Mk 12

Nkana bebo bisaé ya afub woon

(Mt 21:33-46; Lk 20:9-19)

1Ane Yésus a nga taté na a kobô bôt a minkana. Nye na: Môt éziñ a nga bé afub woon, a lôñe nka'alé mbôma'ane, a mane fak ébé éfu'u woon, a lôñe fe nkume-nda ya ba'ale woon. Ane a nga nyoñ afub a ve bebo bisaé, ane a nga ke e dulu. 2Eyoñe mekoé bibuma me nga kpwaan, e nde a nga lôme mbo ésaé na a ke yene bebobisaé a nyoñ akab bibuma dé ya afub woon. 3E nde be nga bi nye, be mane bôme nye, be bulane fe lôme nye ve mo, ve mebo. 4Ane a nga beta lôme be mbo ésaé mfe. Nyuli e nye be nga mane bibi biôm e nlô, be nga mane fe samele nye. 5E nde a nga lôme mfe, nyuli ate e nye be nga wôé a si. A lôme fe befe abui. Balé bete, be bôme bevok, be wôé ke bevok. 6Ane a nga li'i a bili môte wua wua, ve mone wé a dañe nye'e. Ane a nga su'ulane lôme nye e be be a jô'ô na: Ba ye boone ko woñ amu na a ne mone wom. 7Bebo bisaé bete be nga ke ba kobô beebe na, e nye nyuna, e môt a ye nyoñ élik, za'ane bi wôé nye, élik é bo éli'i jangan. 8E nde be nga bi nye, be mane wôé nye, be vaa nye afub été be ke wua nye e fé. 9Mie afub woon a ye bo aya? A ye zu jiane bebobisaé bete, a ve fe bôte befe afub woon. 10Ye mi ne teke yeme ntilan wuna na:

Ako'o belôñ menda be nga ben a wua e si,

e nde te e nga bo ako'o ya jua'

11Jame te da so mboone Nti.

E ne jame ya semé e mise mangan.

12Ajô te be nga jeñe na be bi nye. Ve da be mate'e jama bôt. Amu be nga tu'a yeme na a nga ku *nkana ôte, amu ajô dap. Ane be nga li'i nye be mane ke.

Kéza e biôme bié; Zambe e biôme bié

(Mt 22:15-22; Lk 20:20-26)

13E nde be nga lôme bôte b'éziñ e be *yésus, bevok Befarizieñ, bevo'o kik bôte ya ngam Hérôde, na be bi Yésus anyu. 14Akui be nga ke kui, ane be nga jô na: A Ñye'ele, bia yeme na ô ne môta bebebela, w'ô ne teke wu môt éziñ dis, amu w'ô ne teke fombô bôt e mesu, wo ye'ele ve zene Zambe aval e ne bebela. Ye da yiane na be ya'ane kaiza *toya, ye momo? Ye bi ya'an, ye bi bo teke ya'an' 15Ayem a nga yem e mvôle jap, e nde a nga jô be na: Mia lame ma amu jé? Za'ane nsañe moné, me yen! 16E nde be nga soo wô. Ane a nga jô be na: Za nye a nee éve'ela jina, a ntilane wuna? E nde ba yalane nye na: Kéza. 17Yésus nyee be na: Va'ane kéza biôm bi Kéza, a Zambe biôm bi Zambe. Ane be nga dañe fo'o kam a semé nye beta nseman.

Bewu ba ye wômô

(Mt 22:22-33; Lk 20:27-38)

18Eyoñe éte Besadusieñ be nga zu e be Yésus, e mbe ba jô na ñwômane miñwuan ô nji bo, e nde ñhe ba zu sili Yésus nsili wuna na: 19A Ñye'ele, Môze a nga ve bia atiñe na, nge monyañ môt éziñ a wu, a li'i minga, ve teke li'i mon, monyañ wé a lu'u nga, a fôlô monyañe mvoñe bôt. 20E nde, bobenyañe be nga too nalé zamgbwa. Ane nyô ôsu a nga lu'u minga, ane a nga wu, teke li'i mvoñe bôt. 21Ane nyô baa a nga nyoñe minga ate, nye fe a wui, teke li'i mvoñe bôt. Nyu lale fe v'avale da. 22Tañe bese nalé zamgbwa, teke li'i mvoñe bôt. E mvuse jab bese, ane minga fe nye k'a nga wu. 23Eyoñe ya ñwômane miñwuan, ane be wômô, a ye bo e minga za ya be be? Amu bese zamgbwa be nga lu'u minga ate' 24E nde a nga jô be na: Ke mia fu'u fé amu mi ne teke yeme mintilan, teke yeme ngule Zambe! 25Eyoñe bôte ba ye wômô, a so vôm ya miñwuan, befam teke fe luk, binga ki teke fe ke meluk, ba ye tabe ve aval ane b'éngele be ne yôp. 26Mfa'a ya ke na bewu ba ye wômô, ye mi nji lañ e vôme kalate Môze a kañete ajô ya ntut, ane Zambe a nga jô nye na: Me ne Zambe Abraham a Zambe Izak a Zambe Yakob' 27A nji bo Zambe miñwuan, a ne Nyô bevevee. Mia fu'u fo'o fé angôndô.

