2 Timoteo 2

K'ax ru' kowil wachij

1Yet, chi pacha at wak'al, chk'iji ni acho'ab' rumal i utzil chomal chi kuya i Jesucristo chawe. 2Atom chik wach i k'utunik in-anom yin chkiwach k'iyal winaq. I k'utunik le, chaya chkiqul jub'an chik winaq chi kekojon che i Dios chi lik kul ak'ux chke, chi ketiki chuk'utik.

3Yet, lik chach'ija ni'pa i k'ax chi katijo man lik at jun utz laj achi chi yij che i ch'oj re i Jesucristo. 4Jun achi chi yij che i ch'oj, o chuqul kkojon ni che wach kb'ix che rumal i raj-atzil; kumaj taj ku'ano pacha taq to' kraj ire. 5Xaq ni'pa i kkipaj kib' che anem, o uchak kki'ano pacha i usuk', we kki'an taj nti ke uri che i sipon. 6Xaq jun ajchak, we kraj kutij uwach utikon, o uchak uri kchakun ni nab'e. 7Lik chatch'ob'on chrij wach i xinb'ij le; i Ajwal Jesucristo katuto ni uri chutayik ub'e ronojel.

8Chk'un chak'ux i utz laj tzij k'ak' re i Dios chi kintijin yin chupaxsaxik, chi i Jesucristo xwalij che i kamik, chi xaq are i umuq uxikin kan i mam David chi qoy-em te'eq uk'unik, are ile kintijin chutzijoxik. 9Rumal ub'ixkil i tzij k'ak' le, kintij uyej, xaq in ximtal ru' karena pacha taq jun aj-anol utz taj; xwiri i utzij i Dios ximtal taj, xaipa kupon wi. 10Rumali yin kinch'ij ni'pa i jalajuj taq k'ax chi kintijo, rumal anb'al re i utz chkiwach ni'pa i je ucha'om chik i Dios. Keje ile kin-ano man xaq ike kkiriq ni chom laj kelb'al chisaq chi nti uk'isik; kkiriq na we je o che i Jesucristo.

11O jun tzij lik qatzij; are iri:

We oj kamnaq chik ru' ire, xaq ru' ire uri kojk'asi na;

12We kqach'ij ni uyej rumal ire, o ni uri qapatan che i ajawinik re Ire.

We kqab'ij chi oj re ti ire, xaq ire kub'ij ni uri chi oj re taj.

13We yoj kqa'an taj pacha qab'im che, ire ku'an na pacha i ub'im,

man ire lik kujalwachij ti i usujunik.

K'aslemal chi rajwaxik che a Timoteo

14Chak'unsaj ile chkik'ux i qachalal chila, xaq cheapixb'aj chwach i Ajwal chi chkimayij uchapik kib' pa tzij; man ile nti kkich'ak ru', xwi tene kuyoj kinojb'al i ketawik. 15Xwiri yet chaya awib' chu'anik achak man chom kril ni Dios; cha'ana pacha ku'an jun utz laj ajchak, chi nti puwi kk'ix taq che uchak, man utz u'anom che, lik pusuk' chak'utu i saq laj tzij. 16Chajek'a awib' che taq i lapanik chi oksab'al ti u'ij i Dios man ile nti kich'ak che. Man are ke'anaw keje ile xa keuk'am b'i naj che i Dios. 17I k'utunik keje ile, xa pacha jun ch'ak chi xa knimarik, xaq xa ku'aysaj jun ch'akulaj. Keje kik'utunik i ma Himeneo ile, xaq i ma Fileto. 18Ike kkita ti ub'e i saq laj tzij; xa ketijin chub'ixkil chi ya qilom chik qawalijik che i kamik. Xa ketijin chuyojik kinojb'al jujun chke i qachalal. 19Xwiri i Dios uya'om i saq laj tzij chqe chi lik ksach ti uwach. Chupam uwuj i Dios keje iri kub'ij: “I Ajwal reta'am pachin i je re ire.” Keje ile tz'ib'talik; “Konojel ni'pa i kkikoj u'ij ub'i i Ajwal, mki'an uri ni'pa i utz taj.”

20Iweta'am yix chi jun nim laj ja re b'eyom, k'iyal taq uwach laq o chupam. O jujun lik chomiq lik re an-o'oj, xaq o i saq-o'oj xaq o jujun re che' xaq o re xo'ol. O jujun k'ate kchapb'exik are o nima'ij xaq jujun chik re kchapb'ex ij ij. 21Jun, we ch'am i uk'aslemal kujek' rib' che i utz taj, lik keje ni uri pacha jun b'iroxik chi lik o u'ij, chatalik, lik kuriq uchak uri che i Ajwal, yij chik uri che jalajuj taq b'iroxik chi utz.

22Chajek'a awib' chu'ankil i utz taj, ma'an awe pacha taq kki'an i alab'om chi to' xaqmanal kkich'ob'o. Chaya awib' chu'ankil i suk'ulik; chakub'a ak'ux che i Ajwal, k'ax cheana i qachalal; chatzukuj i utz olem. Cha'ana ronojel ile junam ku' i kkikoj u'ij i Ajwal. 23Mamin awib' ku' i to' kkichap kib' chitzij puwi taq i tzij chi nti uchak xaq nti ke'el wi. Aweta'am, chi ile xa ch'oj kupetsaj chkixol i kki'an keje ile. 24Jun, we aj-anol uchak i Ajwal, utz ti uri we to' uminom rib' che jalajuj taq ch'oj; o uchak chi utz uk'ux ku' konojel, xaq o uchak uri chi ktiki chuya'ik i k'utunik xaq lik o uchak chi o unimal uk'ux. 25O uchak o unimal ak'ux, lik utz kipixb'axik i je qelqel cha'ana, moqxa i Dios keuto chujalwachixik i kinojb'al, keje ile kketamaj ni saq laj tzij. 26Moqxa ke'el ni chupam i tzaqsab'al chi ukojom i Itzel chke; man wo'or je o pu'ab', ku'on pacha kraj ire chke.

Currently Selected:

2 Timoteo 2: ACHICUB

Highlight

Copy