လူႉၵႃႇ 14

ၸဝ်ႈယေႇသူႉႁႂ်ႈတၢင်းပဵၼ်ၵူၼ်းၵေႃႉၼိုင်ႈႁၢႆ

1ဝၼ်းၵမ်သိၼ်ဝၼ်းၼိုင်ႈ၊ မိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းႁိူၼ်းၽႃႇရီႉသႄး ဢၼ်ပဵၼ်ဢရႃႇသီႉၵေႃႉၼိုင်ႈႁႂ်ႈလႆႈၵိၼ်တၢင်းၵိၼ်ၼၼ်ႉၸိုင်၊ ၶဝ်လွမ်တူၺ်းမၼ်းၸဝ်ႈယူႇဢေႃႈ။- 2ၵူၼ်းဢၼ်ပဵၼ်ၵႂ်ႈလႄႈၽေႃးၼၼ်ႉၵေႃႉၼိုင်ႈ မီးယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။- 3ယေႇသူႉထၢမ်ၽႃႇရီႉသႄး တင်းၵူၼ်းမေႃၵျၢမ်းၸိူဝ်းၼၼ်ႉလႄႈဝႃႈ၊ ၼႂ်းဝၼ်းၵမ်သိၼ် ထုၵ်ႇလီႁႂ်ႈတၢင်းၶႆႈတၢင်းပဵၼ်ႁၢႆႁိုဝ်။ ဢမ်ႇထုၵ်ႇလီႁႂ်ႈႁၢႆႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉယူႇတဵတ်ႇတဵတ်ႇယူႇဢေႃႈ။- 4မၼ်းၸဝ်ႈဢဝ်ၵေႃႉၼၼ်ႉလႄႈ ႁႂ်ႈၵၢင်းလွတ်ႈတင်းတၢင်းၶႆႈတၢင်းပဵၼ်ယဝ်ႉၸင်ႇပွႆႇၵႂႃႇသေဢေႃႈ။- 5တီႈပရဵၵ်ႈသၢတ်ႈၸိူဝ်းၼၼ်ႉၵေႃႈ မၼ်းၸဝ်ႈထၢမ်လႄႈဝႃႈ၊ ပေႃးလီႈသူလႂ်၊ ဝူဝ်းသူလႂ် တူၵ်းၵႃႈၼႂ်းလုၵ်းၼႂ်းထၢင်ဝၼ်းၵမ်သိၼ်ၸိုင်၊ ၼႂ်းသူၼႆႉ မီးၵေႃႉဢၼ်ဢမ်ႇတိုတ်ႉၸၼ်ဢဝ်တၢင်ႇၵမ်းလဵဝ်ၼၼ်ႉသေၵေႃႉသေၵူၼ်းႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 6ၶဝ်ၼၼ်ႉ ဢမ်ႇၶိုၼ်းလၢတ်ႈၵႂၢမ်းသေၵမ်းလႆႈ။- 7မိူဝ်ႈဢၼ်မၼ်းၸဝ်ႈႁၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းမႃးၼၼ်ႉ လိူၵ်ႈၵဵပ်းဢဝ်တီႈယူႇတီႈၼင်ႈဢၼ်သုင်မျၢတ်ႈတင်းလၢႆယူႇၼၼ်ႉၸိုင်၊ မၼ်းၸဝ်ႈလၢတ်ႈၵႂၢမ်းဢူႉပမႃႇတီႈၶဝ်ၼၼ်ႉလႄႈဝႃႈၸမ်ႉ၊- 8မိူဝ်ႈဢၼ်ပိူၼ်ႈႁွင်ႉပၢင်းမႂ်းၵႂႃႇၵႃႈတီႈပွႆးမင်ႇၵလႃႇၼၼ်ႉၸိုင်၊ ယႃႇပေဢိင်ယူႇၵႃႈတီႈဢၼ်ပဵၼ်တီႈယူႇဢၼ်သုင်ဢၼ်မျၢတ်ႈၼၼ်ႉ။ ပေႃးဢိင်ယူႇၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်ၵေႃႉဢၼ်ယဵင်ႈၶႅၼ်းမျၢတ်ႈၼႃႇသေမႂ်းမႃးၵႃႈတီႈပွႆးၼၼ်ႉ၊- 9ၵေႃႉဢၼ်ႁွင်ႉပၢင်းမႂ်းဢိၵ်ႇတင်းၵေႃႉၼၼ်ႉၼၼ်ႉတၵ်းမႃးသေလႄႈ လၢတ်ႈတီႈမႂ်းလႄႈဝႃႈ၊ ပၼ်တီႈယူႇၼႆႉၵႃႈတီႈၵေႃႉၼၼ်ႉတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ မႂ်းတၵ်းလႆႈမီးလွင်ႈတၢင်းဢၼ်လီဢူၵ်းလီဢၢႆလႄႈ လူင်းၵႂႃႇၸူးၵႃႈတီႈယူႇဢၼ်တႅမ်ႇပုၼ်ႉဢေႃႈ။- 10ၵူၺ်းၵႃႈ မိူဝ်ႈဢၼ်ပိူၼ်ႈႁွင်ႉပၢင်းမႂ်းၼၼ်ႉ၊ ၵႂႃႇလႄႈဢိင်ယူႇၵႃႈတီႈဢၼ်တႅမ်ႇတႃႉ။ ပေႃးဢိင်ယူႇၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်ၵေႃႉဢၼ်ႁွင်ႉပၢင်းမႂ်းၼၼ်ႉမႃးၼၼ်ႉ၊ မၼ်းတၵ်းလၢတ်ႈတီႈမႂ်းလႄႈဝႃႈ၊ ၵေႃႉသေႈဢိူၺ်း၊ ၶိုၼ်ႈၵႃႈတီႈဢၼ်သုင်သေၵမ်းၶႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ မႂ်းတၵ်းမီးသရေႇၵႃႈတီႈၽၢႆႇၼႃႈၶဝ်ၸိူဝ်းဢၼ်ဢိင်ယူႇလူၺ်ႈၵၼ်တင်းမႂ်းၸိူဝ်းၼၼ်ႉဢေႃႈ။- 11ၽူႈလႂ်သေဢမ်ႇဝႃႈ၊ ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉ တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊ ဝႃႈၼင်ႇၼႆဢေႃႈ။

