လူႉၵႃႇ 11
11
ၸဝ်ႈယေႇသူႉသွၼ်ပၼ်လွင်ႈသူးတွင်း
(တူၺ်း၊ မၢတ်ႈ 6:9-13။ မၢတ်ႈ 7:7-11)
1မိူဝ်ႈၼၼ်ႉ မၼ်းၸဝ်ႈသူးတွင်းယူႇၵႃႈၼႂ်းတီႈၼိုင်ႈလႄႈမိူဝ်ႈဢၼ်ယဝ်ႉၼၼ်ႉၸိုင်၊ တပႄးၸဝ်ႈၵေႃႉၼိုင်ႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶႅၼ်းတေႃႈသွၼ်ပၼ်တီႈႁဝ်းၶႃႈ ႁႂ်ႈႁဝ်းၶႃႈလႆႈသူးတွင်းမိူၼ်ၸိူဝ်ႉၼင်ႇဢၼ် ယူဝ်းႁၢၼ်ႇသွၼ်ပၼ်တီႈတပႄးမၼ်းတင်းလၢႆၼၼ်ႉသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 2မၼ်းၸဝ်ႈၵေႃႈလၢတ်ႈလႄႈဝႃႈ၊ မိူဝ်ႈဢၼ်သူသူးတွင်းၸိုင်၊ လွင်ႈဢၼ်သူတၵ်းလႆႈဝႃႈၸမ်ႉ၊ ဢူဝ်းပေႃႈ၊ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ်ရူဝ်ႇသေႇၵူဝ်ယမ်သေၵမ်းလူၺ်ႈတီႈၶႃႈ၊ ႁႂ်ႈမိူင်းၸဝ်ႈႁဝ်းတႄႇပဵၼ်သေၵမ်းလူၺ်ႈတီႈၶႃႈ၊- 3ၶႅၼ်းတေႃႈပၼ်တၢင်းၵိၼ်ဢၼ်ပေႃးၵုမ်ႇလဵင်ႉၸႂ်ၼၼ်ႉတီႈႁဝ်းၶႃႈ ၵူႈမိုဝ်ႉၵူႈဝၼ်းသေၵမ်းတီႈၶႃႈ၊- 4ပိူဝ်ႈဢၼ်ႁဝ်းၶႃႈ ပွႆႇလွတ်ႈဢပႅတ်ႈပိူၼ်ႈတၢင်ႇၵေႃႉၵႃႈဢၼ်ၽိတ်းပိူင်ႈႁဝ်းၶႃႈၼၼ်ႉလႄႈ၊ ၶႅၼ်းတေႃႈပွႆႇလွတ်ႈဢပႅတ်ႈႁဝ်းၶႃႈသေၵမ်းတီႈၶႃႈ၊ ဝႃႈၼႆ၊ သူးတွင်းတႃႉ၊ ဝႃႈၼင်ႇၼႆဢေႃႈ။- 5မၼ်းၸဝ်ႈသမ်ႉဝႃႈထႅင်ႈၸမ်ႉ၊ ၼႂ်းသူၵေႃႉၼိုင်ႈမီးၵေႃႉသေႈလႄႈ၊ ၶိင်ႇတဵင်ႈၶိုၼ်းမၼ်းၵႂႃႇၵႃႈတီႈႁိူၼ်းၵေႃႉသေႈမၼ်းၼၼ်ႉယဝ်ႉၸင်ႇ၊ လၢတ်ႈလႄႈဝႃႈ၊- 6ၵေႃႉသေႈဢိူၺ်း၊ ပိူဝ်ႈဢၼ်ၵေႃႉသေႈၵဝ်ၶႃႈၵေႃႉၼိုင်ႈ လုၵ်ႉသေတၢင်ႇတီႈတၢင်ႇလႅၼ်မႃးလႄႈႁွတ်ႈထိုင်ၵႃႈတီႈၵဝ်ၶႃႈယဝ်ႉ၊ ၵဝ်ၶႃႈဢမ်ႇမီးၵႃႈသင်ပုၼ်ႈဢၼ်တၵ်းလဵင်ႉတၵ်းလူမၼ်းလႄႈ ပၼ်ၵူႈၶဝ်ႈမုၼ်းသေသၢမ်ႁူၺ်ႇၼိုင်ႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 7ၵေႃႉၼၼ်ႉၵေႃႈ ယူႇၵႃႈၼႂ်းႁိူၼ်းသေလႄႈၶိုၼ်းလၢတ်ႈလႄႈဝႃႈ၊ ယႃႇပေယႃႉယူၵ်ႉၵဝ်။ ဢိုတ်းၽၵ်းတူဝႆႉယဝ်ႉ။ လုၵ်ႈလၢင်းၵဝ်တင်းလၢႆဢိၵ်ႇတင်းၵဝ်ၼွၼ်းယူႇယဝ်ႉ။ ၵဝ်ဢမ်ႇလုၵ်ႉပၼ်တီႈမႂ်းလႆႈ၊ ဝႃႈၼင်ႇၼႆသေၵေႃႈ၊- 8ၵဝ်ဝႃႈတီႈသူၸမ်ႉ၊ ပိၵ်ႉသမ်ႉၵေႃႉၼၼ်ႉဢမ်ႇလုၵ်ႉဢမ်ႇပၼ်ၵွပ်ႈပိူဝ်ႈဢၼ်ပဵၼ်ၵေႃႉပဵၼ်သေႈၼၼ်ႉသေၵေႃႈ၊ တၵ်းလုၵ်ႉပၼ်မၼ်းၵႃႈဢၼ်မၼ်းလူဝ်ႇၼၼ်ႉတီႈမၼ်း ၵွပ်ႈပိူဝ်ႈဢၼ်မၼ်းၸႂ်ဢမ်ႇလူႉလႄႈ ယွၼ်းယူႇတိၵ်ႈတိၵ်ႈၼၼ်ႉဢေႃႈ။- 9ၵဝ်သမ်ႉဝႃႈထႅင်ႈၸမ်ႉ၊ ယွၼ်းတႃႉ။ ပေႃးယွၼ်းၸိုင်တၵ်းလႆႈဢေႃႈ။ ႁႃတႃႉ။ ပေႃးႁႃၸိုင်တၵ်းထူပ်းဢေႃႈ။ တွႆႇၽၵ်းတူတႃႉ။ ပေႃးတွႆႇၸိုင်တၵ်းၽုၺ်ႇဢေႃႈ။- 10ၵေႃႉဢၼ်ယွၼ်းၸမ်ႉ၊ လႆႈဢေႃႈ။ ၵေႃႉဢၼ်ႁႃၵေႃႈထူပ်းဢေႃႈ။ တီႈၵေႃႉဢၼ်တွႆႇၽၵ်းတူၵေႃႈတၵ်းၽုၺ်ႇဢေႃႈ။
11ၼႂ်းသူၼႆႉ ပေႃးလုၵ်ႈဢွၼ်ႇယွၼ်းၶဝ်ႈမုၼ်းတီႈၵေႃႉဢၼ်ပဵၼ်ပေႃႈၼၼ်ႉၸိုင်၊ ပေႃႈၼၼ်ႉတၵ်းပၼ်မၢၵ်ႇႁိၼ်ႁိုဝ်။ ပေႃးယွၼ်းပႃၸိုင်၊ ပုၼ်ႈပႃၼၼ်ႉ၊ မၼ်းတၵ်းပၼ်ငူးႁိုဝ်။- 12ပေႃးယွၼ်းၶႆႇၸိုင်၊ မၼ်းတၵ်းပၼ်မႅင်းငေႃးႁိုဝ်။- 13ပိၵ်ႉသမ်ႉသူပဵၼ်ဢၼ်ႁၢႆႉမိူၵ်ႈယူႇသေၵေႃႈ၊ ပေႃးသူၸၢင်ႈပၼ်ၶိူင်ႈပိူင်ဢၼ်လီဢၼ်ငၢမ်းတီႈလုၵ်ႈလၢင်းသူယူႇၸိုင်၊ ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ ယဵင်ႈၶႅၼ်းတၵ်းပၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈတီႈၶဝ်ၸိူဝ်းဢၼ်သူးတွင်းယွၼ်းၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။
ၸဝ်ႈယေႇသူႉတင်းၶုၼ်ၽီႁၢႆႉပေႇလႃႉၸေႇပူႉလႃႉ
(တူၺ်း၊ မၢတ်ႈ 12:22-30။ မႃႇ 3:20-27)
14မိူဝ်ႈၼၼ်ႉ မၼ်းၸဝ်ႈႁေႃႈၽီႁၢႆႉဢၼ်ဢႃႉၼၼ်ႉဢွၵ်ႇပႅတ်ႈလႄႈ၊ ဝၢႆးသေၽီႁၢႆႉၼၼ်ႉဢွၵ်ႇၵႂႃႇသေယဝ်ႉ၊ ၵေႃႉဢၼ်ဢႃႉၼၼ်ႉလၢတ်ႈၵႂၢမ်းမႃးဢေႃႈ။ ၵူၼ်းဢၼ်ၸူႉဢၼ်တုမ်တင်းလၢႆၵေႃႈဢၢမ်းၼႃႇဢေႃႈ။
15ၵမ်ႈၽွင်ႈဝႃႈ ၵေႃႉၼႆႉဢိင်ပိုင်ႈၶုၼ်ၽီႁၢႆႉပေႇလႃႉၸေႇပူႉလႃႉသေလႄႈ ႁေႃႈၽီႁၢႆႉဢွၵ်ႇပႅတ်ႈဢေႃႈ၊ ဝႃႈၼင်ႇၼႆဢေႃႈ။
