လူႉၵႃႇ 12
12
လွင်ႈပၼ်သတီႉတီႈၵူၼ်းၼႃႈသိုဝ်ႈၸႂ်ၵူတ်ႉ
(တူၺ်း၊ မၢတ်ႈ 10:26-27)
1မိူဝ်ႈၼၼ်ႉ မိူဝ်ႈဢၼ်ၵူၼ်းလၢႆမိုၼ်ႇလၢႆႁဵင်ၼမ်ၼႃႇၸူႉၵၼ်တုမ်ၵၼ် ထၼ်ႈပေႃးၵေႃႉၼိုင်ႈလႄႈၵေႃႉၼိုင်ႈ ယဵပ်ႇၵၼ်ၶၢမ်ႈၵၼ်ယူႇၼၼ်ႉၸိုင်၊ မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈၸမ်ႉ၊ ဝႄႈပႅတ်ႈၸိူဝ်ႉပႅင်ႈၽႃႇရီႉသႄးတင်းလၢႆဢၼ်ဝႃႈ တၢင်းဢၼ်ၸၢင်ႈထိမ်ႇၸၢင်ႈမႅပ်းၼၼ်ႉတႃႉ။- 2လွင်ႈတၢင်းဢၼ်ႁူမ်ႇဝႆႉယဝ်ႉတင်းသဵင်ႈတင်းလူင် ဢၼ်တၵ်းဢမ်ႇလႆႈၶၢမ်ႇတၢင်းဢၼ်ပိုတ်ႇဢွၵ်ႇၼႄပျႃးၼၼ်ႉဢမ်ႇမီးသေၸိူဝ်ႉသေပိူင်။ လွင်ႈတၢင်းဢၼ်သိူင်ႇဝႆႉလပ်ႉဝႆႉယဝ်ႉတင်းသဵင်ႈတင်းလူင် ဢၼ်တၵ်းဢမ်ႇလႆႈၶၢမ်ႇတၢင်းဢၼ်လႆႈႁူႉလႆႈႁၼ်ၼၼ်ႉ ဢမ်ႇမီးသေၸိူဝ်ႉသေပိူင်။- 3ၵႃႈဢၼ်သူလၢတ်ႈၵႃႈၼႂ်းတီႈဢၼ်လပ်းသိင်ႇၼၼ်ႉၸိုင်၊ တၵ်းပဵၼ်တၢင်းဢၼ်လႆႈငိၼ်းၵႃႈၼႂ်းတီႈဢၼ်လႅင်းဢေႃႈ။ ၵႃႈဢၼ်သူလၢတ်ႈၵႃႈႁိမ်းႁူ ၵႃႈတီႈၼႂ်းလုၵ်းတၢင်းၼႂ်းၸိုင်၊ တၵ်းပဵၼ်တၢင်းဢၼ်ႁွင်ႉသႅၼ်ႇၵႃႈၼိူဝ်ၸွမ်ႁိူၼ်းဢေႃႈ။
4ၵေႃႉသေႈၵဝ်တင်းလၢႆဢိူၺ်း၊ ၵဝ်ဝႃႈတီႈသူၸမ်ႉ၊ ၶဝ်ၸိူဝ်းဢၼ်ဢဝ်တူဝ်ၶၼ်ႇထႃႇတၢႆလႄႈ ၵမ်းလိုၼ်းဢမ်ႇႁဵတ်းၵႃႈသင်လႆႈၼၼ်ႉၸိုင်၊ ယႃႇပေၵူဝ်။- 5တၵ်းလႆႈၵူဝ်ၽူႈလႂ်ဝႃႈၼႆၸမ်ႉ၊ ၵူဝ်ၵေႃႉဢၼ်ဢဝ်တူဝ်ၶၼ်ႇထႃႇတၢႆသေယဝ်ႉ၊ ၶျႃးတူၵ်းသႂ်ႇၵႃႈၼႂ်းငရၢႆးလႆႈၼၼ်ႉတႃႉ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူဝ်ၵေႃႉၼၼ်ႉတႃႉ။- 6ဢဝ်တင်းၵႃႈမၼ်းၶၼ်မၼ်း ဢႃႇသရီႉသွင်ၶႅပ်း သိုဝ်ႉဢဝ်ၼူၵ်ႉဢႅၼ်ႇၽႃႉလႆႈႁႃႈတူဝ်ဢမ်ႇၸႂ်ႈႁိုဝ်။ ၼူၵ်ႉဢႅၼ်ႇၽႃႉၼၼ်ႉသေတူဝ်ၵေႃႈၽြႃးပဵၼ်ၸဝ်ႈဢမ်ႇလိုမ်းပႅတ်ႈ။- 7ၶူၼ်ႁူဝ်သူၵေႃႈၼပ်ႉဢၢၼ်ႇဝႆႉတင်းသဵင်ႈတင်းလူင်ယဝ်ႉဢေႃႈ။ ပိူဝ်ႈၼႆလႄႈ ယႃႇပေၵူဝ်။ သူယဵင်ႈၶႅၼ်းမျၢတ်ႈၼႃႇသေၼူၵ်ႉဢႅၼ်ႇၽႃႉတင်းလၢႆၼၼ်ႉၼမ်ၼႃႇဢေႃႈ။
