Romanos 9

I Dios xeu'ul i aj Israel

1Wo'or kwaj kinb'ij jun tzij chiwe chi lik qatzij; kint'oron taj man in re i Cristo. Weta'am pink'ux chi lik qatzij wach i kinb'ij chiwe wo'or man are i Lo'laj Utewal i Dios ku'aljinsaj ile chwe. 2Yin, lik kinb'isonik, lik arewi kinna jun nim laj k'ax pink'ux. 3Lik kintij uyej kumal aj Judío, man ike je intinimit, kwaj yin wach ti kito'ik kin-ano; kinya ne wib'i pkik'exel tupu kuya ni i tojpen i Dios pinwi, tupu ke'eloq nti chik we che ink'aslemal ru' i Cristo. Kin-an neri ronojel ile wetene intinimit ketejeb' ni chwach i Dios. 4Man ike je kimuq kixikin aj Israel winaq, i Dios lik xu'an chke pacha je rak'al ire. I katit kimam aj Israel xqaj li Dios ku' ujer ru' i nim laj u'ij uchomal. I Dios xuyijb'a utrat ku' xaq xuya u'atb'al tzij chke. Chke ike i Dios xuk'utu wach u'ankil ukojik u'ij kki'ano; xaq xu'an sujunik chke. 5Yoj xaq oj kimuq kixikin kan i qatit qamam ujer, xaq keje i Cristo kimuq kixikin ike. Ire are i Dios chi o puwi ronojel ni'pa i olik, chqakojo u'ij k-e ij saq chrij. Lik keje ile ch-antaj na.

6Yin xinb'ij taj chi Dios xu'an taj pacha i xub'ij chke i aj Israel winaq. Xwiri i umuq uxikin i mam Israel, konojel taj je aj Israel chwach i Dios. 7Xaq keje chke i umuq uxikin i mam Abraham, konojel taj je saqil laj taq rak'al. Man i Dios ub'im kan che i mam Abraham: “Xwi ri umam awak'al a Isaac, kinb'ij ni amuq axikin chke.” 8Chi kuya utayik ub'e chqe, chi mijun rak'al i Dios we xa rumal jun lemajil. Keje ti ile, are i saqil alk'uwal je are i rak'al i ma Isaac; man ralaxik i ma Isaac are x-anaw saqil che i sujunik chi xu'an i Dios che i mam Abraham. 9Man iri are i sujunik chi xu'an i Dios che i mam Abraham: K-on panoq kink'un na, che i ij chi inch'ikom, te'uri i awixoqil ati Sara kk'iji ni jun awak'al ru'. Keje ile xub'ij che.

10I ak'al le are i qamam, ma Isaac. Xaq xwi ta la ile; x-on panoq, i ma Isaac le ru' i rixoqil chi ati Rebeca xk'iji keb' kak'al, je yox. 11-13I Dios xu'ul jun chke i keb' ak'alab' le are k'amaja kealaxik. Ike ki'anom ti utz xaq ki'anom ti utz taj, xwiri i Dios reta'am kicha'ik chkixol i winaq pachin i kraj ire; are ti pacha kki'an i winaq. Keje iri xub'ij i Dios che i kichuch i keb' ak'alab' le: Are awak'al atz ke'eloq ajchak chrij i ch'utin; xb'ix che. Xaq kub'ij uwuj i Dios: K'ax xinna i a Jacob, chi cha'xel, i xinxutuj i ma Esaú. Keje ile xub'ij i Dios.

I Dios ku'ano lik pacha kraj Ire

14¿Wach kqab'ij, uri? ¿Xatab'a i Dios suk'ul ti wach i ku'ano? ¡Qatzij suk'ulik! 15I Dios xub'ij che i mam Moisés ujer: Kwil ni tob'al uwach i jun chi kwaj yin, xaq k'ax ni kinna i jun chi kwaj yin. 16Chi kqata wi chi Dios kuya ti utzil chomal puwi jun winaq we to' pacha i kraj ire, tupu lik kukoch'ij rib' chutzukuxik i Dios kuya i utzil chomal puwi i jun chi kraj ire. 17Chupam uwuj i Dios kqil wi utzij che i ma faraón, chi ajawinel ujer ke i aj Egipto winaq. I Dios xub'ij che: Chu'anik xin-an chawe at nim laj ajawinel, man k-iltaj i nim laj incho'ab' yin, xaq kketamaj ronojel uwach i jyub' ta'aj in pachin yin, xub'ij che. 18Kqil uri chi Dios, kril tob'al kiwach i winaq chi kraj ire xaq ku'an ko che i uk'ux jun we ire kraj.

