Romanos 11

I uch'ob'onik i Dios

1Rumali, kinch'ob' yin, ¿Qatzij nawi chi Dios xro'taj kan utinimit Israel? Lik xro'taj taj. Man yin lik in aj Israel winaq. Yin in re kan ulemajil ma Benjamín, in umuq uxikin kan i mam Abraham.#11.1 Filipenses 3.5. 2I Dios je ro'tam ti aj Israel winaq. Lik k'a chuxeb'al je u'ulum re utinimit Ire,#11.2 Éxodo 19.5-6; Deuteronomio 4.20. xaq ub'im taj we kero'taj. ¿Iweta'am ti wa yix wach i tz'ib'tal kan chupam uwuj i Dios chrij i nim laj profeta mam Elías? Ire, are xlapan ru' i Dios, xukoj kimak i aj Israel chwach. 3Xub'ij che: “Ajwal, ike je kikamsam i profeta, xaq xkiwulijsaj i k'ijib'al pa kkiporoj wi i kisipon i winaq chawach yet. Xwi chik yin ink'as kanoq, xaq kkaj kinkikamsaj.”#11.3 Keje ile xub'ij i mam Elías che i Dios: 1 Reyes 19.10,14. 4Te'uri, xla' uwach che rumal i Dios. Xb'ix che: “Yin je wesam chik lajujwinaq wuqlajujmo' (7,000), achiyab'. Ike xkikoj ti u'ij i tiox Baal, xaq xexuki ti chwach.”#11.4 Keje ile xub'ij i Dios che i mam Elías ujer: 1 Reyes 19.18. 5Xaq keje ile wo'or, je o kan jujun aj Israel winaq chi je re i Dios, lik rumal i rutzil uk'ux je u'ulum. 6B'ay, we ile xa rumal i rutzil uk'ux i Dios, rumal ti i utz kki'an ike. Wetene xkich'ak i utzil chomal re i Dios ru' taq i ki'anom, are ti chik uri utzil chomal re i Dios chke. Xwiri ile, lik are usipon i Dios chke.

7¿Wach ut? I aj Israel winaq xkiriq taj wach i xkitzukuj, xwiri ni'pa i jub'an chik chi je ultal rumal i Dios, ike lik xkiriqo; i jub'an lik xa je b'uy. 8Xe'eloq pacha tz'ib'tal kan chupam uwuj i Dios ujer; keje iri kub'ij: “I Dios xu'an chke pacha taq tz'apil i kinojb'al, i kib'a'wach ktzun taj xaq xu'an tak chke i kixikin, keje ile ki'anom k'a are o wi wo'or.”#11.8 Keje ile tz'ib'talik: Deuteronomio 29.4; Isaías 29.10. 9Xaq xub'ij i mam David ujer:

I nimaq taq kiwa'im chi kki'ano churiqa uchak chke chapb'al ke,

churiqa uchak chke tzaqsab'al ke, xaq re petsab'al i k'ax pkiwi.

10I kib'a'wach, chu'ana potz', man keje ile ketzun taj.

Chu'ana ni pek'pik kij, keje ile k-e ij saq chkij.#11.10 Keje ile xub'ij i mam David che i Dios: Salmos 69.22-23.

Kitotajik i ne te aj Judío

11Kintz'onoj ut: I aj Judío winaq are xetzaqik ¿Xatab'a lik xesachik k-e ij saq? ¡Lik xesach taj! Xwiri are xkixutuj i Tol ke le, lik xpe i tob'al ke i ne te aj Judío winaq. I Dios keje ile xu'ano re kketamaj i aj Judío, keje ile ku'anb'ej chke chi xaq ike kkaj kkijach ni kib' pu'ab' i Jesucristo. 12Wo'or we rumal kiqelanik i aj Judío, konojel i winaq re uwach i jyub' ta'aj xetotajik, lik mas ne ketotajik are konojel aj Judío kek'am rumal i Dios.

13Xwiri wo'or, xaq o jun tzij kwaj kinb'ij chiwe yix chi ix aj Judío taj. Are i Dios chi in taqawnaq li ku' i ne te aj Judío winaq chi uya'om chinqul in apóstol chke ike, rumal uri, kwaj yin lik utz kel inchak. 14Kwaj chi jujun chke i winaq re intinimit, kkina ni pkik'ux chi kixkichajij na, man keje ile i Dios xaq kixuto ni yix. 15Are xetzaq i aj Judío chupam i utz taj rumal xe'o'tax rumal i Dios, are uri i ne te aj Judío xkiriq uchomarsaxik kib' ru' i Dios. Lik utz xel ile, xwiri mas utz kel na are kek'ulax tan chik i aj Judío rumal i Dios; ike chi je kamnaq, kek'asi chik. 16I nab'e wa chi antal che i or ksujux chwach i Dios, ile lik o u'ij xaq lik elsam re sujunik chwach i Dios, xaq keje uri uqax ronojel i or le lik o u'ij chwach Ire. Xaq keje k-an che jun che' are ktikik. B'ay, lik elsam re i sujunik chwach i Dios rumali o u'ij i ra' chi ktikik, xaq o uri u'ij u'ab'.#11.16 Números 15.17-21.