8ၵဝ်ဝႃႈတီႈသူၸမ်ႉ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ႁပ်ႉတုင်းဢဝ်ၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ၊ ၵေႃႉၼၼ်ႉၸိုင်၊ လုၵ်ႈၵူၼ်းတၵ်းႁပ်ႉတုင်းဢဝ်ၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆဢေႃႈ။- 9ၽူႈလႂ်သေဢမ်ႇဝႃႈ၊ ၵေႃႉဢၼ်ထဵင်ပႅတ်ႈၵဝ် ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ၊ ၵေႃႉၼၼ်ႉၸိုင်၊ ၵဝ်တၵ်းထဵင်ပႅတ်ႈ ၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆဢေႃႈ။- 10ၽူႈလႂ်သေဢမ်ႇဝႃႈ၊ ၵေႃႉဢၼ်ၽိတ်းသူပ်းၽိတ်းၵႂၢမ်းတီႈလုၵ်ႈၵူၼ်းၼၼ်ႉၸမ်ႉ၊ တၵ်းႁွတ်ႈထိုင်တၢင်းဢၼ်ပွႆႇလွတ်ႈဢပႅတ်ႈလႆႈယူႇဢေႃႈ။ ၵေႃႉဢၼ်သႄႉသွမ်းဝီႉၺိၺ်ႇဢၼ်မူတ်းၸၢင်ႇၸဝ်ႈၼၼ်ႉၸမ်ႉ၊ တၵ်းဢမ်ႇႁွတ်ႈထိုင်တၢင်းဢၼ်ပွႆႇလွတ်ႈဢပႅတ်ႈလႆႈ။- 11မိူဝ်ႈဢၼ်ၶဝ်ဢဝ်သူၵႂႃႇသူင်ႇၵႃႈတီႈၸရွပ်ႈႁေႃးတြႃးတင်းလၢႆ ၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ် ဢိၵ်ႇတင်းၶုၼ်တင်းလၢႆၼၼ်ႉၸိုင်၊ တၵ်းလႆႈၶိုၼ်းလၢတ်ႈၸိူဝ်ႉၼင်ႇႁိုဝ်။ တၵ်းလႆႈၶိုၼ်းလၢတ်ႈၵႃႈသင်ဝႃႈၼႆ၊ ယႃႇပေမႆႈၸႂ်။- 12လွင်ႈမၼ်းၸမ်ႉ လွင်ႈဢၼ်တၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉၸိုင် ဝီႉၺိၺ်ႇဢၼ်မူတ်းၸၢင်ႇၸဝ်ႈ တၵ်းသင်ႇသွၼ်ပၼ်ၼႂ်းၶိင်ႇမိူဝ်ႈၼႃႇရီႇၼၼ်ႉၵမ်းလဵဝ်ဢေႃႈ၊ ဝႃႈၼင်ႇၼႆဢေႃႈ။
ၵႂၢမ်းဢူႉပမႃႇလွင်ႈသထေးငိူဝ်ႈ
13ၵူၼ်းဢၼ်ပႃးၼႂ်း ၵူၼ်းဢၼ်ၸူႉဢၼ်တုမ်ၼၼ်ႉၵေႃႉၼိုင်ႈလဝ်ႊလၢတ်ႈလႄႈဝႃႈ၊ သြႃႇၸဝ်ႈ၊ ၶႅၼ်းတေႃႈမီးဢမိင်ႉႁႂ်ႈပီႈၸၢႆးၵဝ်ၶႃႈ ၽႄမႅင်ႇပၼ်ဢမူၺ်ႇဢုၵ်ႉၸႃႇၶူဝ်းလဵင်းတီႈၵဝ်ၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 14မၼ်းၸဝ်ႈၵေႃႈထၢမ်လႄႈဝႃႈ၊ ၵူၼ်းၵေႃႉၼႆႉဢိူၺ်း၊ ၽူႈလႂ်ၶၢၼ်းၵဝ်ဝႆႉႁႂ်ႈပဵၼ်ၵေႃႉဢၼ်လႆႈၸီႇယၢင်ႇလႄႈ ၽႄမႅင်ႇပၼ်ၶူဝ်းလဵင်းတီႈသူ၊ ဝႃႈၼင်ႇၼႆဢေႃႈ။- 15လိူဝ်သေၼၼ်ႉ၊ မၼ်းၸဝ်ႈလၢတ်ႈတီႈၶဝ်လႄႈဝႃႈ၊ ႁဵတ်းသတီႉလႄႈ ဝႄႈပႅတ်ႈလွင်ႈတၢင်းဢၼ်ၸႂ်လေႃးၽႃႉပူၼ်ႉလိူဝ်ၼၼ်ႉတႃႉ။ လွင်ႈမၼ်းၸမ်ႉ ပိၵ်ႉသမ်ႉမီးၸေးၸိမ်ႇသေၵေႃႈ၊ ဢသၢၵ်ႈဢမ်ႇတႄႇယူႇၵႃႈၼႂ်းၸေးၸိမ်ႇၼၼ်ႉ၊ ဝႃႈၼင်ႇၼႆဢေႃႈ။
