प्रेरितो कै काम 4
4
पतरस औरौ यूहना की गिरफ्तारी
1जोबै पतरस औरौ यूहन्ना लोगौ शै ऐजौ बौल़ै लोव थियु, तौ मुख्य यहूदी पुरोहित औरौ मन्दिर कै ठोगड़े औरौ सदूकी लोग तिनकै धोरे आए। 2सैजै बैजाए गुस्से हुवे जिथुकै पतरस औरौ यूहन्ना यीशु कै बारै मुंजी शिखांव थिए औरौ लोगौ खै शिखांव थिए कै जू लोग मौरे गौवै पौरमेशवर तिनु औटेयौ जियुंदी कौरे दैंदा, जैशै तैणै यीशु खै मौरेयौंदे मुंजीदा जियुंदी कौरे दिया। 3औरौ तिनुऐ तिनु गिरफ्तार कौरेयौ ओकी दूसौ तौड़ी कोयदखाने दै राखै जिथुकै बैल़खौ हौए गौ थियु।
4पौरौ सौंदेश कै शुणणौवाल़ै मुंजीदै बौहितै यीशु पांदी बिशवाश कौरा, औरौ तिनकै गिनती कुल मिलायौ पाँची हजार आदमी कै लमसम थै जू यीशु पांदी बिशवाश कौरणौवाल़ै थिए।
पतरस औरौ यूहना : यहूदी सभा कै सामणै
5दूजै दूसै तिनकै नेता, बुड़ेईक औरौ यहूदी शास्त्री यरूशलेम शहर दै कौठै हुवे। 6सैजै लोग जू सभा मुंजी शामिल थिए, तिनुमुंजी महायहूदी पुरोहित हन्ना औरौ कैफा औरौ यूहन्ना औरौ सिकन्दर औरौ जैतरै महायहूदी पुरोहित कै कुड़बे कै थिए, सौबै यरूशलेम शहर दै कौठै हुवे। 7औरौ पतरस औरौ यूहन्ना कै बीच मुंजी खौड़ै कौरेयौ पूछदै लागै, “ऐसी आदमी कै ठीक कौरणौ कारिए कुणै तुऔं अनौखी शौकतै औरौ औधिकार दैय राए?”
8तोबै पतरसे पवित्र आत्मा लैई भोरेयो तिनु बौल़ौ, 9“ओए रै लोगौ कै ठोगड़े औरौ बुड़ेईक, आमुए ऐक कमजोर आदमी का भला कौरे राए, औरौ ऐलो आमु कैईंदै जांच-पड़ताल कौरे लोए, कै सै कैशै ठीक हौआ। 10तौ तुऐं सौबै औरौ सारै इस्राएल देश कै लोग जाणै पाव कै ऐजौ नासरत गांव का यीशु मसीह कै नांव लैई कौरौ। तैसी यीशु कै तुऐं लोगै क्रूसो पांदी चौढ़ाए दिया थिया, पौरौ पौरमेशवरे तैसी मौरेयौंदे मुंजीदा दुजाल़ियो जियुंदी कौरा। ऐलो तैसकै नांव कै दवारा ऐजा आदमी तोंवारै सामणै आछा भोला खौड़ा औसौ।
11मसीह यीशु ही सैजा पाथर औसौ, जैसी तुऐं मिस्रिए फेरकाए दिया थिया, औरौ सैजाई पाथर चट्टान बौणै गौआ। 12यीशु कै सिवाए कोसी ओकी कै दवारा उध्दार ना आथी जिथु स्वर्ग कै धैनै आदमी मुंजीदा ओका कुणजाई बै नांव ना दैय रैई, जैसकै दवारा आमै उध्दार पाए सौकु।”
यीशु कै नांव कारिए चैलो कै धमकी
13जोबै तिनुऐ पतरस औरौ यूहन्ना कै हिम्मत दैखै, औरौ ऐजौ जाणौ कै ऐजै अनपढ़ औरौ सीधै साधे आदमी औसौ तौ हैरान हुवे; तोबै तिनुऐ जाणै पोऊँ, कै ऐजै यीशु कै साथै रौवै थिए।
14पौरौ तैसी आदमी कै ठीक हौणौ कै बौजैह शै, जू पतरस औरौ यूहन्ना कै साथी खौड़ा थिया, यहूदी लोगौ कै ठोगड़े औरौ बुड़ेईक तिनकै खिलाफ किछै बै ना बौल़ै सौकी।
15पौरौ तिनु महासभा कै बायरै जाणौ की आज्ञा दैयौ सै आपी मुंजी बौलदै लागै, 16“आमुए इनु आदमी कै साथै का कौरु?” जिथु यरूशलेम शहर कै सौबै रौणौवाल़ै लोग इनु कै जाणौए, कै इनु कै दवारा ऐक मशहूर निशान दिखाए राए; औरौ आमुए ऐसी निशान कै भाजै बै ना सौकु।
17इयौं बातौ का समाचार हौजौ जादा ना फोयलै जांव, आमु इनु झिड़कोऊगे, कै सै ऐसी नांव शै हौजौ कोसी बै आदमी आरी बातौ नी कौरेया। 18तोबै पतरस औरौ यूहन्ना खै बौइदै औरौ झिड़कायो ऐजौ बौल़ौ, “यीशु कै नांव शै किछै बै बौलेया नी औरौ ना शिखाया।”
