လူႉၵႃႇ 13

လွင်ႈဢၼ်ပိၼ်ႇၸႂ်ၸူးၽြႃးပဵၼ်ၸဝ်ႈ

1ၼႂ်းၶိင်ႇမိူဝ်ႈၼၼ်ႉ မီးၵူၼ်းၵမ်ႈၽွင်ႈဢၼ်မႃးတီႈမၼ်းၸဝ်ႈသေလႄႈ လဝ်ႊလၢတ်ႈလွင်ႈဢၼ်ၶုၼ်ပီႉလတ်ႉဢဝ်လိူတ်ႈၵူၼ်းၵႃႇလီႉလႄးၵမ်ႈၽွင်ႈ လေႃးၵၼ်တင်းတူဝ်ယိတ်ႈဢၼ်ၶဝ်ပုၵ်ႈၸေႃႇၼၼ်ႉဢေႃႈ။- 2မၼ်းၸဝ်ႈၵေႃႈၶိုၼ်းလၢတ်ႈတီႈၶဝ်ၼၼ်ႉလႄႈဝႃႈ၊ ၵူၼ်းၵႃႇလီႉလႄးၸိူဝ်းၼၼ်ႉ ၵွပ်ႈပိူဝ်ႈဢၼ်လႆႈၶၢမ်ႇၸိူဝ်ႉၼင်ႇၼၼ်ၼၼ်ႉလႄႈ သူထၢင်ႇယဵင်ႈၶႅၼ်းမီးဢပႅတ်ႈယႂ်ႇၼႃႇသေၵူၼ်းၵႃႇလီႉလႄး တၢင်ႇတီႈတၢင်ႇလႅၼ်တင်းသဵင်ႈတင်းလူင်ႁိုဝ်။- 3ယဵင်ႈၶႅၼ်းမီးဢပႅတ်ႈဢမ်ႇၸႂ်ႈ။ သူၵႃႈမီးတင်းသဵင်ႈတင်းလူင်ၸိူဝ်းၼႆႉၵေႃႈ၊ ပေႃးဢမ်ႇမီးတၢင်းဢၼ်ၶုၵ်းၸႂ်လႆႈမႆႈၸႂ်ၸိုင်၊ တၵ်းႁွတ်ႈထိုင်တၢင်းလူႉတၢင်းလႅဝ်မိူၼ်မိူၼ်ၵၼ်ဢေႃႈ ဝႃႈၼႆၵဝ်ဝႃႈဢေႃႈ။- 4လိူဝ်သေၼၼ်ႉ၊ သူထၢင်ႇၶဝ်သိပ်းပႅတ်ႇၵေႃႉ ဢၼ်ထဵင်လၢင်း သီးလွင်ႇလူမ်ႉတဵင်လႄႈတၢႆၸိူဝ်းၼၼ်ႉ ယဵင်ႈၶႅၼ်းမီးဢပႅတ်ႈယႂ်ႇၼႃႇသေၵူၼ်းၵႃႈဢၼ်ယူႇၼႂ်းဝဵင်းယေႇရူႉသလႅမ်ႇတင်းသဵင်ႈတင်းလူင်ၼၼ်ႉႁိုဝ်။- 5ယဵင်ႈၶႅၼ်းမီးဢပႅတ်ႈဢမ်ႇၸႂ်ႈ၊ သူၵႃႈမီးတင်းသဵင်ႈတင်းလူင်ၸိူဝ်းၼႆႉၵေႃႈ၊ ပေႃးဢမ်ႇမီးတၢင်းဢၼ်ၶုၵ်းၸႂ်လႆႈမႆႈၸႂ်ၸိုင်၊ တၵ်းႁွတ်ႈထိုင်တၢင်းလူႉတၢင်းလႅဝ်မိူၼ်မိူၼ်ၵၼ်ဢေႃႈ ဝႃႈၼႆ၊ ၵဝ်ဝႃႈဢေႃႈ မၼ်းၸဝ်ႈဝႃႈၼင်ႇၼႆဢေႃႈ။

