Juan 15

I Jesús lik are saqil laj uche'lal tikon

1I Jesús xub'ij: “Yin lik in saqil laj tikon; i Inqajaw are Ire k-anaw i chak che, 2we o jun chke in-ab' chi kuya ti uwach kuk'atzij b'ik, xwiri we kuya uwach kujos-ij xaq kuk'atzij utzam, man keje ile lik mas k'i uwach kuya'o. 3Yix lik ix ch'am chik rumal i tzij chi inb'im chik chiwe. 4Lik chixjeqel chwe Yin, pacha kin-an Yin chi kinjeqi chiwe yix. Man jun u'ab' i tikon kuya ti uwach utukel we nak'al ti che unimal. Xaq keje yix ile kixwachin taj we kixjeqi ti chwe Yin.”

5“Yin lik are in saqil laj tikon, yix ix keje pacha u'ab'. Jun we kjeqi chwe Yin xaq Yin kinjeqi uri che ire, xaq lik k'i uwach uri kuya'o. Yix we kijek' iwib' wu' lik nti kixtiki uri chu'anik. 6Jun we kjeqi ti chwe Yin kelsax b'i uri, keje pacha u'ab' jun che' chi kchaqijik, kmol uchi', te'uri knak' a' che.”

7“Yix we kixjeqi chwe Yin xaq we kixkojon che ink'utunik, chitz'onoj uri wach kiwaj man lik kyataj ni chiwe. 8Lik k-aljin ni uri u'ij uchomal Inqajaw we kixwachinik xaq lik kixu'on uri intijoxelab'. 9Yin lik k'ax kixinna yix, pacha Inqajaw chi lik k'ax kinuna Yin. Chixjeqel uri che i k'axnab'al k'uxij chi inya'om Yin chiwe. 10Yix, we kixkojon che intzij inpixab', lik kixjeqi uri che i k'axnab'al ink'ux, pacha in-anom Yin kinkojon che utzij upixab' Inqajaw, xaq in jeqel che i k'axnab'al uk'ux.”

11“Keje ile kinb'ij chiwe man keje ile lik kixkikot wu' xaq ikikotemal lik ktz'aqat na. 12I intzij inpixab' chiwe yix are iri: Chi k'ax china iwib' chiwach, pacha kin-an Yin chiwe yix chi k'ax kixinna'o. 13I k'axnab'al k'uxij chi lik nim re jun winaq, are uya'ik rib' chwach i kamik tob'al ke i pachin k'ax keuna'o. 14I yix ix wamiy uri, xwiri we ki'ano pacha kixintaq che. 15Yin kinb'ij ti chik ajchakib' chiwe, man jun ajchak reta'am taj wach ku'an i rajaw. Yin kinb'ij chiwe chi ix wamiy, man inb'im chiwe ronojel ni'pa ub'im Inqajaw chwe. 16Yix ti xini'ul Yin, are Yin xixin-ul yix, xaq inya'om chiqul chi kix-e chu'anik i utz laj chak man arewi kixwachin chwach i Dios xaq chkiwach i winaq. Man keje ile i Inqajaw kuya ni chiwe ronojel ni'pa kitz'onoj che pinb'i Yin. 17Are kixintaq chu'anik are iri: K'ax china iwib' chiwach.”

I winaq chi to' je re uwach i jyub' ta'aj, tzel kkil i Jesús xaq ni'pa je re Ire

18“I winaq chi to' je re uwach i jyub' ta'aj we tzel kixkil yix, chk'un chik'ux chi nab'e tzel xinkil Yin. 19Wetene yix to' ix re uwach i jyub' ta'aj, lik k'ax te'eqi kixkina i winaq chi to' je re uwach i jyub' ta'aj, pacha k'ax una'ik kib' ike kki'an chkiwach. Xwiri Yin xixincha yix chkixol ike, rumali chi tzel kixkilo man ix re ti chik uwach i jyub' ta'aj. 20Chk'un i tziji chik'ux chi xinb'ij chiwe: Mijun ajchak atz u'ij chwach i rajaw. We xki'an ch'oj chwij Yin, xaq kech'ojin ni uri chiwij yix; i winaq le we xekojon che intzij Yin xaq kekojon uri che itzij yix. 21Ronojel ile kki'an ni chiwe wumal Yin, man keta'am ti uwach i Jun chi xintaqaw loq.”

22“I winaq chi to' je re uwach i jyub' ta'aj, lik nti te'eqi kimak wetene xink'un ti Yin chub'ixkil chke. Xwiri wo'or lik nti kuyb'al kimak man insaqim chik chke; 23man konojel ni'pa ktitat kipam chwe Yin xaq ktitat uri kipam che Inqajaw. 24I winaq le lik nti te'eq kimak wetene in-anom ti nimaq taq anik chkixol chi mijun anawnaq. Tupu kilom chik ronojel ni'pa taq ile, xwiri k'a ktitat kipam chwe Yin xaq ktitat kipam che Inqajaw. 25Kuk'ulmaj ni keje ile man rajwaxik chi k-antaj na ni'pa tz'ib'tal chupam ki'atb'al tzij ike, chi keje iri kub'ij: Lik nti puwi xtitat kipam chwe.”

26“Xwiri are kk'un jun Ajkub'sanel K'uxij iwe, chi are mer saq laj tzij, chi kintaq li Yin pub'i Inqajaw, are ni Ire ksaqiw chiwe in pachin Yin. 27Xaq yix kisaqij na in pachin Yin, man yix ax ix o wi wu' are xinjeq inchak.”

Currently Selected:

Juan 15: ACHICUB

Highlight

Copy