Macaafa Isaayaas Raajichaa 36

Shenaaheriib Mootiin Asor Yerusaalemitti Duuluu Isaa

(2Mot 18:13-37; 2Sen 32:1-19)

1Bara Hisqiyaas mootichaa waggaa kudha afuraffaa keessa Shenaaheriib mootiin Asor biyya Yihudaatti duulee, mandara biyyichaa warra kellaa dhagaa qaban hundumaa in qabate. 2Kana booddees mootiin Asor angafa loltuu isaa Rabshaaqee, loltoota jajjabootaa wajjin Laakiishii gara Hisqiyaas mootichaatti in erge; angafni loltuus dhufee boolla jal'isii bishaanii isa gara olii karaa maasii namicha uffata miicutti geessu irra in dhaabate; 3yommus Eliyaaqim ilmi Hilqiiyaa bulchaan mana mootummaa, Shebnaa caaftuun mana mootummaa fi Yo'aan ilmi Asaaf itti gaafatamaan caaffata mana mootummaa gara isaatti gad in ba'an.

4Rabshaaqeen yommus Hisqiyaasitti isaan ergee,<<Mootiin Asor inni guddichi,<<Ati maal amanattee bir'aa malee teessa>> 5Afaaniin dubbachuu duwwaan lola kana keessatti gorsaa fi humna kan siif ta'u sitti fakkaataa>> Eenyuun amanattee ana irratti kaate>> 6Biyya Gibxii isa akka jajjaba caccabaa yommuu qabatan harka namaa waraanu amanattaa>> Fara'oon mootiin Gibxii warra isatti hirkatan hundumaa akkasuma in waraana>> jedhaa*! 7Yoo ati,<<Nuyi Israa'eloonni Waaqayyoon gooftaa keenya amananna>> anaan jette immoo, Waaqayyo kun isa atumti iddoo ol ka'aatti sagaduudhaaf jettee iddoo aarsaa isaa achii balleessitee warra Yihudaa fi warra Yerusaalemiin,<<Iddoo aarsaa isa kana duwwaa duratti sagadaa!>> jette sana mitii>> jedhaan>> jedhe*. 8Rabshaaqeen dubbii isaa ittuma fufee,<<Egaa amma gooftaa koo mootii biyya Asorii wajjin nokorrootti gali, fardeen ani siif kennu hundumaa irra taa'anii loluu kan danda'an abboota fardeenii yoo qabaatteef, ani immoo fardeen kuma lama siif nan kenna; 9ati, warra Gibxii biraa konkolaataa fi abboota fardeenii nan argadha jettee yoo amanatte iyyuu, loltoota gooftaa kootii keessaa isa baay'ee cimaa hin ta'in iyyuu of irraa deebisuu hin dandeessu; 10haa ta'u iyyuu malee yaada Waaqayyoo duuban biyya kanatti ol ba'ee rukutee balleessa sitti fakkaataa>> Lakkii! Waaqayyotu,<<Biyya kanatti duuliitii balleessi!>> jedhee na abboome>> jedhe.#6 His 29:6-7 7 2Mot 18:4

11Eliyaaqim, Shebnaa fi Yo'aan ergasii Rabshaaqeedhaan,<<Namoonni kellaa mandarattii irra taa'an akka hin dhageenyetti, afaan Yihudiitiin hin dubbatiniitii, nuyi garboonni kee afaan warra Aaram waan hubannuuf, maaloo afaanichaan nutti dubbadhu!>> jedhan; 12Rabshaaqeen garuu deebisee,<<Gooftaan koo dubbii kana gooftaa keessanii fi isin duwwaatti akkan dubbadhuuf waan na erge isinitti fakkaataa>> Namoota warra kellaa mandarattii irra taa'an, warra akkuma keessan udaan isaanii nyaachuu fi fincaan isaaniis dhuguuf jiranitti akkan dubbadhuuf na erge mitii?>> jedhe.

13Rabshaaqeen yommus ka'ee ijaajjee sagalee isaa guddisee afaan Yihudiitiin,<<Dubbii mootii Asor mooticha guddichaa dhaga'aa!>> jedhe. 14Mootichi guddichi,<<Hisqiyaas isin oolchuu hin danda'u, hin gowwoominaa! 15<<Waaqayyo dhugumaan nu oolcha mandarri kunis harka mootii Asoritti dabarfamtee hin kennamtu>> jedhee, Waaqayyoon akka amanattan isin hin godhin! 16Isa Hisqiyaas jedhu hin dhaga'inaa! Nagaa buufnaatii gara koo kottaa! Akkas yoo ta'eef tokkon tokkon keessan ija waynii keessanii fi ija harbuu keessan in nyaattu, bishaan boolla bishaanii keessan keessaa waraabbattanis in dhugdu*; 17kunis hamma ani dhufee biyya isa biyya keessan fakkaatutti, isa midhaanii fi waynii baasutti, biyya buddeenaa fi daadhii waynii qabutti isin geessutti itti in fufa! 18Hisqiyaas,<<Waaqayyo nu oolcha>> jedhee akka isin hin gowwoomsineef of eeggadhaa! Waaqayyolii saba lafa irraa keessaa isa kamtu nama biyya isaatii mootummaa koo jala akka hin linne oolchuu danda'a*>> 19Waaqayyoliin Haamaat, kan Arphaadis eessa jiru>> Waaqayyoliin Sefarwaayim eessa jiru>> Isaan Samaariyaan harka koo jala akka hin galle gochuu danda'aniiruu ree>> 20Waaqayyolii biyyoota kanaa hundumaa keessaa isa kamtu harka koo jalaa biyya isaa baase iyyuu, Waaqayyo immoo Yerusaalemin harka koo jala akka hin galle gochuu danda'a ree?>> jedhe.#16 Mik 4:4 18 37:12

21Hisqiyaas mootichi,<<Deebii hin kenninaafii!>> jedhee waan isaan abboomee tureef, jarreen sun calluma jedhan malee, waan tokko illee hin deebifneef. 22Ergasii Eliyaaqim ilmi Hilqiiyaa inni bulchaa mana mootummaa sun, Shebnaa caaftuun mana mootummaa fi Yo'aan ilmi Asaaf itti gaafatamaan caaffata mana mootummaa gadda irraa kan ka'e uffata isaanii tatarsaasanii gara Hisqiyaas dhaqanii wanta Rabshaaqeen dubbate isatti in himan.

Currently Selected:

Macaafa Isaayaas Raajichaa 36: MacQul

Highlight

Copy