John 20

Sa Ummuliyan Jesus

(Mat. 28:1-8; Mrk. 16:1-8; Luk. 24:1-12)

1Mabigat ḵade nagangput umillongane ngannonda ummunae aḻgaw ni sindumingguwan, nammadam-an taḻun aḵ Mary Magdalene we ummoy atte nilibonan Jesus. Sissiya ḵade anggiḵbot, innilanae naḵaan batu we onob ni libon. 2Pun nanoddaḵe ummoy ḵan da Simon Peter ya sa osae disipulu we ay-ayaton Jesus woḵ ḵanan Mary ḵan dida, “Innaḻada ladag Apu Jesus ḵad ippun igammuni nu dinu nangiggaanda.”

3Nangwa ḵad da Peter ya sa osae disipulu, lummibbatda woḵ ummoyda si libon. 4Losanda nanoddaḵ yaḵon nilasiyan ni osae disipulu'ḵ Peter woḵ ummuna niduum atte libon. 5Pun ummobaob ta ilana'd daḻom woḵ innilana sinnune babaddong yaḵon adipun nillumnoḵ. 6Dummatong ḵad aḵ Simon Peter we nituntun-ud, nillumnoḵ si libon woḵ innilana sinnune babaddong 7ya sa sinnune nibusdung si uḻunae natipli ya nisina'tta sinnune babaddong. 8Sa osae disipulu we ummuna niduum atte libon, nillumnoḵ os woḵ innilana ḵad da naḵwa, namati ye ummuli'ḵ Jesus. 9Te sa sadi ye timpu, daandapun maawatan nigili ye Ugud Apudyus we ḵananae ḵasapuḻane umuli'ḵ Jesus. 10Pun ummoyon da disipulu atta naḻpuwanda.

Sa Nampail-an Jesus Ḵan Mary

(Mat. 28:9-10; Mrk. 16:9-11; Luk. 24:22-24)

11Yaḵon aḵ Mary Magdalene, sisiḵad si lasin ni libone umibiibil. Ummobaob ḵade umibiibil ta ilana'd daḻom si libon, 12innilana da duwae anghel we nansilup aḵ itaḵe tutuḵdu si nibadongan ni ladag Jesus, sa osa si nan-uḻuwana ya sa osa si nan-uyadana. 13Ḵananda ḵan Mary, “Bubai, ngaipaḵa umibiibil?”

Ḵanana ḵan dida, “Te innaḻada ladag Apuḵ ḵad naippun igammuḵ nu dinu nangiggaanda ḵan siya.”

14Imbagana ḵad sadi, nantawili woḵ innilana'ḵ Jesus we sisiḵad yaḵon adinapun immatunan. 15Ḵanan Jesus ḵan siya, “Bubai, ngaipaḵa umibiibil? Ngai singsingtom?”

Ḵanampun Mary nu sa angayyuwan atte mumuḻḻaan woḵ ḵanana, “Apu, nu intallaynu, ibagam nu dinu nangiggaam ta iyyaḵ aḻan.”

16Ḵanan Jesus ḵan siya, “Mary!”

Nansagung aḵ Mary woḵ ḵanana ḵan siya si Hinebrew, “Rabboni,” sa piona ḵanan Mistulu.

17Ḵanan Jesus, “Adim yan onnan saḵon te daanaḵpun mipauli ḵan Amaḵ. Yaḵon inḵa'tta susunudḵu we namati ya ibagam ḵan didae mipauliyaḵ ḵan Amaḵ we Amayu ya Apudyusḵu we Apudyusyu.”

18Pun ummoy aḵ Mary Magdalene woḵ imbagana'tta disipulu ḵanane, “Innilaḵ aḵ Apu.” Ḵad imbagana ḵan dida da inugud Jesus ḵan siya.

Sa Nampail-an Jesus Atta Disipuluna

(Mat. 28:16-20; Mrk. 16:14-18; Luk. 24:36-49; Act. 1:3-4)

19Ḵugḵugab ḵad si sadi ye aḻgawe sa umunae aḻgaw ni sindumingguwan, nidaḵig inggawan da disipulu te maḵimutda'tta Judyu. Nampaila'ḵ Jesus woḵ naḵataḵdog ḵan dida woḵ ḵanana, “Lin-awa oḵyan awad ḵan diḵayu.” 20Imbagana ḵad sana, impailana da imana ya sa butiḵna. Pun nallaylayad da disipuluna si innilada'ḵ Apu.

21Pun ḵanan os Jesus ḵasin ḵan dida, “Lin-awa awad ḵan diḵayu. Ibuunḵu diḵayu we isun ni nangibuunan Amaḵ ḵan saḵon.” 22Imbagana ḵad sana, sinap-uyana dida woḵ ḵanana, “Awatonyu Ispiritu Santu. 23Nu pakawanonyu da basuḻ da ngaiman, mapakawanda. Yaḵon nu adiyupun pakawanon dida, adidapun mapakawan.”

Sa Nampail-an Jesus Ḵan Thomas

24Yaḵon aḵ Thomas we ngannonda Ḵapil ya osa'tta disipulu, naippun ḵan dida si nampail-an Jesus. 25Pun imbagan da udume disipulu ḵanane, “Innilani'ḵ Apu.”

Yaḵon ḵanana ḵan dida, “Nu adiḵ ilan ḵan igga tammuduḵ atte aled ni pattoḻ atta imana ya adiḵ appadan butiḵna, adiyaḵpun amati.”

26Naḻaḵpus ḵad sindumingguwan, inninggaw os da disipulu'tte boḻoy woḵ inninggaw aḵ Thomas ḵan dida. Nidaḵig onob yaḵon nampaila'ḵ Jesus woḵ naḵataḵdog ḵan dida woḵ ḵanana, “Lin-awa awad ḵan diḵayu.” 27Pun ḵanana ḵan Thomas, “Ilam da imaḵ ya appadam dida. Uyadom imam ya iggam atte sugat ni butiḵḵu. Adiḵa ogon anduwaduwa yaḵon amatiḵa.”

28Summongbat aḵ Thomas ḵan siya woḵ ḵanana, “Apuḵ ḵan Apudyusḵu!”

29Ḵanan Jesus ḵan siya, “Namatiḵa gapu ta innilam saḵon? Pian da adipun nangila ḵan saḵon yaḵon namatida.”

30Adu da nakaskasdaawe sinyale ḵingwan Jesus atte sinagung da disipulunae adipun nigili si annae iblu. 31Yaḵon nigili da anna ta amati ḵayu we aḵ Jesus siya Kristu we Abeng Apudyus ḵad sa amatiyanyu awad ḵan diḵayu biyag gapu ḵan siya.

Currently Selected:

John 20: kml

Highlight

Copy