17Yix iweta'am wach ku'an i che' olivo chi kitik, kinjunamsaj uri ku' i aj Judío winaq. Olik kelsax u'ab' i che' le man kwachin taj; te'uri koksax uk'exel che chi re jun uche'lal olivo to' aj pa taq es. Keje xu'an i Dios ile chke i aj Judío winaq; o jujun chke xeresaj yab'al re ik'ijib'al yix chi ix ti aj Judío. Yix ix pacha u'ab' che' chi to' aj pa taq es; i Dios ix unak'om chik che unimal i saqil che' olivo, chi lik re i k'aslemal. 18Xwiri mich'ob' yix we mas nim taq i'ij chwach i saqil laj u'ab' che' le. We kib'ij yix chi mas nim i'ij chwach, chk'un chik'ux chi are i ra' i che' are i kok'aw ik'aslemal; are ti yix kixyaw uk'aslemal i ra' i che' le, man xa ix nak'tal che.

19Mib'ij i tziji: “Yoj lik oj utz, man i jub'an xe'elsaxik yab'al re ipa kojk'iji wi yoj”. Utz taj kib'ij yix ile. 20Qatzij, ike le xe'elsaxik, xwiri xa rumal nti ukub'ib'al kik'ux che i Ajwal, i yix o ik'ijib'al lik xa rumal o ukub'ib'al ik'ux che i Ajwal. Rumali mi'an to' nim che iwib', lik xa china iwib'. 21Man iweta'am chi Dios xeukuy ti aj Judío winaq chi je saqil laj u'ab' i che', xaq keje uri yix kixukuy taj. 22Chiwila pe', i Dios lik o uk'axnab'al uk'ux, xwiri, lik suk'ul i ku'ano. Ire lik keresaj ni che i raqan che' ni'pa i xekojon ti che. Qatzij, k'ax kixuna yix, xwiri we kiwo'taj ti ukub'ib'al ik'ux che. We kiwo'taj kanoq, xaq yix kixresaj na. 23I aj Judío winaq we kkijalwachij kinojb'al, we lik kkikub'a kik'ux che i Dios, lik ke'on tan chik ukwenta uri i utinimit, man i Dios lik o ucho'ab' chu'anik ile. 24Man yix, chk'un chik'ux chi ix unak'b'am che i che', tupu xa junwi chi che' ix petnaq wi. ¿Xatab'a k'ax unak'b'axik jun u'ab' che' che i unimal i che'? K'ax taj. B'ay, ¿Xatab'a k'ax kik'ulaxik tan chik i aj Judío winaq ku'an i Dios? K'ax taj.

I k'isb'al totajik chke aj Israel

25Ix, wachalal chwach i Cristo, o jun tzij chi k'ate wo'or ku'aljinsaj i Dios chiwe, chi kwaj kiwetamaj man utz ki'an ti nim che iwib'. Are iri: I kib'uyal i aj Israel winaq kk'is na. Ike wo'or, pacha memernaq i kino'oj, keje ile kekanajik k'a ktz'aqat ni kik'iyal i ne te aj Israel chi kkijach ni kik'ux che i Jesucristo. 26Are kki'an ile, konojel i aj Israel kkiriq ni totajik. Keje ile ke'eloq man keje ile kub'ij i tzij chi tz'ib'tal chupam uwuj i Dios. Kub'ij:

“I nim laj ajtol ke kpe ni pa Sion;

kresaj ni mak atzalal chrij i tinimit Israel.

27Are intrat ile kin-an ni ku',

are kuriq i ij chi kinsach i kimak.”#11.27 Keje ile kub'ij i Dios: Isaías 59.20-21; Isaías 27.9; Jeremías 31.33-34.

28I aj Judío winaq lik tzel kkita i utz laj tzij k'ak' re i Dios; je ajch'oj ru' i Dios. Xwiri yix, chi ix aj Judío taj, utz na chiwe man xa rumal ile iriqom i totajik. Xwiri i Dios lik k'a o k'axnab'al uk'ux chke i aj Judío winaq, man je kimuq kixikin kan katit kimam chi xeu'ul Ire ujer. 29Man i Dios, ni'pa i kuya'o, lik kumaj ti chik, xaq kresaj ti usujunik chqe#11.29 I sik'b'al ke i aj Israel chi xu'ano, i Dios kumaj ti chik chke. 30Yix, u'onom loq, lik ix qelqel te'eq che i Dios. Xwiri wo'or je are i aj Judío ki'anom qelqel che kib' chwach Ire; xwiri i Dios le lik xril tob'al iwach yix man xixtotajik. 31Wo'or i aj Judío winaq chi to' xkiqelqa i Dios, xwiri lik kkil chik i k'axnab'al uk'ux i Dios, man xaq ketotaj na pacha u'anom chiwe yix. 32I Dios xu'an chqe chi qonojel oj qelqel laj taq winaq, man keje ile xaqjun qatotajik ku'an chqe qonojel.

33¡Lik nim i utzil chomal re ub'eyomal i Dios chqe! Lik o uno'oj Ire, ronojel is reta'am, lik mijun ktiki chumajik usuk' uch'ob'onik, xaq lik kqata ti usuk' ub'e. 34Chupam uwuj i Dios keje iri tz'ib'talik: ¿Pachin reta'am wach kuch'ob' i Ajwal? ¿Ktiki taq wa jun chuya'ik unojb'al? 35¿Pachin taq jun kuya jun sipon che i Dios, chi xa kroy-ej tan chik uk'exel?#11.35 Keje ile tz'ib'tal kanoq: Isaías 40.13; Jeremías 23.18. 36Xwiri ni'pa i olik, lik ru' i Dios petnaq wi. Are Ire anawnaq ronojel; xu'ano man kuriq uchak che. ¡Choksax uri u'ij k-e ij saq chrij! Lik keje ile ch-antaj na.

Currently Selected:

Romanos 11: ACHICUB

Highlight

Copy