Homa 13
13
Dai‑ka hidi mai ati dai nofahi
1Kofeno‑ka mai ati dai tokadabahi. Deoso ene kofeno‑ka mai toha, Deoso mai‑ya kasomare‑mana, mai ati kitara neni.
2Kofeno‑ka mai ati dai tokadabara, Deoso ati‑nima dai ni awirani. Hini dai ene kofeno‑ka dai‑ya mai wee, dai‑ya mai bisi, kadeya‑ya dai‑ya mai nafoya naba awineni.
3Dai ene amosa, dai‑ya kofeno‑ka mai nofateni. Kofeno‑ka mai ihi dai habo siitorabone dai ati na, dai ene amosahi. Dai ene amosara, dai habo siitobisahi. Dai tamine‑ya kofeno‑ka mai mitiya, dai‑ya mai wataboneni. Dai ene amosiya, dai‑ya kofeno‑ka mai kahiyaraboneni.
4Deoso‑ka kofeno mai toha, Deoso ene dai‑ya mai kasomaboneni. Deoso ene kofeno ati kitatene. Dai ene amosariya, dai‑ya mai weenaboneni.
5Kofeno‑ka mai ati dai tokadabiya, dai‑ya mai bisirabone, dai atibodi dai‑ya weeni awiraboneni.
6Kofeno‑ka yinero‑bona‑ya mai haana, mai‑ya yinero dai daanahi. Deoso ene yama‑ya mai anina, yinero‑ya mai kayafa, dai‑ya mai kasomaboneni.
7“Yinero‑ya mai haana, mai ati dai tokadabahi.” Deoso ati ne.
Mai ati dai tokadabahi. Mai dai kasomabone mai ati na, mai dai kasoma, mai tamine amosa dai kamina dai nahi.
Deoso ati dai tokadababone, dai ibi nofiyahi
8Yama dai kanika, manakone dai nanahaba kanibote nahi. Mai‑ka yinero dai kayafe, manakone dai daatonama kanibote nahi. Mai dai nofabone Deoso ati ne, mai dai nofahi. Mai dai nofi yokana toha, Deoso ati‑nima dai teni.
9Deoso ati i‑di Mose hikanahanomata dai watoneni.
“Mai‑ka yibote mai dai aharihi, dai owa dai nanahabarihi, mai‑ka yama dai botirihi, mai‑ka yama dai atibodi koborihi, dai nahi.” Deoso ati ne, ati‑ya i‑di Mose kanahanomatane.
Tiwa tinofi‑nima mai one tinofa, fare Deoso ati nafi tikadabineni.
10Mai dai nofa, mai atibodi dai nakomarabone, Deoso atibodi yama kobohina‑nima dai ene naboneni.
11Owati‑nima dai na, dai dodafi, mai a‑amo‑nima dai riyahi. Hibati‑ya Yeso ati‑ya ai nofa yati tohiya, Yeso ai awabone nahorebona, hibayata ai amoni fa‑famaraba nibisa, Yeso ai awaboneni.
12Yama soki‑nima mai dama mai ihi tohasa nineni. Dai‑ta yama soki‑ya mai wi‑wina mai ihi‑nima dai ene riyahi. Dai ene amosahi. Yama wahabisari‑ya mahi kaki nahore ai wato, fare‑nima hibayata Yeso koboni nahorebona ai watoharine. Deoso‑ka bora kita dai sakona, Yeso kobonebona dai‑ya dai hawa toniheboneni. Yama wahi yanatoni‑ya Sodado mai‑ka bora kita‑ya mai sakona, mai hawa tohabone, mai‑nima Deoso‑ka bora kita dai sakonahi.
13Yama tehe‑ka ai toha, ai ene amosa, Yeso koboni hawa tohe‑nima ai ene nahi. Mai ai weerihi, ai yawarihi, kawi ihi ai towe toharihi, ai‑ka yibote mai awira mai‑ya ai dakorarihi, mai‑ka yibote mai ai aharihi, ai‑ka yibote‑ta ai famabisa, ai nahi.
14Ai‑ka hidi i‑di Yeso Kirisito atibodi yama hini kobohina‑nima dai atibodi kobonahi. Dai atibodi bote yama hinofa tamine‑ya dai kadikariyahi. Dai atibodi bote ati‑nima dai riyahi.
Currently Selected:
Homa 13: jaaNT
Highlight
Share
Copy
Want to have your highlights saved across all your devices? Sign up or sign in
