1 Timoteo 4
4
I utz ti laj taq k'utunik
1I Lo'laj Utewal i Dios lik usaqim chqe chi are kk'un i k'isb'al taq ij, je o ni jujun kko'taj kan ukub'ib'al kik'ux che i Jesucristo. Xa ke'ok chukojik kitzij i utz ti laj taq tew chi je ajt'oronel; xa keterej chrij i k'utunik chi petnaq ku' itzel taq tew. 2I k'utunik le, kpe ni ku' i winaq chi xa keb' kipalaj, xa je ajt'oronel; kkina ti chik we o kimak man i pkik'ux lik pacha sikirnaq chik. 3Ni'pa i je teren chkij, kkiya ti chke we kek'uli'ik, xaq kkib'ij na chi o taq i ti'b'alil chi utz taj ktijawik. I k'utunik kkib'ij le, qatzij taj, man i Dios is xuyijb'a ile tzuqb'al qib' yoj chi oj re chik i Cristo, xaq qeta'am chik i saq laj tzij. Ire uya'om chqe kqatijo, xwiri kqatioxij che rumal ile. 4Keje ile kqa'ano man ronojel ni'pa uyijb'am i Dios is utz, utz taj we kqaxutuj; xwiri chqatija xaq chqatioxij che i Dios. 5Man i utzij i Dios xaq i utz'onoxik che ku'an utz.#4.5 Kmajaw taj kqaxutuj, man i Dios ub'im chi is utz, xaq kqatz'onoj che ire puwi, are kqatijo.
6Yet, we keje kak'ut ile chke i qachalal chwach i Cristo, at utz laj ajchak uri re i Jesucristo, xaq kk'iji acho'ab' rumal i tzij chi akub'am ak'ux che, chi xaq are i utz laj tzij chi at terejnaq chrij.
7Xwiri, matkojon che i tzij chi nti usuk', chi xa ku' i winaq petnaq wi chi nti Dios ku'. Cha'ana i utz che i awach lok'anij. 8Keje ile cha'ana, man jun, we kunimarsaj ucho'ab' che uch'akul, utz kel ru'; xwiri mas utz kel ru' we kunimarsaj ucho'ab' che uk'aslemal chwach i Dios. Man ile kuriq uchak che, xwi ti waral chwach i jyub' ta'aj, xaq kuriq uchak che uk'aslemal chi kpetik. 9I xinb'ij le, lik qatzij; lik kmajawik chi konojel kkikoj na. 10Are rumal ile chi yoj kqatij qa'ij chu'anik i chak, xaq kqach'ij i qayo'yaxik kumal i winaq. Kqach'ij ronojel ile man kul qak'ux che i Dios k'aslik. Are ire, Ajtol ke konojel i winaq, etelechiki ni'pa i kikub'am kik'ux che i Cristo.
11Ni'pa taq inb'im le, chak'utu chke i winaq konojel, xaq chab'ij chke chi o uchak kekojon ni che. 12Yet k'a at ala, xwiri, utz cha'ana che awib', moqxa o i kkib'ij chi at ti utz laj tijonel man xa k'a at ak'al. Xwiri cha'ana che awib' chi at ajk'utul utz chke i je re i Dios. Ronojel wach i kab'ij, ronojel wach i ka'ano, xwi i utz, xwi i chom cha'ana; k'ax cheana i winaq, xaq mb'a'krij ak'ux chu'ankil. Ronojel wach i ka'ano, cha'ana chi lik k'utb'al re ukub'ib'al ak'ux che i Ajwal, xaq cha'ana che awib' chi lik ch'am ak'aslemal. Cha'ana ni'pa taq ile, k'utb'al re i utz chke i qachalal. 13Tz'aqat kinupon iwu', chawajlaj ni uwuj i Dios chke i qachalal chwach i Cristo are je o pa molb'al ib'; xaq chaya ukowil kik'ux, xaq cheanawsaj. 14Mawo'taj kan ile chi siptal chawe rumal i Dios. Ni'pa ile ru' utzij i Dios xuya chawe are xkiya ki'ab' i rijab' pawi re i jutzob'aj re i Dios.
15Cha'ana i xinb'ij le, lik chaya awib' chu'ankil, te'uri is kkil ni konojel chi yet kok'ilal mas utz kattijin chu'ankil che achak. 16Cha'ana kwent awib', che i ronojel wach i ka'ano, xaq wach i kattijin chuk'utik chke i qachalal; mamayij u'ankil. We keje ka'an ile, kattotaj ni uri, xaq keje ike chi ketaw atzij xaq ketotaj na.
Currently Selected:
1 Timoteo 4: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