12မၼ်းၸဝ်ႈသမ်ႉလၢတ်ႈတီႈ ၵေႃႉဢၼ်ႁွင်ႉပၢင်းမၼ်းၸဝ်ႈမႃးၼၼ်ႉထႅင်ႈလႄႈဝႃႈၸမ်ႉ၊ မိူဝ်ႈဢၼ်မႂ်းႁဵတ်းလဵင်ႉႁဵတ်းလူ ၶဝ်ႈၼႂ်ၶဝ်ႈၶမ်ႈၸိုင်၊ မႂ်းယႃႇပေႁွင်ႉပေပၢင်းၵေႃႉသေႈမႂ်း၊ ပီႈၼွင်ႉမႂ်း၊ ၸိူဝ်ႉၶိူဝ်းလဵဝ်ၵၼ်တင်းမႂ်း၊ ၵူၼ်းႁိူၼ်းၸမ်ၵၼ်တင်းမႂ်း ဢၼ်ၸၢင်ႈမၢၵ်ႈၸၢင်ႈမီးၸိူဝ်းၼၼ်ႉ။ ပေႃးႁွင်ႉပၢင်းၸိူဝ်ႉၼင်ႇၼၼ်ၸိုင်၊ ၵမ်းလိုၼ်းၶဝ်ၼၼ်ႉတၵ်းႁွင်ႉပၢင်းမႂ်းလႄႈ တွပ်ႇတႅၼ်းၶိုၼ်းၵျေးၸူးတီႈမႂ်းဢေႃႈ။- 13မိူဝ်ႈဢၼ်မႂ်းၶၢမ်ႇပွႆးၸိုင်၊ ႁွင်ႉပၢင်းဢဝ်ၶဝ်ၸိူဝ်းဢၼ်ယၢၵ်ႈၽၢၼ်၊ ၶဝ်ၸိူဝ်းဢၼ်ဢၢင်ႇၵႃႇလူႉ၊ ၶဝ်ၸိူဝ်းဢၼ်တိၼ်ပုတ်း၊ ၶဝ်ၸိူဝ်းဢၼ်တႃမွတ်ႇတင်းလၢႆၼၼ်ႉတႃႉ။- 14ပေႃးမႂ်းႁွင်ႉပၢင်းၸိူဝ်ႉၼင်ႇၼၼ်ၸိုင်၊ မႂ်းတၵ်းမီးမင်ႇၵလႃႇဢေႃႈ။ လွင်ႈမၼ်းၸမ်ႉ ပိူဝ်ႈဢၼ်ၶဝ်ၼၼ်ႉ ဢမ်ႇတွပ်ႇတႅၼ်းၶိုၼ်းၵျေးၸူးတီႈမႂ်းလႆႈလႄႈ ၼႂ်းၶိင်ႇမိူဝ်ႈဢၼ်ၶဝ်ၸိူဝ်းဢၼ်သိုဝ်ႈတေႃႇတင်းလၢႆလုၵ်ႉၶိုၼ်းပုၼ်ႉၼၼ်ႉ၊ မႂ်းတၵ်းလႆႈၶၢမ်ႇဢၵျူဝ်း တၢင်းဢၼ်လႆႈတွပ်ႇတႅၼ်းၶိုၼ်းၵျေးၸူးၼၼ်ႉဢေႃႈ၊ ဝႃႈၼင်ႇၼႆဢေႃႈ။

