Popular Bible Verses from လူႉၵႃႇ 14

Share

ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​မႃး​ၵႃႈ​တီႈ​ၵဝ်​လႄႈ ဢမ်ႇ​ၸင်း​ပေႃႈ​မႄႈ၊ လုၵ်ႈ​လၢင်း၊ မေး၊ ပီႈ​ၼွင်ႉ​ၸဵမ်​ယိင်း​ၸဵမ်​ၸၢႆး ဢိၵ်ႇ​တင်း​ဢသၢၵ်ႈ​မၼ်း​ၼၼ်ႉ ၵေႃႉ​ၼၼ်ႉ ဢမ်ႇ​ပဵၼ်​တပႄး​ၵဝ်​လႆႈ။

ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​ဢမ်ႇ​ႁၢပ်ႇ​ပႃး​ဢဝ်​သဝ်​လၵ်း​ဝႃး​ၵၢပ်ႈ​တူဝ်​ၸဝ်ႈ​ၵဝ်ႇ​သေ​လႄႈ ၸွမ်း​ပႃႈ​လင်​ၵဝ်​ၼၼ်ႉ၊ ၵေႃႉ​ၼၼ်ႉ​ဢမ်ႇ​ပဵၼ်​တပႄး​ၵဝ်​လႆႈ။

ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​ယုၵ်ႉ​ယွင်ႈ​တူဝ်​ၸဝ်ႈ​ၵဝ်ႇ​ၼၼ်ႉ၊ ၵေႃႉ​ၼၼ်ႉ တၵ်း​လႆႈ​ၶၢမ်ႇ​တၢင်း​ဢၼ်​ၶျႃး​တူၵ်း​တီႈ​တႅမ်ႇ​ဢေႃႈ။ ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​ၶျႃး​တႅမ်ႇ​တူဝ်​ၸဝ်ႈ​ၵဝ်ႇ​ၼၼ်ႉ၊ ၵေႃႉ​ၼၼ်ႉ တၵ်း​လႆႈ​ၶၢမ်ႇ​တၢင်း​ဢၼ်​ယုၵ်ႉ​ယွင်ႈ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။

ပိူဝ်ႈ​ၼႆ​လႄႈ မိူၼ်​ၼင်ႇ​ၼၼ် ၼႂ်း​သူ​ၼႆႉ၊ၽူႈ​လႂ်​သေ​ဢမ်ႇ​ဝႃႈ၊ ၵေႃႉ​ဢၼ်​ဢမ်ႇ​ပႄႇ​ပႅတ်ႈ ၵႃႈ​ဢၼ်​မီး​တီႈ​တူဝ်​ၸဝ်ႈ​ၵဝ်ႇ​တင်း​သဵင်ႈ​တင်း​လူင်​ၼၼ်ႉ​လႄႈ​ယူႇ​ၼၼ်ႉ၊ ၵေႃႉ​ၼၼ်ႉ ဢမ်ႇ​ပဵၼ်​တပႄး​ၵဝ်​လႆႈ။

ၼႂ်း​သူ​ၼႆႉ ပေႃး​သေ​ၵေႃႉ​သေ​ၵူၼ်း​မီး​တၢင်း​ၵျၢမ်ႇ​တၢင်း​ပွင် တၵ်း​တႄႇ​ႁဵတ်း​သဝ်​လၢင်း​ၸိုင်၊ မၼ်း​ယင်း​ဢမ်ႇ​ၼင်ႈ​ယူႇ​ဢွၼ်​တၢင်း​သေ​လႄႈ ၼပ်ႉ​ဢၢၼ်ႇ​တူၺ်း​ၸရိပ်ႈ​ဢၼ်​တၵ်း​သဵင်ႈ​ၼၼ်ႉ ႁႂ်ႈ​လႆႈ​ႁူႉ​လွင်ႈ​ဢၼ်​ငိုၼ်း​တၵ်း​ၵုမ်ႇ​ႁႂ်ႈ​သဝ်​လၢင်း​ထၼ်ႈ​ပေႃး​ယဝ်ႉ​တူဝ်ႈ​ႁိုဝ်။ တၵ်း​ဢမ်ႇ​ၵုမ်ႇ​ႁိုဝ်​ၼၼ်ႉ​လႄႈ တၵ်း​ယူႇ​ႁိုဝ်။- ပေႃး​ဢမ်ႇ​ၼၼ် ပေႃး​မၼ်း​တႄႇ​ႁဵတ်း​ငဝ်ႈ​ႁၢၵ်ႈ​သဝ်​လၢင်း​လႄႈ ဢမ်ႇ​ႁႂ်ႈ​ယဝ်ႉ​တူဝ်ႈ​လႆႈ​ၸိုင်၊ ၵူၼ်း​ဢၼ်​ႁူႉ​ဢၼ်​ႁၼ်​တင်း​သဵင်ႈ​တင်း​လူင်​တၵ်း​သႄႉ​သွမ်း​လႄႈ​ဝႃႈ၊- ၵေႃႉ​ၼႆႉ​ႁဵတ်း​ၵေႃႇၸႃႉ​မၼ်း​ၵူၺ်း​လႄႈ ဢမ်ႇ​ႁဵတ်း​ႁႂ်ႈ​ယဝ်ႉ​ႁႂ်ႈ​တူဝ်ႈ​လႆႈ၊ ဝႃႈ​ၼင်ႇ​ၼႆ​ဢေႃႈ။