16ၵမ်ႈၽွင်ႈၵေႃႈၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၸိုင်၊ ယွၼ်းၼီႉမိၵ်ႈလၢၵ်ႈၶၼႃႇဢၼ်ပဵၼ်ၵႃႈၼိူဝ်ၽႃႉၵၢင်ႁၢဝ်ဢေႃႈ။- 17မၼ်းၸဝ်ႈႁူႉၸႅင်ႈတၢင်းၵျၢမ်ႇတၢင်းပွင်ၶဝ်ၼၼ်ႉယူႇသေလႄႈလၢတ်ႈလႄႈဝႃႈ၊ မိူင်းလႂ်သေဢမ်ႇဝႃႈ၊ ပေႃးဢမ်ႇထုၵ်ႇဢမ်ႇပေႃးၵၼ် ၽၢတ်ႇၽႄၵၼ်တင်းတူဝ်ၸဝ်ႈၵဝ်ႇယူႇၸိုင်၊ တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။ ႁိူၼ်းလႂ်သေဢမ်ႇဝႃႈ၊ ပေႃးဢမ်ႇထုၵ်ႇဢမ်ႇပေႃးၵၼ် ၽၢတ်ႇၽႄၵၼ်တင်းတူဝ်ၸဝ်ႈၵဝ်ႇယူႇၸိုင်၊ တၵ်းလူမ်ႉတၵ်းပင်းဢေႃႈ။- 18ၵႃႈၼင်ႇဢၼ်သူဝႃႈ၊ ၵဝ်ဢိင်ပိုင်ႈပေႇလႃႉၸေႇပူႉလႃႉသေလႄႈ ႁေႃႈၽီႁၢႆႉဢွၵ်ႇပႅတ်ႈ၊ ဝႃႈၼင်ႇၼႆၼၼ်ႉ၊ ပေႃးၸႃႇတၢၼ်ႇ ဢမ်ႇထုၵ်ႇဢမ်ႇပေႃးၵၼ် ၽၢတ်ႇၽႄၵၼ်တင်းတူဝ်ၸဝ်ႈၵဝ်ႇယူႇၸိုင်၊ မိူင်းမၼ်းၼၼ်ႉ ႁဵတ်းႁိုဝ်လႄႈတၵ်းတႄႇပဵၼ်လႆႈ။- 19ပေႃးၵဝ်ဢိင်ပိုင်ႈပေႇလႃႉၸေႇပူႉလႃႉသေလႄႈ ႁေႃႈၽီႁၢႆႉဢွၵ်ႇပႅတ်ႈၸိုင်၊ လုၵ်ႈလၢင်းသူဢိင်ပိုင်ႈၽူႈလႂ်သေလႄႈ ႁေႃႈၽီႁၢႆႉဢွၵ်ႇပႅတ်ႈ။ ပိူဝ်ႈၼႆလႄႈ ၶဝ်ၼၼ်ႉတၵ်းပဵၼ်ၵေႃႉဢၼ်ၸီႇယၢင်ႇတြႃးတီႈသူဢေႃႈ။- 20ပေႃးၵဝ်ဢိင်ပိုင်ႈ ၼိဝ်ႉမိုဝ်းၽြႃးပဵၼ်ၸဝ်ႈသေလႄႈ ႁေႃႈၽီႁၢႆႉဢွၵ်ႇပႅတ်ႈၸိုင်၊ မိူင်းၽြႃးပဵၼ်ၸဝ်ႈႁွတ်ႈမႃးၵႃႈတီႈသူဢမၢၼ်ႇၶၼ်ပဵၼ်ယဝ်ႉ။
21ၼႂ်းမိူဝ်ႈဢၼ်ၵူၼ်းႁႅင်းၵေႃႉၼိုင်ႈ မီးတင်းလၢၵ်ႈၼၢၵ်ႈၸေးၸုမ်ႇယူႇသေလႄႈ ပႂ်ႉႁိူၼ်းမၼ်းယူႇၼၼ်ႉၸိုင်၊ ၶူဝ်းလဵင်းမၼ်းၼၼ်ႉမီးယူႇလီလီငၢမ်းငၢမ်းဢေႃႈ။- 22ၵေႃႉဢၼ်ယဵင်ႈၶႅၼ်းႁႅင်းယႂ်ႇၼႃႇသေမၼ်းၼၼ်ႉမႃးလႄႈ ပႄႉၼႅင်ႇမၼ်းယဝ်ႉၸင်ႇ၊ တၵ်းသိမ်းဢဝ်လၢၵ်ႈၼၢၵ်ႈၸေးၸုမ်ႇဢၼ်မၼ်းဢိင်ပိုင်ႈၼၼ်ႉသေလႄႈ ဢဝ်ၶူဝ်းဢဝ်လဵင်းမၼ်းမႅင်ႇၵၼ်ပၼ်ၵၼ်ဢေႃႈ။
