Tito 1

Rutzil wachij

1Yin in ma Pablo chi kintz'ib'aj b'i wuji chawe yet a Tito; in rajchak i Dios xaq in apóstol re i Jesucristo. Inutaqom ku' i je chatal rumal i Dios, man keinto chukub'axik kik'ux che i Ajwal, xaq keinto che i retamaxik i saq laj tzij re i qakojonik che i Dios. 2We kqata ub'e i saq laj tzij le, kul uri qak'ux che chi kqil ni qak'aslemal chi kk'is ti chik. Man keje ile xub'ij i Dios chuxeb'al li ij saq, xaq Ire lik kt'oron taj. 3I Dios, chi Tol qe, are xuriq i ij chi ax uch'ikom wi, xuya retamaxik utzij chqe are xinpaxsaj utzij i Dios, man xuya chinqul kin-e chub'ixkil i tzij le. 4I wuji, kintz'ib'aj b'i chawe yet a Tito, chi at wak'al kinna yin, man yoj chojkeb' qakub'am qak'ux che i Ajwal Jesucristo. Chk'iji ni utz pawi, chrila i tob'al awach, xaq i uxlanb'al ak'ux chi kpe ru' i Qaqajaw Dios xaq ru' i Qajwal Jesucristo chi Tol qe.

Ku' i ajk'amol utzam re i tinimit

5Yet, xatinkanaj kan chila pa Creta#1.5 I Creta are jun ulew setel chwi i mar. ku' i qachalal, man kasuk'b'a na ni'pa i k'a kraj che i kik'aslemal. Xaq xinb'ij kan chawe chi keacha ni rijab' man kkuk'aj utzam i jutzob'aj re i Dios pa taq tinimit chila. 6I rijab' re i jutzob'aj re i Dios pacha ile o uchak utz che'oloq, man mijun kkojow kimak. O uchak xa jun i rixoqil, xaq o uchak chi i rak'al kijachom kib' pu'ab' i Ajwal, xaq chom che'oloq, xaq o uchak ne te qelqel. 7Man jun, we o uchak i Dios chuqul, rajwaxik uri chi utz ch-oloq. Mu'an che rib' chi lik nti kok ru' kuna ire; xaq utz taj we to' k'an laj winaq, we to' ab'arel laj winaq, we to' ajtzukul ch'oj xaq we to' are kuch'ob' i pwaq chi saqil ti uch'akik. 8Are i chu'ana, chuya kiposar i winaq, chuya uk'ux chu'ankil i utz, chuch'ob'o kok'ilal wach i ku'ano, chu'ana pacha i usuk', chuya rib' chu'ankil uchak i Ajwal, chujek'a rib' che i ni'pa taq i kmajaw taj. 9Mro'taj kan i tzij chi lik qatzij, i tzij chi xaqjun ru' pacha i k'uttal che. Ru' i saq laj tzij le, kuya ukowil kik'ux i rachi'il, xaq kuyu'uj kixikin ike chi je ajla'ol uwach.

Chkiwach i saqil ti laj taq tijonelab'

10Man je k'i chik ki'anom qelqel che kib', etelechiki ni'pa i kkikoj uch'ojil i u'anik i circuncisión. Ike, to' tzij kkib'ij, xaq ket'ortaj i winaq kumal. 11O uchak chi ke'atix che i tzij, man xa ketijin chkitunik i qachalal; lik kkijech'ab'saj kinojb'al i qachalal ku' konojel i kixoqil kalk'uwal, to' ch'akb'al re kipwaq kki'ano; ile lik k'ixb'alil.

12Jun achi profeta chi kach aj tinimit Creta, jun nim laj ajpixb'anel ke; ire xub'ij: “I wach aj tinimit, xa je ajt'oronel, xa je itzel chikop; to' wa'im kkaj, kkaj ti kechakunik”; keje ile xub'ij. 13Lik qatzij i xub'ij le. Rumali, lik cheayaja i qachalal chila, suk'b'al ke che i kikojonik che i Dios. 14Chab'ij chke, chkimayij utayik i to' kitzij, to' kinojb'al i aj Judío, mkikoj retalil che i kitzij ike le chi kkikoj ti u'ij i saq laj tzij. 15Ni'pa i je ch'am pkanima, chke ike lik ch'am uri ronojel. Xwiri ni'pa i ne te ch'am pkanima, ni'pa i kkikoj ti saq laj tzij re i Dios, chke ike, ronojel uri lik ch'am taj. Keje ile ke'el chke man ch'am ti kinojb'al, xaq kkina ti chik we utz ti kki'ano. 16Kkib'ij ike chi keta'am uwach i Dios, xwiri rumal wach i kki'ano, k-iltaj chke chi qatzij taj. Je itzel laj taq winaq, to' je qelqel, lik nti kichak chu'ankil i utz.

Currently Selected:

Tito 1: ACHICUB

Highlight

Copy