प्रेरितो कै काम 2
2
पवित्र आत्मा को आणौ
1जोबै यहूदी लोगौ कै पिन्तेकुस्त#2:1 पिन्तेकुस्त का मतलब औसौ पोचाशवा, जू यीशु कै मोरणो कै पचाश दूस कै बाद आंव। का दूस ओऊवा, तोबै सै सौबवे ऐकी जौगैह कौठै थिए। 2औरौ एकदम गौयणै पौरैशै बौड़ै तूफानों जैशणै शणशणाहट कै आवाज़ शौणै, औरौ तिथलैई सारा घोर जिथै सैजै बौठै रौवै थिए गुंजै गौ। 3औरौ तिनकै सामणै ऐक ऐशणै आग दैखी जिथका रुप जीभ कै जैशणा थिया जू जौई हौयौ तिनुमुंजी हरेक आदमी पांदी रौकै गौए। 4औरौ सैजै सौबै पवित्र आत्मा लैई भोरै गौवै, औरौ जैशैकै आत्माए तिनुकै बौलणौ कै शौकतै दै, औरौ सै ओकी-ओकी भाषा दै बौलांदै लागै।
5तैसी सौमय पौरमेशवर का डौर मानणोवाल़ै कैई यहूदी लोग थिए जू दुनिया कै हर देश शै तैयार मौनांदै आए रौवै थिए, औरौ यरूशलेम शहर दै रोए रौवै थिए। 6जोबै तिनुऐ हवा कै जैशणै आवाज़ शौणै तौ भीड़ लागै गौए, औरौ लोग घबराए गौवै, जिथुकै सौबी खै आपणी-आपणी भाषा दै चैलै बौलांदै बैई शौणै रौवै थिए। 7औरौ सैजै सौबै हैरान हौए गौवै औरौ बौलदै लागै, “दैखौ, इनुवे जू बौल़ै लौ का सौबै गलील जिले कै रौणौवाल़ै ना आथी?
8तौ ऐजौ का हौए रो जू आमु मुंजीदै हरेक आपणी-आपणी जन्म कै भाषा दै बातौ कौरदै बैई शुणौए। 9आमु मुंजीदै कुणिए लोग पारथी इलाके कै औसौ, औरौ किछै मेदी, एलामी, मेसोपोटामिया, यहूदिया प्रदेश, कप्पदूकिया, पुन्तुस औरौ एशिया प्रदेश, 10फ्रूगिया प्रदेश औरौ पंफूलिया प्रदेश कै औसौ। औरौ मिस्र देश औरौ लीबिया देश जू कुरेने शहर कै नेड़िक लीबिया इलाके कै आंडे-पांढे औसौ, इनु सौबी देशो कै रौणौवाल़ै औरौ यरूशलेम शहर खै रोम शहर कै रौणौवाल़ै शै आणौवाल़ै प्रदेशी, 11यानी का यहूदी, औरौ का बैगानै यहूदी जिनुवै यहूदी विचार अपनाए राए औरौ क्रेती द्वीप कै लोग औरौ अरब देश कै लोग बै औसौ। पौरौ आपणी-आपणी भाषा दै तिनु कैईंदै पौरमेशवर कै बौड़ै-बौड़ै चौमत्कार कै कामौ खै शुणदै लागै रौवै।”
12औरौ सै सौबै हैरान हुवे औरौ घबराएयों ऐकी दूजै कै बौलदै लागै, “ऐजौ का हौए रौ?” 13पौरौ ओकी लोगै ठाटै पाड़ैयो बौल़ौ, “ऐजै तौ नौवें सुरो कै नोशे दै पागल हौए रौवै।”
पिन्तेकुस्त कै दूसै पतरस का भाषण
14तोबै पतरस तिनु ग्यारो चोणेयौंदे चैलै कै साथै खौड़ा हौआ औरौ जोर शै बौलदा लागा, “ओए रै यहूदिया प्रदेश दै रौणौवाल़ै लोगौ, औरौ ओए रै यरूशलेम शहर दै रौणौवाल़ै सौबै लोगौ, ऐजौ जाणौ औरौ कान लायौ खै मैरी बातौ शुणौ। 15जैशैखै तुऐं सौमझै रौवै, ऐजै लोग नोशे दै ना आथी, जिथुकै इबी तौ झीशो कै नौ बौजै रौवै। 16पौरौ जू अमारै साथै हौ ऐजौ तियौं बातौ कै पूरु कौरौ, जू बातौ प्रभुए पौरमेशवर कै बातौ बौताणौवाल़ै योएल कै दवारा पवित्र शास्त्र दी बौल़ै रैई थी:
17प्रभु बौल़ौ, कै अन्त कै दूसौ दौ ऐशै हौन्दौ, कै हांव आपणै पवित्र आत्मा सौबी आदमी पांदी भैजदा,
औरौ तोंवारै बैटै औरौ तुंआरी बैटी पौरमेशवर कै बातौ बौताया कौरदी औरौ तोंवारै जवान दर्शन दैखदै, औरौ तोंवारै बूढ़े आदमी सुईणै दैखदै।
18हांव तिनु दूसौ दै आपणै दासो औरौ दासियो पांदी बै आपणै पवित्र आत्मा तिनु पांदी दैंदा, औरौ सैजै पौरमेशवर कै बातौ बौतांदै।
19औरौ हांव ऊबै गौयणै दै अनौखै काम औरौ धैनै धोरती पांदी निशान, औरौ लोऊ औरौ आग औरौ धुऐं कौ बादल़ दिखांदा।
20प्रभु कै दूस आणौ दै औगौड़ियौ सुरज इनारौ हौए जांदो औरौ चांद लोऊ कै जैशणौ हौए जांदो। सैजौ दूस महान औरौ झमाकैदार दूस हौंदौ।
21औरौ जू कुणिए प्रभु कौ नांव लोन्दा, सैजाई उध्दार पांदा।”
22“ओए रै इस्राएल देश कै लोगौ ऐजी बात शुणौ, नासरत गांव का यीशु ऐक ऐशणा आदमी थिया, जैसीखै पौरमेशवरे तोंवारै सामणै साबित कौरे राए थिया, कै तैणै तिनु चौमत्कार कै कामौ औरौ अनौखै काम औरौ निशानो कै दवारा जू पौरमेशवरे तैसकै दवारा तोंवारै बीच मुंजी कौरेयौ दिखाए। जोबै कै ऐजै सौचाई तुऐं आपी बै जाणौए। 23यीशु पौरमेशवर कै दवारा तय कौरेयौंदे योजना औरौ आगलै ज्ञान कै हिसाब शै थोम्बाया गौआ। तौ तुऐं तैसी दुष्ट आदमियों कै मौदद लैई किलो लायौ क्रूसो पांदी चौढ़ायौ मारै दिया। 24पौरौ हौजौ बै पौरमेशवरे तैसीखै मौत कै बंधन शै छुड़ायो मौरेयौंदे मुंजीदा जियुंदा कौरे दिया। जिथुकै ऐजौ नामुमकिन थियु कै मौत तैसीकै आपणै बोशो दा राखै सौकौ।
25जिथुकै राजा दाऊद यीशु कै बारै मुंजी बौल़ौ,
‘हांव प्रभु कै हमैशा आपणै सामणै दैखदा रौआ जिथुकै सै मैरै सोऐं ढौबौ औसौ, कै हांव तिनु लोगौ दा ना डौरदा जू मुखै नुकसान पोऊंचाणा चांव।
26इयौं बौजैह शै हांव खुशी लैई भोरै गौआ, औरौ हांव खुशी शै तैरै बौड़ाए कौरु औरौ मैरा शोरीर बै आशा दा बौणैयौं रौंदा।
27जिथुकै तू मुखै पताल़ो दा ना रौणौ दैंदा; औरौ ना आपणै पवित्र आदमी कै लाश कै शौड़णो दैन्दा।
28तुऐं मुखै जिन्दगी जीणो कै बाट बौताए राए; तू मुखै आपणै धोरे रौणौ कै दवारा खुशी लैई भोरै दैन्दा।’”
29ओए रै बिशवाशी भाईयों, हांव तैसी पुराणिया राजा दाऊद कै बारै मुंजी तुऔं कैईंदु हिम्मत कै साथै बौल़ै सौकु कै सै तौ मौरे गौआ औरौ दबाए बै गौआ, औरौ तैसकै कब्र ऐलो तौड़ी अमारै इथै मौजूद औसौ। 30सै पौरमेशवर कै बातौ बौताणौवाल़ा थिया, सै जाणौ थिया कै पौरमेशवरे शौं खायौ तैसीआरी वादा कौरा कै, “हांव तैरै वंश पौरैशा ऐक आदमी कै तैरै सिंहासन पांदी बौठाल़दा।” 31ऐजौ जाणैयौ कै हौणौवाल़ी बातौ दा पौरमेशवर का कौरदा पौरमेशवरे मसीह कै मौरेयौंदे मुंजीदा जियुंदी हौणौ कै बात कौरे। तैणै बौल़ौ, तू मुखै पताल़ो दा ना रौणौ दैंदा, औरौ ना आपणै पवित्र आदमी कै लाश कै शौड़णो दैन्दा। 