23ၵေႃႉဢၼ်ဢမ်ႇယူႇၽၢႆႇၵဝ်ၼၼ်ႉ ပဵၼ်ၽၢႆႇရၢၼ်ႇသူႇၵဝ်ဢေႃႈ။ ၵေႃႉဢၼ်ဢမ်ႇၸူႉဢမ်ႇသိမ်းလူၺ်ႈၵၼ်တင်းၵဝ်ၼၼ်ႉ ပဵၼ်ၵေႃႉဢၼ်ပိုၼ်မိူၵ်ႇပိုၼ်မိူဝ်ပႅတ်ႈဢေႃႈ။- 24ၽီဢၼ်ၵူဝ်ႈၵိူၵ်ႇၼၼ်ႉ၊ မိူဝ်ႈဢၼ်ဢွၵ်ႇသေၵႃႈၼႂ်းၵူၼ်းၵႂႃႇၸိုင်၊ ၸၢင်ႈၵႂႃႇလႄႇၵႃႈၼႂ်းတီႈဢၼ်ႁႅင်ႈဢၼ်ႁွင်တင်းလၢႆလႄႈ ႁႃတၢင်းၼိမ်ဢေႃႈ။ မိူဝ်ႈဢၼ်ဢမ်ႇထူပ်းဢမ်ႇႁၼ်ၸိုင်၊ မၼ်းဝႃႈ၊ၵဝ်တၵ်းၶိုၼ်းမိူဝ်း ၵႃႈတီႈႁိူၼ်းဢၼ်ၵဝ်ဢွၵ်ႇမႃးသေယဝ်ႉၼၼ်ႉလူးၵွၼ်ႇ၊ ဝႃႈၼင်ႇၼႆသေယဝ်ႉ၊- 25မိူဝ်ႈဢၼ်မိူဝ်းႁွတ်ႈမိူဝ်းထိုင်ၸိုင်၊ ထူပ်းႁၼ်ႁိူၼ်းၼၼ်ႉ မီးတၢင်းဢၼ်မႄးပတ်းမႄးၽဵဝ်ႈဝႆႉယူႇလႄႈ၊- 26သမ်ႉၵႂႃႇႁွင်ႉဢဝ်ၽီဢၼ်ႁၢႆႉမိူၵ်ႈၼႃႇသေမၼ်းၸဵတ်းၵေႃႉယဝ်ႉၸင်ႇ၊ ၶဝ်ႈၵႃႈၼႂ်းၵူၼ်းၼၼ်ႉသေလႄႈယူႇဢေႃႈ။ ၵေႃႉၼၼ်ႉၸမ်ႉ၊ ဢၼ်ပဵၼ်ၵမ်းလိုၼ်းၼၼ်ႉယဵင်ႈၶႅၼ်းႁၢႆႉၼႃႇသေ ဢၼ်ပဵၼ်ဢွၼ်တၢင်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
27ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်၊ မႄႈယိင်းၵေႃႉၼိုင်ႈ ယူႇၵႃႈၼႂ်းၵူၼ်းဢၼ်ၸူႉဢၼ်တုမ်ၼၼ်ႉသေလႄႈ ႁွင်ႉလဝ်ႊလၢတ်ႈလႄႈဝႃႈ၊ တွင်ႉဢၼ်ပႃးၸဝ်ႈႁဝ်းဢိၵ်ႇတင်းၼူမ်းဢၼ်ၸဝ်ႈႁဝ်းၸုပ်ႇၵိၼ်ၼၼ်ႉ မီးမင်ႇၵလႃႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 28မၼ်းၸဝ်ႈၵေႃႈလၢတ်ႈလႄႈဝႃႈ၊ ၵေႃႉဢၼ်ထွမ်ႇဢဝ်ၼုၵ်ႈၵပၢတ်ႈတြႃးၸဝ်ႈလႄႈၵမ်ၵျၢင်ႉၼၼ်ႉ မီးမင်ႇၵလႃႇဢၼ်မျၢတ်ႈၼႃႇဢေႃႈ၊ ဝႃႈၼင်ႇၼႆဢေႃႈ။
တၢင်းဢၼ်ယွၼ်းႁႂ်ႈႁဵတ်းၼႄတၼ်းၶူဝ်း
(တူၺ်း၊ မၢတ်ႈ 12:38-42)
29မိူဝ်ႈဢၼ်ၵူၼ်းဢၼ်ၸူႉဢၼ်တုမ်တင်းလၢႆၼၼ်ႉ ၼမ်ၵိုၼ်းမႃးၼႃႇလူင်လၢင်ယူႇၼၼ်ႉၸိုင်၊ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵူၼ်းမဵဝ်းၼႆႉ ပဵၼ်မဵဝ်းဢၼ်ႁၢႆႉမိူၵ်ႈဢေႃႈ။ ၶဝ်ယွၼ်းၼီႉမိၵ်ႈလၢၵ်ႈၶၼႃႇလႄႈ၊ လိူဝ်သေၼီႉမိၵ်ႈလၢၵ်ႈၶၼႃႇ ပရေႃးၽႅတ်ႈယူဝ်းၼႃႉၼၼ်ႉ ဢမ်ႇလႆႈၼႄပျႃးၼီႉမိၵ်ႈလၢၵ်ႈၶၼႃႇဢၼ်လႂ်တီႈၶဝ်။- 30ၸိူဝ်ႉၼင်ႇဢၼ်ယူဝ်းၼႃႉ ပဵၼ်ၼီႉမိၵ်ႈလၢၵ်ႈၶၼႃႇတီႈၵူၼ်းဝဵင်းၼီႉၼေႇဝူၺ်ႇတင်းလၢႆၼၼ်ႉ၊ လုၵ်ႈၵူၼ်းတၵ်းပဵၼ်တီႈၵူၼ်းမဵဝ်းၼႆႉဢေႃႈ။
