प्रेरितो कै काम 3
3
लोंगड़े भिखारी कै ठीक कौरणा
1पतरस औरौ यूहन्ना दोफारी कै ती बौजै प्रार्थना कै सौमय मन्दिर दै जांदै लागै रौवै थिए। 2औरौ लोगै ऐकी आदमी कै नी लौआ थिया जू जन्म शै लोंगड़ा थिया, जैसीखै सैजै हर दूस मन्दिर कै तैसी दवारो पांदी जिथकौ नांव सुन्दर फाटक औसौ, बौठाल़े दैंव थिए, कै सै मन्दिरो दै जाणौवाल़ै कैईंदै भीख मांगो। 3जोबै तैणै पतरस औरौ यूहन्ना कै मन्दिर दै जांदै बैई दैखै, तौ तिनु कैईंदै भीख मांगै।
4पतरसे यूहन्ना कै साथै सीधु तैसकै ढौबौ दैखैयो बौल़ौ, “अमारै ढौबौ दैख!” 5औरौ सै तिनु कैईंदै किछै पाणौ कै उमीद राखैयौ तिनकै ढौबौ दैखदा लागा। 6तोबै पतरसे बौल़ौ, “चांदी औरौ सूनु तौ मुंआगै ना आथी पौरौ जू मुंआगै औसौ; सैजौ हांव ताखै दियु; नासरत गांव कै यीशु मसीह कै नांव शै ऊबा बिज़ औरौ हांडदा फिरदा लाग।”
7तोबै पतरसे तैसका सोंवा हाथ थाम्बैयौ कै तैसी टिपा; औरौ तौलोंई तैसकै लातो औरौ घुंडू दै तागत आए गौए। 8सै उछल़ैयो खौड़ा हौए गौआ औरौ चालदा फिरदा लागा औरौ चालदा औरौ उछल़ैयो-कुदिंदा औरौ पौरमेशवर कै बौड़ाए कौरदै बैई तिनकै साथै मन्दिर कै आँगणो दा हौटा।
9सौबी लोगै तैसी हांडदा फिरदा औरौ पौरमेशवर कै बौड़ाए कौरदै बैई दैखा। 10औरौ तैसीकै पौछेयाणै पोऊवा कै ऐजा सैजाई लोंगड़ा भिखारी औसौ, जू मन्दिर कै सुन्दर फाटक पांदी बौठेयौ भीख मांगैया कौरौ थिया; औरौ तियौं घोटना शै जू तैसकै साथी हौए रोए थी; तिथु दैखैयो सैजै लोग बैजाए हैरान औरौ चकित हौए गौवै।
सुलैमान कै ओसारे पांदी पतरस का सौंदेश
11जोबै तैसी आदमीए पतरस औरौ यूहन्ना कै पाकड़ै राए थिए, तौ सौबै लोग बैजाए हैरान हुवे। औरौ तैसी ओसारे दै जू राजा सुलैमान का औसौ, तिनकै धोरे दौड़ैयौ ओऊवे। 12ऐजौ दैखैयो पतरसे लोगौ कै बौल़ौ, “ओए रै इस्राएल देश कै लोगौ, तुऐं ऐसी आदमी कै दैखैयो किथु हैरान हौए रौवै, औरौ अमारै ढौबौ किथु हैरानी शै दैख लो जैशैखै मानौ आमुए ही आपणी अनौखी शौकतै या भोक्ती लैई ऐसीकै हांडणौ फिरणौ कै लायक बाणै राए।
13अब्राहम, इसहाक औरौ याकूब का पौरमेशवर, अमारै पुराणिया कै पौरमेशवरे आपणै सेवक यीशु की महिमा कौरे, पौरौ तुऐं तैसी मारणौ कारिए यहूदी नेताओं कै हाथौ दा थोम्बाए दिया, औरौ जोबै राज्यपाल पिलातुसे तैसी छोड़े दैणौ का विचार कौरा, तोबै तुऐं तैसकै सामणै यीशु कै बैज्जती कौरे। 14तुऐं यीशु कै ना अपनैई, जू पवित्र औरौ धरमी थिया। औरौ तुऐं चोऊ कै ऐकी हथयारै खै तुऔं कारिए छोड़े दिया जांव।