တူၼ်ႈမၢၵ်ႇလိူဝ်ႇဢၼ်ဢမ်ႇၸၢင်ႈမၢၵ်ႇ

6ၵမ်းၼၼ်ႉ မၼ်းၸဝ်ႈသမ်ႉၶိုၼ်းလၢတ်ႈဢူႉပမႃႇထႅင်ႈလႄႈဝႃႈၸမ်ႉ၊ တီႈၵူၼ်းၵေႃႉၼိုင်ႈ မီးတူၼ်ႈမၢၵ်ႇလိူဝ်ႇသၢင်းၽေႃးတူၼ်ႈၼိုင်ႈဢၼ်ၽုၵ်ႇဝႆႉၵႃႈၼႂ်းသူၼ်ဢူးယဵၼ်ႇမၼ်းဢေႃႈ။ ပိၵ်ႉသမ်ႉမၼ်းၵႂႃႇၵႃႈတီႈတူၼ်ႈၼၼ်ႉလႄႈႁႃမၢၵ်ႇမၼ်းသေၵေႃႈ၊ ဢမ်ႇထူပ်းဢမ်ႇႁၼ်။- 7မိူဝ်ႈၼၼ်ႉ မၼ်းလၢတ်ႈတီႈၵေႃႉဢၼ်ပႂ်ႉသူၼ်ဢူးယဵၼ်ႇၼၼ်ႉလႄႈဝႃႈ၊ သၢမ်ပီႊတဵမ်တဵမ်၊ ပိၵ်ႉသမ်ႉၵဝ်မႃးတီႈတူၼ်ႈမၢၵ်ႇလိူဝ်ႇသၢင်းၽေႃးၼႆႉလႄႈႁႃမၢၵ်ႇမၼ်းသေၵေႃႈ၊ ဢမ်ႇထူပ်းဢမ်ႇႁၼ်ၵႃႈသင်။ ၽၼ်းပႅတ်ႈသေတႃႉ။ ႁဵတ်းႁိုဝ်လႄႈႁႂ်ႈမၼ်းႁူၵ်ႉလိၼ်ၼႆႉယူႇၸိူဝ်ႉၼင်ႇႁိုဝ်၊ ဝႃႈၼႆ၊ မိူဝ်ႈဢၼ်မီးဢမိင်ႉၼၼ်ႉၸိုင်၊- 8ၵေႃႉဢၼ်ပႂ်ႉသူၼ်ဢူးယဵၼ်ႇၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပီႊၼႆႉၸိုင်၊ ယႃႇမၼ်းလူးၵွၼ်ႇၶႃႈ။ ၵဝ်ၶႃႈတၵ်းၶုတ်းယူင်းႁိမ်းငဝ်ႈမၼ်းသေလႄႈ သႂ်ႇၽုၼ်ႇလူးၵွၼ်ႇၶႃႈဢေႃႈ။- 9မၼ်းၸၢင်ႈၶႄးတၵ်းမၢၵ်ႇမၢၵ်ႇမႃးလူးၵွၼ်ႇၶႃႈဢေႃႈ။ ပေႃးဢမ်ႇၼၼ် ၵမ်းလိုၼ်းၸင်ႇၽၼ်းပႅတ်ႈသေၵမ်းၶႃႈ၊ ဝႃႈၼင်ႇၼႆဢေႃႈ၊ ဝႃႈၼႆ၊ မၼ်းၸဝ်ႈဝႃႈၼင်ႇၼႆဢေႃႈ။

