Fakamulun 1

1Ku fakesugun Teufilu, nariruk au si ku fafil taguna sabaliwas Isus at ngay nafakamulun ay at ngay foyungan siginans fagsigadan, 2anggan nu e gfabat anya sas banwa. Ay siginan at Masine fag Falad at fagmabalyananun, kanya nafon sat ngay nasugu ngay suguan. 3Ay nu nlangfe at nadalan fag ngay fagidapun, kanya ngayu ginan kasure sat ngay nasugu laman gfatuyan te, gdog wa gleleg. Ay kaduge ufatk safuluk menit, kanya nsure sa anya fagayu ay gfoyung sabaliwas Dius nu gfagtainan. 4Sik menit, Isus ay at ngay nasugu gina gasfuan gfangon, kanya nalong te, “Lag yap am glao siginans Erusalem. Fanyai at Masine fag Falad ku Mama at nafatuyanan, kata ebi ku nafoyung sa ayu. 5Uan nafasurung ngay taw sasad mamam, ay wa ban glugo ya, kasurung ban am sat Masine fag Falad.”

E Nafabat Isus sas Banwa

6Isus ay at ngay nasugu gina maful, at ngay nasugu nainto te, “Em Fun, o katsi wan nu gfafoli o sa sangay taw Israel at fagfagtainanan?”

7Isus gbalus te, “Ku Mama wa kaylat nu sumaful am nu ginain ban nu kafasludan takatanya. 8Ay baliwan, gina ban at Masine fag Falad andasug, gfon ban sa ayu fagmabalyananun. Ay namoyung ban am ay ngay nalag sa baliwa angku sas Erusalem ay sas fagdaul talun Udea ay sas talun Samarya ay anggan sas fagdaul daga.”

9Ay Isus nu ntabu gfoyung takatanya, e nafabat anya sas banwa gina at ngay nasugu gdama. Ay sik linyabu nafarum anya.

10Ay kaduge at ngay nasugu gtangda sas banwa, duak mangama at ke lanbung malaksi andasug ay gmalindug sit day tigyangan, 11ay glong te, “Am fag ngay taw Galilea, wain ay fagsteun yay gugat ay gtangda sas banwa? Isus, ay nalag at nasas banwa, kanya ban gdog yay fia kafoli ste sdaga. Ay nu setain nu e nafabat anya, katanya yangay kafoli yay ban fia.”

Ngay Nasugu nu Gfili Fantubus Udas

12Sanya ginan, ngay nasugu anfoli wan sas Erusalem siginans Buksul Ulibu, at kayayuan sadik libuk sangbada.#1:12 sangbada: gsud yay sik metru. 13Ay kanya fagayu nu ndasug sas Erusalem, nasakbo sat fagtaglayunan fag bale sat tungud fag suluk. Kafag ngay nasugu at ngay ngayan: Pedru, Uan, Santiagu, Andres, Felipe, Tumas, Bartulume, Mateu, Santiagu Alfeu at baguama, Simun Maseganama ay Udas Santiagu at baguama. 14Kanya fagayu gfataglayun tua nu masadi laman gdarangin, gasfuan ngay mangena ay anggan Maria, Isus at mina, ay Isus at ngay faduksay.

15Ay ginanya fag ngay menit, sadik sandan duak safuluk tagafanud maful ay Pedru anlindug si sangay taw at daga salubangan ay gfoyung te, 16“Ku ngay faduksay, nangus umfasludan kata at kinriruk ay at Masine fag Falad at nafoyung sas Dabid sabaliwas Udas, at nafangguna ngay taw laman nanggamat Isus. 17Kanya sik nasugu oma kata emi ay ggubuk yangay kamoyung.”

18(Abandi, Udas nabayad sik daga. At famayad, at nabul yay fag salapi siginan at nanamoyung Isus sat mauri fag ngay taw. Ay kanya nafabul at sadili siginan nu katong ay at ungdan naltu ay at funa naduksun.) 19Ay fagayu tagbanwan sis Erusalem nasaful at kinfasludan, nu katanya nafangayan kafag daga te, Akeldama, at masuad te, Tagatagukun fag Daga.

20Ay Pedru nalong te, “Anriruk sas Alubad fag fafil te,

‘Wa ban nangus e namanwan ya sat fagbanwanan,

ay salagi tibak taw nu namanwan sanya.’#1:20 Alubad 69:25.

Ay anriruk yangay te,

‘Tiba waban ktaw tagfataglayun at fakamulun.’#1:20 Alubad 109:8.

21Nu katanya, masine nu gfili tam sik mangama fantubus Udas, siginan tam ngay ufud gina tam Fun Isus magamut si antam, 22gfasigad siginans Uan nu gfasurung sitsigon nu e gfabat Isus sas banwa. Ay kanya ban sik tagfatuyan yangay sabaliwas Isus nu gdog gleleg.”

23Ay kanya fagayu nafafidfilian duak mangama, Matias ay Use. Ay Use at ngayan yangay te, Barsabas mannga Ustu. 24Ay kafag ngay nasugu gdarangin te, “Em Fun, nasaful o fagayu taw at amatanganan. Fasafuli emi, sinu am nafili 25laman sik nasugu yangay at nangungbus Udas at naubun fag fakamulun, aroro kanya andasug wan sat fagnangadasugan at mafalganan laman sa anya.” 26Sanya ginan, kanya fagayu nafafidfilian, ay at nafili, Matias. Kanya at kinfamut sat labi sadik nasugu.

Currently Selected:

Fakamulun 1: OCCT

Highlight

Copy