Romanos 4

Ukub'ib'al uk'ux i mam Abraham che i Dios

1I mam Abraham chi qamam yoj oj aj Judío winaq. ¿Wach uriqik utzil chomal re i Dios xu'ano? 2Lik qatzij, are ti rumal ni'pa taq i xu'ano. Wetene keje ile, o ne usuk'i we x-on taq nim che rib' chkiwach i winaq, tupu chwach i Dios keje ti ile. 3Xwiri i wuj chi tz'ib'tal utzij i Dios chupam keje iri kub'ij: “I mam Abraham xkojon che i Dios, xaq i Dios utz xrilo, rumali xukoj pajil xaq x-on che chi suk'ul laj winaq.” 4B'ay, jun winaq we chakunnaq, are ktojik i rajil lik uch'akom; are ti to' jun sipon xya' che. 5Xwiri we o jun kkojon che i Dios, i Dios utz krilo rumal ukub'ib'al uk'ux che, tupu nti jun chak u'anom. I Dios kuk'ulaj ru' xaq o re che i utz laj atb'al tzij. 6Ke'eloq pacha xulap i mam David ujer re i kikotemal re jun winaq. Chi nti jun chak u'anom re kuch'akb'ej re uk'aslemal chwach i Dios; xwiri i Dios utz krilo xa rumal ukub'ib'al uk'ux che Ire. 7I mam David xub'ij:

“Utz ke ike chi Dios ukuyum chik i kimak atzalal, utz ke ike chi chuptal chik uwach i kimak.

8Utz re i winaq chi kuytal ronojel umak rumal i Ajwal.”#4.8 Keje ile tz'ib'tal kan chupam uwuj i Dios.

9I utzil chomal re i Dios ¿Xatab'a xwi ke i antal circuncisión chke? Xwi taj. Xaq we xwi taq ke i antal ti circuncisión chke. Ile ya inb'im chik chiwe chi Dios k'ax xuna i mam Abraham man lik o ukub'ib'al uk'ux chwach Ire. 10I Dios ¿Are xukoj pajil i utzil chomal le che mam Abraham? ¿Xatab'a k'ate xukoj pajil che chrijil i circuncisión? Chrijil taj; lik chuxe'el xukoj pajil che. 11X-on panoq, te'uri x-an i circuncisión che i man Abraham. Are ilb'al re uri chi i Dios u'anom chik utz che rumal ukub'ib'al uk'ux che. I mam Abraham rumal ukub'am uk'ux che i Dios, are k'amaja k-an i circuncisión che. Rumali ire are kiqajaw i winaq chi je kojonnaq che i Dios, tupu antal ti circuncisión chke. Man keje ile i Ajwal Dios kerilo pacha nti kimak ki'anom. 12Qatzij, i mam Abraham xaq are kiqajaw jub'an chi antal i circuncisión chke, xwiri xwi ti rumal i circuncisión le, xaq o uchak kkikub'a kik'ux che i Dios pacha xu'an i man Abraham le are k'amaja k-an i circuncisión che.

Usujunik i Dios, ktz'aqatik rumal ukub'ib'al k'uxij

13I Dios xub'ij che i mam Abraham chi k-on panoq kuya i jyub' ta'aj che xaq chke umuq uxikin. Keje ile xub'ij i Dios man lik utz xril ukub'ib'al uk'ux i mam Abraham. Ile rumal ti taq ukojik ujer atb'al tzij, chi tz'ib'tal kan rumal i ma Moisés. 14Wetene xya' i jyub' ta'aj chke xa rumal ukojik ujer atb'al tzij, i ukub'ib'al kik'ux che i Dios lik nti k-on re uri chke, xaq nti ke'el wi uri usujunik i Dios chke. 15We o i atb'al tzij, xaq o uri i tojb'al mak we kkojon ti che; xwiri we nti atb'al tzij, xaq nti tojb'al mak uri man nti usuk' i qelanik.

16Rumali chi i usujunik che i mam Abraham, xu'ano man ire lik ukub'am uk'ux che i Dios. Keje ile xu'an i Dios aljinsab'al re che, chi i rutzil uk'ux lik o ke che konojel ni'pa i je umuq uxikin i mam Abraham. Qonojel yoj oj umuq uxikin i mam Abraham we qakub'am qak'ux che i Ajwal. Man usujunik i Dios xwi ti ke ike chi kkikoj u'ij ujer atb'al tzij re i mam Moisés, xaq sujtal chke konojel ni'pa i kikub'am kik'ux che i Dios pacha xu'an i mam Abraham ujer. Ire ke'el uri pacha qaqajaw yoj qonojel. 17Keje pacha tz'ib'tal kan chupam uwuj i Dios ujer: “Kin-an ni chawe at kiqajaw uk'iyal nimaq taq tinimit.” Iri are i Dios chi xkojon i mam Abraham che, i Dios chi lik keuwalijsaj i kamnaq, xaq ktiki chuwinaqirsaxik b'iroxik chi ntaj.

18I mam Abraham xukoj i Dios; lik xukub'a uk'ux che chi kril na wach i b'ital che rumal i Dios chi ire k-on ni kiqajaw uk'iyal winaq. Tupu ile k'ax uch'ob'ik chi we qas qatzij keje ile ke'eloq pacha xb'ix che, xwiri ire xukub'a uk'ux che i Dios; x-on panoq i mam Abraham xe'eloq chi kiqajaw ni uk'iyal taq winaq chwach i jyub' ta'aj. Xe'eloq pacha ub'im i Dios che, man Ire ub'im che chi keje ni uk'iyal amuq axikin ile. 19I mam Abraham xusach ti ukub'ib'al uk'ux che utzij i Dios, tupu laj o chik jo'winaq (100) junab' che, xusach taj. Tupu xuna ub'e chi ya kkamik; ire xaq i rixoqil lik je rij chik, i tit Sara kalan taj. 20I mam Abraham, lik xukoj utzij i Dios, ire nti xub'ij puk'ux we qatzij ti xb'ix che rumal i Dios. Lik mas xukowij ukub'ib'al uk'ux xaq xukoj u'ij i Dios. 21Ire lik kuna puk'ux chi k-antaj na pacha i b'ital che, man reta'am chi Dios lik ktiki chu'ankil. 22Rumali, i Dios xukoj pajil ukub'ib'al uk'ux i mam Abraham, xaq x-on utz che chwach Ire.

23I tziji xwi ti re i mam Abraham xaq lik qe yoj tz'ib'talik: “Man utz xe'el chwach i Dios.” 24Xaq chqe yoj tz'ib'tal wi tzij le. I Dios xaq utz kril ukub'ib'al qak'ux che Ire, man Ire lik are i xwalijsaw Ajwal Jesús che i kamik. 25Are i Jesús le, chi i Dios xuya pa kamik rumal i qamak, xwiri xuwalijsaj chik che i kamik anb'al re chqe yoj chi oj utz chwach Ire.

Currently Selected:

Romanos 4: ACHICUB

Highlight

Copy