1 Timoteo 5
5
K'aslemal chi rajwaxik kqak'ut chke uk'iyal winaq
1Jun nim laj winaq, we kawaj kapixb'aj, mayajo, xa chaya unojb'al pacha aqajaw. I alab'om, cheapixb'aj pacha taq je awatz acha'. 2I ixoqib' chi je rij chik, cha'ana i utz chke pacha achuch. I altom, cheapixb'aj pacha taq je awanab', xaq cha'ana che awib' lik ch'am anojb'al chke.
3Cheato i ixoqib' malkanib' we lik qatzij nti kechajiwik. 4Xwiri, jun ixoq malkan, we je o rak'al, we je o ri umam, o uchak are ike le kekichajij i kichuch i katit. Keje ile kkitzalijb'ej uwach che i kik'itsaxik. Ile lik utz kril i Dios. 5Jun ixoq, we qatzij malkan, we qatzij xkanaj kan utukel, lik che i Dios uri kul wi uk'ux, xaq kumayij ti utz'onoxik che i Dios chipa'ij, chicha'ab'. 6Xwiri jun ixoq malkan chi xa kuya rib' chutzukuxik ukikotemal ire, tupu k'aslik, ke'el uri chi kamnaq chwach i Dios. 7Ni'pa i xinb'ij le, chab'ij ni chke i je re chik i Cristo, man utz nti jun kkojow kimak. 8Jun, we keuchajij ti rachalal, kel uri chi uxutum i k'utunik re i Ajwal; we keuchajij ti je o chi rachoch ire, nim ni umak uri kel chwach i kimak i winaq chi kkikoj ti utzij i Cristo.
9I jutzob'aj re i Dios chila, ike o kiwuj ipa kkitz'ib'aj wi kib'i ixoqib' malkanib'. Xwiri chkitz'ib'aj ub'i jun ixoq xwi we o chik oxwinaq (60) junab' che, xaq we lik xa jun i rachijil k'ijinaq ru'. 10I malkanib'i o uchak etamam kiwach kumal i winaq chi lik je aj-anol utz pacha iri: We utz uk'itsaxik kak'al ki'anom, we je ajya'ol posar, we kich'ajom kaqan i lo'laj tinimit re i Cristo, we lik kiya'om kib' chkito'ik i jub'an chi je o puyej; o we kiya'om kib' chu'ankil jub'an chik utzil chomal.
11Xwiri mkitz'ib'aj kib'i i malkanib' chi k'amaja je rijab'. Man jun ixoq we rij taj, k-on panoq kurayij tan chik jun rachijil, moq kukanaj kan uri uchak i Cristo. 12Ke'eloq o ni umak, man xu'an taj pacha ub'im loq. 13Xwi ta la ile, man we keto'ik, ke'eloq xa kpe kik'ayil, xaq to' malkatik kki'an chi taq ja, xaq kki'an che kib' je ajnuk'ul tzij, xaq to' kkimin taq kib' che i kmajaw taj; to' kkib'ij i tzij chi kmajaw ti ub'ixkil. 14Rumali, i malkanib' chi k'amaja je rijab', kwaj yin chek'ulanoq, chk'iji kak'al, xaq chkichajij i kachoch. Chkixija jub'i' kib' che wach kki'ano; keje ile i je ajch'oj chqij yoj chi oj re chik i Cristo, kojkich'ach'a taj. 15Xinb'ij ile chawe man je o jujun chke i ixoqib' malkanib' ya xko'taj kan i Cristo, xa xkimaj ub'e i Satanás.
16Jun chi kkojon che i Cristo, we achi o we ixoq, we je o ixoqib' malkanib' je rachalal, cheutzuqu uri', muya chkiqul i jutzob'aj re i Dios. Keje ile, i jutzob'aj re i Dios le o ni kimer uri chkito'ik i malkanib' chi lik kitukel je olik.
17I kiwi kijolom i jutzob'aj re i Dios, we utz ki'anom che i kipatan, kmajaw uri lik koksax ni ki'ij kumal i jutzob'aj, xaq keto' ni ru' wach i rajwaxik chke; ile mas kmajaw chke i je ajpaxsanel utzij i Dios chi xaq je ajtijonel. 18Keje ile kub'ij uwuj i Dios chi tz'ib'tal kanoq. Kub'ij: “Mikoj teb' che utzam jun b'oyex are ktijin chichak che i tikon.” Xaq kub'ij: “Jun ajchak, o uchak ktojik.” Keje ile tz'ib'tal kanoq.
19We o jun kukoj umak jun uwi ujolom i jutzob'aj re i Dios, matkojon che, xwiri we je keb' oxib' keb'inik wach umak, te'uri chakojo.
20We o jun uwi ujolom i jutzob'aj re i Dios chi kmakunik, chapixb'aj uri chkiwach i jutzob'aj re i Dios. Keje ile xaq i jub'an kiwi kijolom utz kel ni chke man keje ile kkixij ni jub'i' kib' ike.
21Yin lik kinb'ij ni chawe chwach i Dios, xaq chwach i Ajwal Jesucristo, xaq chkiwach i ángel chi je chatal rumal, lik chakojo na wach inb'im chawe. Xwiri xaqjun kilik i qachalal cha'ana; ma'an taq ile chi junwi rilik i jun ka'ano. 22We kawaj kakoj jun che upatan chi ajk'amol utzam chke i jutzob'aj re i Dios, matk'achir la chu'anik; kok'ilal chawila pachin i utz chke. Man we kakoj la jun, moqxa ke'eloq xa ajmak laj winaq, xaq chaqul yet uri o wi umak ire. Rumali mattzaq chupam i utz taj.
23Yet, lik arewi k'ax apam. Rumali, utz we katu' jub'i' i uwa'al uva muqb'am kunb'al re apam, xwi ti ya katu'u.
24Qatzij je o jujun kki'an i kimak chkiwach konojel i winaq, xaq konojel uri keta'am wach umak are k'amaja k-at tzij puwi. Xaq je o jujun kki'an kimak ani'al, xwiri mijun etamawnaq k'a k-on panoq, te'uri k-etamaxik.#5.24 Cha'ana pacha i xinb'ij chawe: Macha tan jun ajk'amol utzam chke i jutzob'aj je re i Dios. 25Xaq keje ile, o jujun kki'an i utz, xaq konojel keta'am wach i utz ki'anom. Xaq je o jujun, are kki'an i utz taj xa ani'al kki'ano, xwiri kel ni utzijol wach i utz taj chi ki'anom; ile kkanaj ti ani'al.
Currently Selected:
1 Timoteo 5: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
