Homa 12
12
Deoso‑ya dai‑ya dai daanahi
1Yodeo dai toha, Bara dai toha, dai na, oka soho dai amani. Owati dai mitahi. Deoso dai‑ya kasomi nafi ene Deoso‑ya dai‑ya dai daanahi. Hibati‑ya Deoso‑ya mai kahiyarabone, Deoso mai‑ya kayafebona, bani‑ya mai nanahaba, Deoso‑ya bani‑ya mai daanameteni. Deoso dai‑ya kayafemari, fara dai‑ta dai abara, dai hasina, Deoso‑ya dai‑ya dai daanahi, Deoso ati‑ya dai tokadababonehe. Haa‑nima dai ene niya, Deoso ya‑yainebonane.
2Deoso ati‑ya mai nofara mai‑nima dai riyahi. Yama amosa hinama tamine‑ya dai atibodi kadikabisahi. Fara yama amosa dai kadikiya, dai ene amosawamabone, yama Deoso hinofa‑ya dai watabone, dai ene Deoso dai ya‑yainiheboneni.
3Deoso owa‑ya kadikemarine, dai‑ya okanawatabonehe. Owati dai mitahi.
“Amosabotebisa ama·oni.” Dai ati riyahi.
Yeso ati dai nofa Deoso dai‑ya kasome, dai‑ya kanawato‑nima dai atibodi dai‑ya kadikabisahi. Deoso ene yama‑ya dai wa‑wato, Deoso ene dai ya‑yainibisa, hini dai‑ya dai kahiyarariyahi.
4Ai yehe, ai teme, ai nokobodi, ai narabo na, ai‑ya kobobona, ai yehe ene‑nima ai teme ene rihi. Ai nokobodi ene‑nima ai narabo ene rihi teni.
5Fara‑nima Yeso ati ai no‑nofa Deoso‑ka ai dami toha, ai ene fara hinama tohatera ai abano ohare‑ta ai toha ai nineni.
6Ai nafi atibodi‑ya Deoso yofikane, mai ai kasomabonehe. Dai one‑ya Deoso yofikane, Deoso ati‑ya kaminebonaha.
“Fara owati tikaminahi!” Deoso ati ne.
Ati tikaminaho.
7Mai‑ya ka‑kasoma dai one atibodi‑ya Deoso yofikane, fare dai‑ya yofikane‑nima mai‑ya dai kasomahi. Mai‑ya ka‑kanawato dai one‑ya Deoso yofikane, fare dai‑ya yofikane‑nima mai‑ya dai kanawatohi.
8Dai one atibodi‑ya Deoso yofikane mai atibodi komi‑ya dai kasomabone, mai dai kasoma, mai atibodi kome fawanabonehe. Yama‑ya da‑daa dai one atibodi‑ya Deoso yofikane, fare dai‑ya yofikane‑nima yama dai daaniya, dai ya‑yainahi. Hidi dai tohabone, dai atibodi‑ya Deoso yofikane, dai noko wadahi, dai ene amosabonehe. Ai one mai‑ka yama wadara mai‑ya dai kasomahi. Dai one atibodi‑ya Deoso yofikane, fare dai‑ya yofikane‑nima mai‑ya dai kasomahi.
Haa‑nima dai ene nahi
9Mai‑ya dai ati nofa, mai‑ya dai nofi yokana tohahi. Yama towe‑ya dai kaka, yama amosa‑ta dai nokotonibisahi.
10Yeso‑ka dai toha dai‑ka soho dai nofi‑nima dai ibi nofa, mai ihi amosa mai dai kahiyarahi.
11Deoso ati‑ya dai nofa dai refo tohariyahi. Dai hawihi. Deoso‑ka yama anini dai kitahi.
12Deoso‑ka yama dai kayafabone ati ne, yama‑ya dai nimana, dai ya‑yainahi. Dai‑ya mai bisina, dai yawarihi. Deoso‑ya dai hiyaranadihi.
13Yeso ati‑ya mai no‑nofa yama‑ya mai one kihara, mai dai kasoma, mai‑ka yama‑ba dai daanahi. Mai a‑amo‑ke mai‑ka yobe awire, tika yobe‑ya mai amonahi.
14Dai‑ya mai bisina, mai dai kasoma, dai ati ene Deoso mai‑ya kasomabise, mai‑ya nakomarayaho.
15Mai ya‑yaina mai eyehe dai ya‑yainahi. Mai ohina mai eyehe dai ohinahi.
16Hini dai‑ka yama‑bone‑ya dai nokotini ohaririyahi. Dai atibodi fara hinama tohahi. Dai one‑ka yama‑bone dai nokotoniharihi. Yama‑ya mai kihara mai‑ya tisawiyahi. Tiwa‑ta tinofabisa tiriyahi.
17Dai‑ya mai ihi amosara, mai‑ya dai ene amosabisa. Dai ene‑ya mai one awiya, dai ene amosa‑ya mai watowahaboneni.
18Dai ati soma, dai‑ya mai weena, mai dai weeriyahi.
19Oka soho dai toha, dai‑ya onofi nafe, dai‑ya mai ihi amosara, mai‑ya dai ene amosabisahi. Deoso‑ka yama hani ati dai awahi.
“Mai manakone amosara‑ya daa·onaboneni.” Deoso ati ne,
fare mai manakone‑ya daanebonane.
20“Dai‑ya mai kaka mai fime, mai tafe‑ba dai daa, mai baki hoka, mai‑ka faha‑ba dai daa niya, hini mai‑ya mai atibodi weeniya, mai atibodi komaboneni.” Deoso‑ka yama hani ati nineni.
21Dai‑ya mai ihi amosara mai ihi‑nima dai ene riyahi. Hiniya mai dai kasomiya, Deoso ati‑ya mai nofawahaba awineni.
Currently Selected:
Homa 12: jaaNT
Highlight
Share
Copy
Want to have your highlights saved across all your devices? Sign up or sign in
