John 19

Sa Nangang-angyagan Da Suḻdadu Ḵan Jesus

(Mat. 27:27-31; Mrk. 15:16-20)

1Pun impaaḻan Pilate aḵ Jesus atta suḻdaduna woḵ impaap-aplitna. 2Ḵad pummaliḵug da suḻdadu'tte naḻasiyane waḵaḻ woḵ imbaḻangatda ḵan siya woḵ sinilupanda si dilaage isun ni silup ni ari. 3Pun nampasapasanidae ummoy ḵan siya woḵ ḵanandae nangang-angyag, “Matataguḵae Arin da Judyu!” Pun nilipaḵda.

Sa Naḵoddongan Jesus Aḵ Matoy

(Mat. 27:15-26; Mrk. 15:6-15; Luk. 23:13-25)

4Lummawa ḵasin aḵ Pilate woḵ ḵanana'tta Judyu, “Annae paḻawaoḵ annae tagu ta igammuwonyu we ippun indasaḵ aḵ basuḻna.” 5Pune sadi, lummawa'ḵ Jesus we nabaḻangatan atte waḵaḻe naḻasiyan ya nasilupan atte dilaag. Ḵanan Pilate, “Ilanyu annayae tagu!”

6Innilan ḵad da papangat da papadi ya da guwaḻdan ni templo, ḵanandae nanugtug-uy, “Paipattoḻnu'tte kros! Paipattoḻnu'tte kros!”

Ḵanan Pilate ḵan dida, “Aḻanyu ya ipattoḻyu'tte kros te naippun indasaḵ aḵ basuḻna.”

7Ḵanan da Judyu we summongbat, “Awad de lintogni ye ḵasapuḻane matoy aḵ Jesus te ngannona long-agna'ḵ Abeng Apudyus.”

8Dingngoḻ ḵad Pilate da sana, amo naḵimtan. 9Pun nillumnoḵ ḵasin atte palasna woḵ ḵanana ḵan Jesus, “Dinu naḻpuwam?” Yaḵon adipun aḵ Jesus summongbat. 10Pun ḵanan Pilate, “Ngaipam saḵon adi songbatan? Adimpun ḵamman igammu we anna ḵabooḻaḵe amuḵay ḵan siḵa ya ḵabooḻaḵe ampaipattoḻ ḵan siḵa'tte kros?”

11Ḵanan Jesus, “Naippun ḵabooḻam ḵan saḵon nu adin Apudyus innatod ḵan siḵa. Pun da nangipuḻang ḵan saḵon ḵan siḵa nadagdagson da basuḻda.”

12Inggan ni sadi, pinadas Pilate puḵayan aḵ Jesus yaḵon da Judyu ḵanandae nanugtug-uy, “Nu puḵayam sanate tagu, daḵampun aḵ buḻbuḻunnu Emperor ad Rome. Ngaimane ngannona long-agna ari, sumullagi si Emperor.”#19:12 Aḵ Emperor Tiberius ad Rome, dinutuḵana'ḵ Pilate aḵ Gobernor ad Judea. Pun awad de ḵaḻabbonganae angaan ḵan Pilate nu awad angkamaliyana.

13Pun dingngoḻ ḵad Pilate da sana, pinaḻawana ḵasin aḵ Jesus woḵ ummoy tummuḵdu si tutuḵduwan ni anḵuwis atte igawe ngannonda Nadatdatan si Batu ya sa Hinebrew Gabbatha. 14Annae mumamatuḵ si sadi ye aḻgawe ansagsaganaan da Judyu si Gayagayae ngannonda Nallausan. Ḵanan Pilate atta Judyu, “Annaya ariyu!”

15Pun ḵanandae nanugtug-uy, “Pagongatnu! Pagongatnu! Paipattoḻnu'tte kros!”

Ḵanan Pilate, “Pionyu ḵammane ipattoḻḵu'tte kros ariyu?”

Ḵanan da papangat da papadi, “Naippun udum aḵ arini yaḵon sa Emperor.”

16Pun impuḻang Pilate aḵ Jesus atta suḻdadu ta umoyda ipattoḻ atte kros.

Sa Nipattoḻan Jesus Atte Kros

(Mat. 27:32-44; Mrk. 15:21-32; Luk. 23:26-43)

17Pun innaḻan da suḻdadu'ḵ Jesus woḵ intallayda si lasinna'd Jerusalem we impabuḵudda ḵan siya de krosna inggana'ḵ dummatongda si “Lugar ni Battuḵag” we ngannonda Golgotha atte Hinebrew. 18Pun impattoḻda'ḵ Jesus atte kros sidi. Inninggaw os da duwae impattoḻda dida'tta krosda, sa osa'tte madawinanna ya sa osa'tte madawigina.

19Inninggaw os impaigilin Pilate we impaiggana'tte kros Jesus we ḵanana, “Jesus we iNazareth, Arin da Judyu.” 20Adu da Judyu we namasa te adani'tte siyudad sadi ye nipattoḻan Jesus atte kros ya nigili si tuḻu we nansabasabali ye ugud we Hinebrew, Linatin ḵan Grineek. 21Pun ummoy da papangat da papadi ḵan Pilate woḵ ḵananda, “Adim igili, ‘Arin da Judyu,’ ta siya igilim, ‘Ḵanan ni annae tagu we siya Arin da Judyu.’ ”

22Ḵanan Pilate, “Ngai ḵappagay inggiliḵ, siya!”

