Popular Bible Verses from Romanos 8

Share

Qeta'am iri: Konojel i k'ax kkina i Dios, ni'pa taq i k'ax kpe pkiwi, is utz ke'el chke chwach i Dios. Keje ile ke'el chke ni'pa i je sik'tal rumal i Dios chi xeu'ulu pacha uch'ob'om ire.

Rumali, yin lik weta'am chi lik nti jun chik kojresaj pu'ab' i Dios: Mitene i kamik, mitene i k'aslemal; mitene i ángel, mitene itzel taq tew; mitene i anik re wo'or, mitene re i k-on panoq; mitene i je aj chuxe' i ulew, mitene i je aj chikaj; mitene jun chik chke ni'pa i olik ktiki ti chqelsaxik chupam i k'axnab'al uk'ux i Dios, chi u'aljinsam xaq uya'om chqe rumal i Qajwal Jesucristo.

Xaq i Lo'laj Utewal i Dios kojuto, man yoj nti qas qano'oj chutz'onoxik wach taq i rajwaxik chqe. Xwiri, lik are Utewal ku'aljinsaj che i Ta pqak'exel ni'pa i kojtiki ti yoj chub'ixkil.

¿Wach chik mas kqab'ij ut? We i Dios kojrok'aj, ¿Mijun uri ktiki chqatzaqsaxik?

Wo'or ut, nti chik utojb'alil kimak ni'pa i ki'anom jun che kib' ru' i Jesucristo.

Ni'pa i to' kkich'ob' i utz taj chi kraj i kich'akul, xa kekam na. Ni'pa i lik kkich'ob'o wach kraj Lo'laj Utewal i Dios, kkiriq ni kik'aslemal chi kk'is taj, xaq kkiriq ni chomb'al ib' chwach i Dios.

Nti k-ono kqatij taq i k'ax. Ni'pa taq ile ktiki ti chqe; xwiri yoj lik kojtiki ni chupek'ik ru' i k'axnab'al uk'ux i Cristo chi Tol qe.

B'ay, kwil yin i uyej chi kqatij wo'or lik nti unimal chwach i chomal chi kya' ni chqe k-on panoq.

¿Pachin uri kojresaj pu'ab' i k'axnab'al uk'ux i Cristo? Mijun. We oj o pa k'ax, xaq we kqatij uyej, we k-an k'ax chqe kumal i winaq, we kojnumik, xaq we nti qa'u', we oj o chwach i k'ax, o xaq we kojkikamsaj.

I Dios chi lik reta'am wach kqach'ob' pqak'ux, xaq reta'am wach kraj Utewal chqe, man ni'pa i kutz'onoj i Utewal pqawi xaq are kraj i Dios. Keje ile ku'an chke i je re utinimit chi lik je ch'am.

Konojel i je uk'am rumal Lo'laj Utewal i Dios, je rak'al uri i Dios.

Konojel i je re i Lo'laj Utewal i Dios are kkich'ob' u'ankil wach kraj Ire. Xwiri konojel i ne te re ire, to' are kkich'ob' u'ankil wach kraj i kich'akul.

I Dios lik k'ax ti xuna Uk'ojol xujach che i kamik, tob'al qe yoj, ¿Xatab'a kuya ti uri chqe junam ru' uk'ojol ronojel wach i rajwaxik chqe?

I Lo'laj Utewal i Dios le ku'an junam che rib' ru' i qanima yoj, ile ku'aljinsaj chi lik oj rak'al i Dios. Rumal oj rak'al chik i Dios, kuya ni uk'iyal taq utzil chomal chqe pacha ub'im kanoq, man lik oj ralk'uwal junam ru' i Jesucristo. Nti k-ono we kqatij uyej junam ru' i Cristo wo'or; man k-on panoq koksax ni qa'ij junam ru' ire.

Keje ile ke'eloq, man ni'pa i to' are kkich'ob'o wach kraj i kich'akul, je ajch'oj uri ru' i Dios; man kkiya ti kib' chukojik xaq chu'ankil u'atb'al tzij i Dios.

Man i kaj, i jyub' ta'aj, ronojel ni'pa o chwach, lik kraj chik rilik i ij are k-aljinsax na chi oj rak'al chik i Dios.

Xwiri qeta'am chi wo'or ni'pa i jyub' ta'aj chi uyijb'am i Dios, ketijin chrilik i k'ax pacha ku'an jun ixoq ru' uk'axk'ol are kalax rak'al.