31ၶိင်ႇမိူဝ်ႈဢၼ်ၸီႇယၢင်ႇတြႃးပုၼ်ႉၸိုင်၊ ၼၢင်းႁေႃၶမ်းမိူင်းတၢင်းၸၢၼ်းတၵ်းလုၵ်ႉယူႇၽၢႆႇၼိုင်ႈသေလႄႈ ႁႂ်ႈၵူၼ်းမဵဝ်းၼႆႉလႆႈၶၢမ်ႇတၢင်းသုမ်းဢေႃႈ။ လွင်ႈမၼ်းၸမ်ႉ ၼၢင်းႁေႃၶမ်းၼၼ်ႉ၊ လုၵ်ႉသေၵႃႈတီႈႁိမ်းလိၼ်သုတ်းပုၼ်ႉမႃး ႁႂ်ႈလႆႈထွမ်ႇလႆႈငိၼ်းၵႂၢမ်းပိင်ႇၺႃႇ ၶုၼ်လူင်သေႃးလမုၼ်ႇဢေႃႈ။ ၵႃႈတီႈၼႆႈၸမ်ႉ၊ မီးၵေႃႉဢၼ်ယႂ်ႇမျၢတ်ႈၼႃႇသေ သေႃးလမုၼ်ႇၼၼ်ႉဢေႃႈ။- 32ၶိင်ႇမိူဝ်ႈဢၼ်ၸီႇယၢင်ႇတြႃးပုၼ်ႉၸိုင်၊ ၵူၼ်းဝဵင်းၼီႉၼေႇဝူၺ်ႇၸိူဝ်းၼၼ်ႉ တၵ်းလုၵ်ႉယူႇၽၢႆႇၼိုင်ႈသေလႄႈ ႁႂ်ႈၵူၼ်းမဵဝ်းၼႆႉလႆႈၶၢမ်ႇတၢင်းသုမ်းဢေႃႈ။ လွင်ႈမၼ်းၸမ်ႉ ၶဝ်ၼၼ်ႉ ၵွပ်ႈပိူဝ်ႈၵႂၢမ်းဢၼ်ယူဝ်းၼႃႉႁေႃးလၢတ်ႈၼၼ်ႉလႄႈ ၶုၵ်းၸႂ်လႆႈမႆႈၸႂ်ဢေႃႈ။ ၵႃႈတီႈၼႆႈၸမ်ႉ၊ မီးၵေႃႉဢၼ်ယႂ်ႇမျၢတ်ႈၼႃႇသေယူဝ်းၼႃႉၼၼ်ႉဢေႃႈ။
လွင်ႈဢၼ်လႅင်းတူဝ်ၶၼ်ႇထႃႇ
(တူၺ်း၊ မၢတ်ႈ 5:15။ မၢတ်ႈ 6:22-23)
33ၵူၼ်းႁဝ်းၼႆႉ တႆႈဝၢၼ်ႇၽႆးတဵၼ်းသေလႄႈ ဢဝ်ႁူမ်ႇဝႆႉၵႃႈၼႂ်းတီႈဢၼ်လပ်ႉဢၼ်သိူင်ႇဢမ်ႇၸႂ်ႈ။ တႂ်ႈပဵတ်ႈတႂ်ႈၶွင်ႈၵေႃႈဢဝ်ႁူမ်ႇဝႆႉဢမ်ႇၸႂ်ႈ။ ၼင်ႇႁိုဝ်ၶဝ်ၸိူဝ်းဢၼ်ၶဝ်ႈမႃးတင်းလၢႆၼၼ်ႉ တၵ်းလႆႈဢၼ်လႅင်းမၼ်းၸိုင်၊ ၸၢင်ႈဢဝ်တၢင်ႇဝႆႉၵႃႈၼိူဝ်ၶူင်ႇတီႈတႆႈၽႆးဢေႃႈ။- 34ဝၢၼ်ႇၽႆးတဵၼ်းတူဝ်ၵႃႇယႃႉၸမ်ႉ၊ ပဵၼ်မၢၵ်ႇတႃဢေႃႈ။ ပိူဝ်ႈၼႆလႄႈ မိူဝ်ႈဢၼ်မၢၵ်ႇတႃမႂ်းၼၼ်ႉသႂ်လႅင်းၸိုင်၊ တၵ်းလႅင်းတင်းတူဝ်ဢေႃႈ။ မိူဝ်ႈဢၼ်မၢၵ်ႇတႃမႂ်းၼၼ်ႉ ဢမ်ႇလီၸိုင်၊ တၵ်းလပ်းသိင်ႇတင်းတူဝ်ဢေႃႈ။- 35ၼင်ႇႁိုဝ်ဢၼ်လႅင်းၼႂ်းမႂ်းၼၼ်ႉတၵ်းဢမ်ႇပဵၼ်ဢၼ်လပ်းသိင်ႇၸိုင်၊ ႁဵတ်းသတီႉတႃႉ။- 36ပေႃးဢမ်ႇပႃးဢၢင်ႇၵႃႇဢၼ်လပ်းသိင်ႇသေဢၼ်လႄႈ လႅင်းယူႇတင်းတူဝ်ၸိုင်၊ တၵ်းလႅင်းယူႇတင်းသဵင်ႈတင်းမူတ်းမိူၼ်ၸိူဝ်ႉၼင်ႇဝၢၼ်ႇၽႆးတဵၼ်းဢၼ်ႁိူဝ်ႈလႅင်းၼႃႇ ႁႂ်ႈမႂ်းလႅင်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉတၢင်ႇဢပႅတ်ႈၽႃႇရီႉသႄးလႄႈသြႃႇမေႃၵျၢမ်းထမ်ႇမႃႉ
(တူၺ်း၊ မၢတ်ႈ 23:1-36။ မႃႇ 12:38-40)
37ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉလၢတ်ႈၸိူဝ်ႉၼင်ႇၼႆယူႇၼၼ်ႉၸိုင်၊ ၽႃႇရီႉသႄးၵေႃႉၼိုင်ႈ ႁွင်ႉပၢင်းဢဝ်မၼ်းၸဝ်ႈ ႁႂ်ႈမၼ်းၸဝ်ႈၵိၼ်တၢင်းၵိၼ်လူၺ်ႈၵၼ်တင်းမၼ်းသေယဝ်ႉ၊ မၼ်းၸဝ်ႈၵႂႃႇၶဝ်ႈၵႃႈတီႈၼႂ်းႁိူၼ်းမၼ်းၼၼ်ႉလႄႈ ဢိင်ယူႇၵႃႈတီႈႁိမ်းတီႈၵိၼ်ဢေႃႈ။- 38မိူဝ်ႈဢၼ်ၽႃႇရီႉသႄးၼၼ်ႉ ႁၼ်လွင်ႈဢၼ်မၼ်းၸဝ်ႈဢမ်ႇႁဵတ်းတၢင်းၸုမ်ႇၼမ်ႉၸူဝ်ႈဢၼ်ဢမ်ႇပႆႇၵိၼ်တၢင်းၵိၼ်ၼၼ်ႉၸိုင်၊ မီးတၢင်းဢၼ်ဢၢမ်းၼႃႇဢေႃႈ။- 39ၸဝ်ႈၽြႃးၵေႃႈလၢတ်ႈလႄႈဝႃႈ၊ သူၸိူဝ်းဢၼ်ပဵၼ်ၽႃႇရီႉသႄးၼႆႉ သုၵ်ႈလၢင်ႉၵွၵ်းဢိၵ်ႇတင်းလၢင်ႇပၢၼ်းတင်းလၢႆ ၽၢႆႇပႃႈၼွၵ်ႈၵူၺ်းဢေႃႈ။ ၵႃႈၼႂ်းသူၸမ်ႉ၊ မီးတဵမ်ဝႆႉတင်းလွင်ႈတၢင်းဢၼ်ႁိမ်ဢဝ် ဢိၵ်ႇတင်းလွင်ႈတၢင်းဢၼ်ႁၢႆႉမိူၵ်ႈယူႇဢေႃႈ။- 40ၵူၼ်းမိူၵ်ႈတင်းလၢႆၶဝ်ဢိူၺ်း၊ ၵေႃႉဢၼ်ၽၢၼ်ႇသၢင်းႁဵတ်းပဵၼ်ၽၢႆႇပႃႈၼွၵ်ႈၼၼ်ႉ၊ ၽၢႆႇပႃႈၼႂ်းၵေႃႈၽၢၼ်ႇသၢင်းႁဵတ်းပဵၼ်ဢမ်ႇၸႂ်ႈႁိုဝ်။- 41လွင်ႈတၢင်းဢၼ်ယဵင်ႈၶႅၼ်းလီၸမ်ႉ၊ ဢဝ်ၵႃႈဢၼ်သူမီးတင်းသဵင်ႈတင်းလူင်ၼၼ်ႉ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ လွင်ႈတၢင်းၵႃႈမီးတင်းသဵင်ႈတင်းလူင် တၵ်းမူတ်းသႂ်တီႈသူဢေႃႈ။
42 ၽႃႇရီႉသႄးတင်းလၢႆၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူလူႇတၢၼ်း ၸႃႉၸဵမ်ဢိမ်ၶိမ်းလႄႈ ၽၵ်းႁၢၼ်ႈတူၼ်ႈယိူဝ်ႈတူၼ်ႈယႃႈၵူႈၸိူဝ်ႉၵူႈပိူင် သိပ်းပုၼ်ႈပုၼ်ႈၼိုင်ႈယူႇလႄႈ ဝႆႉၵိုတ်းပႅတ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးဢိၵ်ႇတင်းတၢင်းဢၼ်ႁၵ်ႉၽြႃးပဵၼ်ၸဝ်ႈဢေႃႈ။ လွင်ႈတၢင်းဢၼ်ဝႃႈၵမ်းလိုၼ်းၸိူဝ်းၼႆႉၸိုင်၊ သူတၵ်းလႆႈၵမ်ၵျၢင်ႉဢေႃႈ။ လွင်ႈတၢင်းဢၼ်ဝႃႈဢွၼ်တၢင်းၸိူဝ်းၼၼ်ႉၵေႃႈ ဢမ်ႇလႆႈဝႆႉၵိုတ်းပႅတ်ႈ။
43 ၽႃႇရီႉသႄးတင်းလၢႆၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူထုၵ်ႇၸႂ်ၵျိူၵ်ႈၸႂ်တီႈၼင်ႈဢၼ်သုင်ဢၼ်မျၢတ်ႈၵႃႈၼႂ်းၸရွပ်ႈႁေႃးတြႃးတင်းလၢႆ ဢိၵ်ႇတင်းတၢင်းဢၼ်ပိူၼ်ႈႁဵတ်းရူဝ်ႇသေႇၵူဝ်ယမ်လႄႈ တၵ်ႉလၢတ်ႈၵႃႈၼႂ်းၵၢတ်ႇၼၼ်ႉဢေႃႈ။
44သူတင်းလၢႆၸိူဝ်းၼႆႉဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူမိူၼ်ၸိူဝ်ႉၼင်ႇၶုမ်သၢင်းၶႅင်း ဢၼ်ဢမ်ႇထၢင်ႇဢမ်ႇသႃးၼၼ်ႉဢေႃႈ။ ၶဝ်ၸိူဝ်းဢၼ်ၵႂႃႇမႃးၵႃႈၼိူဝ်ၶုမ်သၢင်းၶႅင်းတင်းလၢႆၼၼ်ႉ ဢမ်ႇႁူႉလွင်ႈ ဢၼ်ၶုမ်သၢင်းၶႅင်းမီးၼၼ်ႉ၊ ဝႃႈၼင်ႇၼႆဢေႃႈ။
45ၵူၼ်းမေႃၵျၢမ်းၵေႃႉၼိုင်ႈၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ပေႃးဝႃႈၸိူဝ်ႉၼင်ႇၼႆၸိုင်၊ ၸဝ်ႈႁဝ်းသႄႉသွမ်းတၢင်ႇဢပႅတ်ႈတီႈႁဝ်းၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 46မၼ်းၸဝ်ႈလၢတ်ႈလႄႈဝႃႈ၊ ၵူၼ်းမေႃၵျၢမ်းတင်းလၢႆၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူၸၢင်ႈဢဝ်ၶူဝ်းဢၼ်ႁၢပ်ႇၼၵ်းၼႃႇတၢင်ႇသႂ်ႇဝႆႉၵႃႈၼိူဝ်ပိူၼ်ႈတၢင်ႇၵေႃႉဢေႃႈ။ သူၸမ်ႉ၊ ဢမ်ႇဢဝ်တင်းၼိဝ်ႉမိုဝ်းသူသေၼိဝ်ႉတိူဝ်ႉ။- 47သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူတႄႇႁဵတ်းသၢင်းၶႅင်းပရေႃးၽႅတ်ႈတင်းလၢႆလႄႈ၊ ပူႇမွၼ်ႇသူၼၼ်ႉဢဝ်ၶဝ်တၢႆဢေႃႈ။- 48သူၶၢမ်ႇသၢၵ်ႈသေႇလႄႈ ႁပ်ႉတုင်းဢဝ်တၢင်းႁဵတ်းတၢင်းသၢင်ႈပူႇမွၼ်ႇသူၼၼ်ႉဢမၢၼ်ႇၶၼ်ပဵၼ်ဢေႃႈ။ ပူႇမွၼ်ႇသူၼၼ်ႉ ဢဝ်ပရေႃးၽႅတ်ႈၸိူဝ်းၼၼ်ႉတၢႆယဝ်ႉ။ သူၸမ်ႉ၊ တႄႇႁဵတ်းသၢင်းၶႅင်းၶဝ်ၼၼ်ႉဢေႃႈ။- 49ပိူဝ်ႈၼႆလႄႈ ဢၼ်ၺၢၼ်ႇၽြႃးပဵၼ်ၸဝ်ႈ ၸီႇယၢင်ႇဝႆႉၼၼ်ႉၸမ်ႉ၊ ၵဝ်တၵ်းပွႆႇၸႂ်ႉပရေႃးၽႅတ်ႈဢိၵ်ႇတင်းတမၢၼ်ႇၸဝ်ႈတင်းလၢႆ ၵႂႃႇတီႈဢၼ်ၶဝ်မီးယူႇၼၼ်ႉဢေႃႈ။ ၶဝ်တၵ်းၼိၵ်ႈၸၢၵ်ႈငႅၼ်းသႄးၵမ်ႈၽွင်ႈဢေႃႈ။ တၵ်းဢဝ်တၢႆၵမ်ႈၽွင်ႈဢေႃႈ။- 50ပိူဝ်ႈၼႆလႄႈ ၵွပ်ႈပိူဝ်ႈလိူတ်ႈပရေႃးၽႅတ်ႈတင်းသဵင်ႈတင်းလူင်ဢၼ်ထွၵ်ႇပႅတ်ႈယဝ်ႉ ၸႃႉၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉ ဢၼ်ဝႃႈၸႃႉၸဵမ် လိူတ်ႈဢႃႇပေႇလႃႉတေႃႇထိုင်ႁွတ်ႈလိူတ်ႈၸႃႇၶရီႉ ဢၼ်လႆႈဢဝ်တၢႆယဝ်ႉၼႂ်းၵႄႈဝူင်ႈၵၢင်ႁိူၼ်းပိၵ်ႈမၢၼ်ႇၸဝ်ႈ တင်းယိတ်ႈပလၢင်ႇၼၼ်ႉလႄႈ၊ ၵူၼ်းဢၼ်မီးယူႇတေႃႈလဵဝ်တင်းလၢႆၸိူဝ်းၼႆႉ တၵ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဢေႃႈ။- 51ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉ တၵ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဢေႃႈ။
52ၵူၼ်းမေႃၵျၢမ်းတင်းလၢႆၶဝ်ဢိူၺ်း၊ သူမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ သူသိမ်းဢဝ်သေႃးဢၼ်ၽုၺ်ႇပိင်ႇၺႃႇၼၼ်ႉဝႆႉယဝ်ႉ။ သူၵေႃႈဢမ်ႇၶဝ်ႈ။ တီႈၶဝ်ၸိူဝ်းဢၼ်ၶႂ်ႈၶဝ်ႈၼၼ်ႉၵေႃႈ၊ သူႁႄႉသူၶႅၼ်ဝႆႉဢေႃႈ၊ ဝႃႈၼင်ႇၼႆဢေႃႈ။
53ၼႂ်းမိူဝ်ႈဢၼ်မၼ်းၸဝ်ႈလၢတ်ႈတီႈပရဵၵ်ႈသၢတ်ႈၸိူဝ်ႉၼင်ႇၼႆယူႇၼၼ်ႉၸိုင်၊ ၵူၼ်းထုတ်ႇၵျၢမ်းဢိၵ်ႇတင်းၽႃႇရီႉသႄးတင်းလၢႆ ၽိုတ်ႉဢီးၸူးတီႈမၼ်းၸဝ်ႈၼႃႇလူင်လၢင်လႄႈ တိုၵ်းယူင်းၸူဝ်းဢဝ်မၼ်းၸဝ်ႈႁႂ်ႈမၼ်းၸဝ်ႈလၢတ်ႈလွင်ႈတၢင်းၼမ်ၼႃႇလႄႈ၊- 54ၼင်ႇႁိုဝ်တၵ်းလႆႈမီးလွင်ႈဢၼ်တၵ်းတၢင်ႇဢပႅတ်ႈတီႈမၼ်းၸဝ်ႈၸိုင်၊ လွမ်တူၺ်းၵျၢမ်ႇႁႃႁႂ်ႈလႆႈၵမ်ၵႂၢမ်းမၼ်းၸဝ်ႈၼၼ်ႉယူႇဢေႃႈ။
Currently Selected:
လူႉၵႃႇ 11: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