မိူဝ်ႈ​ဢၼ်​မႂ်း​ၶၢမ်ႇ​ပွႆး​ၸိုင်၊ ႁွင်ႉ​ပၢင်း​ဢဝ်​ၶဝ်​ၸိူဝ်း​ဢၼ်​ယၢၵ်ႈ​ၽၢၼ်၊ ၶဝ်​ၸိူဝ်း​ဢၼ်​ဢၢင်ႇ​ၵႃႇ​လူႉ၊ ၶဝ်​ၸိူဝ်း​ဢၼ်​တိၼ်​ပုတ်း၊ ၶဝ်​ၸိူဝ်း​ဢၼ်​တႃ​မွတ်ႇ​တင်း​လၢႆ​ၼၼ်ႉ​တႃႉ။- ပေႃး​မႂ်း​ႁွင်ႉ​ပၢင်း​ၸိူဝ်ႉ​ၼင်ႇ​ၼၼ်​ၸိုင်၊ မႂ်း​တၵ်း​မီး​မင်ႇၵလႃႇ​ဢေႃႈ။ လွင်ႈ​မၼ်း​ၸမ်ႉ ပိူဝ်ႈ​ဢၼ်​ၶဝ်​ၼၼ်ႉ ဢမ်ႇ​တွပ်ႇ​တႅၼ်း​ၶိုၼ်း​ၵျေး​ၸူး​တီႈ​မႂ်း​လႆႈ​လႄႈ ၼႂ်း​ၶိင်ႇ​မိူဝ်ႈ​ဢၼ်​ၶဝ်​ၸိူဝ်း​ဢၼ်​သိုဝ်ႈ​တေႃႇ​တင်း​လၢႆ​လုၵ်ႉ​ၶိုၼ်း​ပုၼ်ႉ​ၼၼ်ႉ၊ မႂ်း​တၵ်း​လႆႈ​ၶၢမ်ႇ​ဢၵျူဝ်း တၢင်း​ဢၼ်​လႆႈ​တွပ်ႇ​တႅၼ်း​ၶိုၼ်း​ၵျေး​ၸူး​ၼၼ်ႉ​ဢေႃႈ၊ ဝႃႈ​ၼင်ႇ​ၼႆ​ဢေႃႈ။

ၵိူဝ်​ၸမ်ႉ၊ လီ​ဢေႃႈ။ ၼႂ်း​ဝႃႈ​ၼၼ်​သေ​ၵေႃႈ ပေႃး​ဢၼ်​ၸဵမ်း​မၼ်း​ႁၢႆ​ၵႂႃႇ​ၸိုင်၊ တၵ်း​ၶိုၼ်း​လႆႈ​ဢၼ်​ၸဵမ်း​မၼ်း​ၸိူဝ်ႉ​ၼင်ႇ​ႁိုဝ်။- ဢမ်ႇ​လီ​ပုၼ်ႈ​လိၼ်၊ ဢမ်ႇ​လီ​ပုၼ်ႈ​ၵွင်​ၽုၼ်ႇ။ ၵူၼ်း​တင်း​လၢႆ​ၸၢင်ႈ​ဢဝ်​ထိမ်ႈ​ပႅတ်ႈ​ၵႃႈ​ၼွၵ်ႈ​သေ​ဢေႃႈ။ ၵေႃႉ​ဢၼ်​မီး​ႁူ​ဢၼ်​လီ​ငိၼ်း​ၼၼ်ႉ​ၸမ်ႉ၊ ႁႂ်ႈ​ငိၼ်း​သေ​ၵမ်း​လူၺ်ႈ၊ ဝႃႈ​ၼင်ႇ​ၼႆ​ဢေႃႈ။