2 Timoteo 1
1
I ma Pablo kuya pan rutzil uwach a Timoteo
1 # 1.1 Yin in ma Pablo chi kintz'ib'aj b'i i wuji chawe yet a Timoteo. In apóstol re i Jesucristo, in taqtal li rumal i Dios man Ire keje ile xuch'ob'o chrij pacha i sujunik re i k'aslemal chi kya' ni chqe we junam oj o wi che i Jesucristo. 2Yet, a Timoteo, chi lik katwaj pacha taq at wak'al. Kintz'onoj che i Qaqajaw Dios xaq che i Qajwal Jesucristo chi kkiya i utzil chomal, k'axnab'al kik'ux xaq i utz olem pawi.
Utioxixik che i Dios
3Lik arewi katk'un chink'ux are kinlapan ru' i Dios; kintioxij che xaq kintz'onoj pawi yet chipa'ij, chicha'ab'. Kinna yin lik utz u'ankil inpatan kin-an chrij i Dios, pacha xki'an i watit inmam ujer. 4Ksach ti chink'ux wach o'ej a'anom, xaq lik kwaj rilik tan chik awach man keje ile kinkikot ni uri. 5Kk'un chink'ux chi yet lik saqil ukub'ib'al ak'ux che i Ajwal. I awatit ati Loida i achuch ati Eunice, xaq keje ukub'ib'al kik'ux ike ile nab'e. Yin weta'am chi ukub'ib'al ak'ux yet lik keje pacha ke ike.
Kink'ix ti che i utz laj tzij k'ak'
6Rumali, kinb'ij chawe, chi lik chatchakun ru' i sipon chi uya'om i Dios chawe, are xinya in-ab' pawi; wo'or chajuluwsaj pacha jun a' k'aslik. 7Man i utewal i Dios u'anom ti chqe chi kqaxij qib', are u'anom uya'om qacho'ab' re k'ax kqana i qatz qacha' xaq kojuto re kqa'anb'ej che i k'aslemal utz chwach i Dios. 8Rumali, matk'ix chub'ixkil wach u'anom i Qajwal; xaq matk'ix chwe yin chi in o prexil xaq rumal re Ire. Are i cha'ana, chach'ija ni'pa i uyej kpe pawi xa rumal upaxsaxik i utz laj tzij k'ak' re i Dios. Chach'ija ru' i cho'ab' chi kuya i Dios chawe. 9Keje cha'ana ile man i Dios xojuto xaq xojusik'ij ru' man kqa'ano pacha kraj ire. Keje xu'an ile chqe, rumal ti jun utz chi qa'anom yoj, xa rumal keje xraj ire ile chqe, xaq rumal i rutzil uk'ux chqe oj o chik ru' i Jesucristo. I rutzil uk'ux i Dios le, ax uch'ob'om wi, k'a chuxeb'al li ij saq, 10xwiri, wo'or u'aljinsam i k'axnab'al uk'ux chqe ru' uk'unik i Jesucristo chi Tol qe. Ire le resam chik ucho'ab' i kamik, xaq u'aljinsam chqe wach i qak'aslemal saqil chi ksachsax ti uwach. U'aljinsam ile chqe rumal i utz laj utzij k'ak' re i Dios.
11I Dios uya'om chinqul ub'ixkil i utz laj tzij le; xaq in utaqom loq chi in apóstol re kintzijoj utzij man yin pacha in tijonel. 12Rumali chi lik kintij ni uyeji. Xwiri kink'ix ti che, man lik weta'am pachin che inya'om wi ink'ux; lik weta'am chi ire o ucho'ab' chinchajixik#1.12 I tzij chi tz'ib'tal kan waral, qas ti alaj usuk', we are “woqxanim ru'”, o we are “wach uyom ire chinqul.” k'a pa k'isb'al ij, ru' ni'pa uya'om chinqul.
13Mawo'taj i saq laj tzij chi ink'utum kan yin chawe. Pacha i xink'ut chawe, cha'ana ru' ukub'ib'al ak'ux, xaq ru' k'axnab'al ak'ux chi o che i Ajwal; kattiki che man at o che i Jesucristo. 14Ru' utob'al i utewal i Dios, chi lik o pqak'aslemal lik utz uk'olik cha'ana che i utz laj k'utunik.
15Aweta'am, chi konojel ni'pa i je o pa ulew Asia in ko'tam kanoq; xaq i keb' achiyab' chi ma Figelo xaq ma Hermógenes xinko'taj kanoq. 16Xwiri, i ma Onesíforo keje ti ile xu'ano; ire xk'ix ti che chi in o prexil. K'iyalmul xuya ukub'ib'al ink'ux; rumali kintz'onoj che Dios chi chuya ni utzil chomal puwi, puwi i rixoqil xaq pkiwi i rak'al. 17Are i xu'ano, are xk'un waral pa Roma, xujeq intzukuxik, lik xumayij taj k'a xinuriq na. 18Xaq yet awilom chi nim i qato'ik xu'an ire chila pa Éfeso; kwaj yin k-il ni tob'al uwach rumal i Ajwal pa k'isb'al ij.
Currently Selected:
2 Timoteo 1: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
