Mk 11

Yésus a nyiin e Yérusalém ane Mesie

(Mt 21:1-11; Lk 19:28-40; Yo 12:12-19)

1Eyoñe be nga subu bebé e Yérusalém, e zia Bétfajé baa Bétani, bebé a nkôle b'ôlivié, e nde Yésus a lôme beyé'é bé bebaé, 2a jô be na: Kelan e jal e ne mia zo'one yate vana di, nné ane mia ye kui, mia ye koone mon éjakas a tii, môte mfe éziñ a ngenan teke tame betebe nye yôp, ti'ane nye, mi zuu nye. 3Nge môt éziñ a sili mia na: Jé mia bo le? Mi yalane na: Nti nye a yi nye, a ye fe bulane lôme mia nye vana ana'ana. 4E nde be nga ke, be koone mon éjakas a tii atan bebé a *mbé akak, e mfaka yôp; ane be nga tiine nye. 5Ane bôte b'éziñ ya ba be nga tele valé be nga jô be na: Mia tiine mon éjakas ate amu jé' 6E nde be nga yalane be aval ane Yésus a nga jô. Ane be nga jô'é be. 7E nde ñhe be nga kee mon éjakas ate e be Yésus, be nga ta mengômesan mab e mvus jé, ane Yésus a nga ke tabe nye e yôp. 8Abui bôt e nga ke da ta mengômesane mab e njoñe njoñ, ba bevo'o ki mebui bilé be nga ke ba tyi'i e fé fé.

9E bôte ya ôsu,

a bôte ya mvus,

be nga zu ba yôtane na: Hôzana!

Ébotan a môt a zu e jôé Nti!

10Ebotan a éjôé ja zu,

e ji ésaa wongan David!

Hôzana e susu'a nkôñ ya yôb été!

11E nde a nga ke kui e Yérusalém, a nyiin e Nda Zambe été. Aman a nga mane fombô biôm bise mbôma'ane, éyoñ éte ngô'é é nga bo fo'o abui, ane a nga kui atan a ke e Bétani baa Beyé'é awôm a bebaé.

Yésus a yo'é élé fiig

(Mt 21:18-19)

12Tyé-kpwa, valé be kôlô'ô e Bétani, e nde Yésus a nga wô'ô zaé. 13Eyoñ a yeneya élé fiig é tele ôyab analé, é be'e mekaé, ane a nga ke jom nge a ye yene jôm éziñ été. Ve éyoñ a nga ke kui je bebé, a viane koone ve mekaé-mekaé, amu éyoñ éte é nji bo éyoñ befiig. 14Ane a nga kobô a jô élé na: Akekui melu mese ma zu, môt éziñ a bo'o te beta di ébuma ya be wo ne tya! Beyé'é bé be nga vô'ôlô a wô'ô nkobô ôte.

Yésus a titane bôt ba bo makit e Nda Zambe

(Mt 21:10-17; Lk 19:45-48)

15Ane be nga ke kui e Yérusalém. Anyiin a nga nyiin e Nda Zambe, a tebe ñhe na a titane bôt ba kuan, a bôt ba kuse biôm e Nda Zambe été, a sô'ôlô betebele betyendé moné a bito bekuane bezum e si. 16Teke fe jô'é na môt éziñ a tulane Nda Zambe a be'e jôm éziñ. 17A nga ye'ele bôt a jô na:

Ye e nji bo ntilane na:

Ba ye loone *nda jam na,

*nda meye'elan asu meyoñe mese'

Ve mia mi vianeya kôñelane je

mfule befanga.

18Eyoñe Betuni Benen a Beyeme-bekalate be wô'ôtaneya ajô te, be nga jeñe ñhe aval avé be ne jiane nye. Ve be mbe be mate'e nye amu nkunda bôt ôse ô mbe ô seme'ene ñye'elane wé. 19Eyoñe ngô'é é nga bo, ane be nga kôlô tison éte.

Nkôt élé fiig; meye'elan ya mbunan

(Mt 21:20-22)

20Eyoñe be nga zu lôte bia-tyé, ane be nga yen élé fiig é maneya kôt, ataté mindi. 21E nde Pierre a zu beta simesan, a jô nye na: A Rabbi, tame yen ane élé fiig ô nga yo'é é maneya kôt! 22Ane Yésus a nga nyoñe nkobô a jô be na: Buna'ane Zambe! 23Ma kate mia bebela na, nge môt éziñ a jô nkôle wuna na: Kôlô'ô si va ô ke ku e mañ, teke bone bisô biziñ e *nlem été, a buni'i fo'o ve na e jam a jô da ye boban, da ye fo'o boban v'ane a jô. 24E nde ma jô mia na, e jam ese mi ne ja'é a meye'elan, buna'ane fo'o na mi mbili de, da ye fo'o veban ane mia sili. 25A éyoñ mi ntele na, mia ye'elan, nge mi bili môt jam éziñ e *nlem été, mi jamé'é, ndemben Esaa wônan ya yôb nye fe a ye jamé mia bikobe bienan. 26Ve nge mia bo te yeme jamé, Esoo wônan a ne yôb nye fe a ye bo te jamé mia bivuse bienan.

Ngule fé wo boo je mam ma'

(Mt 21:23-27; Lk 20:1-8)

27Eyoñe be beteya zu kui e Yérusalém, Yésus a nga ke a lôtan e Nda Zambe été. Ane Betuni Benen, Beyeme-bekalate a Bemvendé, be nga zu yene nye. 28E nde be nga jô nye na: Ngule fé, e nje wo boo je mame ma? Nge na: Za a nga ve wo ngule ya bo mam mete' 29Ane Yésus a nga jô be na: Ma fe ma zu sili mia ve nsili wua, mi yala'ane ñhe ma, nde ma fe me kate mia, ngule fé ma boo je mame ma. 30E nduan Yôanes a nga du bôt, ô nga so vé, ye yôb, ye be bôt? Yala'ane ma! 31Be nga ke ba fas beebe be jô'ô na: Nge bia jô na: Ô nga so yôp, ke a ye sili na: V'amu jé mi nji buni nye' 32Nge bia jô ke na: Ô nga so be bôt be nga viane ko ékoone bôte woñ, amu bôte bese be nga buni na Yôanes a ne fo'o totii *nkulu mejô. 33E nde be nga yalane Yésus na: Bi nji ke yem. Ane Yésus a nga jô be na: Ma fe maa ye kate mia, ngule fé nje ma boo je mame ma.

Currently Selected:

Mk 11: BDCB

Highlight

Copy