19Moq kab'ij chwe: ¿B'uchak uri i Dios kukoj umak i winaq? ¿Man mijun k-atiw urayijb'al Ire? 20Yet at winaq, ¿At pachin yet chi kapaj awib' ru' i Dios? ¿Xatab'a o jun b'oj kub'ij che i xyijb'awik: B'uchak keje iri xa'an chwe? 21I aj-anol b'oj o pu'ab' wach kraj u'anik che i xo'ol. Xaq che i xo'ol le kyiji keb' b'oj che. Kel jun chi k-on tan kuchapb'ej xwi are o taq jun nima'ij, xaq kel jun chik che chi kuchapb'ej ij ij.

22Xaq keje i Dios ile o pu'ab' wach kraj ku'an chke i winaq, man keje ile konojel i winaq chi je o chwach i jyub' ta'aj kketamaj ucho'ab'. Rumali chi lik xuch'ij i roywal chke i winaq chi kmajaw te'eq kya' utojb'alil chke xaq ksachsax ni kiwach. 23Keje ile xu'an chqe yoj, aljinsab'al re i nim laj u'ij uchomal. Xril tob'al qawach yoj chi oj uyijb'am chuxeb'al loq man keje ile o qe che i k'ak' laj k'aslemal. 24Man yoj oj usik'im ru'. O i je sik'tal chkixol i aj Judío winaq, xaq o i je sik'tal chkixol i ne te aj Judío. 25Pacha xutz'ib'aj i mam Oseas ujer:

Ike chi ne te inwinaq yin, kin-an ni chke je inwinaq yin;

ike chi k'ax ti xe'inna'o, kink'ut ni i k'axnab'al ink'ux chke.

26Xaq lik che i k'ijib'al le ipa xb'ix wi chiwe “Yix lik ix intinimit taj”,

Lik kb'ix ni chiwe chi ix rak'al i Dios chi lik k'aslik.#9.26 Keje ile tz'ib'tal kan chupam uwuj i Dios: Oseas 2.23; Oseas 1.10.

27Xaq i mam Isaías ujer xutz'ib'aj i tziji chkij i aj Israel: Israel winaq, tupu je k'i pacha uk'iyal seneb' chuchi' i mar, xwiri ne te k'i ketotajik, 28Lik ya kuriq i ij chi Ajwal ku'an ni atb'al tzij pkiwi konojel i winaq re i jyub' ta'aj. 29Xaq keje iri ub'im kan i ma Isaías:

I Dios, chi Ronojel Ktiki Che, wetene xuya ti kan qamuq qaxikin,

wo'or yoj oj keje te'eqi pacha i Sodoma xaq Gomorra.#9.29 Keje ile xutz'ib'aj kanoq: Isaías 1.9.

30¿Wach kqab'ij uri chrij iri? I ne te aj Israel winaq tupu xkitzukuj ti uyijb'axik kib' chwach i Dios; xwiri Ire xril tob'al kiwach rumal ukub'ib'al kik'ux che i Ajwal. 31I aj Israel winaq junwi xki'ano. Ike xkitzukuj kiyijb'axik kib' chwach i Dios rumal u'ankil i atb'al tzij tz'ib'tal kan rumal i mam Moisés, xwiri xetiki ti che. 32¿B'uchak xetiki ti che? Rumal xkikub'a ti kik'ux che i Jesucristo. Ike xa are xkikub'a kik'ux che wach taq i utz kki'ano. Xe'eloq chi xkitakij kaqan che jun ab'aj. 33Keje iri tz'ib'tal chupam uwuj i Dios:

Kintaq b'i jun pa tinimit Sion chi ke'el chke i winaq pacha jun ab'aj pa kkitakij wi i kaqan,

jun ab'aj chi ketzaq ni rumal.

Xwiri, pachin kukub'a uk'ux che kril ni uri chi saqil wach i xroy-ej che.#9.33 Xe'el uri pacha ub'im i Dios. Ire u'onom loq xujunamsaj i Jesucristo ru' jun ab'aj: Isaías 28.16 xaq Isaías 8.14.

Currently Selected:

Romanos 9: ACHICUB

Highlight

Copy