Homa 14
14
Dai owa ene dai kadikariyahi
1Yeso ati‑ya mai nofa, Yeso ati‑ya mai wato bi‑bidi na mai dai nofa, dai‑ya mai dabiya, yama mai hiwatora tamine‑ya mai dai weeriyahi.
2Yama nafi‑ya ai one kaba, ai one bani‑ya kabarihi teni.
3Bani dai ati kaba, sibarihi, bani‑ya mai kabara mai‑ya dai weeriyahi, bani‑ya dai ati kabara, sibarihi, bani‑ya mai kabiya, mai‑ya dai weeriyahi, dai nahi. Mai‑ya Deoso kayafemari, mai dai weeriyahi.
4Yeso ati‑ya mai nofa, ati mai hiwato bi‑bidi hine, Yeso Kirisito‑ya mai na‑narifa mai amani. Ai owa‑ya mai na‑narifa mai ihi ai kadikara, mai‑ka hidi mai ihi‑ya kadikabisatene. Kirisito‑ya mai na‑narifa mai ihi hikadikabone, mai hikasomaboneni, mai ihi amosabonehe.
5Deoso‑ya dai kahiyarabone, dai owa marina dami‑ya nofa, dai owa marina fa‑famaraba na‑ya nofa, hini dai atibodi hinofa‑nima dai na, sibaraboneni. Dai owa marineya, dai owa sawi awiriya, sibaraboneni.
6Mahi ohari‑ya dai yorotokaniya, Deoso‑ya dai kahiyara, sibarihi, mahi‑nima dai yorotokana Deoso‑ya dai kahiyara, sibarihi, bani‑ya dai kaba, Deoso‑ya dai kahiyara, dai sibarihi, bani‑ya dai kabara, Deoso‑ya dai kahiyara, dai sibarihi, dai nineni.
7Kirisito‑ka ai toha hini ai ene ai hasira, Deoso ene ai hasinibisineni, mai ai kasomabonehe. Ai ababone, hini ai ene ai abara, Deoso ene ai aba, Deoso ai kahiyaraboneni.
8Bofe‑ya ai hasinasa niya, Kirisito ai kahiyara, ai abawaha, Deoso tabaro‑ya ai tokabone Kirisito ai kahiyara, ai naboneni. Kirisito‑ka ai toha ai hasi ai aba na, Kirisito ai kahiyara teni.
9Hibati‑ya Yeso Kirisito abe, kitamematane, ai hasi, ai aba na, ai nafi‑ka hidi tohebonaha.
10Dai ene‑nima dai owa mai ihi ra, mai dai tairiyahi, mai ihi‑ya dai kadikariyahi, dai nahi. Ai nafi Deoso noko‑kaya ai nahoya, ai ene‑ya Deoso kadikebonane.
11Hibati‑ya Yeso ati‑ya i‑di Isa·iya kanahano,
“Okitamiya, neme‑ya owinamatasiya, owa noko‑ya mai yobati‑kaya mai nafi nahabone, mai moikanisa,
‘Deoso amatini.’ Mai nafi ati naboneni.” Ati ne.
Ati‑ya i‑di Isa·iya kanahanomatane, Deoso‑ka yama hani‑ya.
12Ai nafi ai ene‑ya ai kaminaboneni, Deoso‑ya.
Mai ai taratokariyahi
13Deoso mai ihi hikadikabone, mai ihi dai kadikariyahi. Yeso hawine‑ya mai yakana, dai ene‑ya mai awiya, dai ene amosara‑mone mai ati na, dai ene mai taratokanaba awineni. Dai ene mai taratokariyahi.
14Yeso ene yama‑ya owatoneni. Yama owatibodi hikaba, okobiya, Deoso owa‑ya weerebonane. Yama tiwatibodi hikaba, tikabiya, sibaraboneni. Deoso ene yama‑ya tikabarabone tiwatibodi ati na, tikabariyahi. Tikabiya, Deoso ene tiwatibodi tiwa‑ya weenaboneni.
15Dai owa yama kabi mai hinofara, mai noki‑ya tikabariyahi. Yama tikaba‑ya mai awiya, mai atibodi mai‑ya weenaboneni. Ai owa mai ai nofa, ai ene mai atibodi mai‑ya weeriyahi. Kirisito mai manakone‑ya nanahabemata, ai ene mai atibodi tosawaririyahi.
16Dai ene amosahi. Dai ene Yeso‑ka mai‑ya mai one weeraboneni.
17Deoso ai‑ka hidi tohe, yama ai kaba, yama ai fawa na ihi Deoso ya‑yaini awirihi, yawi awirihi nane. Deoso‑ka Doni ai‑ya sawi, ai ene amosa, ai ati soma, ai ya‑yai na ene Deoso ya‑yaitene.
18Fara haa‑nima ai toha, Kirisito‑ka yama anini‑ya ai anina, Deoso ai‑ya kayafebona, ai‑ya mai one nofaboneni.
19Ai ene mai ibi nofi nafe, mai ibi kasomiyahi.
20Deoso ene‑mona bani‑ya mai kabara mai noki‑kaya bani tikabariyahi. Mai noki‑kaya bani tikabiya, mai‑ya taratikaniheba awineni. Bani ai kaba, ai ati kasiroterani. Ai owa ai taratokanihe, ai ati kasirobisateni.
21Yama dai kaba, yama dai fawa na ihi dai owa taratokarayaho.
22Tiwatibodi ati‑nima mai atibodi ati ni awiriya, sibarini. Tiwatibodi ati tikaminiya, tiwa‑ya mai weenaba awineni. Tiwatibodi ati‑ya Deoso wato, tiwatibodi ati tikamini awiriya, tiwa‑ya mai weeni awiraboneni.
23Deoso ene yama dai kabarabone dai atibodi ati na, yama dai kabariyahi. Yama dai kaba, dai ene towe tohani. Deoso ati‑nima ai ni awira, ai ene amosaterani.
Currently Selected:
Homa 14: jaaNT
Highlight
Share
Copy
Want to have your highlights saved across all your devices? Sign up or sign in