23Nagangput ḵade impattoḻ da suḻdadu'ḵ Jesus atte kros, innaḻada silupna woḵ nanḵapatonda nambisbisaḵan. Innaḻada bos taḵḵop ni silupnae ippun nandaubana. 24Pun ḵananda, “Umadi taḵu pissayon ta ambubbunut taḵu nu ngai anginḵuwa.” Naḵwa da anna ta mituttuwa nigili ye Ugud Apudyus we ḵanana, “Nambisbisaḵanda silupḵu ya nambubbunutda nu ngai anginḵuwa si osae silupḵu.”#19:24 Psalm 22:18. Ḵaḵna ḵingwan da suḻdadu.

25Da summisiḵad ḵad si adanin ni de kros Jesus aḵ inana, sa sunud ni inana, aḵ Mary ye asawan Clopas ya aḵ Mary Magdalene. 26Innilan ḵad Jesus inana ya sa ay-ayatonae disipulu we summisiḵad si adani, ḵanana'tte inana, “Ina, annaya ibelangnu'ḵ abengnu.” 27Pun ḵanana bos atte sanae disipuluna, “Annaya ibelangnu'ḵ inam.” Pun inggan ni sadi ye timpu, intallay ni disipulu inan Jesus woḵ paigawona'ḵ ḵuwada.

Sa Natoyan Jesus

(Mat. 27:45-56; Mrk. 15:33-41; Luk. 23:44-49)

28Inigammun ḵad Jesus we ginanggangputna da losan ḵanana, “Nauwawaḵ,”#19:28 Da Psalm 22:15; 69:21. ta mituttuwa nigili ye Ugud Apudyus.

29Inninggaw angange napnu'tte naḵilome bayase sasaad. Pun illinong da suḻdadu impaḵawdae isunan ḵapos atte pangan ni hyssop woḵ indawdawda'tte sungad Jesus. 30Sinusup ḵad Jesus ḵilom ḵanana, “Naganggangput.” Pun nayyung-ut woḵ natoy.

31Gapu ta ansaganaan da Judyu para'tte umillongan atte mabigat, adimpun da Judyu pione matenan da ladag atte kros si umillongane ampatoge aḻgaw. Pun ḵindawda ḵan Pilate we maptod da suḵin da nipattoḻ atte kros ya maopas da ladagda.#19:31 Mibatay atte lintog da Judyu, adipun maḵwae mitatayyun mabigatan ladag ni pumappatoye tagu'tte ḵayu. Deuteronomy 21:23; Joshua 8:29. 32Pun iyyunud Pilate woḵ ummoy da suḻdadu pintod da suḵin da duwae buḻun Jesus we nipattoḻ atta krosda. 33Yaḵon niduumda ḵad ḵan Jesus, inniladae nagangput natoy woḵ adidapun pintod da suḵina. 34Yaḵon sa osa'tta suḻdadu, dinuy-uḵna si tubay butiḵ Jesus woḵ daguse pummoy-as daḻa ḵan danum. 35Sa nangila'tte sanae naḵwa, tinaḵdoḻana ḵatuttuwaan ḵan igammunae imbagana ḵatuttuwaan ta amati ḵayu bos. 36Ḵad naḵwa da sana ta mituttuwa nigili ye Ugud Apudyus we ḵanana, “Naippun ossaan aḵ maptod atta tung-aḻna.”#19:36 Psalm 34:20 ibaganae naippun ossaan aḵ maptod atta tung-aḻna. Exodus 12:46 ḵan Numbers 9:12 ibaganae da tung-aḻ ni ubbu we karnero we midatun si Gayagayan da Judyu we ngannonda Nallausan adipun oḵyan maptod ḵad sa ubbu we karnero siya mipaniyan Jesus. 37Ḵad awad os Ugud Apudyus we ḵanana, “Asida ilan dinuy-uḵda.”#19:37 Zechariah 12:10.

Sa Nilibonan Jesus

(Mat. 27:57-61; Mrk. 15:42-47; Luk. 23:50-56)

38Naabus ḵad sadi, ummoy ḵan Pilate aḵ Joseph we iyArimathea we osa'tta disipulun Jesus yaḵon illimodna te maḵimut atta Judyu. Pun ḵindawna ḵan Pilate nu maḵwae opasona ladag Jesus atte kros ta itallayna. Iyyunud Pilate woḵ ummoyna impas ladag Jesus woḵ intallayna. 39Aḵ Nicodemus we ummoy ḵan Jesus si sillabiyan.#19:39 John 3:1-21. Nangawit aḵ bangbanglu we myrrh ya da aloe we batug di tuḻumpuḻu we kilo. 40Pun innaḻada ladag Jesus woḵ pinutiputanda'tte itaḵe sinnune nabangbangluwan te siya ugalin da Judyu.

41Sa lugar we nipattoḻana inggaw mumuḻḻaan ya sa sadi ye mumuḻḻaan inggaw ḵaḵḵopyae libone ippun nilibon. 42Pun gapu ta ansaganaan da Judyu para'tte umillongan atte mabigat ya adani libon, illibonda'ḵ Jesus sidi.

Currently Selected:

John 19: kml

Highlight

Copy