16မၼ်းၸဝ်ႈသမ်ႉၶိုၼ်းလၢတ်ႈၵႂၢမ်းဢူႉပမႃႇထႅင်ႈလႄႈဝႃႈၸမ်ႉ၊ တီႈသထေးၵေႃႉၼိုင်ႈ လိၼ်မၼ်းလီလႄႈမၢၵ်ႇၶဝ်ႈမၢၵ်ႇၼမ်ႉမၼ်းၼမ်ၼႃႇဢေႃႈ။- 17သထေးၵေႃႉၼၼ်ႉ မီးတၢင်းၵျၢမ်ႇတၢင်းပွင်လႄႈဝႃႈ၊ ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။ တီႈဢၼ်တၵ်းသိမ်းမၢၵ်ႇၶဝ်ႈမၢၵ်ႇၼမ်ႉၸိူဝ်းၼၼ်ႉဝႆႉဢမ်ႇမီး။- 18တၢင်းၵျၢမ်ႇတၢင်းပွင်ဢၼ်ၵဝ်တၵ်းႁဵတ်းၸမ်ႉ၊ ၵဝ်ယႃႉႁိူၼ်းယႃႉယေးၵဝ်သေလႄႈ မႄးႁဵတ်းႁိူၼ်းႁဵတ်းယေးဢၼ်ယဵင်ႈၶႅၼ်းယႂ်ႇၼႃႇသေၼႆႉယဝ်ႉၸင်ႇ တၵ်းသိမ်းဢဝ်မၢၵ်ႇၶဝ်ႈမၢၵ်ႇၼမ်ႉဢုၵ်ႉၸႃႇၵဝ် ၵႃႈမီးတင်းသဵင်ႈတင်းလူင်ၸိူဝ်းၼၼ်ႉဝႆႉဢေႃႈ။- 19တီႈဝီႉၺိၺ်ႇၵဝ်ၵေႃႈ ၵဝ်တၵ်းလၢတ်ႈလႄႈဝႃႈ၊ ၸႂ်ဝီႉၺိၺ်ႇဢိူၺ်း၊ ပုၼ်ႈဢၼ်မႂ်းတၵ်းယိပ်းတၵ်းၵႅမ်း ပီႊမိူင်းၼမ်ၼႃႇၸိုင်၊ မႂ်းမီးဢုၵ်ႉၸႃႇၶူဝ်းလဵင်းၼမ်ၼႃႇဢၼ်ၸူႉသိမ်းဝႆႉယဝ်ႉ။ ယူႇၼိမ်ၼိမ်တႃႉ။ ၵိၼ်ၶူပ်းတႃႉ။ မူၼ်ႈပျေႃႇသိူဝ်းသႂၢင်ႇတႃႉဝႃႈၼႆ၊ မၼ်းမီးတၢင်းၵျၢမ်ႇတၢင်းပွင်ဢေႃႈ။- 20ၵူၺ်းၵႃႈ ၽြႃးပဵၼ်ၸဝ်ႈလၢတ်ႈတီႈမၼ်းလႄႈဝႃႈ၊ ၵူၼ်းမိူၵ်ႈဢိူၺ်း၊ ၼႂ်းၶိုၼ်းၼႆႉ၊ ၶိင်ႇဢၼ်သိမ်းဢဝ်ဝီႉၺိၺ်ႇမႂ်းၼၼ်ႉတၵ်းႁွတ်ႈထိုင်ဢေႃႈ။ ပိူဝ်ႈၼႆလႄႈ ဢုၵ်ႉၸႃႇၶူဝ်းလဵင်းဢၼ်မႂ်းသိမ်းဝႆႉၼၼ်ႉၸိုင်၊ ၽူႈလႂ်တၵ်းပိူင်ႇ၊ ဝႃႈၼင်ႇၼႆဢေႃႈ။- 21ပိူင်လဵဝ်ၵၼ်၊ ၵေႃႉဢၼ်သိမ်းပႅင်းၽၼ်ႇတႃႇဢုၵ်ႉၸႃႇပုၼ်ႈမၼ်းဝႆႉလႄႈ ယၢၵ်ႈၽၢၼ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉၸမ်ႉ၊ မိူၼ်ၸိူဝ်ႉၼင်ႇသထေးၼၼ်ႉယဝ်ႉ၊ ဝႃႈၼင်ႇၼႆဢေႃႈ။
တၢင်းဢၼ်ယုမ်ႇမၢတ်ႈဢိင်ပိုင်ႈထႃႇဝရႃႉၽြႃး
(တူၺ်း၊ မၢတ်ႈ 6:25-34)
