JOŊ 15

Yeesu ci-un bëbiiñu bëcär

1Nji n ci un bëbiiñu bëcär, a Asin nji ci un najaar. 2Kana kan ci ki-ba këci tsi nji a tsijats mbuk, në fal kul; a kan tsij ki mbuk, në jëntsan kul pa ka pe këpe pëtsij mbuk. 3Ind nda jënts ba, undo përim pnja ind pi. 4Nda moban tsi pëci tsi nji, nji buts ka mob tsi pëci tsi ind. Bi kana yëlanats bunk pëtsij mbuk bërier kul, uci ka mobats tsi pëci tsi bëko, unk buts di nda rits run ka yëlan, uci nda mobats tsi pëci tsi nji. 5Nji n ci un bëbiiñu, a nda ci ina. Na mobi tsi pëci tsi nji, a n mob tsi pëci tsi nul, në tsij mbuk mcumal. Par ucits ba ni nji, nda yëlanats përo ko. 6Na mobatsi tsi pëci tsi nji, agutsara utsand pi kana, a na kay; ina ka contsaa, i gutsa di bërua, i yëk. 7Uci nda mob tsi pëci tsi nji, a irim nji mob tsi pëci tsi ind, nda yepan ko wi nda ŋal wi ba këŋal, u rolaa pa ind. 8Uci nda tsij mbuk mcumal, Asin nji arëmbanaa tsi wul, unk, ndë ci bafetsin. 9Bi Asin nji ŋalin bunk, nji buts ma ŋal ind; nda moban tsi pëci tsi bëŋal nji. 10Uci nda mob tsi ngëtsua nji, ndë mob tsi pëci tsi bëŋal nji, bi n mob bi tsi ngëtsua Asin nji, a n mob tsi pëci tsi bëŋalul. 11Man ja ind ko wan, pa ulílan nji pëci di ind, din ulílan ind ka ci un kës wi. 12#Joŋ 13.34; 15.17; 1Joŋ 3.23; 2Joŋ 1.5Utsua nji ci wun wi: Nda ŋalëlari, bi n ŋal ind bi. 13Ñaan cits, nan kai bëŋal ban pe bi bi: ñaan pëwël ubiiraul bërierul undo ifetsarul.

14Nda ci ifetsar nji, uci nda ro ko wi n tsu ind wi përo. 15Nji n katse ka ndu ind baluek, par naluek di ka me ko wi ajugul kë ro wi. Maa, mándu ind ifetsar, par ngi n te ngi bëlieng di Asin nji, man tsu ind a nda me ngul. 16Cits ind ratin bukun; maa man dat ind, a n tsu ind nda tsëp, ndë tsij mbuk, mbuk ind kë cirin. Pa ko wi nda yep wi ba këyep Asin tsi katim nji, në wël ind wul. 17Ko wi, wi ndu n tsu ind wun: Nda ŋalëlari.

Umundu ñaas Yeesu ni bafetsul

18Uci umundu ñaas ind, nda mean u ci nji ni u ñaas un ucäk. 19Uci nda ro ci biki umundu, umundu ka ro ŋal ko un ci wi wiic wul. Bi nda cits bi biki umundu, maa ndul di n datëni ind run, wul ka wun umundu ñaas ind. 20#Mat 10.24; Lúk 6.40; Joŋ 13.16Nda lesan përim pnja ind pi: Naluek peets ajugul. Uci ba noor-nooranin, bu ka noor-nooran ind buts; a uci ba mob tsi përim nji, bu ka mob buts tsi përim ind. 21Maa, bu ka ro ind ngëko ngan bëlieng, undo katim nji, par bu meets na yëliini. 22Uci ndoots n bi, a nji ndoots leents bukul, bu bitse ka ka ujuban. Maa inkri, bu kaats ulaabaraani ujuban bukul. 23Na ñaasini, añaas buts Asin nji. 24Uci ndoots ndo tsi pëncuaf bukul ngëko ngi ñaan netse ngi ro yaas, bë bitse ka ka ujuban. Maa, inkri bu win ngul, a ba ñaasin, a ba ñaas Asin nji. 25#Iya 35.19; 69.5Maa ko wan arolaa, pa pëbandan përim pan picana pi tsi ulua bukul aja: ‘Bë ñaasin, te kaats ko un ka wi ba ñaasin.’ 26Ubi natsënk ni ndu n wëtani indi na pënëni tsi Asin nji, nul Uwejats ucär un pënëni wi di Asin nji, wul ka leents uleka nji. 27Ind buts nduu leents, par nda ci ni nji ki ujuundi.

Currently Selected:

JOŊ 15: KPKNT

Highlight

Copy