Homa 11
11
Deoso ati‑ya Isara·eo‑ka nodi mai one nofa
1Isara·eo‑ka mai dami‑ya Deoso nofami awire‑mona dai ati na awineni. Isara·eo‑ka mai‑ya Deoso kanakiterene. Isara·eo‑ka owa ama·oni. Abaraho‑ka nodi, i‑di Besami tohe, i‑di Besami‑ka nodi ama·oni.
2Hibati‑ya Isara·eo‑ka mai‑ya Deoso kadikemata, mai‑ya kakanaterene. Deoso ati‑ya mi‑mita‑mata i‑di Eriya Isara·eo‑ka nodi mai tamine‑ya hiyarane.
3“Deoso, Isara·eo‑ka mai ihi tika bani‑bona oda da‑daa‑ka yati wamani‑ya mai nanahaba, tiwati‑ya mai mi‑mita mai nafi‑ya mai nanahaba na, owa hare hasi·ona, owa‑ya mai ati nanahabamakineni.” Eriya ati nematane.
4I‑di Eriya‑ya Deoso hiyare,
“Tiwa ohari awirini, oka 7000 mai kana Satanasi‑ka owa i‑di Baa noko‑kaya mai yobati‑kaya mai nahoterani.” Deoso ati nematane.
5Hibati‑ya i‑di Eriya wineya, Deoso ati‑ya mai one nofamete, fara‑nima hibayata mai fa‑famaraba na mai‑ya Deoso kadikemata, mai‑ya kasomane.
6Hibati‑ya Deoso ai‑ya nofe, ai‑ya kadikematane. Deoso hini ene amane. Ai ene ai‑ya kadike‑mana, hini ene tohare nane.
7Isara·eo‑ka nodi mai dami‑ya Deoso kadikare, mai fa‑famaraba na mai‑ya kadike, Isara·eo‑ka nodi Deoso‑ka mai dami toha‑mone mai ati na, Deoso mai‑ya kadikemata, Deoso ati‑ya mai nofa, Deoso‑ka mai tohabisa. Mai one Deoso ati‑ya nofara mai atibodi ai teme ataro baye‑nima mai atibodi tokitameteni.
8“Mai atibodi kita Deoso ene nokobisa‑ka ai‑nima mai na, Deoso ene‑ya mai awa, yama‑ya mai watorihi, ati mai himite, ati mai hiwatorihi hine.” Deoso‑ka yama hani ati nineni.
9Mai atibodi kita mai tamine‑ya Deoso‑ya i‑di Dafi hiyare,
“Mai ihi amosara mai mariniya, mai noki wadariyahi. Mai‑ya mai ka‑kako mai kakiya, mai‑ya mai watiya, mai manakone amosara‑ya mai kayafiyahi.
10Mai nokibodi fawana, yama‑ya mai awamaterabone, mai‑ya mai ka‑kako mai‑ka yama‑ya mai weyenibisiyahi.” Dafi ati nane, Deoso‑ya hiyareri.
Fara Deoso‑ka yama hani‑ya kanahanomakimatane.
Deoso‑ka yama amosabote‑ya Bara mai kayafa
11“Yeso abeya, Yodeo mai manakone‑ya nanahabebona tamine‑ya mai mita, mai taratokana, mai ihi Deoso mai‑ya kakane, mai‑ya kasomarebonane.” Dai ati na awineni.
Deoso mai‑ya kanakare, Bara mai‑ya kasomeya, Deoso ene‑ya Isara·eo‑ka mai awiya, Deoso‑ya mai kayawabone Deoso atibodi ati nane.
12Yodeo mai taratokaniya, Bara mai‑ya Deoso kasome, Yeso ati‑ya Yodeo mai nofariya, Bara mai‑ya kasome, Yeso ati‑ya Yodeo mai nofawahiya, ai nafi‑ya kasomi na‑nafi nebonane.
13Bara dai toha, dai‑ya ohiyarabone, Deoso owa‑ya yosemarine. Yeso Ati Amosabote dai‑ya okaminabone ati ne, ati ene ya‑yai·oneni.
14Dai‑ya ohiyara, owa‑ya Yodeo mai awiya, mai yawaba awineni. Yeso ati‑ya dai nofa Deoso dai‑ya kasome‑ya mai awiya, Yeso ati‑ya mai one nofamakeba awineni.
15Yodeo mai‑ya Deoso saatokase ene Yeso ati‑ya Bara mai dami mitawahiya. Fara Yodeo mai‑ya kayafamataseya, mai abamaro mai kitama, mai‑nima mai nawahaboneni.
16Yodeo mai‑ka tiriko marafakana‑ya mai tiina, Deoso‑ka baho‑bone ohare‑ya mai wamani dai tohineni, Deoso mai‑ka tiriko nafi‑ya kasomebonaha. Awa bono habi amosa, ini amosateni. Fara‑nima Yodeo mai‑ka idi Deoso ati‑ya mai nofamete, fara Deoso ati‑ya Yodeo mai‑ka nodi mai nofahareboneni.
17Tabora‑ke orifera ino‑nima Yodeo mai na, Yeso ati‑ya mai nofara hini mai ihi Deoso mai bakahinakosa, yama‑ke orifera ino‑nima Bara dai na, Yeso ati‑ya dai nofawaha, tabora‑ke orifera‑ya Deoso dai‑ya nawaane, orifera amose habo dai‑ya kasomawahane.