22မၼ်းၸဝ်ႈသမ်ႉၶိုၼ်းလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈ၊ ပိူဝ်ႈၼႆလႄႈ ၵဝ်ဝႃႈတီႈသူၸမ်ႉ၊ တၵ်းလႆႈၵိၼ်ၸိူဝ်ႉၼင်ႇႁိုဝ်ဝႃႈၼႆ၊ ပုၼ်ႈဢသၢၵ်ႈလႄႈသင်၊ တၵ်းလႆႈၼုင်ႈၸိူဝ်ႉၼင်ႇႁိုဝ်ဝႃႈၼႆ၊ ပုၼ်ႈတူဝ်ၵႃႇယႃႉလႄႈသင်၊ ယႃႇပေမႆႈၸႂ်၊ ၵဝ်ဝႃႈၼင်ႇၼႆဢေႃႈ။- 23ဢသၢၵ်ႈမျၢတ်ႈသေတၢင်းၵိၼ်ဢမ်ႇၸႂ်ႈႁိုဝ်။ တူဝ်ၵႃႇယႃႉမျၢတ်ႈသေတၢင်းၼုင်ႈဢမ်ႇၸႂ်ႈႁိုဝ်။- 24တူၺ်းၵႃလမ်တင်းလၢႆလႄႈ ၶႆႈၸႂ်ဝူၼ်ႉၸႂ်တႃႉ။ ၼူၵ်ႉၸိူဝ်းၼၼ်ႉဢမ်ႇဝၢၼ်ႇဢမ်ႇသွမ်ႈၸိူဝ်ႉၽၼ်း၊ ဢမ်ႇပၢတ်ႇၶဝ်ႈထိူဝ်ၶဝ်ႈ၊ ဢမ်ႇမီးယွင်မီးယေး၊ ဢမ်ႇမီးတိူၵ်ႈၽၼ်ႇတႃႇၶူဝ်းလဵင်း။ ၼႂ်းဝႃႈၼၼ်သေၵေႃႈ ၽြႃးပဵၼ်ၸဝ်ႈလဵင်ႉလူၶဝ်ယူႇဢေႃႈ။ သူမျၢတ်ႈၼႃႇသေၼူၵ်ႉၸိူဝ်းၼၼ်ႉဢမ်ႇၸႂ်ႈႁိုဝ်။- 25ၵွပ်ႈပိူဝ်ႈတၢင်းဢၼ်မႆႈၸႂ်ၶီၸႂ်လႄႈ၊ ၼႂ်းသူၼႆႉ ၽူႈလႂ်တၵ်းႁႂ်ႈၸူဝ်ႈတႃႇဢသၢၵ်ႈတူဝ်ၸဝ်ႈၵဝ်ႇယၢဝ်းမႃးထႅင်ႈသေသွၵ်ႇၼိုင်ႈလႆႈ။- 26ပေႃးသူဢမ်ႇတၢတ်ႈၼိူင်ႇလႆႈ လွင်ႈတၢင်းဢၼ်လဵၵ်ႉဢၼ်ၼွႆႉသေပိူၼ်ႈၼႆႉၸိုင်၊ ႁဵတ်းႁိုဝ်လႄႈမႆႈၸႂ်ၶီၸႂ်လူၺ်ႈလွင်ႈ ဢၼ်ၵိုတ်းဢၼ်ၵျၢၼ်ႇတင်းလၢႆၸိူဝ်းၼၼ်ႉၼင်ႇႁိုဝ်။
27ၶႆႈၸႂ်တူၺ်းတူၼ်ႈမွၵ်ႇၼၢင်းပၢၼ်းတင်းလၢႆၼၼ်ႉ ယႂ်ႇမႃးၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်ၼၼ်ႉတႃႉ။ တူၼ်ႈၸိူဝ်းၼၼ်ႉဢမ်ႇႁဵတ်းတၢင်းႁဵတ်း၊ ဢမ်ႇပၼ်ႇ၊ ဢမ်ႇတေႃး။ ၼႂ်းဝႃႈၼၼ်သေၵေႃႈ ၵဝ်ဝႃႈတီႈသူၸမ်ႉ၊ တၢင်းၼုင်ႈတၢင်းမႆ ၶုၼ်လူင်သေႃးလမုၼ်ႇ ဢၼ်မီးမုၼ်ယႂ်ႇၼႃႇၼၼ်ႉ ဢမ်ႇၶိုတ်းတူၼ်ႈၸိူဝ်းၼၼ်ႉသေတူၼ်ႈ။- 28သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း၊ ပေႃးၽြႃးပဵၼ်ၸဝ်ႈဢဝ်တၢင်းၼုင်ႈတၢင်းမႆ ႁူမ်ႇလူမ်ႈတူၼ်ႈယိူဝ်ႈတူၼ်ႈယႃႈၵႃႈၼႂ်းထိူၼ်ႇ ဢၼ်ဝၼ်းမိူဝ်ႈၼႆႉဢသၢၵ်ႈလိပ်းယူႇလႄႈ ဝၼ်းမိူဝ်ႈၽုၵ်ႈဢဝ်ၶျႃးသႂ်ႇၵႃႈၼႂ်းမုၵ်ႉၽႆးၼၼ်ႉၸိူဝ်ႉၼင်ႇၼၼ်ၼၼ်ႉၸိုင်၊ မၼ်းၸဝ်ႈယဵင်ႈၶႅၼ်းတၵ်းဢဝ်တၢင်းၼုင်ႈတၢင်းမႆႁူမ်ႇလူမ်ႈသူၼႃႇသေၼၼ်ႉဢမ်ႇၸႂ်ႈႁိုဝ်။- 29ပိူဝ်ႈၼႆလႄႈ တၵ်းလႆႈၵိၼ်လႆႈၶူပ်းၸိူဝ်ႉၼင်ႇႁိုဝ်ဝႃႈၼႆ ယႃႇပေႁႃ။ လွင်ႈတၢင်းဢၼ်ၸႂ်ၼမ်ၸႂ်ယုင်ႈၵေႃႈ ယႃႇပေႁႂ်ႈမီး။- 30ၵူၼ်းလေႃးၵီႇၵူႈၸိူဝ်ႉၵူႈမဵဝ်း ၸၢင်ႈႁႃလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉဢေႃႈ။ ပေႃႈသူၼၼ်ႉ ႁူႉလွင်ႈဢၼ်သူလူဝ်ႇလွင်ႈတၢင်းၸိူဝ်းၼႆႉယူႇဢေႃႈ။- 31သူၸမ်ႉ၊ ႁႃမိူင်းၽြႃးပဵၼ်ၸဝ်ႈတႃႉ။ လိုၼ်းၼၼ်ႉ မၼ်းၸဝ်ႈတၵ်းပၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉထႅင်ႈဢေႃႈ။
လွင်ႈၽၼ်ႇတႃႇမိူင်းၵၢင်ႁၢဝ်
(တူၺ်း၊ မၢတ်ႈ 6:19-21)
32ၽုင်သူဝ်းဢွၼ်ႇၼႆႉဢိူၺ်း၊ သူယႃႇပေၵူဝ်။ ပေႃႈသူၼၼ်ႉမီးဢလူဝ်ႇၶႂ်ႈပၼ်မိူင်းတီႈသူဢေႃႈ။- 33ဢဝ်ဢုၵ်ႉၸႃႇၶူဝ်းလဵင်းသူၶၢႆသေလႄႈ ၽႄၸွၼ်းယိုၼ်ႈမႅင်ႇတီႈၵူၼ်းဢၼ်ယၢၵ်ႈဢၼ်ၽၢၼ်တင်းလၢႆတႃႉ။ ႁဵတ်းထူင်ပႃးဢၼ်ဢမ်ႇၸၢင်ႈၵဝ်ႇၸၢင်ႈမွင်တင်းလၢႆဢၼ်ဝႃႈ ၽၼ်ႇတႃႇဢၼ်ဢမ်ႇသုတ်းဢမ်ႇသဵင်ႈလႆႈၵႃႈၼိူဝ်မိူင်းၵၢင်ႁၢဝ်၊ တီႈဢၼ်ၽူႈလၵ်ႉဢမ်ႇႁွတ်ႈဢမ်ႇထိုင်၊ မူင်ႈတင်းလၢႆဢမ်ႇယႃႉပႅတ်ႈလႆႈၼၼ်ႉပုၼ်ႈသူတႃႉ။- 34လွင်ႈမၼ်းၸမ်ႉ ႁူဝ်ၸႂ်သူၸၢင်ႈမီးၵႃႈတီႈဢၼ်ၽၼ်ႇတႃႇဢုၵ်ႉၸႃႇသူမီးၼၼ်ႉဢေႃႈ။
လုၵ်ႈၸၢင်ႈဢၼ်မီးသတီႉလႄႈပႂ်ႉယူႇ
35သူႁတ်ႉသၢႆဢႅဝ်သူသေလႄႈ တႆႈဝၢၼ်ႇၽႆးတဵၼ်းယူႇတႃႉ။- 36ႁႂ်ႈပဵၼ်ၸိူဝ်ႉၼင်ႇၶႃႈတင်းလၢႆ ဢၼ်ပႂ်ႉလွင်ႈဢၼ်ၸဝ်ႈၶဝ်တၵ်းလုၵ်ႉသေၵႃႈတီႈပွႆးသွင်ႇမင်ႇၵလႃႇၶိုၼ်းမႃးၼၼ်ႉ ႁႂ်ႈလႆႈၽုၺ်ႇၽၵ်းတူပၼ်တီႈမၼ်းၵမ်းလဵဝ် မိူဝ်ႈဢၼ်မၼ်းမႃးလႄႈ တွႆႇၽၵ်းတူၼၼ်ႉတႃႉ။- 37ၶႃႈၸိူဝ်းဢၼ်ၸဝ်ႈၶဝ်ၶိုၼ်းမႃးလႄႈ ထူပ်းႁၼ်ၶဝ်ပႂ်ႉယူႇၼၼ်ႉမီးမင်ႇၵလႃႇဢေႃႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၸဝ်ႈၼၼ်ႉ ႁတ်ႉသၢႆဢႅဝ်သေလႄႈ ႁႂ်ႈၶႃႈၸိူဝ်းၼၼ်ႉဢိင်ယူႇႁိမ်းတီႈၵိၼ်သေယဝ်ႉ၊ တူဝ်မၼ်းတၵ်းမႃးလႄႈ ႁဵတ်းလဵင်ႉႁဵတ်းလူၶဝ်ဢေႃႈ။- 38ၵၢင်ၶိုၼ်းၶိင်ႇဢၼ်ႁႆႇသွင်မွင်းသေဢမ်ႇဝႃႈ၊ ၶိင်ႇဢၼ်ႁႆႇသၢမ်မွင်းသေဢမ်ႇဝႃႈ၊ ပေႃးမၼ်းမႃးလႄႈထူပ်းႁၼ်ၸိူဝ်ႉၼင်ႇၼႆၼၼ်ႉၸိုင်၊ ၶႃႈၸိူဝ်းၼၼ်ႉမီးမင်ႇၵလႃႇဢေႃႈ။- 39ပေႃးၸဝ်ႈႁိူၼ်းႁူႉၶိင်ႇၼႃႇရီႇဢၼ်ၽူႈလၵ်ႉတၵ်းမႃးၼၼ်ႉ၊ လွင်ႈဢၼ်မၼ်းတၵ်းပႂ်ႉယူႇလႄႈ ဢမ်ႇပႅတ်ႈပၼ်ႁိူၼ်းမၼ်းႁႂ်ႈလႆႈၶၢမ်ႇတၢင်းဢၼ်မူင်ႇဢၼ်ယႃႉၼၼ်ႉၸိုင်၊ သူႁူႉယူႇဢေႃႈ။- 40ပိူဝ်ႈၼႆလႄႈ သူမႄးႁႅၼ်းဝႆႉသေလႄႈယူႇတႃႉ။ လွင်ႈမၼ်းၸမ်ႉ ၶိင်ႇၼႃႇရီႇဢၼ်သူဢမ်ႇထၢင်ႇဢမ်ႇထိူမ်ၼၼ်ႉ၊ လုၵ်ႈၵူၼ်းတၵ်းမႃးဢေႃႈ၊ ဝႃႈၼင်ႇၼႆဢေႃႈ။
41 ပေႇတရူႉၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း၊ၸဝ်ႈႁဝ်းလၢတ်ႈဢူႉပမႃႇၼႆႉပၼ်တီႈႁဝ်းၶႃႈႁိုဝ်။ လၢတ်ႈပၼ်တီႈၵူၼ်းတင်းသဵင်ႈတင်းလူင်ၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 42ၸဝ်ႈၽြႃးၵေႃႈလၢတ်ႈလႄႈဝႃႈ၊ ၽၼ်ႇတႃႇၸူဝ်း ဢၼ်မီးသဵတ်ႈၸႃႇတင်းသတီႉဢၼ်ၸဝ်ႈမၼ်းၶၢၼ်းဝႆႉၵႃႈၼိူဝ်ၵူၼ်းႁိူၼ်းၵူၼ်းယေးတင်းလၢႆ လွင်ႈၼင်ႇႁိုဝ်ၼႂ်းမိူဝ်ႈဢၼ်ၶိင်ႇထုၵ်ႇၼၼ်ႉ၊ မၼ်းတၵ်းလႆႈၽႄမႅင်ႇပၼ်တၢင်းၵိၼ်တၢင်းၶူပ်းတီႈၶဝ်ၼၼ်ႉၸမ်ႉ၊ ပဵၼ်ၽူႈလႂ်။- 43ၶႃႈဢၼ်ၸဝ်ႈမၼ်းၶိုၼ်းမႃးလႄႈ ထူပ်းႁၼ်မၼ်းႁဵတ်းၸိူဝ်ႉၼင်ႇၼႆယူႇၼၼ်ႉမီးမင်ႇၵလႃႇဢေႃႈ။- 44ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၸဝ်ႈမၼ်းတၵ်းၶၢၼ်းၶႃႈၼၼ်ႉဝႆႉၵႃႈၼိူဝ်ဢုၵ်ႉၸႃႇၶူဝ်းလဵင်းမၼ်း ၵႃႈမီးတင်းသဵင်ႈတင်းလူင်ဢေႃႈ။
45ပေႃးဢမ်ႇပဵၼ်ၸိူဝ်ႉၼင်ႇၼၼ်ၸမ်ႉ၊ ပေႃးၶႃႈၼၼ်ႉထၢင်ႇၼႂ်းၸႂ်လႄႈဝႃႈ၊ ၸဝ်ႈၵဝ်တၵ်းၼၢၼ်းမႃးဢေႃႈ၊ ဝႃႈၼင်ႇၼႆယူႇသေလႄႈ ယႅၼ်ႉထုပ်ႉၶႃႈၼင်ႇၵၼ်ၵၼ်ၸဵမ်ယိင်းၸဵမ်ၸၢႆးလႄႈ ၵိၼ်ၶူပ်းမဝ်းလဝ်ႈယူႇၸိုင်၊- 46ၶိင်ႇဝၼ်းဢၼ်ၶႃႈၼၼ်ႉဢမ်ႇမုင်ႈဢမ်ႇတူၺ်း၊ ၶိင်ႇၼႃႇရီႇဢၼ်ဢမ်ႇႁူႉဢမ်ႇငိၼ်းၼၼ်ႉ၊ ၸဝ်ႈမၼ်းတၵ်းႁွတ်ႈၽႅဝ်မႃးလႄႈ တႅပ်းၶႃႈၼၼ်ႉႁဵတ်းသွင်ပွတ်းသေယဝ်ႉ၊ ဢဝ်မၼ်းဝႆႉလူၺ်ႈၵၼ်တင်းၶဝ် ၸိူဝ်းဢၼ်ဢမ်ႇမီးသဵတ်ႈၸႃႇၼၼ်ႉဢေႃႈ။
