Fakamulun 2

At Masine fag Falad nu Kadasug

1Nu ndasug Pentekustes#2:1 Pentekustes: Fagmafulun sabaliwas Fanggutluan, 50k menit at kinlangfe siginans Tagbarita nu Glangfe fag fagmafulun. (Nu Galin 34:22). fag fagmafulun, fagayu tagafanud anful sa sik bale. 2Ay kaduge maful, sik awang daul siginans banwa andasug masakit kata sik maksvn fag tagmara ay ankapnu sat fagmafulan fag bale. 3Ay kanya fagayu e nalag kata sik ngay igang ayu sirut ay antayuk sas galay at sadi. 4Ay at Masine fag Falad antayuk sa anya fagayu. Ay kanya fagayu naringang at fagyudun saful fag ngay fangaringang, siginan at Masine fag Falad at nafon fag fagmakatuun.

5Ay ginanya sis Erusalem, e ngay taw Udyu tagseg Dius, siginans fagayu talun sas fagdaul daga. 6Ay kanya fagayu nu nadungug kafag awang, maksvn nu kadulo ay nanangaful sa sangay tagafanud at fagmafulan. Ay kanya fagayu andulo nu nadungug ngay tagafanud nu garingang sat mesa fangaringang, 7ay glong te, “O nunda kafag ngay taw bunwa taw Galilea? 8Setain nu gsaful tam ngay fangaringang? 9Itam, siginan way tam stalun Partya ay Medya ay Elam, Mesuputamia ay Udea ay Kapadusya, Puntu ay Asya, 10Frigya ay Panfilia, Igiptu ay Libya at fagagbilugun fag ngay furuan at munakbang sis Sirene fag talun. Ay siginans furuan Ruma fag ngay betaw, 11(ay sanya yangay ngay taw Udyu ay yud Udyu fag ngay taw at kinsadi sat fagafanudun) ay siginans furu Kreta ay talun Arabya. Dewa katanya, gtogdungug tam anya fagayu nu garingang sa tam ngay fangaringang laman gfoyung sabaliwa Dius at ngay nafakamulun at madulo.” 12Ay tagsanya fagayu andulo ay gidgintoan te, “Nataw tuy at masuad?”

13Ay tibak taw gfalingun te, “Kanya fagayu galangu way.”

Pedru at Foyungan

14Ay Pedru namalindug gasfuan at labi sadik nasugu, ay mabitsug nu gfoyung te, “Em ngay kaiban, ay am tagbanwan sis furuan Erusalem, dungugani fia masine ku fagyalongun sa ayu. 15Duan, wa kata ay namatangan te, in fag ngay taw galangu, aroro katsi fasiam yay sbalabag. 16At kinfasludan katsi gfafasludan kata Uel fag taglong at foyungan te, 17Dius nalong te,

‘Sa ban taguyan fag ngay menit,

gfon kban ku Falad sas fagayu taw.

Ay ngay baguama ban ay ay ngay baguina mafafoyung tua ku longan, ay ngay baguama ban umke fagsafulun sabaliwa takafasludan sas fagunan.

Ay ngay fagtainan ban umke ngay taginfan.

18Ay ginanya ban fag ngay menit gfon kyangay ku Falad sa ku ngay fagsuguan, mangama ay mangena, ay kanya ban fagayu mafafoyung tua ku longan.

19Ay gfasure kban ngay madulo sis banwa ay ngay fakatoglagan sis daga;

siginans taguk, afuy ay at maksvn fag anus.

20Ay menit ban umdulum, ay magdanun ban umraska kata sik taguk.

Umfasludan ban takatanya gina yud andasug tam Fun at menit at madulo ay at mauseganan,

21ay nusnga sinu taguro sa tam Fun at ngayan umlangfe tua ban.’ ”#2:21 Uel 2:28-32.

22Pedru gfataglayun gfoyung te, “Ku kaiban fag ngay taw Israel, dungugani! Isus tagsiginans Nasaret nafakamulun at madulo ay at mabalyanan fag ngay fakamulun laman gfatoglag te, Dius at nasugu anya. Ay nasaful wam takatanya aroro nu kafasludan ste si ayu. 23Dius nafon sa ayu kanya fag taw kata at algan, dewa katanya, nafabul am anya siginan nu gsugu am at mauri fag ngay taw laman nantuktuk anya sas fasulungan kayu. 24Dewa katanya, Dius nafadog nafaleleg anya ay nafalangfe siginans fakabulun at fagmabalyananun. At matuyan, fakabulun wa mababo anya. 25Dabid nariruk sabaliwas Isus te,

‘Nalag kwan ku Fun, kanya kabavn tagsi ku fagunan, ay ku ufud laman kdi kamomuy.

