1 Timoteo 3
3
Wach i rajwaxik chke ajk'amol utzam chke i jutaq tzob'aj re i Dios
1O jun tzij kb'ixik chi lik qatzij, are iri: “Jun we kraj ku'an upatan re rok'axik utzam jun tzob'aj re i Dios, utz laj patan uri kurayij,” kb'ixik. 2Xwiri, jun we ajk'amol utzam chke i qachalal, lik kmajaw uri che chi utz ch-oloq, man nti jun kkojow umak. O uchak xa jun rixoqil, xaq lik uya'om uk'ux che upatan, xaq ktiki chu'atixik i urayijb'al chi utz taj; xaq chu'ana che rib' pacha kmajawik. Xaq o uchak kuya kiposar i winaq, xaq o uchak ktiki chkitijoxik i winaq. 3Jun ajk'amol utzam chke i qachalal, kmajaw taj we xa k-ab'arik, o we ajtzukul ch'oj, o we lik qus kril i utz ti laj taq trat chi saqil taj, xaq lik muya i uk'ux che i pwaq. Are chu'ana che rib' chi utz uk'ux chke i winaq, mutzukuj ch'oj chkij, xaq mu'an xuy che rib'. 4O uchak utz uk'amik utzam ku'an chke i ralk'uwal xaq i rixoqil, xaq chu'ana chke i rak'al chi kekojonik, xaq kkikoj u'ij ire, keje ile chom kik'aslemal. 5Man jun we ktiki ti chuk'amik utzam chke i ralk'uwal prachoch, xaq ktiki ti uri chuk'amik utzam chke i jutzob'aj re i Dios. 6Jun we kok'aw utzam chke i jutzob'aj re i Dios, kumaj taj we k'ate ujachom uk'ux che i Ajwal. Ire, we xa k'ak' laj ajkojol utzij i Ajwal, moqxa ku'an nim che rib' rumal upatan, i xa kpe i tojpen puwi, xaqjun pacha xu'an i Dios che Itzel chi xuya pa tojpen man xu'an nim che rib'. 7Jun ajk'amol utzam chke i jutzob'aj re i Dios, o uchak lik utz ch-oloq, man o ni uri u'ij kumal i winaq chi kikojom ti i Dios. Man we chom ti uk'aslemal chkiwach ike, nti uri u'ij; moqxa ktzaq uri chupam i tzaqsab'al re chi kukoj Itzel.
Wach i rajwaxik chke i diácono
8 # 3.8 Are i winaq chi kkito i jutz'ob'aj re i Dios, ke'el chkisolixik xaq kekito iwab'ib', malkanib', rijab'. Xaq i je diácono, o uchak lik je utz laj taq winaq; o uchak chi ni'pa taq i kkib'ij to' ti kichi'; o uchak chi k'i ti uwa'al uva muqb'am kutu'u#3.8 Ke'eloq chi xa jub'i' kutu'u man keje ile k-ab'ar taj., xaq kkirayij ti i pwaq chi kich'akom taj. 9Xaq chkikojo i chkik'utu i saq laj tzij chi u'aljinsam i Dios chqe. Keje chki'ana ile man lik utz ni uri kek'iji'ik. 10I achiyab' le, o uchak ke'iltaj na we je utz; we nti kimak, utz uri ke'ok che i kipatan. 11Xaq i ixoqib', o uchak je utz laj taq winaq. O uchak ne te ajnuk'ul tzij, xaq lik jik je olik, xaq lik je tz'aqat chu'anik ni'pa taq i kki'ano. 12Jun diácono o uchak xa jun rixoqil, xaq utz i rok'axik utzam ku'an chke i ralk'uwal prachoch. 13I je diácono we utz u'anik kichak kki'ano, knimar i ki'ij chkiwach i winaq, xaq kk'iji ni ukowil kik'ux chub'ixkil wach rumal kul kik'ux che i Jesucristo.
Wach usuk' i saq laj tzij chi qakojom
14Lik kwaj yin we' na katewila; xwiri, moqxa kinb'aytajik, rumali kintaq b'i wuji chawe, 15man kawetamaj re wach u'anik i utz kki'an na, pacha kmajaw chke i je umi'al ralk'uwal chik i Dios. Man i jutzob'aj re i Dios k'aslik; are i je ajchajinel, xaq i je aj-ok'anel re i saq laj tzij re i Dios. 16Qatzij, lik nim i saq laj tzij le chi uk'utum i Dios chqe chi aljinsam ti ujer, uk'utum iri chqe:
I Cristo xk'un chi pacha winaq, xaq ni'pa i xu'ano, ni'pa i xub'ij, lik suk'ulik;
I Lo'laj Tewal lik xusaqij chi nti umak.
Xaq x-iltaj kumal i ángel.
Xpaxsax ni utzijol ire chke i nimaq taq tinimit chi keta'am ti te'eq uwach i Dios.
Ronojel i uwach i jyub' ta'aj o i kikub'am kik'ux che.
Xaq x-on panoq, xk'am b'i chila pa chom laj k'ijib'al chikaj.#3.16 Keje usuk' i saq laj tzij ile chi u'aljinsam i Dios chqe.
Currently Selected:
1 Timoteo 3: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
