Popular Bible Verses from John 19

Share

Sinusup ḵad Jesus ḵilom ḵanana, “Naganggangput.” Pun nayyung-ut woḵ natoy.

Inigammun ḵad Jesus we ginanggangputna da losan ḵanana, “Nauwawaḵ,” ta mituttuwa nigili ye Ugud Apudyus.

Innilan ḵad Jesus inana ya sa ay-ayatonae disipulu we summisiḵad si adani, ḵanana'tte inana, “Ina, annaya ibelangnu'ḵ abengnu.” Pun ḵanana bos atte sanae disipuluna, “Annaya ibelangnu'ḵ inam.” Pun inggan ni sadi ye timpu, intallay ni disipulu inan Jesus woḵ paigawona'ḵ ḵuwada.

Yaḵon niduumda ḵad ḵan Jesus, inniladae nagangput natoy woḵ adidapun pintod da suḵina. Yaḵon sa osa'tta suḻdadu, dinuy-uḵna si tubay butiḵ Jesus woḵ daguse pummoy-as daḻa ḵan danum.

Ḵad naḵwa da sana ta mituttuwa nigili ye Ugud Apudyus we ḵanana, “Naippun ossaan aḵ maptod atta tung-aḻna.” Ḵad awad os Ugud Apudyus we ḵanana, “Asida ilan dinuy-uḵda.”

Pun innaḻan da suḻdadu'ḵ Jesus woḵ intallayda si lasinna'd Jerusalem we impabuḵudda ḵan siya de krosna inggana'ḵ dummatongda si “Lugar ni Battuḵag” we ngannonda Golgotha atte Hinebrew.

Ḵad pummaliḵug da suḻdadu'tte naḻasiyane waḵaḻ woḵ imbaḻangatda ḵan siya woḵ sinilupanda si dilaage isun ni silup ni ari.