ၵႂၢမ်းဢူႉပမႃႇလွင်ႈပွႆးၶၢမ်ႇၶႅၵ်ႇလူင်

(တူၺ်း၊ မၢတ်ႈ 22:1-10)

15ၵူၼ်းဢၼ်ဢိင်ယူႇၵႃႈတီႈႁိမ်းၶူင်ႇတီႈၵိၼ်ၼၼ်ႉၵေႃႉၼိုင်ႈ ငိၼ်းၵႂၢမ်းမၼ်းၸဝ်ႈသေယဝ်ႉ၊ လဝ်ႊလၢတ်ႈလႄႈဝႃႈ၊ ၵေႃႉဢၼ်ၵိၼ်ၶဝ်ႈမုၼ်းၼႂ်းမိူင်းၽြႃးပဵၼ်ၸဝ်ႈၼၼ်ႉ မီးမင်ႇၵလႃႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 16မၼ်းၸဝ်ႈၵေႃႈလၢတ်ႈလႄႈဝႃႈ၊ ၵူၼ်းၵေႃႉၼိုင်ႈ ႁဵတ်းပွႆးလူင်လႄႈႁွင်ႉပၢင်းၵူၼ်းၼမ်ၼႃႇဢေႃႈ။- 17မိူဝ်ႈဢၼ်ထိုင်ၶိင်ႇဢၼ်ၶၢမ်ႇပွႆးၼၼ်ႉၸိုင်၊ မၼ်းပွႆႇၵူၼ်းၸႂ်ႉၵူၼ်းသွႆၵႂႃႇလႄႈ ႁႂ်ႈလၢတ်ႈတီႈၶဝ်ၸိူဝ်းဢၼ်မၼ်းႁွင်ႉပၢင်းၼၼ်ႉလႄႈဝႃႈ၊ မႃးသေၵမ်းၶႃႈ။ ႁႅၼ်းဝႆႉၵႃႈမီးၵူႈၸိူဝ်ႉၵူႈပိူင်ယဝ်ႉၶႃႈဢေႃႈ၊ ဝႃႈၼင်ႇၼႆလႄႈ၊- 18ၶဝ်တင်းသဵင်ႈတင်းလူင်ၼၼ်ႉ မီးၸႂ်ဢၼ်မိူၼ်မိူၼ်ၵၼ်သေလႄႈ ဢွၼ်ၵၼ်တွင်းပၢၼ်ႇယွၼ်းလွတ်ႈဢေႃႈ။ ၵေႃႉၼိုင်ႈတွင်းပၢၼ်ႇလႄႈဝႃႈ ၵဝ်ၶႃႈသိုဝ်ႉဢဝ်ၵႂၢၵ်ႈလိၼ်ယဝ်ႉၶႃႈယဝ်ႉ။ ၵဝ်ၶႃႈတၵ်းလႆႈၵႂႃႇတူၺ်းၶႃႈဢေႃႈ။ ပွႆႇလွတ်ႈၵဝ်ၶႃႈသေၵမ်းၶႃႈတႃႉ၊ ဝႃႈၼင်ႇၼႆဢေႃႈ။- 19ၵေႃႉၼိုင်ႈၵေႃႈတွင်းပၢၼ်ႇလႄႈဝႃႈ၊ ၵဝ်ၶႃႈသိုဝ်ႉဢဝ်ဝူဝ်းႁႃႈၵူႈယဝ်ႉၶႃႈယဝ်ႉ။ ၵဝ်ၶႃႈၵႂႃႇႁႂ်ႈလႆႈၸၢမ်းတူၺ်းယူႇၶႃႈဢေႃႈ။ ပွႆႇလွတ်ႈၵဝ်ၶႃႈသေၵမ်းလူးၵွၼ်ႇၶႃႈ၊ ဝႃႈၼင်ႇၼႆဢေႃႈ။- 20ၵေႃႉၼိုင်ႈၵေႃႈတွင်းပၢၼ်ႇလႄႈဝႃႈ၊ ၵဝ်ၶႃႈဢဝ်မေးယဝ်ႉၶႃႈယဝ်ႉ။ ပိူဝ်ႈၼႆလႄႈ ၵဝ်ၶႃႈဢမ်ႇမႃးလႆႈၶႃႈ၊ ဝႃႈၼင်ႇၼႆဢေႃႈ။- 21ၵူၼ်းၸႂ်ႉၵူၼ်းသွႆၼၼ်ႉၶိုၼ်းမႃးလႄႈလဝ်ႊလၢတ်ႈလွင်ႈတၢင်းၸိူဝ်းၼၼ်ႉတီႈၸဝ်ႈမၼ်းဢေႃႈ။ မိူဝ်ႈၼၼ်ႉ ၸဝ်ႈႁိူၼ်းၼၼ်ႉၸႂ်မႆႈၶႆႈၸႃႉလႄႈ လၢတ်ႈတီႈၵူၼ်းၸႂ်ႉၵူၼ်းသွႆၼၼ်ႉလႄႈဝႃႈ၊ ၵႂႃႇၵႃႈတီႈၼႂ်းသဵၼ်ႈတၢင်းလူင် သဵၼ်ႈတၢင်းဢွၼ်ႇတင်းလၢႆ ၵႃႈၼႂ်းဝဵင်းၼႆႉၼၼ်ႉၶၼ်ၶၼ်ၽႂ်းၽႂ်းတႃႉ။ ႁွင်ႉဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ ၶဝ်ၸိူဝ်းဢၼ်ဢၢင်ႇၵႃႇလူႉ၊ ၶဝ်ၸိူဝ်းဢၼ်တိၼ်ပုတ်း၊ ၶဝ်ၸိူဝ်းဢၼ်တႃမွတ်ႇတင်းလၢႆၸိူဝ်းၼၼ်ႉမႃးၵႃႈတီႈၼႆႈတႃႉ၊ ဝႃႈၼင်ႇၼႆဢေႃႈ။- 22ၵူၼ်းၸႂ်ႉၵူၼ်းသွႆၼၼ်ႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ႁဵတ်းၵႃႈၼင်ႇဢၼ်ၸဝ်ႈႁဝ်းၸီႇယၢင်ႇၼၼ်ႉယဝ်ႉၶႃႈယဝ်ႉ။ ၼႂ်းဝႃႈၼၼ်သေၵေႃႈ တီႈဢၼ်ပဝ်ႇဢၼ်လၢပ်ႈယင်းမီးယူႇလူးၵွၼ်ႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 23ၸဝ်ႈၼၼ်ႉၵေႃႈလၢတ်ႈတီႈၵူၼ်းၸႂ်ႉၵူၼ်းသွႆမၼ်းလႄႈဝႃႈ၊ ဢွၵ်ႇၵႂႃႇၸူးၵႃႈတီႈၼႂ်းသဵၼ်ႈတၢင်းလူင်တင်းလၢႆ၊ ၵႃႈတီႈႁိမ်းႁူဝ်ႉဝၢင်းတင်းလၢႆပုၼ်ႉလူးၵွၼ်ႇတႃႉ။ တိုၵ်းၼိူင်ႇႁွင်ႉဢဝ်ၶဝ်မႃးႁႂ်ႈႁိူၼ်းၵဝ်ၼႆႉတဵမ်တႃႉ၊ ဝႃႈၼင်ႇၼႆဢေႃႈ။- 24ၵဝ်ဝႃႈတီႈသူၸမ်ႉ၊ ၶဝ်ၸိူဝ်းဢၼ်ႁွင်ႉပၢင်းမိူဝ်ႈဢွၼ်တၢင်းၼၼ်ႉ ဢမ်ႇလႆႈၶဝ်ႈပွႆးၵဝ်သေၵေႃႉသေၵူၼ်း၊ ဝႃႈၼင်ႇၼႆဢေႃႈ။

