Romanos 8

Utewal i Dios lik kuya i k'aslemal

1Wo'or ut, nti chik utojb'alil kimak ni'pa i ki'anom jun che kib' ru' i Jesucristo. 2Man i atb'al tzij re i Lo'laj Utewal i Dios re ik'aslemal ru' i Jesús, xixuto pu'ab' i atb'al tzij re i mak atzalal xaq pu'ab' i kamik. 3I Dios u'anom jun utzil chomal chqe, chi ujer atb'al tzij re i ma Moisés xtiki ti chu'ankil. Yoj tupu xqetamaj i atb'al tzij le, xqach'ij ti u'anik pacha i kub'ij. Xwiri x-on panoq, i Dios xutaq li Uk'ojol qu' man kutojb'ej re i qamak, uch'akul lik keje pacha qach'akul yoj; xwiri ru' i uch'akul le xutoj i qamak. Keje ile i Dios xresaj ucho'ab' i mak atzalal pqawi. 4Xu'an i Dios ile anb'al re chqe chi kojtiki chu'ankil pacha kub'ij ujer atb'al tzij. Wo'or kqa'an ti chik pacha urayijb'al qach'akul are kqa'ano pacha kraj i Lo'laj Utewal i Dios.

5Konojel i je re i Lo'laj Utewal i Dios are kkich'ob' u'ankil wach kraj Ire. Xwiri konojel i ne te re ire, to' are kkich'ob' u'ankil wach kraj i kich'akul. 6Ni'pa i to' kkich'ob' i utz taj chi kraj i kich'akul, xa kekam na. Ni'pa i lik kkich'ob'o wach kraj Lo'laj Utewal i Dios, kkiriq ni kik'aslemal chi kk'is taj, xaq kkiriq ni chomb'al ib' chwach i Dios. 7Keje ile ke'eloq, man ni'pa i to' are kkich'ob'o wach kraj i kich'akul, je ajch'oj uri ru' i Dios; man kkiya ti kib' chukojik xaq chu'ankil u'atb'al tzij i Dios. 8Rumali ni'pa i to' kki'ano pacha urayijb'al i kich'akul, i Dios kumaj ti uri uwach ile.

9Xwiri ik'aslemal yix keje ti chik ile, yix lik are chik i Lo'laj Utewal i Dios o piwanima; lik are ki'an uri pacha kub'ij i Lo'laj Utewal i Dios le pik'aslemal, man pachin i jun chi nti Utewal i Cristo pranima, re ti uri i Cristo. 10Rumal imak atzalal i ch'akul kkamik, xwiri we i Cristo o piwanima yix, lik ix k'as uri rumal Ire. Keje ile ke'eloq chi i Dios xu'aljinsaj chi yix nti imak. 11I Dios xuwalijsaj i Jesucristo che i kamik. We i Utewal Ire jeqel piwanima yix, xaq keje ku'an che ich'akul yix chi kamnaq kuya tan chik uk'aslemal. Keje ile ku'an Utewal i Dios piwanima.

12Rumali, wachalal chwach i Cristo, lik mijun k-anaw pen chqe re kqa'an urayijb'al i qach'akul. 13We ki'ano to' pacha urayijb'al i ch'akul, kixkam ni uri rumal. Xwiri we kiya che i Lo'laj Utewal i Dios kixuto chuchupik i utz ti laj taq rayijb'al re i ch'akul, kixk'asi ni uri.

14Konojel i je uk'am rumal Lo'laj Utewal i Dios, je rak'al uri i Dios. 15I Lo'laj Utewal i Dios chi o chik iwu', kixuya ti pu'ab' i xib'rikil, lik xane kukowirsaj ukub'ib'al ik'ux che i Ajwal. Rumal i Utewal le ix rak'al chik i Dios; xaq o ukowil qak'ux kqab'ij “¡Qatat!” Che i Dios. 16I Lo'laj Utewal i Dios le ku'an junam che rib' ru' i qanima yoj, ile ku'aljinsaj chi lik oj rak'al i Dios. 17Rumal oj rak'al chik i Dios, kuya ni uk'iyal taq utzil chomal chqe pacha ub'im kanoq, man lik oj ralk'uwal junam ru' i Jesucristo. Nti k-ono we kqatij uyej junam ru' i Cristo wo'or; man k-on panoq koksax ni qa'ij junam ru' ire.

I oy-enik re i lo'laj chomal

18B'ay, kwil yin i uyej chi kqatij wo'or lik nti unimal chwach i chomal chi kya' ni chqe k-on panoq. 19Man i kaj, i jyub' ta'aj, ronojel ni'pa o chwach, lik kraj chik rilik i ij are k-aljinsax na chi oj rak'al chik i Dios. 20Ronojel uwach i jyub' ta'aj itzim rumal i mak atzalal. Utukel ti uwach i jyub' ta'aj xutzukuj uk'oqb'al; are i Dios keje ile xraj. Xwiri lik k'a o ni jun utz laj roy-exik. 21Kuriq ni ij chi k-on tan chik i utz. I Dios ku'an ni che i jyub' ta'aj pacha ku'an ni chke i rak'al. K-on panoq ike ke'elsax ni chupam i k'ax; xaq keje ile i kaj xaq i jyub' ta'aj ke'elsax ni chupam i k'ax. 22Xwiri qeta'am chi wo'or ni'pa i jyub' ta'aj chi uyijb'am i Dios, ketijin chrilik i k'ax pacha ku'an jun ixoq ru' uk'axk'ol are kalax rak'al. 23Xaq xwi ti i jyub' ta'aj kutij uyej, xaq keje yoj oj o pa k'ax tupu i Lo'laj Utewal i Dios o chik qu'; chi lik are nab'e usipon i Dios chqe; xwiri k'a o i kuya chqe k-on panoq. Lik kojilawik tz'aqat kqoy-ej ni ij chi Dios ku'aljinsaj chi oj rak'al. Lik kqoy-ej ni qach'akul k'ak' chi kril ti chik i k'ax xaq kkam ti chik. 24Are xkuytaj qamak xaq xqakub'a qak'ux che i Jesucristo lik xojtotajik, xwiri qeta'am chi k'a o ni oy-exik kraj chi kuya chqe k-on panoq. Jun we o chik pu'ab' wach i roy-em, ¿B'uchak uri kroy-ej mas? We o chik ru' wach i roy-em. 25Xwiri we kul qak'ux che chi kqil uwach ni'pa i qoy-em chi qilom ti uwach, o uchak uri mb'a'krij qak'ux chroy-exik.

26Xaq i Lo'laj Utewal i Dios kojuto, man yoj nti qas qano'oj chutz'onoxik wach taq i rajwaxik chqe. Xwiri, lik are Utewal ku'aljinsaj che i Ta pqak'exel ni'pa i kojtiki ti yoj chub'ixkil. 27I Dios chi lik reta'am wach kqach'ob' pqak'ux, xaq reta'am wach kraj Utewal chqe, man ni'pa i kutz'onoj i Utewal pqawi xaq are kraj i Dios. Keje ile ku'an chke i je re utinimit chi lik je ch'am.

I chak re i Dios tob'al qe

28Qeta'am iri: Konojel i k'ax kkina i Dios, ni'pa taq i k'ax kpe pkiwi, is utz ke'el chke chwach i Dios. Keje ile ke'el chke ni'pa i je sik'tal rumal i Dios chi xeu'ulu pacha uch'ob'om ire. 29I Dios ax reta'am wi loq chuxeb'al pachin xuch'ik kij chi keusik'ij ru'. Ire xeu'ulu man ke'eloq lik je keje pacha i Cristo chi Uk'ojol. Man kraj ire chi i Uk'ojol le ke'eloq are i atz chke uk'iyal qachalal chwach i Cristo. 30I Dios konojel ni'pa i k'a chuxeb'al xeu'ulu chi ke'el ni chisaq, xaq xeusik'ij ru'. Ni'pa i xeusik'ij ru' le x-on utz chke chwach Ire, xuya chke chi o ke che i chom laj k'ijib'al re i saqil laj k'aslemal.

31¿Wach chik mas kqab'ij ut? We i Dios kojrok'aj, ¿Mijun uri ktiki chqatzaqsaxik? 32I Dios lik k'ax ti xuna Uk'ojol xujach che i kamik, tob'al qe yoj, ¿Xatab'a kuya ti uri chqe junam ru' uk'ojol ronojel wach i rajwaxik chqe? 33I Dios lik je u'ulum chik; lik mijun uri kkojow chik kimak ni'pa i je u'ulum chik Ire. 34¿Pachin uri kb'in chqe chi kqatoj i qamak? Mijun, man i Cristo ya xuya rib' che i kamik qumal yoj. Xwi ta la ile, xaq lik xwalij che kamik, i wo'or o puwiqab'im i Dios chila chikaj, ktijin chutz'onoxik i utz pqawi yoj. 35¿Pachin uri kojresaj pu'ab' i k'axnab'al uk'ux i Cristo? Mijun. We oj o pa k'ax, xaq we kqatij uyej, we k-an k'ax chqe kumal i winaq, we kojnumik, xaq we nti qa'u', we oj o chwach i k'ax, o xaq we kojkikamsaj. 36Keje iri kub'ij i tzij chi tz'ib'tal chupam uwuj i Dios ujer:

Ajwal, awumal yet kkaj kojkikamsaj, ij ij lik oj o chwach i kamik le.

K'ax kki'an chqe pacha kki'an che i chij chi kkamsax pa kamsab'al.

37Nti k-ono kqatij taq i k'ax. Ni'pa taq ile ktiki ti chqe; xwiri yoj lik kojtiki ni chupek'ik ru' i k'axnab'al uk'ux i Cristo chi Tol qe. 38Rumali, yin lik weta'am chi lik nti jun chik kojresaj pu'ab' i Dios: Mitene i kamik, mitene i k'aslemal; mitene i ángel, mitene itzel taq tew; mitene i anik re wo'or, mitene re i k-on panoq; 39mitene i je aj chuxe' i ulew, mitene i je aj chikaj; mitene jun chik chke ni'pa i olik ktiki ti chqelsaxik chupam i k'axnab'al uk'ux i Dios, chi u'aljinsam xaq uya'om chqe rumal i Qajwal Jesucristo.

Currently Selected:

Romanos 8: ACHICUB

Highlight

Copy