JOŊ 17

Yeesu añaandar bafetsul

1Bi Yeesu ba bi pëja ngëmënts ngan, a na katar këkës batsi, a na ja: “Paapa, uler aband. Rëmbani Abuku, pa Abuk ka rëmbanu, 2bi m wëlul bunk pëyëlan tsi ruëts bañaan-bajin bëlieng, pa na wël ubiira un dits wi ka ba, pa biki m wëlul biki bëlieng. 3A ubiira un dits wi ka ba, aci bukul pëmeu, wi rin Nasien-batsi nacär, ni Yeesu Këristu, nul ni m yëlii. 4Man dëmbanu tsi umundu, a n bandan uleemp wi m wëlin wi përo. 5A inkri, Paapa, rëmbanin tsi wi bërieru, ni përëmb pi n ka pi tsi wi, bi umundu netse bi leempa.

6Bañaan biki m pënani biki di umundu a m wëlin, man tsu bukul a ba me katimu. Bu ro ci bayiicu, a m wëlin bukul, a ba mob tsi përimu. 7Inkri, bë me ne, ngëko bëlieng ngi m wëlin ngi apënë-ni tsi wi. 8Par, ma wël bukul irim i m wëlin yi, a ba yank yul; tsi ucär bë me ne, di wi di n pënë-ni run, a ba fiaar u ci wi yëliin un. 9Man ci tsi pëñaandar bukul; cits bañaan umundu biki n ci bukun tsi pëñaandar, maa biki m wëlin biki, par bë ci bayiicu. 10Ko wi n ka wi ba këka, aci wiicu; a ko wi m ka wi ba këka, ci umiñ; tsi ngul tsi n dëmbanaana tsun. 11Nji n katse ink a n ci tsi umundu, maa, bukul bë wam tsi wul; a nji mán bi di wi. Paapa, kanpatsana, waayan bukul tsi katimu ki m wëlin ki, pa bukul pëci baloole, pinja. 12#Iya 41.10; Joŋ 13.18Bi n do bi n ci ni bukul, man waay bukul tsi katimu ki m wëlin ki; man waay bukul, a nin naloole tsi bukul niamats, ucits ba nan bukaree pëniam, pa u ci bi Bëpica n ja bi. 13Maa inkri, mán bi di wi, a n ja ko wan tsi umundu, pa bukul pëka ulílan nji un kës wi, tsi bukul bërier bukul. 14Man wël bukul përimu, a bañaan umundu ñaas bukul, par bë cits biki umundu, bi n cits bi ni umundu. 15Nji n ñaandarats wi pëpënan bukul tsi umundu, maa randani bukul kañan Ujuatsal. 16Bukul bë cits biki umundu, bi n cits bi ni umundu. 17Patsanaani bukul ucär; përimu ci pun ucär. 18Bi m yëliin bi tsi umundu, unk buts bi ndu n yël bun bukul tsi umundu. 19Mán patsandar bërierin, undo bukul, pa bu ka ci buts ban patsanaana biki ucär. 20Cits biki rin biki ndu n ñaandar bukun, maa, man ñaandar buts biki kee wak biki tsi nji, tsi undo irim biki; 21pa bukul bëlieng pëci baloole, bi m ci bi di nji, Paapa, a n ci di wi, bukul buts bu ka ci di nja. Unk, pa bañaan umundu pëfiaar u ci wi yëliin un. 22Nji ma wël bukul përëmb pi m wëlin pi, pa ba ci baloole, bi ngë ci bi baloole, 23nji di bukul, wi di nji, pa bu ka ba pëci baloole, pa bañaan umundu pëme u ci wi yëliin un, a m ŋal bukul bi m ŋalin bi. 24Paapa, ma ŋal tsi n ci tsi, biki m wëlin biki ka ci buts tsul ni nji, pa bukul pëwin përëmb nji pi m wëlin pi. Par, umundu ruka ka leempa, a m ŋalin. 25Paapa, namabal, bañaan umundu meetsu, maa nji man meu; a biki me u ci wi yëliin un. 26Man tsu bukul a ba me katimu; mán tsu bukul bu kë pe këpe pëme kul. Unk, bëŋal bi m ŋalin bi ka ci di bukul, nji buts ka ci di bukul.”

Currently Selected:

JOŊ 17: KPKNT

Highlight

Copy