1 Timoteo 6
6
1Ni'pa i winaq chi je o pa k'ax pki'ab' i rajaw kichak, lik rajwaxik chkikojo ki'ij i rajaw kichak. O uchak keje kki'an ni ile, man i winaq k'ax ti kech'aw uri chrij i Dios, xaq k'ax ti kech'aw chrij wach taq i kojtijin yoj chuk'utik. 2We je o jujun ajchakib', we rajaw kichak kekojon che i Cristo, mkich'ob' ike we kkimayij ukojik ki'ij i rajaw kichak xa rumal je kachalal chik chwach i Cristo. Are i chki'ana, chekojon mas chke, man i kajaw i chaki, xaq kkikoj utzij i Dios, xaq je qachalal chwach i Cristo chi k'ax keqana'o. I tziji chi xinb'ij are i chak'utu, xaq are i chab'ij chke i qachalal chwach i Cristo.
I saqil laj b'eyomal
3We o jun kk'utuw i tzij chi saq laj tzij taj, we xaqjun ti ru' i k'utunik suk'ulik re i Qajwal Jesucristo, we uya'om ti uwach che i tzij chi qakojom yoj, 4xa kojb'al u'ij uri ire ku'ano; lik nti reta'am. Xwi kraj kukoj uch'ojil chrij wach usuk' i ral taq tzij; ire xa pacha k'alwachirnaq ujolom chub'ixkil. Ke'eloq xa je ajch'oj; xa je ajyo'yanel; xaq kul ti kik'ux chke i kachi'il wach i kki'ano; 5xaq lik arewi kkitzukuj ch'oj ku' i winaq chi xa jech' kinojb'al man keta'am ti saq laj tzij. Kkich'ob' ike chi keb'eyomar ni rumal i tzij chi ketijin chuk'utik. Chajek'a awib' yet chkiwach ike chi keje kki'an ile. 6Qatzij, o i qab'eyomal ni'pa i kojterej chrij i k'utunik re i Cristo, xwiri o uchak chi xwi kojkikot che ni'pa i o qu'. 7Man are xojalax chwach i jyub' ta'aj nti qok'am loq; xaq are kojkamik nti kqak'am b'ik. 8Rumali, we o kqatijo xaq we o qa'u', chojkikot uri ru' ile. 9Xwiri o jujun kkaj kki'an b'eyom che kib'; rumal urayixik ile, xa ketzaq chupam kimak, ketzaq chupam i uk'iyal taq kirayijb'al chi nti usuk'. Kkirayij taq ile chi xa tzaqsab'al ke ku'ano. I kirayijb'al le xa keuk'am b'i uri che i sachsab'al ke. 10Ile ke'eloq, urayijb'al uwach i pwaq are uxeb'al ni'pa taq utz taj. O jujun chi xa rumal kirayijb'al che i pwaq, kikanam kan i utz laj b'e, rumal ile k'i ni uyej kipetsam pkiwi.
I ma Pablo xuya ukowil uk'ux i a Timoteo
11Xwiri, yet chi at rajchak i Dios chajek'a awib' chwach ronojel ile. Chaya awib' chu'ankil i suk'ulik, chu'ankil i chom chwach i Dios xaq chakub'a ak'ux che ire, k'ax cheana i winaq, xaq chaya unimal ak'ux che wach i kak'ulmaj, xaq cha'ana utz che i ak'ux. 12Chaya ronojel acho'ab' chu'ankil pacha i utz laj k'utunik chi akojom. Chatija a'ij che ak'aslemal chi kk'is ti chik. Xinb'ij ile chawe man i Dios xatusik'ij churiqik i k'aslemal le. Xwi ta la ile, xaq yet ab'im chik chkiwach uk'iyal winaq chi lik akojom chik i saq laj tzij; rumali keje ile cha'ana che ak'aslemal. 13Wo'or chwach i Dios chi kyaw i k'aslemal che ronojel wach i olik; xaq kinb'ij ni chawe chwach i Jesucristo chi xuxij ti rib' chub'ixkil i saq laj tzij chwach i ma Poncio Pilato. 14Lik kinb'ij chawe: Cha'ana pacha i b'ital chawe; majech'ab'saj. Utz cha'ana che man keje ile nti jun kkojow amak. Cha'ana ile tz'aqat kuriq ni i ij are kk'un chali Qajwal Jesucristo. 15Are kuriq i ij chi ch'iktalik, i Dios ku'an ni che chi kk'unik. Xwi ire lo'laj Dios, rajaw i kikotemal xaq lik nim ucho'ab'; xwi ire o puwi ronojel. Are ire Ajawinel pkiwi konojel i ajawinelab'; are ire Ajwal chke i ajwalxelab'. 16Xwi ire kkam taj, chi jeqel che jun nim laj saq chi mijun kch'ijaw i tejeb'ik ru'. Mijun winaq rilom uwach, xaq mijun ktiki chrilik. Lik choksax u'ij ronojel ij saq; xaq i u'atb'al tzij kk'is taj k-e ij saq chrij. Lik keje ile ch-antaj na.
17Ni'pa i b'eyomab' waral chwach i jyub' ta'aj, chab'ij chke mkikoj ki'ij, xaq mkikub'a kik'ux che ub'itaq ke man ile knajtin taj. Are i chki'ana, chkikub'a kik'ux che i Dios k'aslik. Are Ire kyaw ronojel i rajwaxik chqe xaq upaxsam uwach man ru' ile k-on chqe chi kojkikotik. 18Xaq chab'ij chke chki'ana i utz; chkib'isoj u'ankil wach kraj i Ajwal, ile are i b'eyomal saqil. Mki'an xuy che kib', are chki'ana ajsipanel che kib'. 19Keje ile o ni kib'eyomal uri kkik'olo re k-on panoq, chi kmajawik kkikub'a kik'ux che. We keje ile kki'ano, kkiriq ni uri kik'aslemal chi nti uk'isik.
I k'isb'al pixb'anik xaq i rutzil wachij
20Yet, a Timoteo, chachajij ni wach uya'om i Dios pa'ab'. Maya axikin chutayik wach taq i klapik chi nti ke'el wi chi to' re uwach i jyub' ta'aj; xaq maya axikin che i k'utunik chi nti utz rok'am. O i keb'inik chi lik nim i rok'am, xwiri nti uchak. 21O jujun je terejnaq chrij i nojb'al le xko'taj kan uri i saq laj tzij re i Dios chi qakub'am qak'ux yoj che.
I Dios chuya ni utzil chomal piwi yix. Keje ile kwaj (Amén).
Currently Selected:
1 Timoteo 6: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
