JOŊ 16

1Man ja ind ngëmënts ngan, pa ind përits wëtan uwak. 2Bu ka pënan ind di ito-ijúki. Maa uwal ka bi, uja ñaan fiŋ ind, në ja ne aci tsi pëleempar Nasien-batsi. 3Bu ka ro ngëmënts ngan, par bu meets Asin, nin bu meetsin. 4Man ja ind ngëmënts ngan, pa ubaandi uwal umënts, ndë les n ja ind ngul.

Uleemp Uwejats-ujënts

Ki ujuundi, nji n doots n ja ind ngul, par man do n ci ni ind.

5Maa inkri, mán tsëp di na yëliini; a nalon tsi ind di ka yeparin koon na ja: ‘tsum tsi kë tsëp tsun-i?’ 6Maa, bi n ja ind bank ngëmënts ngan, a ngëwaas ind juatsan.

7Maa mán leents ind ucär: Ko un pe wi pëkat pa ind, aci nji pëtsëp; par uci n tsëpats, natsënk di ka bi tsi ind. Maa uci n tsëp, kee wëtani ind nul. 8Ubaandiul, në piban bañaan umundu ba niam tsi uleka ujuban, ni tsi uleka bëmabal, ni tsi uleka kawat-pëleents; 9tsi uleka ujuban, par bë wakats tsi nji; 10tsi uleka bëmabal, par mán tsëp di Asin, a nda katse ka winin; 11tsi uleka kawat-pëleents, par kantsijëna umundu wi awata ba pëleents. 12Man wama n ka ngëcumal pa pëleents ind, maa nda yëlaants ngul inkri. 13Maa, uwal wi Uwejats ucär baandi wi, u tsëpand ind tsi ucär un ci wi-ba këci. Par, di ka ñakandar uleka wul bërier wul, maa ka ñakan ngi u te ngi, u leents ind ngi kan bi ngi. 14Wul, ka rëmbanin, par ka jej tsi umiñ, u leents ind wul. 15Ko wi Asin nji ka wi ba këka, aci umiñ; wul ka wun n ja ind, wul ka jej tsi umiñ, u leents ind wul.

Unjuatsia u witsa wi ci ulílan

16tsini ko uties, nda katse ka winin; a tsini ko uties kak, ndë kaka winin.” 17Din, a balon tsi bafetsul kë jaalar tsi ba ci tsi: “We ci wun wi na ja nja wank? ‘tsini ko uties, nda katse ka winin; a tsini ko uties kak, ndë kaka winin;’ a na jaand: ‘Mán tsëp di Asin nji.’” 18A bu kë ja: “tsini ko uties a! Përim pan, wee pa pac wun? Ngë meets ko wi pa pac wi.”

19A Yeesu me ba ŋal pëyeparul, a na ja bukul: “Uleka bi n ja ind bank: tsini ko uties, nda katse ka winin; a tsini ko uties kak, ndë kaka winin, wul wi nda ci wun tsi pëyepëlar-a? 20Mán leents ind ucär: Nduu rug, nduu kaan, bañaan umundu ka lílan. Nduu juatsan, maa unjuatsia ind ka witsa u ci ulílan. 21Uwal wi ŋaats kë buk wi, ka te urear-uliaf, par ulerul aband; maa, uwal wi na buk wi napäts, katse ka les unoor wi na par-na wi, undo alílan bi na buk bi ñaan-najin tsi umundu. 22Unk buts di nda juatsandun inkri. Maa, mee n winin ind kak, ngëwaas ind ka ci tsi ulílan; a ulílan ind, ñaan di ka yëlan pëpënan wul tsi ind. 23tsi unu umënts wan, nda ri ka yeparin ko. Mán leents ind ucär: Ko wi nda yep wi ba këyep Asin nji tsi katim nji, në wël ind wul. 24Te inkri, nda netse yep ko tsi katim nji. Nda yepan, ndë yank, pa ulílan ind pëci-un kës wi.

Yeesu agaañaar umundu ukam

25Ma n jaan ind ngëko ngan, tsi irim inaamanaani. Uwal ka baandi, wi n katse wi kee ñakanaan ind tsi irim inaamanaani, maa mán ñakanaan ind uleka Asin, tsi ko un jënts wi. 26tsi unu umënts wan, nduu yepëna tsi katim nji. Nji njaats ind mán ñaan Asin pa ind. 27Par, Asin bërierul aŋal ind, undo nda ŋalin a nda fiaar n pënë-ni di Nasien-batsi. 28Man pënë-ni di Asin, a n bi tsi umundu; mán pën tsi umundu, ka tsëp di Asin.” 29A bafetsul jaul: “Teenan-e, wi ka ñakan ink inkri a kë jëntsan uñakan; m katse m ja irim inaamanaani. 30Inkri, wund ame m me ngëko bëlieng, a m fierats ñaan pëyeparu ko. Wul ka wun wund fiaar m pënë-ni di Nasien-batsi.” 31A Yeesu yank bukul aja: “Nda wak inkri-a? 32Nda teenan-e! Uler ka bi, abaandi ba, wi ndu garësaa wi, kara ñaan në tsëp pa ngiicul, ndë rukin koorin. Maa nji n cits koorin, par Asin nji aci ni nji. 33Man ja ind ngëmënts ngan, pa nda ka pëfac tsi nji. Nduu ka unoor tsi umundu; maa nda kaan katsëb, man gaañaar umundu ukam.”

Currently Selected:

JOŊ 16: KPKNT

Highlight

Copy