47ၶႃႈဢၼ်ႁူႉဢလူဝ်ႇၸဝ်ႈမၼ်းယူႇလႄႈ ဢမ်ႇမႄးႁႅၼ်းဝႆႉဢမ်ႇႁဵတ်းၸွမ်းဢလူဝ်ႇၸဝ်ႈမၼ်းၼၼ်ႉ တၵ်းလႆႈၶၢမ်ႇတၢမ်ႇၼမ်ၼႃႇဢေႃႈ။- 48ၵေႃႉဢၼ်ဢမ်ႇႁူႉဢလူဝ်ႇၸဝ်ႈမၼ်းလႄႈ ႁဵတ်းမႅၼ်ႈလွင်ႈတၢင်းဢၼ်ထိူၵ်ႈၶၢမ်ႇတၢမ်ႇၼၼ်ႉၸမ်ႉ၊ တၵ်းလႆႈၶၢမ်ႇတၢမ်ႇၵေႇၵေႇဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်လႆႈၶၢမ်ႇၵျေးၸူးၼမ်ၼႃႇၼၼ်ႉ၊ ၵေႃႉၼၼ်ႉတၵ်းလႆႈတႅၼ်းၼမ်ၼႃႇဢေႃႈ။ တီႈၽူႈလႂ်သေဢမ်ႇဝႃႈ၊ တီႈၵေႃႉဢၼ်လႆႈဢဝ်ဢုၵ်ႉၸႃႇဢၢပ်ႈဝႆႉၼမ်ၼႃႇၼၼ်ႉ၊ တီႈၵေႃႉၼၼ်ႉတၵ်းယွၼ်းဢဝ်ၼမ်ၼႃႇဢေႃႈ။
လွင်ႈဢမ်ႇမီးတၢင်းၼိမ်လႄႈတၵ်းၽၢတ်ႇၽႄၵၼ်
(တူၺ်း၊ မၢတ်ႈ 10:34-36)
49ၵဝ်မႃးႁႂ်ႈလႆႈပွႆႇၽႆး ၵႃႈၼိူဝ်လိၼ်မိူင်းၼႆႉဢေႃႈ။ ၸူဝ်ႈဢၼ်ၽႆးၼၼ်ႉဢမ်ႇပႆႇၸပ်းၸိုင်၊ ဢလူဝ်ႇၵဝ် ဢမ်ႇပႆႇပျေႉၸုမ်ႇ။- 50ပပ်ႉတီႉၸမ်ႇဢၼ်ၼိုင်ႈၵေႃႈ ၵဝ်မီးလွင်ႈဢၼ်တၵ်းလႆႈၶၢမ်ႇဢေႃႈ။ ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇပပ်ႉတီႉၸမ်ႇၼၼ်ႉၸိုင်၊ ၵဝ်မီးတၢင်းဢၼ်ၵိတ်ႇၸႂ်ၵႅၼ်းၸႂ်ၼႃႇဢေႃႈ။- 51သူထၢင်ႇၵဝ်မႃး ႁႂ်ႈလႆႈပၼ်တၢင်းၼိမ်ၵႃႈၼိူဝ်လိၼ်မိူင်းၼႆႉႁိုဝ်။ ၵဝ်မႃးႁႂ်ႈလႆႈပၼ်ၸိူဝ်ႉၼင်ႇၼၼ်ဢမ်ႇၸႂ်ႈ။ ၵဝ်မႃးႁႂ်ႈၵေႃႉၼိုင်ႈလႄႈၵေႃႉၼိုင်ႈၽၢတ်ႇၵၼ်ယၢၼ်ၵၼ်ဢေႃႈ၊ ဝႃႈၼႆ၊ ၵဝ်ဝႃႈဢေႃႈ။- 52လွင်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၸႃႉၸဵမ်တေႃႈလဵဝ်ၼႆႉလႄႈ၊ ၵူၼ်းႁႃႈၵေႃႉ ဢၼ်ယူႇၵႃႈၼႂ်းႁိူၼ်းလင်ၼိုင်ႈၼၼ်ႉ၊ သွင်ၵေႃႉမုၵ်ႉၼိုင်ႈ၊ သၢမ်ၵေႃႉမုၵ်ႉၼိုင်ႈ၊ ၵေႃႉၼိုင်ႈလႄႈၵေႃႉၼိုင်ႈ တၵ်းၽၢတ်ႇၽႄၵၼ်ဢေႃႈ။- 53ပေႃႈတင်းလုၵ်ႈၸၢႆး၊ မႄႈတင်းလုၵ်ႈယိင်း၊ လုၵ်ႈယိင်းတင်းမႄႈ၊ ဢွၵ်ႇၼၢႆးတင်းလုၵ်ႈပႂ်ႉ၊ လုၵ်ႈပႂ်ႉတင်းဢွၵ်ႇၼၢႆး၊ ၵေႃႉၼိုင်ႈလႄႈၵေႃႉၼိုင်ႈ တၵ်းၽၢတ်ႇၽႄၵၼ်ဢေႃႈ၊ ဝႃႈၼင်ႇၼႆဢေႃႈ။
