2 Timoteo 3

Tzijonik chrij i k'isb'al taq ij

1Rajwaxik kawetamaj chi pa k'isb'al taq ij, lik kitij ni jalajuj taq k'ax chwach i jyub' ta'aj. 2Man i winaq, xwi ke ike kkich'ob'o; xwi kek'achir chutzukuxik kipwaq, to' nim kki'an che kib', xaq lik to' kkikoj ki'ij. Xaq k'ax kech'aw ni chrij i Dios, kekojon ti chik chke i kiqajaw kichuch, kkich'ob' ti chik u'anik i utz; xaq lik kkikoj ti chik u'ij i Dios. 3Che taq i ij le, i winaq nti chik rutzil kik'ux chkiwach, xaq mitene uk'axnab'al kik'ux lik nti chik; xaq lik xa je ajtzukul tzij, man xa tzel kkil ni utz. 4Che taq i ij le i winaq xaq kkijach ni kachi'il pki'ab' i ajch'oj chkij; ko kiwach xaipa kkimin wi kib'; to' nim kki'an ni che kib'; xa are kkitzukuj kirayijb'al ike, are ti kkitzukuj i Dios. 5Che taq i ij le i winaq kki'an ni che kib' pacha je re i Dios, xwiri rumal i utz taj chi kki'ano xa kkuwaj ucho'ab' i Dios.

Yix lik chijek'a iwib' ku' i keje ke'anaw ile. 6O jujun chke ike kki'an ni che kib' pacha je utz, xaq ke'ok ru' taq ja chkit'orik ixoqib' chi nti qas kino'oj. I ixoqib' le lik je ajmakib', to' kewi keterej taq chkij i je ajt'oronel, man to' je o pu'ab' i kirayijb'al ike. 7Lik arewi, ketijin chutayik i k'utunik, xwiri lik arewi kkita ti ub'e i saq laj tzij. 8I je ajt'oronel le kki'an na pacha xki'an i keb' aj-itz, ma Janes i ma Jambres ike le ujer xkaj te'eq kki'atij utzij i mam Moisés. I winaq le kkaj kki'atij ni saq laj tzij; xa je are achiyab' chi sachnaq kinojb'al; lik utz ti chik ukub'ib'al kik'ux. 9Xwiri ne te k'i i winaq kekit'oro, man konojel kkil na chi ike le lik nti kino'oj, keje pacha xki'an keb', chi je are i ma Janes i ma Jambres ike le, xki'an ch'oj chrij i mam Moisés ujer.

Upixb'anik ma Pablo che i a Timoteo

10Xwiri yet, lik aweta'am i k'utunik kin-ano, ink'aslemal, inch'ob'onik, xaq aweta'am chi o ukub'ib'al ink'ux che i Ajwal, xaq wach unimal ink'ux; awilom wach i k'axnab'al ink'ux, xaq inkowil chupam ronojel ni'pa i k'ax. 11Aweta'am ni'pa i k'ax antal chwe, xaq ni'pa uyej intijom pa tinimit Antioquía, pa tinimit Iconio, xaq pa Listra; xwiri i Ajwal Jesucristo xinuto chwach ronojel ni'pa taq i k'ax le. 12Qatzij, ni'pa i kkaj keb'in che i k'aslemal ch'am ru' i Jesucristo, lik kkitij ni k'ax rumal. 13Xwiri, i je aj-anol utz taj xaq i je ajt'oronel, lik xa kkikowirsaj kib' chu'anik i utz taj; kekit'or i winaq, xaq kit'or ni kib' ike.

14Xwiri yet, chakowij awib' che i tzij chi at nawnaq che, chi lik kana pak'ux chi lik saq laj tzij. Lik aweta'am pachin je k'utuwnaq ile chawe. 15Chk'un chak'ux chi lik are at ak'al xawetamaj wach kub'ij uwuj i Dios, chi lik kuya anojb'al xaq katuto na, ile rumal ukub'ib'al ak'ux che i Qajwal Jesucristo. 16Ronojel ni'pa i tz'ib'tal kan chupam uwuj i Dios lik utzijonik i Dios, man lik ru' i Ire petnaq wi; kuriq uchak chawe are keatijoj i qachalal, are keajek'o, are keasuk'b'a, xaq are keanawsaj che i k'aslemal chi lik suk'ulik. 17Keje ile, ni'pa i je rajchak i Dios, lik keyijb'ax ni uri chu'ankil uchak xaq lik ketiki ni uri chu'ankil ronojel i utz.

Currently Selected:

2 Timoteo 3: ACHICUB

Highlight

Copy