19पौरौ पतरस औरौ यूहन्नाए तिनुकै जोवाब दिया, “तुऐं ही न्याय कौरौ, का ऐजौ पौरमेशवर कै नेड़िक आछौ औसौ, कै आमुए पौरमेशवर कै बात शै बोढ़यो तुंआरी बात मानु? 20जिथुखै ऐजौ तौ आमु शै हौए ना सौकौ, कै जू आमुए दैखै औरौ शौणै राए, सैजौ ना बुलू।”
21तोबै तिनुऐ तिनुकै धोमकायो छोड़े दिए, जिथुकै लोगौ की बौजैह शै तिनु सौजा दैणौ कै किछै बै बौजैह ना भैटी, इथकारिए कै जू घोटना हौए रोए थी तिथकै बौजैह शै सौबै लोग पौरमेशवर की बौड़ाए कौरौ थिए। 22जिथुकै जू आदमी, अनौखै निशान शै ठीक हौए रौआ थिया, सै चाल़ीश सालो दा जादा उमरे का थिया।
चैलो की प्रार्थना
23पतरस औरौ यूहन्ना रिहा हौणौ कै बाद आपणै साथियो कै धोरे ओऊवे, औरौ जू किछै मुख्य यहूदी पुरोहित औरौ बुड़ेईके तिनुकै बौल़ै राए थियु, तिनुकै शुणाए दियु। 24ऐजौ शोणेयो, तिनुऐ ऐक मन हौयौ कै जोर शै पौरमेशवर कै बौल़ौ, “ओए रै प्रभु, तू सैजाई औसौ जैणै स्वर्ग औरौ धोरती औरौ समुन्द्रो औरौ जू किछै तिथमुंजी औसौ बौणाए राए।
25तुऐं पवित्र आत्मा कै दवारा आपणै सेवक अमारै पुराणिया राजा दाऊद कै दवारा बौल़ौ,
‘बैगानै यहूदी लोगै किथु रोल़ा पाड़ा?
औरौ देशो-देशो कै लोगै किथु बैकार बातौ सूची?
26प्रभु औरौ तैसकै मसीह कै खिलाफ धोरती कै राजा खौड़ै होवे, औरौ राज्यपाल ऐकी साथी कौठै होवे।’
27जिथुकै सौथी कै तैरै पवित्र सेवक यीशु, जैसका तुऐं अभिषेक कौरे राए तैसकै खिलाफ दै बैगानै यहूदी लोगौ औरौ इस्राएल देश कै लोगौ कै साथी मिलैयौ राजा हेरोदेस औरौ पुन्तियुस पिलातुस राज्यपाल बै ऐसी नोगरो दै कौठै हौए रौवै, 28कै तिनुऐ सैजौई कौरौ जू तैरै शौकतै औरौ इछाएं आगैई तय कौरे दियु थियु कै ऐशै हौणौ चैंई।
29ऐबै ओए रै प्रभु, तिनकी धोमकियो कै शुण, औरौ आपणै दासो कै ऐजा वरदान दै कै तैरा वचन बौड़ै हिम्मत शै शुणांव। 30औरौ ठीक कौरणौ कारिए तू आपणा हाथ औगौड़ियौ कौर कै चौमत्कारी निशान औरौ अनौखै काम तैरै पवित्र सेवक यीशु कै नांव लैई कौरे जांव।”
31जोबै तिनुऐ प्रार्थना कौरे पाए, तौ सैजै जौगैह जिथै सै कौठै थिए हिंजल़ी गौए, औरौ सैजै सौबै पवित्र आत्मा दै भोरै गौवै, औरौ पौरमेशवर का वचन हिम्मत लैई शुणादै रौवै।
बिशवासियौं का सहयोगी
32बिशवाश कौरणौवाल़ौ कै मण्डली ऐक चित औरौ ऐकी मनो कै थी, इथै तौड़ी कै कुणिए बै आपणै जायदात कै आपणै नी बौल़ौ थिए, पौरौ सौबै ठुँ साझे को थियु। 33चोणेयौंदे चैलै बौड़ै अनौखी शौकतै लैई यीशु कै जियुंदी हौणौ कै औटेयौ गवाही दैंव थिए औरौ तिनु सौबी पांदी बौड़ा अनुग्रह थिया।
34तिनुमुंजी कुणिए बै गरीब नी थी, जिथुकै जिनुकैईं जमीन या घोर थिए, सै तिनी कै बिक-बिकैयो, बिकयौंदे चीज़ौ कै रुपीये लायो तिनु चोणेयौंदे चैलै खै दैय दैंव थिए। 35औरौ जैशै कोसी कै जौरुरत हौंव थी, तिथकै हिसाब शै सौबी खै बांडै दैया कौरौ थिए।
36यूसुफ नांव का ऐक आदमी थिया। जू लेवी गोत्र का थिया औरौ तैसका जन्म साइप्रस टापू दा हौए रौआ थिया। जैसकौ नांव चोणेयौंदे चैलै बरनबास यानी शान्तै का बैटा राखै राए थियु। 37तैसकै किछै जमीन थी, जियौं तैणै बिकी औरौ दामो कै रुपये लायौ खै चोणेयौंदे चैलै कै दैय दियै।
Currently Selected:
प्रेरितो कै काम 4: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