လွင်ႈတၢင်းဢၼ်ပဵၼ်တပႄးၸဝ်ႈ

(တူၺ်း၊ မၢတ်ႈ 10:37-38)

25ၵူၼ်းဢၼ်ၸူႉဢၼ်တုမ်ၼမ်ၼႃႇ ၸွမ်းလူၺ်ႈၵၼ်တင်းမၼ်းၸဝ်ႈယူႇဢေႃႈ။ မၼ်းၸဝ်ႈဝၢႆႇၶိုၼ်းသေယဝ်ႉ၊ လၢတ်ႈတီႈၶဝ်ၼၼ်ႉလႄႈဝႃႈ၊

26ၽူႈလႂ်သေဢမ်ႇဝႃႈ၊ ၵေႃႉဢၼ်မႃးၵႃႈတီႈၵဝ်လႄႈ ဢမ်ႇၸင်းပေႃႈမႄႈ၊ လုၵ်ႈလၢင်း၊ မေး၊ ပီႈၼွင်ႉၸဵမ်ယိင်းၸဵမ်ၸၢႆး ဢိၵ်ႇတင်းဢသၢၵ်ႈမၼ်းၼၼ်ႉ ၵေႃႉၼၼ်ႉ ဢမ်ႇပဵၼ်တပႄးၵဝ်လႆႈ။- 27ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇႁၢပ်ႇပႃးဢဝ်သဝ်လၵ်းဝႃးၵၢပ်ႈတူဝ်ၸဝ်ႈၵဝ်ႇသေလႄႈ ၸွမ်းပႃႈလင်ၵဝ်ၼၼ်ႉ၊ ၵေႃႉၼၼ်ႉဢမ်ႇပဵၼ်တပႄးၵဝ်လႆႈ။- 28ၼႂ်းသူၼႆႉ ပေႃးသေၵေႃႉသေၵူၼ်းမီးတၢင်းၵျၢမ်ႇတၢင်းပွင် တၵ်းတႄႇႁဵတ်းသဝ်လၢင်းၸိုင်၊ မၼ်းယင်းဢမ်ႇၼင်ႈယူႇဢွၼ်တၢင်းသေလႄႈ ၼပ်ႉဢၢၼ်ႇတူၺ်းၸရိပ်ႈဢၼ်တၵ်းသဵင်ႈၼၼ်ႉ ႁႂ်ႈလႆႈႁူႉလွင်ႈဢၼ်ငိုၼ်းတၵ်းၵုမ်ႇႁႂ်ႈသဝ်လၢင်းထၼ်ႈပေႃးယဝ်ႉတူဝ်ႈႁိုဝ်။ တၵ်းဢမ်ႇၵုမ်ႇႁိုဝ်ၼၼ်ႉလႄႈ တၵ်းယူႇႁိုဝ်။- 29ပေႃးဢမ်ႇၼၼ် ပေႃးမၼ်းတႄႇႁဵတ်းငဝ်ႈႁၢၵ်ႈသဝ်လၢင်းလႄႈ ဢမ်ႇႁႂ်ႈယဝ်ႉတူဝ်ႈလႆႈၸိုင်၊ ၵူၼ်းဢၼ်ႁူႉဢၼ်ႁၼ်တင်းသဵင်ႈတင်းလူင်တၵ်းသႄႉသွမ်းလႄႈဝႃႈ၊- 30ၵေႃႉၼႆႉႁဵတ်းၵေႃႇၸႃႉမၼ်းၵူၺ်းလႄႈ ဢမ်ႇႁဵတ်းႁႂ်ႈယဝ်ႉႁႂ်ႈတူဝ်ႈလႆႈ၊ ဝႃႈၼင်ႇၼႆဢေႃႈ။- 31ၼႄးၼိုင်ႈၸမ်ႉ၊ ပေႃးၶုၼ်ႁေႃၶမ်းသေပႃးပႃး မီးတၢင်းၵျၢမ်ႇတၢင်းပွင်တၵ်းတိုၵ်းသိုၵ်းၵၼ်တင်းၶုၼ်ႁေႃၶမ်းတၢင်ႇပႃးၸိုင်၊ မၼ်းယင်းဢမ်ႇၼင်ႈယူႇဢွၼ်တၢင်းသေလႄႈ ၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်မၼ်းတၵ်းဢဝ်ၵူၼ်းမိုၼ်ႇၼိုင်ႈ ႁပ်ႉၶၢမ်ႇၶုၼ်ႁေႃၶမ်းဢၼ်ဢဝ်ၵူၼ်းသွင်မိုၼ်ႇၶီႇမႃးၼၼ်ႉလႆႈႁိုဝ်။ တၵ်းဢမ်ႇႁပ်ႉၶၢမ်ႇလႆႈႁိုဝ်လႄႈ တၵ်းယူႇႁိုဝ်။- 32ပေႃးဢမ်ႇႁပ်ႉၶၢမ်ႇလႆႈဢမၢၼ်ႇၶၼ်ပဵၼ်ၸိုင်၊ မိူဝ်ႈဢၼ်ၶုၼ်ႁေႃၶမ်းတၢင်ႇပႃးၼၼ်ႉ ယင်းမီးယူႇတီႈဢၼ်ၵႆၼၼ်ႉ၊ မၼ်းၸၢင်ႈပွႆႇၸႂ်ႉၵူၼ်းၸႂ်ႉၵူၼ်းသွႆၵႂႃႇလႄႈ တွင်းပၢၼ်ႇႁႂ်ႈသိုၵ်းယဵၼ်ဢမ်ႇၸႂ်ႈႁိုဝ်။