Atiñ e tele metiñ mese ôsu

(Mt 22:34-40; Lk 10:25-28)

28Ane ñyeme bekalate éziñ a nga zu e be Yésus, éyoñ a wô'ôya ane baa be bôt bete be nga sañetan, a mbôl a nga yene na a nga yalane be mvaé, e nde a zu sili nye na: Atiñ avé e nde e tele metiñe mese ôsu' 29Ane Yésus a nga yalane na: Atiñ ôsu e ne na: Vô'ôlô'ô, a Israél. Nti Zambe wongan e nye étam a ne Nti. 30Wo ye ñhe nye'e Nti Zambe wôé a nleme wôé ôse, a nsisime wôé ôse a ôsimesane wôé ôse a ngule jôé ése. 31Atiñe baa dina na: Wo ye nye'e môt mbok aval ane womien. Atiñ afe e nji bo anen alôte metiñe mete. 32E nde ñyeme bekalate a nga jô nye na: Mvaé fo'o, a Ñye'ele, wo kobô bebela na: E nye étam a né! A mfe a nji bo ve nye. 33E nde fe na: E nye'ane ya nye'e nye a *nlem ôse, a fek ése, a ngul ése, a na e nye'ane ya nye'e môte mbok aval ane womien, ñwô wo dañe *bityi'a bise ba di'i ngumba, beta ndañan. 34Mbôle Yésus a nga yene na a yalane ñyalane mfefek, e nde a nga jô nye na: O nji bo ôyab a *ayoñe Zambe. A teke môt éziñ mfe a nga beta zômbô sili nye nsili.

Mesie a ne bo mone David aya

(Mt 22:41-46; Lk 20:41-44)

35Ane Yésus a nga nyoñe nkobô a ye'ele'e e Nda Zambe, a jô na: Beyeme-bekalate ba jô na Mesie a ne mone David aya' 36Ke David émien a kobô a ngule Mfufub Nsisim na:

Nti a nga jô Nti wome na:

Tabe'e e mbo nnôm wom,

akekui ma ye bo

minziziñe miôé ételé mebo jôé.

37E David émien a yôlé nye jôé na: Nti, aval avé a ne beta bo mone wé? E nde beta ékoone bôt a nga nye'e a vô'ôlô'ô nye.

Mi tabe'e ntye a Beyeme-Bekalate

(Mt 23:1-36; Lk 20:45-47)

38E ñye'elane wé été, e nde Yésus a zu jô na: Mi tabe'e ntye a Beyeme-Bekalate. Ba nye'e ba ke ba lôtan, be be'e beta minjombô bizingi, be kele ba batane be e minseñe minseñ. 39Ba nye'e bito bi ôsu e meba me Zambe a bedina. 40E mbe ki be mane'e di minkuse mi binga biôm, be dañe fe viane liti ve miñyené ya atan a zene ya abui ayabe meye'elan. Ba ye nyoñe mekua ma lôte nkôñ.

Mveane nkuse minga wo dañ

(Lk 21:1-4)

41Ane Yésus a nga ke tabe asu éwolo mimvean, a fombô'ô ane bôte ba wua moné éwolo été. Abui minkukum e za'a wua abui moné.

42E nde éngôngole nkuse minga jia ja ke so, é wua minsañe mibaé, tañ étun kabe. 43Ane Yésus a nga loone beyé'é bé a jô be na: Ma bele fo'o ane ma jô mia na éngôngole nkuse minga jina é veya alôte bôte bese be wuaya moné éwolo va. 44Amu na bôte bete bese ba te zu ve amu be bili abui, ve nye kik, azoé dé été, a te ve mon abim ase a bili na a nyiñ été.

Currently Selected:

Mk 12: BDCB

Highlight

Copy