မႄႈယိင်းလင်ၵွင်ႇယဵတ်ႇတူဝ်လႆႈမႃး

10ၼႂ်းဝၼ်းၵမ်သိၼ်ဝၼ်းၼိုင်ႈ၊ မိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးယူႇၼၼ်ႉၸိုင်၊- 11မီးမႄႈယိင်းဢၼ်ၽီၶဝ်ႈသိပ်းပႅတ်ႇပီႊတဵမ်တဵမ်လႄႈ လႆႈၶၢမ်ႇတၢင်းဢၼ်တၢင်းၶႆႈတၢင်းပဵၼ်ၸပ်းတူဝ်ယူႇၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉလင်ၵွင်ႇလႄႈ ဢမ်ႇယဵတ်ႇတူဝ်မၼ်းလႆႈသေဢိတ်း။- 12ယေႇသူႉႁၼ်မၼ်းၼၼ်ႉသေယဝ်ႉ၊ ႁွင်ႉမၼ်းမႃးတီႈမၼ်းၸဝ်ႈသေလႄႈလၢတ်ႈလႄႈဝႃႈ၊ မႄႈယိင်းဢိူၺ်း၊ မႂ်းၵၢင်းလွတ်ႈတင်းတၢင်းၶႆႈတၢင်းပဵၼ်မႂ်းယဝ်ႉ၊ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်။- 13မၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်မၼ်းလႄႈ မၼ်းၼၼ်ႉႁွတ်ႈထိုင်တၢင်းဢၼ်လုၵ်ႉၸုၵ်းသိုဝ်ႈသိုဝ်ႈလႄႈ ယွင်ႈယေႃးမုၼ်ၵျေးၸူးၽြႃးပဵၼ်ၸဝ်ႈဢေႃႈ။- 14ပိူဝ်ႈဢၼ်ယေႇသူႉ ႁႂ်ႈတၢင်းၶႆႈတၢင်းပဵၼ်ၼၼ်ႉႁၢႆၼႂ်းဝၼ်းၵမ်သိၼ်လႄႈ၊ ၵႄႇၸရွပ်ႈႁေႃးတြႃး မီးတၢင်းဢၼ်ၸႂ်မႆႈၶႆႈၸႃႉလႄႈလၢတ်ႈတီႈပရဵၵ်ႈသၢတ်ႈတင်းလၢႆၸိူဝ်းၼၼ်ႉလႄႈဝႃႈ၊ ပုၼ်ႈဢၼ်ၵူၼ်းတၵ်းလႆႈႁဵတ်းတၢင်းႁဵတ်းၸိုင် မီးႁူၵ်းဝၼ်းဢေႃႈ။ ၵႃႈၼႂ်းဝၼ်းၸိူဝ်းၼၼ်ႉ မႃးလႄႈၶၢမ်ႇၵျေးၸူးတၢင်းဢၼ်ႁႂ်ႈ တၢင်းၶႆႈတၢင်းပဵၼ်ႁၢႆတႃႉ။ ၼႂ်းဝၼ်းၵမ်သိၼ်၊ ယႃႇပေမႃး၊ ယႃႇပေၶၢမ်ႇ၊ ဝႃႈၼင်ႇၼႆဢေႃႈ။- 15ၸဝ်ႈၽြႃးၵေႃႈၶိုၼ်းလၢတ်ႈလႄႈဝႃႈ၊ ၵူၼ်းဢၼ်ၸၢင်ႈထိမ်ႇၸၢင်ႈမႅပ်းတင်းလၢႆၶဝ်ဢိူၺ်း၊ ၼႂ်းဝၼ်းၵမ်သိၼ် သူၵႃႈမီးတင်းသဵင်ႈတင်းလူင်ၼႆႉပွႆႇဝူဝ်းဢိၵ်ႇတင်းလီႈဢွၵ်ႇသေၵႃႈၼႂ်းၶွၵ်ႈလႄႈ ဢဝ်ၵႂႃႇႁႂ်ႈလႆႈပၼ်ၵိၼ်ၼမ်ႉယူႇဢမ်ႇၸႂ်ႈႁိုဝ်။- 16ၵေႃႉဢၼ်ပဵၼ်လုၵ်ႈယိင်းဢႃႇပြႃႇႁၢမ်ႇဢၼ်ၸႃႇတၢၼ်ႇမတ်ႉၽုၵ်ႇဝႆႉ သိပ်းပႅတ်ႇပီႊတဵမ်တဵမ်ၼႆႉ ၼႂ်းဝၼ်းၵမ်သိၼ်ဢမ်ႇထုၵ်ႇလီၶၢမ်ႇတၢင်းဢၼ်ပွႆႇလွတ်ႈၵႃႈၼႂ်းတၢင်းဢၼ်မတ်ႉၽုၵ်ႇဝႆႉၼႆႁိုဝ်။ ဝႃႈၼင်ႇၼႆဢေႃႈ။- 17မၼ်းၸဝ်ႈလၢတ်ႈၸိူဝ်ႉၼင်ႇၼႆသေယဝ်ႉ၊ ၶဝ်ၸိူဝ်းဢၼ်ယူႇၽၢႆႇၼိုင်ႈတင်းမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉ မီးတၢင်းဢၼ်လီဢူၵ်းလီဢၢႆလႄႈ ၵူၼ်းဢၼ်ၸူႉဢၼ်တုမ်တင်းသဵင်ႈတင်းလူင် သိူဝ်းၸူမ်းမူၼ်ႈပျေႃႇၼႂ်းလွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းၼမ်ၼႃႇၼၼ်ႉဢေႃႈ။

ၵႂၢမ်းဢူႉပမႃႇလွင်ႈၽၼ်းၽၵ်းၵၢတ်ႇလႄႈၸိူဝ်ႉပႅင်ႈ

(တူၺ်း၊ မၢတ်ႈ 13:31-32။ မႃႇ 4:30-32။ မၢတ်ႈ 13:33)