လွင်ႈဢၼ်ႁူႉၸႅင်ႈၽွင်းယၢမ်းၵႃႇလႃႉ
(တူၺ်း၊ မၢတ်ႈ 16:2-3)
54မၼ်းၸဝ်ႈသမ်ႉၶိုၼ်းလၢတ်ႈတီႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉထႅင်ႈလႄႈဝႃႈၸမ်ႉ၊ မိူဝ်ႈဢၼ်သူႁၼ်ၽႃႈၽူၼ် ၶိုၼ်ႈမႃးၵႃႈတီႈ ၼႃႈၽႃႉတၢင်းဝၼ်းတူၵ်းၸိုင်၊ သူၵေႃႉၼိုင်ႈလႄႈၵေႃႉၼိုင်ႈၸၢင်ႈလၢတ်ႈၵၼ်လႄႈဝႃႈ၊ ၽူၼ်တၵ်းတူၵ်းဢေႃႈ၊ ဝႃႈၼင်ႇၼႆဢေႃႈ။ ၵႃႈၼင်ႇဢၼ်ဝႃႈၼၼ်ႉၵေႃႈ ၸၢင်ႈပဵၼ်ဢေႃႈ။- 55မိူဝ်ႈဢၼ်သူႁၼ်လူမ်းၼႃႈတၢင်းၸၢၼ်းမႃးၼၼ်ႉၸိုင်၊ သူၸၢင်ႈလၢတ်ႈၵၼ်လႄႈဝႃႈ၊ လႅတ်ႇတၵ်းမႆႈၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။ ၵႃႈၼင်ႇဢၼ်ဝႃႈၼၼ်ႉၵေႃႈၸၢင်ႈပဵၼ်ဢေႃႈ။- 56သူၸိူဝ်းဢၼ်ၸၢင်ႈထိမ်ႇၸၢင်ႈမႅပ်းၼႆႉဢိူၺ်း၊ သူၶႆႈၸႂ်ၼႃႈလိၼ်မိူင်းဢိၵ်ႇတင်း ၼႃႈၽႃႉၵၢင်ႁၢဝ်လႄႈႁူႉလႆႈဢေႃႈ။ ႁဵတ်းၸိူဝ်ႉႁိုဝ်လႄႈ သူၶႆႈၸႂ်လွင်ႈၵၢပ်ႈၵႃႇလႃႉၶိင်ႇတေႃႈလဵဝ်ၼႆႉလႄႈ ဢမ်ႇႁူႉလႆႈၼင်ႇႁိုဝ်။- 57လိူဝ်သေၼၼ်ႉ၊ သူၶႆႈၸႂ်လူၺ်ႈလွင်ႈတြႃးတၢင်းဢၼ်သိုဝ်ႈတေႃႇလႄႈဢမ်ႇႁူႉလႆႈ ၵွပ်ႈပိူဝ်ႈၸိူဝ်ႉၼင်ႇႁိုဝ်။- 58မိူဝ်ႈဢၼ်မႂ်းၵႂႃႇလူၺ်ႈၵၼ်တင်းၵေႃႉဢၼ်ႁဵတ်းဢမူႉတီႈမႂ်းၼၼ်ႉ ၸူးၵႃႈတီႈၶုၼ်ၼၼ်ႉၸိုင်၊ ၵျူဝ်းၸႃးႁႂ်ႈဢမူႉပေႇ ၵႃႈတီႈၵၢင်တၢင်းတႃႉ။ ပေႃးဢမ်ႇၼၼ်ၸမ်ႉ၊ၵေႃႉဢၼ်ႁဵတ်းဢမူႉၼၼ်ႉ တၵ်းတိုတ်ႉၸၼ်ဢဝ်မႂ်းၵႂႃႇၸူးၵႃႈတီႈၶုၼ်လူင်ဢေႃႈ။ ၶုၼ်လူင်ၼၼ်ႉ တၵ်းဢဝ်မႂ်းဢၢပ်ႈပၼ်တီႈၵႄႇဢွၼ်ႇၸၢႆးလႄႈ ၵႄႇဢွၼ်ႇၸၢႆးၼၼ်ႉတၵ်းဢဝ်ၶင်ဝႆႉၵႃႈၼႂ်းထွင်ႇဢေႃႈ။- 59ၵဝ်ဝႃႈတီႈမႂ်းၸမ်ႉ၊ ၸူဝ်ႈဢၼ်မႂ်းဢမ်ႇပႆႇယေႃႇငိုၼ်း တေႃႇထိုင်ႁွတ်ႈပႅၵ်ႉသၢၼ်ႇဢမ်ႇၵိုတ်းဝႆႉသေၶႅပ်းၼၼ်ႉၸိုင်၊ ဢမ်ႇလႆႈဢွၵ်ႇၵႃႈၼႂ်းထွင်ႇ၊ ဝႃႈၼင်ႇၼႆဢေႃႈ။
Currently Selected:
လူႉၵႃႇ 12: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