26Nu katanya, guseganan au gugat, ay gfauseganan Dius.

Ay dewa kban anbul, e fagsegun ktua.

27Aroro di o nafabayan ku falad nu kadasug sat kinbul at talun, ay di o naylat am Nafili nu kadasug sas fakadanun.

28Nafoyung tuo sa angku dalan tagsas leleg, ay maksvn nu guseganan au, aroro gufud tuo gugat angku.’#2:28 Alubad 16:8-11.

29Ku ngay faduksay, matuyan, mafafoyung au sa ayu te, tam mangaguyang Dabid anbul ay nanamoli anya, ay dasug katsi saful tam te, sanya at fagfolian. 30Dabid sik taglong ay nasaful Dius at fatuyanan te, at sadi ban at kasugfunanan umsik fun kata anya. 31Ay aroro Dabid nasaful tua Dius at fagnamakamulunun ban, kanya nafoyung sabaliwa Dius at nafili fag Fun nu gdog ban gleleg, ay di nafabayan anya sat kinbul at talun ay at bilug di ndan. 32Ay at foyungan we tiba nu bunway Isus, Dius at nafadog nafaleleg ay natuyan ami te, kanya nadog naleleg. 33Ay Isus nu siwas banwa, namalunggung sis Dius at siun baliwa, ay kanya nagbilug at Mama at nafatuyanan sa anya at Masine fag Falad. Ay Isus nafon yangay sa emi at Masine fag Falad kata ay nalag ay ay nadungug katsi. 34Bunwa fun Dabid at nasas banwa, dewa katanya, kanya nalong te,

‘Tam Dius nalong sa ku Fun te,

Malunggungi sa ku siun baliwa,

35ay namababo au emu sa am ngay fawayan.’#2:35 Alubad 110:1.

36Nu katanya, ngay taw Israel, masine nu gsaful am te, ay nafabul fag Isus sas fasulungan kayu, sia wan Dius at nafili laman tam Fun.”

37Kafag ngay taw nu nadungug, gafanawa ay ginto sas Pedru ay sa tibak nasugu te, “Em ngay faduksay, setain ban manga em fakamulun?”

38Ay Pedru nabalus te, “Ubuni ay ngay asalanan ay asurungi sa tam Fun Isus at ngayan, laman sik fakatoglagan te, nalyam wan ay ngay asalanan ay magbilug am at Masine fag Falad Dius at fon sa ayu. 39Aroro kanya at fatuyanan sa ayu ay sa ay ngay sisian ay sas fagayu taw tangayayu, tam Fun Dius at fagnanguroun yay ban.”

40Ngayu yay Pedru at foyungan laman gfatuyan at ngay longan, ay kanya get sa anya fagayu te, “Falangfei ay sadili ste ginan fag ngay taw mauri.” 41Ay ngayu at nafanud sat foyungan ay kanya fagayu ansurung, ay ginanya fag menit arvs tuluk libuk taw at kinfamut sa sangay tagafanud.

Ngay Tagafanud at Fagmasadiun

42Ay kanya fagayu gfataglayun tua nu gdungugan Isus at ngay nasugu at foyungan, ay gfataglayun yangay nu nangaful, ay nu kon tam Fun at Yafun, ay anggan nu gdarangin. 43Isus at ngay nasugu nafasure ngayuk madulo ay at mabalyanan fag fakamulun, nu katanya, ngay tagafanud gsuyu tua ay gfaning Dius. 44Fagayu tagafanud e fagmasadiun tua ay at ngay ramraman sa tuas fagayu. 45Ay kanya fagayu nafalao at ngay ramraman ay at daga, ay at nagbulan nafud sas fagayu, nu seyu at mesa fagayudanun. 46Kayu menit, kanya fagayu nanseg Dius sas Dius at bale, ay nangaful gugat sa sangay bale laman nangon tam Fun at Yafun. Ay kanya fagayu kon guseganan ay manabayan at ngay amatanganan, 47ay gseg gugat Dius, ay galay at sadi guseganan. Ay kayu menit tam Fun gfamut ngay taw takalangfe.

Currently Selected:

Fakamulun 2: OCCT

Highlight

Copy