18Yodeo mai‑ya Deoso bakanakose, dai‑ya nawaane, mai‑ya dai weeriyahi. Dai amosawaha, hini dai ene tohara, orifera amose ede‑ya Deoso dai‑ya nawaane hini Deoso ene‑bisa amane.
19“Orifera amose ino Deoso bakahinakoseya, oda‑ya nawaanane.” Dai ati na awineni.
20Fara dai ati‑nima yama nineni. Yeso ati‑ya Yodeo mai nofaramaro, hini mai ihi orifera ino‑nima mai na, Deoso mai‑ya bakanakose. Dai‑ta Yeso ati‑ya dai nofa, orifera amose ede‑ya dai‑ya Deoso nawaane. Dai‑ya dai nofi nafiriyahi. Deoso ene dai ya‑yaina, Deoso dai kahiyarahi.
21Yeso ati‑ya Yodeo mai one nofara, orifera ino‑nima mai na, mai‑ya Deoso bakanakose, Yeso ati dai nofamara, dai‑ya bakanakosamaki neba awane.
22Deoso ene ai one ya‑yai, ai one ohiteni. Orifera ede amose‑ya dai‑ya nawaane ene dai ya‑yainineni. Orifera amose ede‑ya Yodeo mai waanamaro, Deoso mai‑ya bakanakose, mai ya‑yainamara, mai ohinibisaboneni. Fara‑nima Yeso ati‑ya dai nofami awiriya, dai‑ya bakanakosamakibonane.
23Yeso ati‑ya Yodeo mai nofara Deoso mai‑ya bakanakose, Yeso ati‑ya mai nofawahiya, Deoso mai‑ya nawaanamakitasebonane. Deoso kitabote tohe, mai‑ya ati nawaanamakiya, mai‑ya nawaanamakitasebonane.
24Orifera tabora‑ke ede‑ya orifera yama‑ke ino ai nawaanaterani. Orifera yama‑ke ino‑nima Bara dai tohabisa, orifera tabora‑ke ede‑ya dai‑ya nawaane. Orifera tabora‑ke ino‑nima Yodeo mai tohabisa, tabora‑ke orifera ino Deoso bakanakose, hini ede‑ya Deoso hinawaanami nofeya, mai‑ya nawaanama kanibote nebonane.
Isara·eo‑ka mai‑ya yama amosa‑ya Deoso daanebona
25“Yodeo mai ati kasira oda‑ta oda amosabisineni.” Dai ati riyahi.
Yama‑ya mai watoramete yama dai watowahi. Hibayata Isara·eo‑ka mai one atibodi kita, Deoso ati‑ya mai nofara, Bara dai one‑ya Deoso kadikemata, ati dai nafi hinofeya, yama hawa tohawahaboneni.
26Fara yama hawa tohiya, Isara·eo‑ka mai nafi Yeso ati‑ya mai nofawahabone, mai nafi Deoso‑ka mai tohawahaboneni.
“Ai nafi‑ya ka‑kasoma Siyaho‑ya yananebonane. I‑di Yako‑ka nodi yokana mai ihi amosara, mai ihi amosawahaboneni.” Deoso‑ka yama hani ati nineni.
27“‘Mai ihi amosara mai ihi fawa·onihebone onamaro, mai ihi amosara fawa·oniheboneni.’ Deoso ati nane.” Hika yama hani ati nineni.
28Hibayata Yodeo mai one Deoso Ati Amosabote‑ya mai kaka, mai ihi Deoso dai‑ya kasomi ba‑basi nane. Hibati‑ya Yodeo mai‑ka idi mai‑ya Deoso nofemata, mai‑ka nodi mai‑ya nofamakibona ati ne, mai‑ka nodi mai‑ya nofasa nane.
29Deoso ati abaterene, ati‑nima yama naboneni. Deoso yama‑ya ati daane, yama‑ya daanebonane. Mai‑ya kasomebona ati ne mai‑ya kasomebonane.
30Hibati‑ya Deoso ati dai tokadabaramaro, Isara·eo‑ka nodi mai ihi amosara, mai ihi Deoso Ati Amosabote dai mita, ati dai nofe, Deoso dai‑ya kasome, dai‑ya ati somawamane.
31Hibati‑ya Deoso ati dai nofasa riya, dai‑ya kasome, ati dai nofawahane. Fara‑nima Deoso ati‑ya Isara·eo‑ka mai nofi awisara, Deoso dai‑ya kasome‑nima mai‑ya kasomebonane. Ati mai hinofeya, mai‑ya ati somawamebonane.
32Ai nafi ati kasira, Deoso ai‑ya kasome, ai abarabone‑ya nofane.
33Ka! Yama nafi‑ya Deoso wato, ene nafi ai watorihi, ati nafi ai watorihi ne, yama ai wata‑ya Deoso‑ka yama wato fiyakani nafineni.
34Deoso atibodi ati nafi ai watoterani. Deoso‑ya ai kanawatoterani.
35Yama nafi‑ka hidi Deoso tohe, hini hika yama ai‑ya daane, hika yama ai daatonama, manakone wadaterani.
36Yama ai kiha‑ya Deoso daanemari, yama nafi‑ka hidi amane. Ai kahiyare, ai kahiyari fawarayaho. Feye amani.
Currently Selected:
Homa 11: jaaNT
Highlight
Share
Copy
Want to have your highlights saved across all your devices? Sign up or sign in
