Romanos 6

Ix kamnaq chik chwach i mak atzalal xwiri ix k'aslik chwach i Cristo

1¿Wach kqab'ij uri? ¿Xatab'a kqamayij ti makunik man keje ile i Dios ku'aljinsaj mas i utzil chomal pqawi? 2¡Keje ti ile! Yoj pacha taq oj kamnaq chik man i mak atzalal nti chik re chqe. ¿B'uchak uri kqaya tan chik qib' che i makunik? 3¿Iweta'am ti b'awa iri: Are xqajsax ya pqawi xojel loq o re i Jesucristo? Xaq we o re Ire chqe, xe'el uri junam xojkam ru'. 4Are xqajsax ya pqawi, are uri xojmuq junam ru' i Jesucristo, xaq kojkam na re kojwalij tan chik che jun k'aslemal k'ak'. Pacha xu'an i Cristo chi xwalij chik che i kamik rumal i Lo'laj Ucho'ab' i Dios.

5Xojel loq chi lik o re ire chqe are xkam i Jesucristo junam xojkam yoj ru' ire, xaq are kwalij che i kamik o re chqe uri. 6Lik qeta'am iri: I qak'aslemal re ujer xkamsax junam ru' i Cristo are xripik xaq xtz'aw chwach i krus. Keje ile xsachb'ex uwach i utz ti laj taq urayijb'al i qach'akul. O uchak xsachsaxik man oj nti chik uri pu'ab' i mak atzalal. 7Man jun we kamnaq chik, nti chik uri ucho'ab' i mak atzalal puwi. 8Xaq yoj, we oj kamnaq chik ru' i Cristo are xqajsax ya pqawi, kul qak'ux uri che chi kojk'asi ni ru'. 9Man qeta'am chi Cristo xwalij che i kamik xaq kkam ti chik; i kamik nti chik ucho'ab' puwi ire. 10Are xkam i Jesucristo i mak atzalal xk'is i ucho'ab' puwi ire. I wo'or k'aslik, kojb'al re u'ij i Dios. 11Xaq keje yix, chi'ana che iwib' pacha ix kamnaq chwach i mak atzalal. Xwiri lik ixk'aslik re i Dios junam ru' i Cristo Jesús.

12Rumali miya che i mak atzalal krajawin piwi, xaq miya che chi kixutaq chu'ankil i utz ti laj taq i rayijb'al re ich'akul. 13Mijach ich'akul pu'ab' i mak atzalal chu'anik i utz taj. Are chijacha ich'akul che i Dios chu'anik i utz. Chi'ana ile man ix kamnaq te'eq chupam imak, xwiri wo'or ix k'as chik chwach i Dios. 14Keje i mak atzalal ile lik nti chik ucho'ab' piwi yix, man ix o ti chik pu'ab' i ujer atb'al tzij, wo'or pu'ab' i rutzil uk'ux i Dios ix o wi.

Oj umokom ti i mak atzalal; oj umokom chik i utz

15¿Wach kqa'an ut? ¿Utz nawi kojmakunik we oj o ti chik pu'ab' i ujer atb'al tzij? ¿Utz nawi kojmakunik man i rutzil uk'ux i Dios o pqawi? ¡Lik utz taj, keje ti ile! 16Yix lik iweta'am iri: We kiya iwib' pu'ab' jun iwajaw chu'ankil wach kraj ire, ke'el uri lik ix jun utaqon. Xaq keje ile we kixkojon yix che i mak atzalal, ke'eloq lik ix o uri pu'ab', i kixkam rumal. We kixkojon che i Dios kixk'asi na xaq kiriq ni i kuyb'al mak. 17Mantiox che i Dios chi yix keje ti chik ki'ano pacha xi'an li ujer. Ujer lik ix taqon re i mak atzalal, xwiri wo'or lik ru' ronojel ik'ux ikojom i saq laj tzij lik pacha usuk' k'uttal chiwe. 18Are xixelsax pu'ab' i mak atzalal, xixok chu'ankil i suk'ulik chwach i Dios. 19Yix lik k'ax utayik ub'e iri ki'ano rumali chi kinb'ij chiwe ru' tzij chi k'ax ti utayik ub'e ki'an che. Ujer oj pacha ajtaqon re i mak atzalal. Xaq ki'an te'eq jalajuj taq makunik rumal urayijb'al ich'akul, xwiri wo'or, lik chijacha ich'akul chu'ankil ronojel ni'pa i suk'ulik chwach i Dios man keje ile lik kijach iwib' chu'ankil ipatan chrij i Dios.

20Yix ujer, are ix taqon te'eq re i mak atzalal, ki'an ti te'eq i suk'ulik. 21Ni'pa i utz taj chi xi'an ujer ¿Wach xich'ak ile ru'? Wo'or xwi tene kixk'ix che. I utz taj le xwi kupetsaj i kamik piwi. 22Xwiri wo'or, ix utaqon ti chik i mak atzalal, ix utaqon chik i Dios. Wo'or, ile o kich'ak ru' man we lik kiya iwib' pu'ab' i Dios kuya ik'aslemal uri chi nti uk'isik. 23Man i tojonik kuya i mak atzalal che jun winaq are i kamik. Xwiri i Dios keje ti ile, i sipon chi kuya Ire chqe are qak'aslemal chi nti uk'isik junam ru' i Jesucristo chi Qajwal.

Currently Selected:

Romanos 6: ACHICUB

Highlight

Copy