Juan 17

I Jesús xlapan ru' i Dios pkiwi utijoxelab'

1I Jesús are xutzin chub'ixkil i tzij le, are uri xtaqen an chikaj, xaq xub'ij: “Inqajaw, ya xuriq i or lik chakojo u'ij Ak'ojol man keje ile Ire xaq kukoj a'ij Yet. 2Yet aya'om i atb'al tzij pu'ab' Ak'ojol pkiwi konojel i winaq, yab'al kik'aslemal chi nti uk'isik, chke konojel ni'pa i xeaya che. 3I k'aslemal chi nti uk'isik are iri, chi kketamaj awach Yet, chi lik xwi Yet at saqil Dios xaq i Jesucristo chi xataq loq.”

4“Yin lik inkojom a'ij waral chwach i jyub' ta'aj xaq xink'is i chak chi xinataq chu'anik. 5Wo'or, ut Ta, Chaya'a in-ij inchomal chawach pacha te'eq in-ij are in o awu', lik keje pacha i chuxeb'al ij saq are k'amaja uwach jyub' ta'aj.”

6“Konojel ni'pa xea'ul chwach i jyub' ta'aj xeaya pin-ab' Yin, inb'im chke at pachin Yet. Je awe Yet te'eq, xwiri Yet xeaya chwe Yin xaq lik je kojonnaq che atzij. 7Wo'or ike keta'am chik chi ronojel ni'pa xaya chwe, lik awu' Yet petnaq wi. 8Xinb'ij i tzij chke chi xab'ij Yet chwe, ike xkikoj pkik'ux; xaq xketamaj chi lik saq laj tzij awu' Yet in petnaq wi xaq xkikojo chi Yet xinataq loq.”

9“Yin kintz'onoj chawe pkiwi ike le, kintz'onoj ti chawe pkiwi i winaq chi to' je re uwach i jyub' ta'aj. Xwi pkiwi i xeaya chwe man je awe Yet. 10Ronojel ni'pa i we yin xaq awe Yet; xaq ronojel ni'pa awe Yet lik we Yin. Xaq in-ij inchomal k-aljin ni pkik'aslemal ike.”

11“Yin kink'iji ti chik chi chwach i jyub' ta'aj, xwiri ike k'a kek'iji chi chwach i jyub' ta'aj, tz'aqat Yin kin-e awu' chila re kink'iji awu'. Lo'laj Inqajaw, cheachajij ni ru' acho'ab' chi aya'om chwe, man keje ile keu'on ni jun, pacha qa'anom yoj awu' chi xa oj jun. 12Are in o ku' ike chwach i jyub' ta'aji xeinchajij xaq xewil ru' ucho'ab' ab'i chi aya'om chwe. Mijun chke ike xsachik xwi i jun chi lik ax sachnaq wi, man keje ile xtz'aqatik pacha i Tz'ib'tal kan chupam awuj.”

13“Wo'or, Yin kitzalij chila ipa at o wi Yet, xwiri kinb'ij i tziji tz'aqat k'a in o chi chwach i jyub' ta'aj, man keje ile ktz'aqat ni kikikotemal pkik'ux ike chi xinkikojo, lik pacha inkikotemal Yin. 14Yin inb'im atzij chke, xwiri i winaq chi to' je re uwach i jyub' ta'aj tzel kekilo, man ike ne te je re chik uwach i jyub' ta'aj, keje pacha Yin in re ti uwach jyub' ta'aj. 15Kintz'onoj ti chawe chi keawesaj chwach i jyub' ta'aj; are kintz'onoj chawe chi keawok'aj xaq keato chwach i utz taj. 16Keje pacha Yin chi in re ti uwach i jyub' ta'aj, xaq keje ike je re ti chik uwach i jyub' ta'aj. 17Cha'ana ch'am chke awu' Yet, chupam i saq laj tzij. Man atzij lik saq laj tzij. 18Keje pacha xa'an Yet chwe Yin, chi xinataq li chkixol i je re uwach i jyub' ta'aj, xaq keje kin-an Yin chke ike keintaq b'i chkixol i je re uwach i jyub' ta'aj. 19Kumal ike chi Yin lik kinjach ink'aslemal pa'ab', xaq keje uri ike lik chkijacha kik'aslemal pa'ab' Yet, chupam i saq laj tzij.”

20Xwi ti pkiwi ike ri kintz'onoj chawe; xaq kintz'onoj chawe pkiwi i jub'an chik chi kinkikoj pkik'ux k-on panoq, are kkita i tzij chi kkib'ij intijoxelab'i. 21Kintz'onoj chawe chi konojel ike le lik chki'ana junam che kib', xa jun chitzij junam qu' yoj. Inqajaw, keje pacha a'anom Yet chi at o chwe Yin xaq Yin in o chawe Yet, xaq keje ike chu'ana ni uri junam kiwach; man keje ile i winaq chi je re uwach i jyub' ta'aj kkikojo chi Yet xinataq loq. 22Yin inya'om a'ij achomal chke ike chi aya'om Yet chwe Yin, man keje ile lik keu'on ni junam kiwach, keje pacha yoj chi junam qawach awu'. 23Yin in o chke ike, i yet at o chwe Yin; keje ile ke'el ni uri chi ike lik xaq jun kiwach, man keje ile kkil i winaq chwach i jyub' ta'aj chi Yet xinataq loq, xaq kkilo chi lik k'ax keana'o pacha ka'an chwe Yin.

24“Inqajaw, Yet xeaya chwe; rumali kwaj Yin chi ike kek'iji chila wu' ipa kink'iji wi Yin, man keje ile kkil ni in-ij inchomal chi aya'om chwe; man lik k'ax kinana'o k'a chuxeb'al ij saq are k'amaja uwach jyub' ta'aj. 25Inqajaw, chi lik suk'ul i ka'ano, i winaq chi je re uwach i jyub' ta'aj keta'am ti awach, xwiri Yin weta'am awach Yet, xaq keje ike ri chi xeaya chwe keta'am chi Yet xinataq loq. 26Yin xinya retamaxik chke at pachin Yet; xaq lik kinmayij ti u'anik, man pacha i k'axnab'al ak'ux Yet chwe Yin, xaq keje ni ile chke ike, man keje ile Yin in o ni chke ike.” Xcha i Jesús che Uqajaw.

Currently Selected:

Juan 17: ACHICUB

Highlight

Copy