne ngul ya boban. 28Ane Pierre a nga nyoñe ñhe nkobô a jô nye na: Tame yen, bi maneya li'i biôme bise a zu tôñe wo! 29Yésus a nga yalane nye na: Ma kate fo'o mia bebela na, e môt éziñ a ye li'i *nda, nge bobenyañ, nge beka, nge nyia, nge ésaa, nge *bon, nge ke mefub amu ajô dam a ajô Mbamba Foé, 30a se ngule ya bo te nyoñe biôm bite ntet biôm tañe jôme jia éyoñ ébien ji, a taté menda a kui bobenyañ, a beka, a benyia, a *bon, a mefup, a fulane bikpwe'ele, a ényiñ ya nnôm éto mfa'a ya biyoñ bia zu. 31Abui ya ba be ne ôsu, da ye tebe e mvus, e ba ya mvuse ki ba ye tebe ôsu.

Eyoñe lale Yésus a kate na a ye wu a beta wômô

(Mt 20:17-19; Lk 18:31-34)

32Be ntoo zene zañe valé, be betek a ke Yérusalém, Yésus a tele be ôsu, minleme mi ntyele be yôp, e bôte ki be mbe be za'a ba tôñe be, be ko woñ. Ane a nga beta nyoñe Beyé'é awôm a bebaé, a nga kate be mame ma yiane tôbane nye. 33Nye na: Bia ñhe bia bet a ke Yérusalém ba, a Mone Môt, a ye vebane e mo Betuni Benen a Beyeme-bekalate, ba ye tyi'i na a wu a ve nye bikuu, 34ba ye kpwe'ele nye a tui nye menden, ba ye bibi nye minkasa a wôé nye, ve e mvuse melu mebaé, e môse lale a ye wômô.

Yésus baa bone be Zébédé

(Mt 20:20-28; Lk 22:25-27)

35Ane Yakob baa Yôanes, bone be Zébédé, be nga zu tôbane Yésus a jô nye na: A Ñye'ele bia yi na, e jam bia ye sili wo, ô bo bia de. 36E nde a nga jô be na: Jé nje mia yi na me bo mia' 37Ane be nga yalane nye na: Va'a bia ngule ya zu tabe étôto'o jôé été, môte wua e mbo nnôm, nyô mbo'o kik e mbo nga. 38E nde Yésus a nga jô be na: Mi nji tu'a yem e jôm mia sili! ye mi bili ngule ya nyu *élaé mamien ma ye nyu? Nge dubane kik e nduan mamiene ma ye duban' 39Ane be nga jô na: Bi bili ngu. Yésus nyee be na: E *élaé mamiene ma ye nyu, mia ye nyu je, a nduan mamiene ma ye duban, mia ye dubane wô, 40ve mfa'a ya bito ya mbo nnôm nge mbo ngale wom, sake ma ma ve bie, bi ne nkôman asu bôt be nee bie. 41Eyoñ awôm beyé'é avok e wô'ôya nalé, ane be nga yaa Yakob baa Yôanes. 42Ane Yésus a nga loone be a jô be na: Mia yeme na e bôte mia yene be bili éjôé ya *meyoñ, be titi *meyoñ mete yôb a ngul, e nde fe beta be bôt, ba tibili *meyoñ. 43Ve avale te e nji bo e be mia. Ve nge môt éziñ a kômbô bo beta môt e zañe jenan, a ye bo mbo ésaé wônan; 44a nge môt éziñ a kômbô bo môt ôsu ya be mia, a ye bo mon *ôlo asu bôte bese. 45Ajô te ñhe Mone Môt nye a nji ke so amu na bôt be saane nye, ve na *a saane bôt, a ve ényiñ jé ntañ bôt abui.

Yésus a saé ndindim Bartimé

(Mt 20:29-34; Lk 18:35-43)

46Ane be nga kui Yérikô. Eyoñ a kôlô'ô e Yérikô valé, baa beyé'é bé a ébe'ebe'e nsamba bôt, nde Bartimé, mone Timé, a mbe ndindim, nye k'a too si e fefele *zen, a jaké'é bôte biôm. 47Awô'ô a nga wô'ô na a ne Yésus ya Nazarét, a taté ñhe na a yôtan e yôb été a jô'ô na: A Yésus, mone David, ko m'éngôngo! 48Bôte bevo'o abui be nga bamé nye na a ku évô. Nye k'a nga dañedañe bete *tyiñ e yôb été na: A mone David, ko m'éngôngo! 49Ane Yésus a nga tebe, nye na: Lo'one nye! ane be nga loone ndindim wu, a jô wô na: Volô'ô *nlem, kôlô'ô si, a loone wo! 50E nde fo'o a nga sô'ô kôte jé, a ji'a nyokan tetele, a ke e be Yésus. 51E nde Yésus a nga nyoñ nkobô a jô nye na: Wo kômbô na me bo wo jé? Ane ndindim ô nga yalane na: A Rabbuni, ma yi ve na me yen. 52E nde Yésus a jô nye na: Kelek, mbunane wôé ô nyiiya wo. Ane fe a nga yen été été, a nga ke a tôñe nye e zenezen.

Currently Selected:

Mk 10: BDCB

Highlight

Copy