Uan 21
21
Isus Nafalag Anya sat Tagadal at Fitu
1Ay sanya ginan Isus gdog yay gfalag anya sat ngay tagadal sas tigyangan Lino Galilea. Katatuy at kinfasludan. 2Simun Pedru ay Tumas at ngayan yangay te, Tagasfuan nu Kasalug, ay Natanael fag taw Kana sis talun Galilea, ay Sebedeu at ngay baguama, ay dua yak tagadal, kanya fagayu gadgaloan. 3Simun Pedru nalong sat ngay ibama te, “Nanfangalbon kwan.”
Ay at ngay ibama nabalus anya te, “Nangalo ami emu.”
Nu katanya, kanya fagayu nasakay sa sik sakayan lino ay ginanya fag yabi we nagamat albon. 4Ay balabag di sbalabag sirut, Isus malindug sis tigyangan lino, ay at ngay tagadal wa natoglag anya. 5Isus nalong te, “Ku ngay sisian, o e nagamat am?”
Ay at ngay tagadal nabalus te, “Duan.”
6Ay Isus nalong te, “Fasai sad lino ay fanggamat albon sas siun baliwa fag tigyangan sakayan, ay magamat ro am.”
Ay at ngay tagadal nu nafaning at longan, kanya fagayu wa mafaranggut ya at fanggamat aroro ngayu at nagamat. 7Ay Isus at fakesugun fag tagadal nalong sas Pedru te, “Kanya tam Fun.”
Ay Simun Pedru nu nadungug, kanya nasulun at lanbung aro at nabul siginan at bilug, ay kanya natos sasad lino. 8Ay tibak tagadal gguyan anya, gsakay yay sis sakayan lino, ay kanya fagayu gfaradranggutan at fanggamat mapnu albon. Kanya fagayu wa fia ngayayu siginans tigyangan lino, at kayayuan sik sandan wayk sangbada. 9Ay kanya fagayu nu ndasug sas tigyangan lino, nalag sik faygangan e masugban albon ay e tinapay. 10Ay Isus nalong sat ngay tagadal te, “Agvd, bubai stae tiba ay balbon.”
11Ay Simun Pedru nadog yay nasakay sas sakayan lino ay naranggut at fanggamat albon sas tigyangan. At fanggamat mapnu tagbia fag ngay albon. Nu fagayu wan at balbon, sadik sandan limak safulu e tulu. Ay dewa ngayu at nagamat, at fanggamat albon di nrasras. 12Ay Isus nalong sat ngay tagadal te, “Wainyayam, gyabas watam.”
Nusdi sadi at tagadal we manamaskud nanginto te, “Sinu o?” aroro kanya fagayu nasaful wa te, kanya tam Fun. 13Ay Isus nanangakbang sat ngay tagadal ay kanya nafuyut kafag tinapay ay fag albon ay nafon sa anya fagayu. 14Kanya at fatulu ginan Isus nu gfalag anya sat ngay tagadal siginan nu nadog naleleg.
Fafangoni Ku ngay Tupa
15Isus ay at ngay tagadal nu nafangon wan, Isus nainto sas Simun Pedru te, “Simun, Uan at baguama, o kesug o angku gtungud yay tuy fagayu?”
Ay Pedru nabalus te, “Sabv, em Fun, nasaful wo te, kesug au emu.”
Ay Isus nalong anya te, “Fafangoni ku ngay tupa riangan.”
16Isus nadog yay fia nainto anya te, “Simun, Uan at baguama, o kesug o angku?”
Ay Pedru nabalus te, “Sabv, em Fun, nasaful wo te, kesug au emu.”
Ay Isus nalong anya te, “Alagai ku ngay tupa.”
17Ay sis fatulu ginan, Isus nadog yay fia nainto te, “Simun, Uan at baguama, o kesug o angku?”
Ay Pedru kabalu aroro tulu ginan Isus nu ginto anya te, “O kesug o angku?” Ay kanya nalong anya te, “Em Fun, nasaful wo fagayu nusnge wain. Nasaful wo te, kesug au emu.”
Ay Isus nalong anya te, “Fafangoni ku ngay tupa. 18Matuyan nu glong au emu te, ebi gina o mabaguama, o mandi tagsulun am lanbung, ay madasug o nusnga nday am fakaylatun. Ay nu mafufuama wo, gfalugde o am take ay tiba wayk taw tagfasulun emu am lanbung ay gtaban ban emu nusnga nday am fagyudun kaylat.” 19Isus nalong takatanya laman gfasaful te, setain ban Pedru nu kabul, ay siginan ban takatanya e gfauseganan Dius. Ay sanya ginan Isus nalong anya te, “Aloi angku.”
Isus at Fakesugun fag Tagadal
20Ay Pedru anbiling ay nalag Isus at fakesugun fag tagadal nu galo anya, kanya at nasarare sis Isus ebi gina gyafun ay at nainto te, “Em Fun, sinu ban at namoyung emu sat mauri fag ngay taw?” 21Ay Pedru nu nalag kafag tagadal, nainto sas Isus te, “Em Fun, tain ban at kumfasludan sa anya?”
22Ay Isus nabalus te, “Nu kaylat kyay kafag taw nu gleleg yakmay kban anfoli, tain ro nu gamatangan o? Aloi angku.”
23Nu katanya, andungug sa sangay tagafanud sas Isus sik barita te, kanya ban fag tagadal wa kabul ya. Ay Isus wa nalong te, “Kanya ban wa kabul ya.” Nalong way te, “Nu kaylat kyay kafag taw nu gleleg yakmay kban anfoli, tain tua ro nu o tagamatangan?” 24Au wan kafag tagadal at nafoyung ay at nariruk takatanya. Ay fagayu taw nasaful te, matuyan ku foyungan.
Fakatabuan fag Longan
25Ngayu yay Isus at nafakamulun. Nu nriruk di fagayu, nu au tagamatangan, kafag ngay rirukan ro wa sak sas fagdaul daga.
Currently Selected:
Uan 21: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
