Uan 20

Isus nu Gdog Gleleg

Mt 28:1-8; Mk 16:1-8; Lk 24:1-10

1Sis Linggu sbalabag gina yay madulum, Maria Magdalena nalao sas fagfolian, ay kanya nalag te, faningding fagfolian at sakbawan fag gang, andaging wan. 2Nu katanya, kanya natarung sas Simun Pedru ay sas Isus at fakesugun fag tagadal, ay gfoyung anya te, “E nabul wan tam Fun siginans fagfolian, ay wami nasaful te, dada nu gbuba.”

3Ay nu katanya Pedru ay at usama fag tagadal nalao sas fagfolian. 4Duama nu glao, gtarung, ay at usama amasakit yap tua Pedru ay kanya naguna sas fagfolian. 5Ay kanya nu ndasug sas fagfolian, garungan gfatangun sasad basad, ay at lagan ngay ramit way lang, ay kanya wa nasakbo. 6Ay sanya ginan Simun Pedru andasug yangay ay gtaglayun gsakbo sas fagfolian. Ay kanya nalag kafag ngay ramit, 7ay at fansifig Isus at alfuyu fag ramit wa magamut si tibak ramit, nu bunway masaman way nu mafalutan ay mafasariuan si sik tigyangan. 8Ay taguna kadasug fag tagadal nasakbo yangay ay nalag fia sasad basad fagfolian ay gafanud te, Isus gleleg wan. 9Duama ya fia nasaful at masuad sis Dius at Longan te, Isus ban gdog yay gleleg. 10Sanya ginan, kafag duak tagadal noli wan.

Isus Nafalag Anya sas Maria Magdalena

11Maria malindug sis day sakbawan fagfolian ay gwayway. Ay kaduge gwayway, gfatangun sas fagfolian. 12Ay kanya nalag duak tagbarita galanbungan malaksi, malunggung sis fagfataygilidanan Isus at bilug, at sadi sibaliwa at fagalfuyuan ay at sadi sibaliwa at fagdarafaan. 13Ay kanya fag duama nainto anya te, “Wain am fagwaywayun?”

Maria nabalus te, “E nabul ku Fun, ay kwa nasaful te, dada nu gbuba.”

14Ay kanya nu nalong wan takatanya, anbiling ay nalag Isus nu malindug sanya, ay wa natoglag te, kanya wan Isus. 15Ay Isus nainto anya te, “Wain am fagwaywayun? Sinu am fagrvbvyun?”

Maria nu glong, at fagfakamatoanun tagalaga tanuman, nu katanya nalong te, “Nu o wan at nabul anya, namoyung o angku nu dada nu gbuba o, ay namul kro.”

16Ay Isus nalong te, “Maria.”

Ay kanya nasalubang ay nalong sas Ebreu fag fangaringang te, “Rabuni!” (At masuad te, Takamoyung.)

17Ay Isus glong anya te, “Lag o gted angku, aroro kya nkabat sa ku Mama. Loi wan sa ku ngay faduksay ay foyungi te, kabat kwa ban sa ku Mama ay ay Mama, sa ku Dius ay ay Dius.”

18Ay sanya ginan Maria Magdalena nalo wan sas Isus at ngay tagadal ay nalong sa anya fagayu te, “Nalag au tam Fun.” Ay kanya gfataglayun gfoyung sa anya fagayu kata Isus at longan.

Isus Ansure sat ngay Tagadal

Mt 28:16-20; Mk 16:14-18; Lk 24:36-49

19Ay ginanya fag yabi, sis Linggu fag menit, at ngay tagadal maful. Ay at fagmafulan fag bale at ngay sakbawan madingdingan, aroro kanya fagayu kalimu taw Udyu at ngay tagfangguna. Isus andasug masakit ay malindug sanya fag ngay taw at wabilug, ay nalong te, “Sumawa nangus fia ayu fagmanabayanun.” 20Ay Isus nu nalong takatanya, kanya nafalag at ngay daluap ay at tigyangan sat ngay tagadal. Ay at ngay tagadal nu nalag tam Fun, maksvn nu guseganan.

21Ay Isus nadog yay nalong te, “Si wa ayu fagmanabayanun. Gsugu au ayu kata ku Mama nu nasugu angku.”

22Isus nu nalong wan takatanya, kanya nauyup sat ngay tagadal ay nalong te, “Aylati at Masine fag Falad. 23Ay nu nafalyam am nusnga sinu fag taw at asalanan, Dius nafalyam yangay. Ay ay yud nafalyam sik taw at asalanan, Dius wa yangay nafalyam kafag taw at asalanan.”

Tumas wa Gafanud

24Tumas at ngayan yangay te, Tagasfuan nu Kasalug, wa sanya gina Isus andasug. Kanya at sadi sis Labi Duak nasugu. 25Nu katanya, tibak tagadal nalong anya te, “Nalag wami tam Fun.”

Ay Tumas nabalus te, “Kwa gafanud yakmay kban nalag ay nautkut ngay sulbung sit daluap ay yakmay kban nated sit maurusan fag tigyangan.”

26Ay nu nlangfe waluk menit, at ngay tagadal gdog yay anful sisad bale magamut Tumas. Ay at ngay sakbawan matabingan, dewa katanya Isus nasakbo sasad bale ay malindug sit wabilug, ay kanya nalong te, “Si wa ayu fagmanabayanun.” 27Ay sanya ginan Isus nalong sas Tumas te, “Damai ku ngay daluap ay tedi, ay apkapi sa ku tigyangan. Lag o gawabilugan ya, afanudi wan.”

28Ay Tumas nalong te, “Ku Fun ay ku Dius.”

29Ay Isus nalong anya te, “O gafanud wo aroro nalag wo angku? Mauseganan sik taw tagafanud tua deyud nalag angku.”

Uan at Rirukan at Algan

30Ngayu yay Isus at nafakamulun at madulo at nafalag sat ngay tagadal. Ay dewa katanya, wa nriruk ya ste fag fafil. 31Fagayu at kinriruk ste anriruk laman gafanud am te, Isus wan Dius at nafili fag Fun, ay at Baguama, ay nu gafanud tuam takatanya, mul tua ban am leleg siginan anya.

Currently Selected:

Uan 20: OCCT

Highlight

Copy