18မၼ်းၸဝ်ႈသမ်ႉၶိုၼ်းဝႃႈထႅင်ႈၸမ်ႉ၊ မိူင်းၽြႃးပဵၼ်ၸဝ်ႈ မိူၼ်လွင်ႈတၢင်းၸိူဝ်ႉၼင်ႇႁိုဝ်။ တၵ်းလႆႈၼႄပျႃးဢူႉပမႃႇပုင်ႇမၼ်းၸိူဝ်ႉၼင်ႇႁိုဝ်။- 19မိူၼ်ၸိူဝ်ႉၼင်ႇၽၼ်းၽၵ်းၵၢတ်ႇမဵတ်ႉၼိုင်ႈဢၼ်ၵူၼ်းၵေႃႉၼိုင်ႈ ဢဝ်ၽုၵ်ႇသႂ်ႇၵႃႈၼႂ်းသူၼ်မၼ်းၼၼ်ႉဢေႃႈ။ မဵတ်ႉၼၼ်ႉယႂ်ႇမႃးလႄႈပဵၼ်တူၼ်ႈလူင်ဢေႃႈ။ ၼူၵ်ႉၵၢင်ႁၢဝ်တင်းလၢႆၵေႃႈ မႃးလိုဝ်ႈမႃးသဝ်းၵႃႈၼႂ်းၵိင်ႇမၼ်းၶႃႊမၼ်းယူႇဢေႃႈ၊ ဝႃႈၼင်ႇၼႆဢေႃႈ။

20မၼ်းၸဝ်ႈသမ်ႉၶိုၼ်းဝႃႈထႅင်ႈၸမ်ႉ၊ မိူင်းၽြႃးပဵၼ်ၸဝ်ႈ တၵ်းလႆႈၼႄပျႃး ဢူႉပမႃႇပုင်ႇမၼ်းၸိူဝ်ႉၼင်ႇႁိုဝ်။- 21မိူၼ်ၸိူဝ်ႉၼင်ႇၸိူဝ်ႉပႅင်ႈဢၼ်မႄႈယိင်းၵေႃႉၼိုင်ႈဢဝ်သႂ်ႇၵႃႈၼႂ်းၽွင်ၶဝ်ႈမုၼ်းသၢမ်တၢင် တေႃႇထိုင်ႁွတ်ႈၸိူဝ်ႉပႅင်ႈၼၼ်ႉႁႂ်ႈတင်းသဵင်ႈတင်းလူင်ပွင်းၶိုၼ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

တၢင်းဢၼ်သွၼ်ပၼ်လွင်ႈၽၵ်းတူၵႅပ်ႈ

(တူၺ်း၊ မၢတ်ႈ 7:13-14၊21-23)