33ပိူဝ်ႈၼႆလႄႈ မိူၼ်ၼင်ႇၼၼ် ၼႂ်းသူၼႆႉ၊ၽူႈလႂ်သေဢမ်ႇဝႃႈ၊ ၵေႃႉဢၼ်ဢမ်ႇပႄႇပႅတ်ႈ ၵႃႈဢၼ်မီးတီႈတူဝ်ၸဝ်ႈၵဝ်ႇတင်းသဵင်ႈတင်းလူင်ၼၼ်ႉလႄႈယူႇၼၼ်ႉ၊ ၵေႃႉၼၼ်ႉ ဢမ်ႇပဵၼ်တပႄးၵဝ်လႆႈ။

34ၵိူဝ်ၸမ်ႉ၊ လီဢေႃႈ။ ၼႂ်းဝႃႈၼၼ်သေၵေႃႈ ပေႃးဢၼ်ၸဵမ်းမၼ်းႁၢႆၵႂႃႇၸိုင်၊ တၵ်းၶိုၼ်းလႆႈဢၼ်ၸဵမ်းမၼ်းၸိူဝ်ႉၼင်ႇႁိုဝ်။- 35ဢမ်ႇလီပုၼ်ႈလိၼ်၊ ဢမ်ႇလီပုၼ်ႈၵွင်ၽုၼ်ႇ။ ၵူၼ်းတင်းလၢႆၸၢင်ႈဢဝ်ထိမ်ႈပႅတ်ႈၵႃႈၼွၵ်ႈသေဢေႃႈ။ ၵေႃႉဢၼ်မီးႁူဢၼ်လီငိၼ်းၼၼ်ႉၸမ်ႉ၊ ႁႂ်ႈငိၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

Currently Selected:

လူႉၵႃႇ 14: CBMS

Highlight

Copy