2 Timoteo 4
4
1Chwach i Dios xaq chwach i Jesucristo, chi k-on panoq ku'an ni atb'al tzij pkiwi i je k'aslik xaq pkiwi i je kamnaq, rumali lik are i Dios xaq i Jesucristo kkita na wach i tzij kinya chaqul: 2Chapaxsaj utzij i Dios; cha'ana che awib' at sik'aj chub'ixkil; we k'ax ktzijoxik, cha'ana pen ub'ixkil. Lik chayu'uj kixikin i winaq; cheajek'a, xaq cheapixb'aj. Keje cha'ana ile, lik mb'a'krij ak'ux chuk'utik chke ru' k'axnab'al k'uxij. 3Keje cha'ana ile, man kk'un ni ij chi i winaq lik kkaj ti chik utayik i utz laj k'utunik; xa are kkitzukuj wach i qus kkita ike. Xa ke'ok chutzukuxik k'iyal taq tijonelab' chi xa are kkik'ut i qus kkita ike. 4Lik kkaj ti kkita i saq laj tzij; xa are i kkikoj retalil che i tzij chi to' kinojim i winaq. 5Xwiri yet, wach i kak'ulmaj, masach ano'oj rumal; chach'ija ni'pa uyej kpe pawi; chaya awib' chupaxsaxik i utz laj tzij k'ak' re i Dios; utz u'ankil cha'ana che i chak chi yatal chaqul.
6Yin, ya kuriq i ij chi ink'aslemal ya kya' chwach i Dios pacha jun sipon, rumali lik ya kuriq i or re inkamik. 7Lik xinch'ojij u'anik uchak i Ajwal; xaq xink'is u'anik ronojel pacha uch'ob'om i Dios chwe chi kin-an na; xaq lik in-anom utz che ink'aslemal chwach Ire. 8Rumali yin wo'or, yij chik i koron chi kya' ni chwe rumal i Ajwal. Ire lik suk'ul i atb'al tzij ku'an pqawi, rumali are kuriqa i ij lik kuya ile chwe, xaq xwi ti chwe yin kuya'o, xaq kuya chke konojel ni'pa ru' k'axnab'al k'uxij koy-em uk'unik.
I ma Pablo kub'ij che a Timoteo wach i ku'ano
9Cha'ana pen awib' re kinawilo. 10I ma Demas xinukanaj kanoq, man ire xa k'ax kuna i b'iroxik re uwach i jyub' ta'aj; rumali enaq pa Tesalónica. I ma Crescente enaq pa ulew Galacia, i ma Tito enaq pa ulew Dalmacia#4.10 Chu'ankil uchak i Dios.. 11Xwi i ma Lucas o chi wu' yin. Chatzukuj li ma Marcos, xaq chak'ama li waral man kinuto che inchak. 12I qachalal a Tíquico intaqom b'i pa Éfeso. 13Yet, are katpetik chak'ama li inchaket chi xinkanaj kan pa Troas chi rachoch i ma Carpo; xaq chak'ama li b'orom wuj, xaq i b'orom tz'um chi o tz'ib' chwach chi lik o uchak chwe.
14I ma Alejandro chi ajch'ayol ch'ich', lik nim i utz taj u'anom chwe; i Ajwal chutzalij ni uwach che pacha u'anom ire. 15Xaq cha'ana kwent awib' che ire le, man lik kutzukuj ch'oj chrij i tzijonik chi kojtijin yoj chupaxsaxik uwach.
16Lik are nab'e tob'al wib' chkiwach i atb'al tzij, lik mijun xintowik; konojel xinko'taj kanoq. Kwaj wetene kkuytaj ni kimak le chke rumal i Dios. 17Keje into'ik ile xu'an i Ajwal, xaq xuya incho'ab' chub'ixkil utzij, man keje ile lik xintiki chupaxsaxik uwach utzij chi are i tzijonik re i totajik, lik xkita utzij i Dios konojel i ne te aj Judío. Keje into'ik ile xu'an i Ajwal chwach i kamik, pacha taq xinresaj puchi' i koj, 18xaq weta'am chi kinresaj pu'ab' ronojel ni'pa i utz taj, xaq kinuto na k'a kinok ni ru' ire ipa krajawin wi chila chikaj. ¡Choksax u'ij ire k-e ij saq chrij! Lik keje ile ch-antaj na (Amén).
Uya'ik i k'isb'al taq rutzil wachij
19Chaya rutzil uwach i ati Prisca,#4.19 Ile are i ati Priscila. ma Aquila, xaq chaya rutzil uwach i ma Onesíforo, rixoqil xaq i rak'al. 20I ma Erasto xkanaj kan pa Corinto. I ma Trófimo xinkanaj kan pa tinimit Mileto man lik iwab'. 21Chab'isoj apetik chuxe'el upetik i jab' ru' tew. I ma Eubulo, i ma Pudente, i ma Lino, i ati Claudia xaq konojel i qachalal chwach i Cristo kkitaq pan rutzil awach.
22I Ajwal Jesucristo chk'iji ni awu', i Dios chuya ni lo'laj utzil chomal piwi yix iwonojel.
Currently Selected:
2 Timoteo 4: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