22မိူဝ်ႈၼၼ်ႉ မၼ်းၸဝ်ႈတေႇသႃႉၸႃႇရီႇလႄႇလဵပ်ႈၵႃႈၼႂ်းဝၢၼ်ႈၼႂ်းဝဵင်းတင်းလၢႆလႄႈ သင်ႇသွၼ်သုင်းမႃႉပၼ်ယူႇ၊ ၸွမ်းတၢင်းၵႂႃႇၵႃႈတီႈဝဵင်းယေႇရူႉသလႅမ်ႇၼၼ်ႉယူႇဢေႃႈ။- 23ၵူၼ်းၵေႃႉၼိုင်ႈၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း၊ ၶဝ်ၸိူဝ်းဢၼ်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉ မီးၵေႇၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 24မၼ်းၸဝ်ႈၵေႃႈလၢတ်ႈလႄႈဝႃႈ၊ ၵျူဝ်းၸႃးႁႂ်ႈလႆႈၶဝ်ႈၽၵ်းတူဢၼ်ၵႅပ်ႈၼၼ်ႉတႃႉ။ လွင်ႈမၼ်းၸမ်ႉ ပိၵ်ႉသမ်ႉၵူၼ်းၼမ်ၼႃႇမီးဢလူဝ်ႇၶႂ်ႈၶဝ်ႈသေၵေႃႈ ၶဝ်ဢမ်ႇတၢတ်ႈၼိူင်ႇလႆႈ။- 25ၸဝ်ႈႁိူၼ်းလုၵ်ႉလႄႈ ဢိုတ်းၽၵ်းတူဝႆႉသေယဝ်ႉ၊ ပိၵ်ႉသမ်ႉသူၸုၵ်းယူႇၵႃႈၼွၵ်ႈလႄႈ တွႆႇၽၵ်းတူယူႇသေလႄႈလဝ်ႊယွၼ်းလႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်း၊ ၽုၺ်ႇပၼ်တီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆသေၵေႃႈ၊ မၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ လွင်ႈဢၼ်သူၼႆႉလုၵ်ႉၵႃႈလႂ်မႃးၸိုင်၊ ၵဝ်ဢမ်ႇႁူႉ၊ ဝႃႈၼင်ႇၼႆဢေႃႈ။- 26မိူဝ်ႈၼၼ်ႉ သူၵေႃႈတၵ်းၶိုၼ်းလဝ်ႊလၢတ်ႈလႄႈဝႃႈ၊ ႁဝ်းၶႃႈလႆႈၵိၼ်လႆႈၶူပ်းၵႃႈတီႈၽၢႆႇၼႃႈၸဝ်ႈႁဝ်းယဝ်ႉၶႃႈယဝ်ႉ။ ၼႂ်းသဵၼ်ႈတၢင်းဝၢၼ်ႈဝဵင်းႁဝ်းၶႃႈတင်းလၢႆၵေႃႈ၊ ၸဝ်ႈႁဝ်းလႆႈသင်ႇသွၼ်သုင်းမႃႉပၼ်ယဝ်ႉၶႃႈယဝ်ႉ။ ပိၵ်ႉသမ်ႉၶိုၼ်းဝႃႈၸိူဝ်ႉၼင်ႇၼႆသေၵေႃႈ၊- 27မၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈသူၸမ်ႉ၊ လွင်ႈဢၼ်သူလုၵ်ႉၵႃႈလႂ်မႃးၸိုင်၊ ၵဝ်ဢမ်ႇႁူႉ။ ၵူၼ်းၸိူဝ်းဢၼ် ႁဵတ်းလွင်ႈတၢင်းဢၼ်ဢမ်ႇတြႃးတင်းသဵင်ႈတင်းလူင်ၼႆႉဢိူၺ်း၊ ဝႄႈသေၵႃႈတီႈၵဝ်လႄႈၵႂႃႇတႃႉ၊ ဝႃႈၼင်ႇၼႆဢေႃႈ။- 28မိူဝ်ႈၼၼ်ႉ မိူဝ်ႈဢၼ်သူႁၼ်ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ဢိၵ်ႇတင်းပရေႃးၽႅတ်ႈတင်းသဵင်ႈတင်းလူင် လႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉလႄႈ သူလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈၵႃႈၼွၵ်ႈၼၼ်ႉၸိုင်၊ တၵ်းမီးတၢင်းဢၼ်ႁွင်ႉႁႆႈ ဢိၵ်ႇတင်းတၢင်းဢၼ်ၵတ်းၶဵဝ်ႈၵတ်းၽၼ်းဢေႃႈ။- 29မိူဝ်ႈၼၼ်ႉ ၵူၼ်းတင်းလၢႆတၵ်းလုၵ်ႉသေၵႃႈတီႈတၢင်းဝၼ်းဢွၵ်ႇ၊တၢင်းဝၼ်းတူၵ်း၊ တၢင်းႁွင်ႇ၊ တၢင်းၸၢၼ်းမႃးလႄႈ ဢိင်ယူႇၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ။- 30ၶဝ်ၸိူဝ်းဢၼ်တူၵ်းလိုၼ်းၵမ်ႈၽွင်ႈ တၵ်းတူၵ်းဢွၼ်တၢင်းဢေႃႈ။ ၶဝ်ၸိူဝ်းဢၼ်တူၵ်းဢွၼ်တၢင်းၵမ်ႈၽွင်ႈ တၵ်းတူၵ်းလိုၼ်းဢေႃႈ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉမႆႈၸႂ်ပုၼ်ႈဝဵင်းယေႇရူႉသလႅမ်ႇ

(တူၺ်း၊ မၢတ်ႈ 23:37-39)