32ऐसी यीशु खै पौरमेशवरे जियुंदी कौरा, जैसकै आमु सौबै गवाह औसौ। 33ऐबै सै स्वर्ग दा पौरमेशवर कै सोऐं हाथौ कै सौबी दै बौड़ै इज्जत वाल़ै ठाँव पांदी बौठेयौंदा औसौ। औरौ पिताए जैशै तैणै वादा कौरे राए थिया, तैसीखै पवित्र आत्मा दै औरौ तैणै पवित्र आत्मा आमु दै, जैसी ऐलो तुऐं दैखौ औरौ शुणौए। 34जिथुकै राजा दाऊद तौ स्वर्ग पांदी ना हुटी पौरौ सै आपी बौल़ौ,
“प्रभु पौरमेशवरे मैरै प्रभु शै बौल़ौ; मैरै सोऐं ढौबौ बौठ।
35जांव तौड़ी हांव तैरै दुशमनो कै नम्र कौरु, तिनुखै तैरै लातो मुल़ी कै ठेली कै जैशणै ना बाणै दियु।”
36“इथकारिए इस्राएल देश कै सौबै लोग पाकौ जाणै पाव कै पौरमेशवरे ऐसी यीशु कै जैसी तुऐं क्रूसो पांदी चौढ़ौऊवा, प्रभु बै ठैहरोऊवा औरौ मसीह बै।”
37जोबै लोगै ऐजौ शुणु तौ सै आपी खै दोषी महसूस कौरदै लागै, औरौ सै पतरस औरौ ओकी चोणेयौंदे चैलै कैईंदु पूछदै लागै, “ओए रै भाईयों, आमै का कौरु?” 38पतरस तिनुकै बौल़ौ, “पाप कौरणै छोड़े दैंव औरौ तुऔं मुंजीदा हरेक आपणै-आपणै पापौ कै माफी कारिए यीशु मसीह कै नांव शै बपतिस्मा लौ; तौ तुऐं पवित्र आत्मा का वरदान पांदै। 39जिथुकै ऐजा वादा तुऔं, औरौ तोंवारै नानड़िया, औरौ तिनु दूर-दूर कै सौबी लोगौ कारिए बै औसौ जिनुखै प्रभु अमारा पौरमेशवर आपणै धोरे बौईददा।”
40पतरसे बौहितै सारी बातौ बौलेयौ तिनु कैईंदै बिन्ती कौरे कै आपी खै इनु जिद्दी लोगौ शै बौचाव। 41जू किछै पतरसे बौल़ौ जिनु लोगै तैसकी बातौ पांदी बिशवाश कौरा तिनुऐ बपतिस्मा लौआ; औरौ तैसी दूसै तीन हजार आदमी कै लमसम तिनु बिशवाशी कै गुट मुंजी जोड़े गौवै।
बिशवासियौं कै साझी जिन्दगी
42औरौ सै चोणेयौंदे चैलै शै शिक्षा पाणौ औरौ संगति राखणौ औरौ प्रभु भोज दै शामिल हौणौ औरौ मिलैयौ खाणौ औरौ प्रार्थना दै मगन रौंव थिए। 43औरौ यरूशलेम शहर दै सौबै लोग डौरौ शै भोरै गौवै औरौ भौरिशै अनौखै काम औरौ निशान चोणेयौंदे चैलै कै दवारा प्रगट हौं थिए। 44औरौ सौबै बिशवाश कौरणौवाल़ै कौठै रौंव थिए, औरौ तिनुकैईं जू चीज़ौ थी तिथमुंजी सौबी का साझा थिया। 45सै आपणी-आपणी जायदात औरौ सामान बिक-बिकैयो जैशणी जैसीखै जौरुरत हौंव थी, बांडै दैया कौरौ थिए।
46सै हर दूसै ऐक मन हौयौ मन्दिर कै आँगणो दै कौठै हौं थिए औरौ घोर-घोर प्रभु भोज कौरदै बैई खुशी मौनांदै औरौ नम्र मन शै खाणौ खांव थिए। 47औरौ पौरमेशवर कै बौड़ाए कौरदै रौंव थिए, औरौ सौबै लोग तिनुदै खुशी थिए। औरौ जू उध्दार पांव थिए, तिनुखै प्रभु हर दूसै तिनकै बिशवाशी गुट मुंजी मिलाए दैंव थिया।
Currently Selected:
प्रेरितो कै काम 2: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
