Romanos 10

I Israel xaq i utz laj tzij k'ak' re i Jesucristo

1Ix, wachalal chwach i Cristo, i urayijb'al ink'ux xaq inlapanik ru' i Dios, are utz'onoxik che, pkiwi i wach aj Israel winaq man keje ile kkiriq ni i tob'al ke. 2Weta'am chi ike lik kkaj ukojik u'ij i Dios, xwiri keta'am taj wach u'anik kki'ano. 3Lik kkita ti ub'e chi xwi i Dios ktiki chu'anik utz chke. Rumali chi kkitij u'ijol u'anik utz che kib' man keje ile i Dios chom na krilo, xwiri lik saq laj tzij lik kixutum i uch'ob'onik re i Dios. 4Are xk'un i Cristo, xtz'aqat u'ankil i atb'al tzij chi tz'ib'tal kan rumal i mam Moisés, wo'or ni'pa i kkikub'a kik'ux che i Cristo, ke'eloq je utz chwach ire.

5Ujer, i atb'al tzij re i ma Moisés keje iri xub'ij: Jun winaq, we kojonnaq che i atb'al tzij, o ni uri uk'aslemal.#10.5 Keje ile xutz'ib'aj: Levítico 18.5. 6Xwiri, xaq xub'ij i tziji chrij usuk'b'axik qib' chwach i Dios rumal ukub'ib'al qak'ux che i Cristo: Mub'ij ak'ux chi utz wetene o jun kel b'i chikaj re: Qajsab'al li re i Cristo chi chwach i jyub' ta'aj. 7Xaq mub'ij ak'ux: Utz wetene o jun kqaj b'i k'a chuxe' i jyub' ta'aj: Iri yakb'al li re i Cristo chkixol i kamnaq.#10.7 Mach'ob' ile, man i tob'al qe naj ti chik o wi chqe. 8I utzij i Dios keje iri kub'ij: “I tzij re i elb'al chisaq naqaj o wi chawe; kpe ub'ixkil pak'ux xaq kel ub'ixkil pachi'#10.8 Deuteronomio 30.12-14..” Are ile are i usuk' i elb'al chisaq rumal ukub'ib'al qak'ux che i Cristo chi kojtijin yoj chupaxsaxik. 9I Dios katresaj chupam amak we kab'ij chkiwach i winaq chi are i Jesús are Awajwal we xaq akojom pak'ux chi Dios xuwalijsaj che i kamik, xaq kattotaj uri chwach i nim laj tojb'alil. 10Man ru' qak'ux kqakojo chi Jesús are i Cristo; are ile k-anaw chqe oj utz chwach i Dios. Xaq ru' qachi' kqab'ij chi kul qak'ux che i Jesucristo; keje ile kqariq i totajik.

11Chupam uwuj i Dios, keje iri kub'ij: “Ni'pa i kkikub'a kik'ux che i Ajwal Ire lik keuya ti pa k'ixb'alil.” 12Nti k-ono we je aj Judío xaq we ne aj Judío taj, man xa jun i Ajwal o pkiwi. Ire, lik utz ku' konojel ni'pa i kkitz'onoj kitob'al che. 13Chupam uwuj i Dios xaq keje iri kub'ij: I Ajwal keuto ni ni'pa i kkitz'onoj kitob'al che xwiri we lik xwi ire kkikoj u'ij. 14Xwiri, ¿Wach utz'onoxik kitob'al che, we kikub'am ti kik'ux che? Xaq ¿Wach ukub'axik kik'ux che Ire, we kitom ti utzij? Xaq ¿Wach utayik utzij kki'ano we nti jun kb'in chke? 15¿Wach u'enam uri jun chub'ixkil utzij i Jesucristo, we i Ajwal keutaq tu b'ik? Xwiri, chupam uwuj i Dios keje iri kub'ij: “¡Lik chom ktzun kuponik i je k'amawnaq li utz laj tzij k'ak'!”

16Xwiri konojel taj kkikoj i utz laj tzij k'ak' re i Dios. Ke'eloq pacha xub'ij i profeta mam Isaías: Ajwal, ¿Lik mijun kkojowik wach i qab'im?#10.16 Keje ile xub'ij che i Dios: Isaías 53.1. 17Rumali chi i winaq kkikub'a ni kik'ux che i Dios we o jun kb'in i utzij i Jesucristo chke.

18Wo'or kintz'onoj ut: ¿Xatab'a kitom ti utz laj tzij? ¡Qatzij lik kitom! Man chupam uwuj i Dios keje iri kub'ij:

I kich'awb'al intaqon, kitom chik i winaq ronojel uwach i jyub' ta'aj;

i kitzij uponnaq chik k'a naj ipa k-e k'is wi i jyub' ta'aj.#10.18 Keje ile xub'ij i Dios: Salmos 19.4.

19Xaq kintz'onoj chik: ¿Xatab'a i aj Israel winaq kitom ti ub'e? Man nab'e, i mam Moisés kub'ij:

Yin kin-an ni chiwe yix chi kpe i selosil chiwe che jun tinimit chi tinimit taj; kin-an chiwe chi kpe i woywal che jun tinimit chi kraj ti kuta ub'e.#10.19 Keje ile xub'ij i Dios: Deuteronomio 32.21.

20Te'uri i mam Isaías, xub'ij i tziji chi xb'ix che rumal i Dios:

Ike chi xinkitzukuj taj, xinkiriqo; ike chi xkich'ob' ti intzukuxik,

xink'ut wib' chke.#10.20 Keje ile xub'ij i Dios chkij i ne te aj Israel winaq: Isaías 65.1; Romanos 9.30.

21Xwiri chkij i aj Israel winaq, i ma Isaías xub'ij i tziji: “Yin inmayim ti usik'ixik jun tinimit qelqel, jun tinimit chi kkaj ti kekojon chwe.”#10.21 Keje ile xub'ij i Dios, chi utz'ib'am i mam Isaías: Is 65.2.

Currently Selected:

Romanos 10: ACHICUB

Highlight

Copy