Romanos 7

Jun tijojb'al tzij chi k'amtal che i k'ulankil

1Yix, ix wachalal chwach i Cristo, lik iweta'am wach ku'an i atb'al tzij chi o pqawi. Iweta'am yix chi atb'al tzij o puwi jun winaq are o uk'aslemal. 2Kub'ij i atb'al tzij chi jun ixoq o pu'ab' i rachijil are je k'aslik, xwiri we xkam i rachijil, i ixoq nti chik atb'al tzij puwi re i k'ulankil le. 3Tz'aqat k'as i rachijil, we i ixoq le kumin rib' ru' jun chik achi, o uri umak chwach i atb'al tzij re i k'ulankil. Xwiri we xkam i rachijil, i ixoq nti chik re i atb'al tzij le che; nti umak uri we kk'uli chik ru' jun chik achi.

4Keje yix ile, ix wachalal chwach i Cristo, ix re chik i Cristo. Ix kamnaq chik chwach i ujer atb'al tzij. Nti chik kix-atiw che we kiya iwib' che jun chik chi lik are i Cristo chi xwalijsax che i kamik; man i ujer atb'al tzij nti chik re chiwe. Keje ile xu'an i Dios chqe, man kqa'an ni utz chke konojel i winaq xaq ru' qak'aslemal, kojb'al re u'ij i Dios. 5Tz'aqat are oj o te che i ujer nojb'al, i ujer atb'al tzij xa xu'an chqe chi mas xqarayij uwach i utz taj. Xaq keje ile ronojel ni'pa i utz taj chi xqa'ano xa xu'an chqe chi lik naj xqajek' qib' ru' i Dios. 6Wo'or oj elnaq chik pu'ab' ujer atb'al tzij man pacha oj kamnaq te'eq chwach. Wo'or utz oj olik re kqa'an uchak i Dios, man are i Lo'laj Utewal i Dios o puwi i qak'aslemal k'ak'.

I mak atzalal chi o chwe yin

7¿Wach ke'el uri usuk' iri, chi i atb'al tzij are i mak atzalal? ¡Keje ti ile! Xwiri yin weta'am ti te'eq uwach i mak atzalal matiji i atb'al tzij; yin weta'am taj we utz taj kinrayij wach i o ru' inlok'anij. Xwiri are xwetamaj wach i kub'ij i atb'al tzij, kub'ij chi utz taj karayij uwach ni'pa taq i awe taj. 8Te'uri xe'el chwe yin, chi i mak atzalal xuya uchak i tzij pixab' tz'ib'talik. Xu'an chwe chi ronojel i utz taj, is xinrayij u'ankil. Keje ile xu'an chwe, man matiji i atb'al tzij tz'ib'talik, keje teneri kqetamaji uwach i mak atzalal. 9Ujer, are weta'am ti usuk' i atb'al tzij, yin to' in k'aslik. Xwiri x-on panoq are xwetamaj wach kub'ij i tzij pixab', te'uri xinna pink'ux chi lik utz ti makunik. 10I tzij pixab' le, Dios xuya chqe yab'al re qak'aslemal. Xwiri yin xa re kamik xel chwi in-ab'. 11Are xwetamaj wach kub'ij i tzij pixab' le, i mak atzalal pink'ux xukoj ucho'ab', xinut'oro, xaq lik ru' tzij pixab' le xinukamsaj.

12I Lo'laj atb'al tzij le, lik ch'am, lik re i Dios. Utzij upixab' Ire, lik ch'am, lik utz, xaq lik suk'ulik. 13Xwiri ¿Xatab'a are i utz laj atb'al tzij le xpetsaw i kamik pinwi? Lik are taj. Are i x-anaw iri are i mak atzalal. Xukowij taq ucho'ab' che i utz. Rumali alaj chi lik utz ti i mak atzalal.

Are i utz taj are kwaj kin-ano

14Qeta'am chi i atb'al tzij le petnaq ru' i Dios anb'al re i utz pqak'aslemal. Xwiri yin xa in winaq, xa o urayijb'al inch'akul, lik in o pu'ab' i mak atzalal. 15Yin, lik kintiki ti chuch'ob'ik ub'e wach i kintijin chu'ankil. Kraj ink'ux, kin-an i utz xwiri kin-an taj. Are i kwaj ti u'anik, xa are ile kin-ano. 16B'ay, wach kintijin uri chu'anik, we are i kwaj ti u'anik kin-ano, lik kub'ij uri ink'ux chi utz i atb'al tzij. 17Rumali, yin ti chik kin-anaw i utz taj, xa are i mak atzalal chi o pink'ux k-anawik. 18Yin weta'am chi lik k'a pwalaxik loq lik nti utz chwe. Tupu kwaj yin kin-an i utz, xwiri kintiki ti che. 19Kwaj kin-an i utz, xwiri kin-an taj; are i utz taj chi kwaj taj, xa are ile kin-ano. 20B'ay, we are i kwaj ti u'anik kin-ano, yin ti chik uri kin-anawik. Xa are i mak atzalal chi o pink'ux k-anaw chwe.

21Are iri kintijin chrilik: Are kwaj kin-an i utz, kinna ub'e chi xwi i utz taj o pink'ux. 22Pink'ux yin, lik kwaj u'atb'al tzij i Dios; 23xwiri, kinna ub'e chi o jun chik b'iroxik chwe chi kin-atiw che wach i kraj ink'ux, ile are ucho'ab' i mak atzalal chi o pink'ux i lik in uximom.

24¡Lik to' inwach yin! ¿Pachin nawi kinresaj pu'ab' ucho'ab' i mak atzalal xaq pu'ab' kamik chi o pinwi rumal i utz ti laj inch'akul? 25Xwi i Dios kinuto, chi kintioxij che rumal i Qajwal Jesucristo. Pa k'isb'al re: Yin kinta chi kinya wib' pu'ab' i atb'al tzij re i Dios, man inch'akul xa kuya rib' pu'ab' i mak atzalal.

Currently Selected:

Romanos 7: ACHICUB

Highlight

Copy