Juan 16

1“Kinb'ij iri chiwe man keje ile kisach ti ukub'ib'al ik'ux chwe Yin, 2man kixelsax nu b'i pa taq ja re molb'al ib' ke i judío. Xwi ti la ile, kuk'ulmaj na chi xapachin kixkamsawik kuch'ob' na chi ru' i ku'ano le, ku'an jun upatan chwach i Dios. 3Ile kki'an na, man keta'am ti uwach Inqajaw xaq keta'am ti inwach Yin. 4Xinb'ij ile chiwe man are kuk'ulmaj i ij le, kk'un chik'ux chi Yin inb'im chik chiwe.”

I anik chi ku'an i Lo'laj Utewal i Dios

Inb'im ti ile chiwe chuxe'el, man Yin in o iwu', 5xwiri wo'or kintzalij chik ru' i Jun chi xintaqaw loq; xwiri mijun chiwe kutz'onoj chwe ipa kin-e wi. 6Xane petnaq jun nim laj ib'is rumal i tzij chi xinb'ij chiwe chi kin-e chik ru' i Jun chi xintaqaw loq. 7Xwiri kinb'ij i saq laj tzij chiwe: Lik utz ke'el chiwe yix we kin-ek. Man we kin-e taj i Ajkub'sanel K'uxij kk'un ti iwu', xwiri we kin-ek, kintaq na li iwu'. 8Are kk'un Ire, lik kusaqij ni chke i winaq chwach i jyub' ta'aj pachin je ajmakib', pachin i je suk'ulik chwach i Dios xaq pachin k-at tzij puwi rumal i Dios. 9I jun chi lik ajmak atzalal k-aljin uri che chi kkojon ti chwe Yin. 10I jun chi suk'ulik: Are Yin, chi kin-e ru' i Ta chikaj, xwiri yix, kiwil ti chik inwach. 11I Itzel chi k-at tzij puwi rumal i Dios, are k-ataw tzij chwach i jyub' ta'aj, xwiri wo'or lik ya u'atom chik tzij puwi i lik xya' utojb'alil che.

12“Lik k'i kwaj ub'ixkil chiwe, xwiri wo'or kich'ij ti utayik ronojel. 13Xwiri are kk'un Utewal i Dios, chi are i saq laj tzij, Ire kixuk'am nu b'i che i b'e chi lik saq laj tzij. Man Ire nti tzij kub'ij chi to' re Ire, xwi kub'ij ronojel ni'pa utom che i Ta xaq kusaqij ni chiwe wach k-an na k-on panoq. 14Ire kukoj ni in-ij Yin, man ni'pa i we Yin lik o re ire che, xaq kusaqij ni chiwe yix. 15Ronojel ni'pa o ru' i Ta xaq lik we Yin; rumali xinb'ij chiwe chi Lo'laj Utewal i Dios o re Ire che ni'pa i we Yin xaq kusaqij ni chiwe yix.”

16“K-on pan jub'i' yix kiwil ti chik inwach, xwiri k'a k-on tan chik pan jub'i' te'uri kiwil tan chik inwach.” Keje ile xub'ij i Jesús chke utijoxelab'.

I b'is kjaltaj ni puk'exel i kikotemal

17Are uri jujun chke utijoxelab' xkitz'onoj chkiwach:

—¿Wach kraj ub'ixkil chqe ru' i tzij le? Kub'ij chi k-on pan jub'i' kqil ti chik uwach, xwiri k'a k-on tan chik pan jub'i' kqil tan chik uwach, ¿I wach kraj usuk' ile? Chi k-e chila ipa o wi i Ta. 18¿Wach kraj ub'ixkil ru' i tzij le chi k-on pan jub'i'? Lik kqata ti ub'e wach ktijin chub'ixkil —xecha.

19I Jesús xunab'ej chi kkaj kki'an jun tz'onb'enik che, are uri xub'ij chke:

—Yin inb'im chik chiwe chi k-on pan jub'i', yix kiwil ti chik inwach xwiri k'a k-on tan chik pan jub'i' kiwil tan chik inwach. ¿Are ile kixtijin chutz'onoxik chiwach? 20Lik saq laj tzij kinb'ij chiwe chi yix lik kixb'ison na xaq lik kixo' na, tz'aqat i winaq chi to' je re uwach i jyub' ta'aj kekikot na, xwiri tupu yix kixb'isonik, k-on panoq i b'is le kyiji ni che jun kikotemal. 21Man are ya kalax rak'al jun ixoq, lik kpe jun nim laj ub'is man ya kuriq or re nim laj k'axk'olil chi kik'aw wi; xwiri chrijil chik ralaxik i rak'al, ksach ronojel ni'pa i k'axk'olil chuk'ux rumal ukikotemal man xalax jun ak'al chwach i jyub' ta'aj. 22Xaq keje yix ile, wo'or lik kpe ib'is xwiri are kiwil chik inwach te'uri lik kpe jun nim laj kikotemal pik'ux, ile are jun kikotemal chi mijun kelsaw chiwe.

23“Xwiri che i ij le lik nti chik kitz'onoj chwe. Lik saq laj tzij kinb'ij chiwe, ronojel ni'pa kitz'onoj che i Ta pinb'i Yin, Ire lik kuya ni chiwe. 24Xwiri ni'pa petnaqi yix lik nti itz'onom pinb'i. Wo'or chitz'onoj ut man kya' ni chiwe, man keje ile lik ktz'aqat ni ikikotemal”.

I Jesús kuqajsaj ucho'ab' i utz taj chwach i jyub' ta'aj

25“Inb'im ile chiwe ru' tijojb'al tzij, xwiri lik kuriq ni ij chi nti chik tijojb'al tzij kinb'ij man puk'exel ile lik saqil kinlap ni i Ta chiwe. 26Che i ij le, yix na kitz'onoj che i Ta pinb'i Yin, nti chik uchak we Yin kintz'onoj che i Ta pib'i yix. 27Man i Ta lik k'ax kixuna'o, Ire lik k'ax kixuna'o man yix k'ax kinina Yin, xaq rumal ikojom chi Yin in petnaq ru' i Dios. 28Xwo'taj kan i Ta man xinpe waral chwach i jyub' ta'aji; xwiri wo'or kwo'taj kan uwach i jyub' ta'aji man kintzalij chik ru' i Ta chikaj”; keje ile xub'ij i Jesús chke.

29Are uri i utijoxelab' xkib'ij che:

—Ta, wo'or lik kqata ub'e wach i kab'ij, chi ru' ti chik i tijojb'al tzij xab'ij chqe. 30Wo'or, qeta'am chi yet ronojel i b'iroxik is aweta'am, rumali rajwaxik ti chik we o taq jun ku'an jun tz'onb'enik chawe; rumal ile lik kqakojo chi ru' i Dios at petnaq wi —xecha.

31Are uri i Jesús xula' uwach chke:

—¿Wo'or yix lik kikojo? 32Lik ya kuriq i ij, xaq lik are chik i ij iri, chi iwonojel yix kixkicher nu b'ik, kiniwo'taj ni kanoq, xwiri kinkanaj ti kan intukel man o i Ta wu'. 33Ronojel ile kinb'ij chiwe, man kwaj yin o ni uxlanb'al k'uxij chiwach are kixpe wu', yix lik kitij ni k'ax chwach i jyub' ta'aj, xwiri chikowij ik'ux, man yin inqajsam chik u'ij i utz taj chwach i jyub' ta'aj —xcha i Jesús chke.

Currently Selected:

Juan 16: ACHICUB

Highlight

Copy