Romanos 5

K'utb'al re chi i Dios k'ax kojuna'o

1Wo'or ut, xa rumal ukub'ib'al qak'ux che i Qajwal Dios ronojel ile xa rumal i Jesucristo, i Dios oj uk'amom; rumali wo'or lik utz oj o chwach i Dios. 2Lik kojkikotik man qeta'am chi rumal i ukub'ib'al qak'ux che i Jesucristo, wo'or lik kqana ni k'axnab'al uk'ux i Dios xaq rumal ire chi o ni qe che u'ij uchomal. 3Xwi ta la ile, xaq kojkikot chupam i k'ax chi kpe pqawi, man qeta'am we kqach'ij i k'ax le lik kuya ukub'ib'al qak'ux. 4I ukub'ib'al qak'ux le k-on ni chqe chi utz kojelik, i we utz xojelik lik k'i uri i utz kqoy-ej. 5I utz le chi qoy-em kuqajsaj ti ukub'ib'al qak'ux man lik kqil na, man kqana i k'axnab'al uk'ux i Dios pqanima rumal Lo'laj Utewal chi uya'om chqe.

6Alaj chi k'ax kojuna'o man i Cristo xkamsaxik tob'al qe are nti te kojtowik. Xwiri are xuriq i ij chi uch'ikom i Dios, i Cristo xkamik tob'al ke ajmakib'. 7Mijun kraj kuya rib' che i kamik tob'al re jun chik, tupu puk'exel jun utz laj winaq. O na wi jun ko uk'ux kuya rib' che i kamik tob'al re jun utz laj winaq. 8Xwiri i Dios xuk'ut k'axnab'al uk'ux chqe man are k'a oj ajmakib' te'eq, i Cristo xkam pqak'exel. Keje u'anik ile xu'an i Dios chqe. 9Rumal i kamik le chi xik'aw wi Jesucristo, oj utz chik chwach i Dios. Lik nim i utzil chomal uya'om i Dios chqe, xwiri, i mas nim chwach ile are iri: Xaq kojuto ni chwach i tojb'al mak chi o te chqawach pa k'isb'al ij. 10U'anom loq oj ajch'oj te'eq chrij i Dios, xwiri wo'or rumal i kamik chi xik'aw wi Uk'ojol, xqachomaj qib' ru' i Dios. Xwi ta la ile, xaq kojresaj ni chwach i k'ax chi kpetik, man ire xwalij che i kamik, xaq wo'or k'aslik. 11Xaq xwi ta la ile, lik kojkikot ru' i Dios rumal i Qajwal Jesucristo. Rumal ire qachomam chik qib' ru' i Dios.

Ma Adán xaq i Cristo

12I mak atzalal are xjeqan chwach i jyub' ta'aj xa jun achi xkojow loq. Are i Adán xkojow loq. Rumal i mak atzalal xok li kamik. I kamik le x-ax chkiwach i winaq man konojel xemakunik. 13Ujer ax kemakun wi i winaq are k'amaja o i atb'al tzij rumal i mam Moisés. Xwiri nti makunik we nti atb'al tzij. 14I kamik xjeqan li che taq i ij re i Adán k'a che taq i ij re mam Moisés pkiwi i xemakunik tupu i winaq le xaqjun ti kimak pacha umak i ma Adán. I ma Adán laj kmajaw i jun chi kk'unik.#5.14 Are i xu'an i Adán, xeumaj uk'iyal winaq; xaq are xu'an i Jesucristo, xaq xeumaj uk'iyal winaq.

15Xwiri ile chi xu'an i ma Adán le kumaj taj pacha i xu'an i Dios chqe man xa rumal i umak jun winaq (chi Adán), konojel i winaq xpe i kamik pkiwi. Xwiri i Dios xusipaj i elsab'al qe chupam i kamik xaq xa rumal jun winaq, chi are i Jesucristo; ile lik nim man ku'an utz chke uk'iyal winaq chwach i Dios. 16I umak i ma Adán chi xu'ano le kumaj taj pacha i tob'al qe chi Dios kuya chqe, man i xu'an i ma Adán le, xeuk'oqoj konojel i winaq rumal jun mak atzalal, xwiri i qelb'al chisaq ile, tupu lik jun nim laj mak atzalal ire xu'an ch'am che. 17We xa rumal umak ma Adán oj o pu'ab' i kamik, xaq xa rumal i utzil chomal re i Jesucristo oj o pu'ab' i k'aslemal saqil. Keje ile kojel loq ni'pa yoj chi xya' i nim laj utzil chomal re i Dios chqe, man Ire k'ax kojuna'o xaq u'anom chqe chi oj utz chwach Ire.

18Xe'el uri, i umak jun achi xupetsaj i tojb'al mak pkiwi konojel i winaq. Xaq keje ile rumal i utz laj anik chi xu'an i Jesucristo xuya i utz pacha kmajaw chke konojel i winaq chi are kik'aslemal chi nti uk'isik. 19Xe'eloq chi rumal umak i ma Adán lik je k'i i winaq ajmakib'; xwiri xaq je k'i i winaq utz ke'el ni chwach i Dios rumal wach xu'an i Jesucristo.

20I atb'al tzij x-anik rumal k-on nim i mak atzalal. Xwiri are xk'iyar i mak atzalal, xaq lik mas xk'iyar i utzil chomal re i Dios chwach ile. 21Keje pacha i mak atzalal x-ajawin pkiwi i winaq, xupetsaj i kamik pkiwi. Xaq keje i utzil chomal re i Dios krajawin pqawi xu'on utz chqe, xaq kuya i qak'aslemal chi nti uk'isik. Keje ile ku'an chqe rumal i Qajwal Jesucristo.

Currently Selected:

Romanos 5: ACHICUB

Highlight

Copy