31မိူဝ်ႈၼၼ်ႉ ၽႃႇရီႉသႄးၵမ်ႈၽွင်ႈ မႃးၵႃႈတီႈမၼ်းၸဝ်ႈသေလႄႈလဝ်ႊလၢတ်ႈလႄႈဝႃႈ၊ ဢွၵ်ႇၵႂႃႇသေၵႃႈတီႈၼႆႈသေၵမ်းၶႃႈ။ ၶုၼ်ႁေႇရူတ်ႈမီးတၢင်းၵျၢမ်ႇတၢင်းပွင် တၵ်းဢဝ်ၸဝ်ႈႁဝ်းတၢႆၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 32မၼ်းၸဝ်ႈၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၼႆႉတင်းဝၼ်းမိူဝ်ႈၽုၵ်ႈၸိုင်၊ၵဝ်ႁေႃႈၽီႁၢႆႉဢွၵ်ႇပႅတ်ႈလႄႈ ႁႂ်ႈတၢင်းၶႆႈတၢင်းပဵၼ်တင်းလၢႆႁၢႆယူႇဢေႃႈ။ မိူဝ်ႈဢၼ်ထူၼ်ႈထိုင်သၢမ်ဝၼ်းၼၼ်ႉၸိုင်၊ ၵဝ်တၵ်းႁွတ်ႈထိုင်တၢင်းဢၼ်ပျေႉၸုမ်ႇဢေႃႈ ဝႃႈၼႆ၊ သူၵႂႃႇလႄႈလဝ်ႊလၢတ်ႈတီႈမႃလိၼ်ၼၼ်ႉတႃႉ။- 33ၼႂ်းဝႃႈၼၼ်သေၵေႃႈ ၼႂ်းဝၼ်းမိူဝ်ႈၼႆႉ ဝၼ်းမိူဝ်ႈၽုၵ်ႈ၊ ဝၼ်းမိူဝ်ႈႁိုဝ်း ၵဝ်တၵ်းလႆႈၵႂႃႇယူႇလူးၵွၼ်ႇဢေႃႈ။ လွင်ႈမၼ်းၸမ်ႉ လိူဝ်သေၵႃႈတီႈဝဵင်းယေႇရူႉသလႅမ်ႇၼၼ်ႉ၊ ပရေႃးၽႅတ်ႈဢမ်ႇလႆႈလူႉလႆႈလႅဝ် ၵႃႈတီႈၼႂ်းတၢင်ႇတီႈတၢင်ႇလႅၼ်သေၵေႃႉသေၵူၼ်း။- 34ဢူဝ်း ဝဵင်းယေႇရူႉသလႅမ်ႇ၊ ဝဵင်းယေႇရူႉသလႅမ်ႇ ဢၼ်ဢဝ်ပရေႃးၽႅတ်ႈတင်းလၢႆတၢႆလႄႈ ဢဝ်မၢၵ်ႇႁိၼ်ထိမ်ႈၶဝ်ၸိူဝ်းဢၼ်ပွႆႇၸႂ်ႉမႃးၵႃႈတီႈမႂ်းတင်းလၢႆၼၼ်ႉသေႇသေႇၼႆႉဢိူၺ်း၊ ၸိူဝ်ႉၼင်ႇဢၼ်ၵႆႇမႄႈ ႁႂ်ႈလုၵ်ႈဢွၼ်ႇမၼ်းၸူႉၵၼ်တုမ်ၵၼ်တႂ်ႈပိၵ်ႇမၼ်းၼၼ်ႉ ၵဝ်မီးဢလူဝ်ႇ ၶႂ်ႈႁႂ်ႈလုၵ်ႈဢွၼ်ႇမႂ်းလႆႈၸူႉၵၼ်တုမ်ၵၼ်ယူႇ ဢမ်ႇႁူႉလၢႆၽဝ်ႇလၢႆပွၵ်ႈယဝ်ႉ။ မႂ်းၸမ်ႉ၊ ဢမ်ႇမီးဢလူဝ်ႇ။- 35တူၺ်းလူး၊ ႁိူၼ်းသူၼၼ်ႉၵိုတ်းဝႆႉတီႈသူလႄႈ ပဵၼ်တီႈဢၼ်ၽိတ်ႇၵူၼ်းငႅဝ်ၵူၼ်းဢေႃႈ။ ၵဝ်ဝႃႈတီႈသူၸမ်ႉ၊ တေႃႇထိုင်ႁွတ်ႈၸူဝ်ႈဢၼ်သူဢမ်ႇပႆႇလၢတ်ႈလႄႈဝႃႈ၊ ႁႂ်ႈၵေႃႉဢၼ်ပႃးတင်းဢၶႂၢင်ႉ ထႃႇဝရႃႉၽြႃးမႃးၼၼ်ႉမီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆၼၼ်ႉၸိုင်၊ ၸႃႉၸဵမ်တေႃႈလဵဝ်ၼႆႉလႄႈ သူတၵ်းဢမ်ႇလႆႈႁၼ်ၼႃႈၵဝ်၊ ဝႃႈၼင်ႇၼႆဢေႃႈ။

Currently Selected:

လူႉၵႃႇ 13: CBMS

Highlight

Copy