15औरौ तुऐं तैसी जू लोगौ कै सौदा कै जिन्दगी दैंव मारै दिया, जैसी पौरमेशवरे मौरेयौंदे मुंजीदा जियुंदा कौरे दिया; औरौ इयौं बातौ कै आमु गवाह औसौ।
16औरौ मसीह यीशु पांदी बिशवाश कौरणौ कै दवारा ऐजा आदमी बिल्कुल ठीक हौए गौआ, औरौ तुऐं जाणौए कै ऐजा कैशणा अपंग थिया औरौ तुंआरी आखी कै सामणै मसीह यीशु कै नांव दै बिशवाश कौरणौ की बौजैह शै ऐसी चंगाए भैट रौए।” 17“औरौ ऐबै ओए रै भाईयों हांव जाणुए कै तुऐं औरौ तुंआरै नेताए यीशु कै अणजाणै दा मारै दिया, जिथुकै तुऔं पोता ना थी कै सै मसीह थिया। 18पौरौ जिनु बातौ कै सौब पौरमेशवर कै बातौ बौताणौवाल़ै कै दवारा औगौड़ियौ ही पौरमेशवरे बौल़ै राए थियु, कै तैसका मसीह दुख झैलदा औरौ मारा जांदा, औरौ तैणै तिनु साचौ कौरेयौ दिखोऊ।
19औरौ पाप कौरणा छोड़े दैंव, औरौ पौरमेशवर कै ढौबौ पाछु आव कै तोंवारै पाप माफ कौरे जांव जिथलैई तुऔं पांदी पौरमेशवर कै ढौबौशा आत्मिक शौकतै का सौमय आन्दा। 20औरौ सै यीशु कै छाड़दा, जू सैजा मसीह औसौ जैसी तैणै तुऔं कारिए औगौड़ियौ शै चोणे राए।
21यीशु का स्वर्ग दा तैसी सौमय तौड़ी रौणा जौरुरी औसौ जोबै पौरमेशवर तिनु सौबी चीज़ौ कै नौवाँ बाणै दैन्दा जू तैणै बाणै रैई। बौहुत सौमय आगै पौरमेशवरे लोगौ कै बौताणौ कारिए पवित्र पौरमेशवर कै बातौ बौताणौवाल़ै कै दवारा ऐशै कौरणौ का वादा कौरा। 22जैशैखै मूसाए बौल़ौ, ‘प्रभु पौरमेशवर तोंवारै भाईयों मुंजी तुऔं कारिए मुं जैशणा ऐक पौरमेशवर कै बातौ बौताणौवाल़ा भैजदा जू किछै सै तुऔं बौल़ौ तैसकी शोणेया।’
23पौरौ हर आदमी जू तैसी पौरमेशवर कै बातौ बौताणौवाल़ै कै ना शुणौ, सै पौरमेशवर कै लोगौ मुंजीदा नाश हौए जांदा।
24औरौ शमूएल शै लोयो तैसकै बाद वाल़ौ तौड़ी जैतरै पौरमेशवर कै बातौ बौताणौवाल़ै बातौ बौतैई तिनु सौबीए इनु दूसौ का सौंदेश दैय राए। 25तुऐं सौबीए पौरमेशवर कै बातौ बौताणौवाल़ै कै संतान औरौ तियौं कौरारो कै हकदार औसौ, जू पौरमेशवरे तोंवारै पुराणिया शै बानै, जोबै तैणै अब्राहम कै बौल़ौ, ‘तैरै वंश कै दवारा दुनिया कै सारै कुड़बे आर्शीवाद पांदै।’
26पौरमेशवरे आपणै सेवक कै मौरेयौंदे मुंजीदा बिज़ाल़ैयौ सौबिदा औगौड़ियौ तोंवारै धोरे भैजा, कै तुऐं आर्शीवाद पांव, ताकि तुऔं मुंजीदै हरेक पाप कै जिन्दगी शै फिरैयौ पौरमेशवर कै ढौबौ आणौ दै मौदद कौरौ।”
Currently Selected:
प्रेरितो कै काम 3: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
