Mk 13

Yésus a kuli ajô ntyaman Nda Zambe ya Yérusalém

(Mt 24:1-3; Lk 21:5-10)

1Akôlô Yésus a nga kôlô e Nda Zambe, e nde ñye'é wé wua a jô nye na: A ñye'ele, tame yen avale meko'o di, a aka'a melôñ di! 2Ane Yésus a nga yalane nye na: E beta melôñ bese ô lôô vana ba, teke ako'o éziñ da ye li'i e bete ako'o avok e yôp, be teke de sô'ôlô e si. 3Eyoñe Yésus a tabeya e si e nkôle beôlivié, e zia Nda Zambe, e nde Pierre, Yakob, Yôanes a André, ba ke sili nye e fefele na: 4Kate bia, mame mete ma ye boban éyoñ évé? A ndeme fé ja ye liti na biôm bite bise bi nga zu man'

Atata'a minjuk

(Mt 10:16-24; 24:4-14; Lk 12:11-12; 21:7-19)

5E nde Yésus a nga nyoñe nkobô a jô be na: Mi tabe'e ntye môt éziñ a za yalee mia e feñ. 6Amu bôt abui ba ye so, be be'e jôé dam, be jô'ô na: Mamiene nyuna! Nalé ba ye du'u bôt abui. 7Eyoñe mia ye wô'ôtan bita, nge ki bifoofooé ya bita, te koone woñ. Nalé a yiane boban, ve da sake asu'ulane le. 8Amu na ayoñe bôt da ye kôlô si e nga wosane di avok, éjôé é nga wosane ji évok. Mimfô'ôsan mi si mia ye bo mevôm mevôm, a bemfumbale zaé. Mame mete me ne aval ane atata'a mintaé mi abiaé. 9E nde ñhe mi ba'ale'e miabebien. Amu na ba ye kee mia e meba mejô, a meba me Zambe, ba ye bôme mia a minkasa, ba ye kee mia e mise me beta bengovina a bejô bôt, amu ajô dam, nalé a ye bo'olô ngum jam e mise map. 10Amu na Mbamba Foé a yiane taté mane kateban e be *meyoñ mese. 11Eyoñ ba ye kee mia nalé, te tyelane minleme yôb asu jôm mia ye jô, ve jam da ye veban be mia awolo te ebien, koba'ane de. Amu sake mia mia ye kobô, ve Mfufub Nsisim. 12Amu na monyañ a ye ke koñ monyañ na a wu, ésaa fe a ye ve mon; bone ki ba ye kôlô si a wosane bebiaé, a bo na be wu. 13E nde ñhe mia ye bi ziñ e be bôte bese amu jôé dam. Ve da, e môt a ye yem ne zeñ akekui asu'ulan e nye a ye yen ényiñ.

Njuk ve nenenen

(Mt 24:15-25; Lk 21:20-24; 17:23; 21:8)

14Eyoñ mia ye yen ébubua ja dañ angôndô, é ntoo e vôm a nji yian - e môt a lañ a tuka'a wôk - éyoñe éte e bôte be ne e Yudé be tubuk a ke e minkôle yôp. 15E môt a ne nseñ *nda ya yôp, a bo'o te sus e si a ke nyiine *nda jé na a nyoñe jôm éziñ été. 16E môt a nee afup, a bo'o te bulan a mvus na a nyoñe alô'ô dé. 17Ngo'o binga ba ye be'e mebum, nge nyia *bon melu mete. 18Mi ye'ela'ane fo'o na jame te e bo te kui a ôyôn. 19Amu na, melu mete, avale njuk da ye kui e ngenan teke tame bo nalé, ataté ane Zambe a nga té biôm, azukui éyoñ ji, a teke na da ye beta bobane nalé. 20A nge Nti a nga ye bo teke se'é melu mete tañ, teke môt éziñ a nga ye li'i a vee. Ve da a nga se'é melu mete tañ amu bôt a nga top. 21Ajô te nge môt a ye kate mia na: Ke Mesie nye a ne vana nyô! Tame yenan, e nye nyuli, te yebane de. 22Amu na, bekrist medu'an a bekulu mejô medu'an ba ye vam, ba ke ba bo mesimba a bitua bi mam na be yale mintoban mi bôt mezen mefe, nge nalé a ne boban. 23Ve mfa'a wônan, mi tabe'e ntye. Me maneya kate mia mam mese.

Nsoone Mone Môt

(Mt 24:26-35; Lk 21:25-28)

24E nde, melu mete,

e mvuse beta nju'u nyuna,

jôb da ye dim,

ngon teke fe faé.

25Ateté da ye ke da koo e yôp

e kpwa'a si,

a ngule biôme ya yôp

é kôlô'ô bité biap.

26Eyoñe te ñhe ba ye yene Mone Môt a za'a e minkut été a beta ngu a étôto'o nnen. 27Eyoñe te a ye lôme béngele bé a tôkan mintoban mié e meku'u mimfa'a minyin, ataté susu'a aku'u si akekui susu'a aku'u yôp.

Nkana élé fiig

Mt 24:32-36; Lk 21:29-33

28E nde, nyoñane ñye'elan ya tu'a wô'ô *nkana élé fiig. Eyoñ é mbe'e bisôsoñe mintyaé a bilele'e mekaé, mi yeme na éseb é nto bebé. 29Avale te fe mfa'a wônan, ane mi yene mam mete me boba'an, mi yeme na Mone Môt a ntele mia e *mbé yôp. 30Ma kate mia bebela na, e miaé bôte wu wo ye bo teke man, te na mam mete mese me tame mane boban. 31Yôb a si bia ye lôt, ve mejô mam teke lôt. 32Môse ôte, nge k'awolo te, teke môt *a yem, ja'ane béngele ya yôp, ja'a ki Mone Môt, fo'o ve Esaa étam.

Mi tabe'e bevevee a mombô

(Mt 24:42; 25:13-30; Lk 12:35-40; 19:12-13)

33Mi tabe'e ntye, mi tabe'e évevé. Amu mi nji yem éyoñ biyoñ bia ye kpwaan. 34Aval ane môt a ke e dulu, a li'i *nda jé a mane ve bebo bisaé éjôé jé, môt ase ésaé jé, a ve fe mba'ale *mbé ya jal *atiñ na a mombô. 35E nde ñhe momba'an, amu mi nji yem éyoñe miejale a ye bulan, nge mamengô'é, nge e zañ alu, nge éyoñ beyôm be kub ba loñ, nge ndib-tyé. 36Mi za ke tem a soya, a koone mia ôyo. 37Ajô ma kate mia di, ma jô de mia bese ve na: Momba'an!

Currently Selected:

Mk 13: BDCB

Highlight

Copy