Popular Bible Verses from Romanos 6

Share

Man i tojonik kuya i mak atzalal che jun winaq are i kamik. Xwiri i Dios keje ti ile, i sipon chi kuya Ire chqe are qak'aslemal chi nti uk'isik junam ru' i Jesucristo chi Qajwal.

Keje i mak atzalal ile lik nti chik ucho'ab' piwi yix, man ix o ti chik pu'ab' i ujer atb'al tzij, wo'or pu'ab' i rutzil uk'ux i Dios ix o wi.

Are xqajsax ya pqawi, are uri xojmuq junam ru' i Jesucristo, xaq kojkam na re kojwalij tan chik che jun k'aslemal k'ak'. Pacha xu'an i Cristo chi xwalij chik che i kamik rumal i Lo'laj Ucho'ab' i Dios.

Mijach ich'akul pu'ab' i mak atzalal chu'anik i utz taj. Are chijacha ich'akul che i Dios chu'anik i utz. Chi'ana ile man ix kamnaq te'eq chupam imak, xwiri wo'or ix k'as chik chwach i Dios.

Lik qeta'am iri: I qak'aslemal re ujer xkamsax junam ru' i Cristo are xripik xaq xtz'aw chwach i krus. Keje ile xsachb'ex uwach i utz ti laj taq urayijb'al i qach'akul. O uchak xsachsaxik man oj nti chik uri pu'ab' i mak atzalal.

Xaq keje yix, chi'ana che iwib' pacha ix kamnaq chwach i mak atzalal. Xwiri lik ixk'aslik re i Dios junam ru' i Cristo Jesús.

¿Wach kqab'ij uri? ¿Xatab'a kqamayij ti makunik man keje ile i Dios ku'aljinsaj mas i utzil chomal pqawi? ¡Keje ti ile! Yoj pacha taq oj kamnaq chik man i mak atzalal nti chik re chqe. ¿B'uchak uri kqaya tan chik qib' che i makunik?

Yix lik iweta'am iri: We kiya iwib' pu'ab' jun iwajaw chu'ankil wach kraj ire, ke'el uri lik ix jun utaqon. Xaq keje ile we kixkojon yix che i mak atzalal, ke'eloq lik ix o uri pu'ab', i kixkam rumal. We kixkojon che i Dios kixk'asi na xaq kiriq ni i kuyb'al mak.

Mantiox che i Dios chi yix keje ti chik ki'ano pacha xi'an li ujer. Ujer lik ix taqon re i mak atzalal, xwiri wo'or lik ru' ronojel ik'ux ikojom i saq laj tzij lik pacha usuk' k'uttal chiwe. Are xixelsax pu'ab' i mak atzalal, xixok chu'ankil i suk'ulik chwach i Dios.