John 18

Sa Nanoḵmaanda Ḵan Jesus

(Mat. 26:47-56; Mrk. 14:43-50; Luk. 22:47-53)

1Nagangput ḵad nalluwaḻu'ḵ Jesus, ummoyonda'tta disipuluna woḵ dummoḻmangda'tte wail Kidron. Awad de mumuḻḻaan pun siya ummayanda.

2Igammun Judas we angituyuḵ ḵan Jesus sadi ye lugar te sidi dam-on da Jesus ya da disipuluna andaḵdaḵngan. 3Pun impuyut Judas da suḻdadu we iRome ya da guwaḻdan ni templo we imbuun da papangat da papadi ya da Pharisee. Nampaḵ-odonda'ḵ silaw, pinatud ya aggom.

4Gapu ta inigammun Jesus da losane maḵwa ḵan siya, inabotna dida woḵ ḵanana, “Ngai singtonyu?”

5Ḵanandae summongbat, “Aḵ Jesus we iNazareth.”

Ḵanan Jesus, “Saḵon.” Pun inninggaw aḵ Judas we angituyuḵ ḵan siyae sisiḵad si igawda. 6Imbagan ḵad ay Jesus ḵatti, summunodda woḵ nampaklobda.

7Pun ḵanan os Jesus we nan-imus, “Ngai singtonyu?”

Ḵananda bos, “Aḵ Jesus we iNazareth.”

8Ḵanan os Jesus, “Imbagaḵ ḵan diḵayu we saḵon. Ḵad nu saḵon singtonyu, iyunudyu we umoyon da disipuluḵ.” 9Imbagana sana ta mituttuwa sadi ye inugudnae naippun ossaan aḵ tinaḻaḵḵu'tta innatod Apudyus ḵan saḵon.#18:9 John 17:12.

10Nangwa ḵad aḵ Simon Peter, inuḵputna ispadana woḵ binaḵagna madawinane ingan Malchus we musassun ni ḵangatuwane padi. 11Ḵanan Jesus ḵan Peter, “Ipaulim ispadam si bolbolloyna. Ḵanampun ḵamman nu adiḵ maanusan ampaḵaḻamane inḵoddong Amaḵ?”

Sa Nanumaḻyaanda Ḵan Jesus

12Pun da suḻdadu ya da kapitanda ya da guwaḻdan ni templon da Judyu dinoḵmaanda'ḵ Jesus woḵ binaḻudda da imana. 13Inunada inniyoy ḵan Annas we ḵatugangan Caiaphas we ḵangatuwane padi si sadi ye tawon. 14Binagbagaan Caiaphas da papangat da Judyu we unnoyna oḵyan ossaan aḵ matoy para'tta tagu.

Sa Namuḵlitan Peter Ḵan Jesus

(Mat. 26:69-70; Mrk. 14:66-68; Luk. 22:55-57)

15Aḵ Simon Peter ya sa osae disipulu, nitun-udda ḵan Jesus. Gapu ta igammun ni ḵangatuwane padi osae disipulu, naḵaḻnoḵ ḵan Jesus atte paway ni boḻoyna. 16Yaḵon aḵ Peter inninggaw si lasin ni lewangan ni paway. Sa osae disipulu we igammun ni ḵangatuwane padi, ummoy naḵaugud si bubai ye sammilu we guwaḻdan ni lewangan woḵ pinaḻnoḵna'ḵ Peter. 17Ḵanan ni bubai ye inggaw si lewangan ḵan Peter, “Daḵampun ḵad ain aḵ osaḵa'tta disipulun Jesus?”

Ḵanan Peter, “Daḵanaḵpun.”

18Gapu ḵad ta antungnin, nan-apuy da sammilu ya da guwaḻda woḵ sisiḵaddae nan-anidu. Summisiḵad os aḵ Peter woḵ naḵaanidu.

Sa Nanumaḻyaan Ni Ḵangatuwane Padi Ḵan Jesus

(Mat. 26:57-66; Mrk. 14:53-64; Luk. 22:66-71)

19Pun sinumaḻyan ni ḵangatuwane padi'ḵ Jesus mipanggob atta disipuluna ya sa tuttuduna. 20Ḵanan Jesus, “Patilayunaḵ antuttudu si maḻamaḻang atte sinagoga ya sa paway ni templo we andaḵdaḵngan da losane Judyu. Ḵad naippun imbagaḵ aḵ nitataḻu. 21Ngaipa saḵon an-imusam? Maḵaimusḵa'tta tagu we nandongoḻ ḵan saḵon te igammuda da imbagaḵ.”

22Imbagan ḵad ay Jesus anna, nilipaḵ ni osae guwaḻda bosaḻna woḵ ḵanana, “Ngaipa ḵaḵnat ansosongbatnu si ḵangatuwane padi?”

23Summongbat aḵ Jesus ḵan siya woḵ ḵanana, “Nu nankamali imbagaḵ, ibagam ḵan saḵon inugudḵu we nankamali. Yaḵon nu ustu da imbagaḵ, ngaipam saḵon lipaḵon?”

24Pun impaiyoy Annas aḵ Jesus we nabaḻud da imana ḵan Caiaphas we ḵangatuwane padi.#18:24 Aḵ Caiaphas, siya ḵangatuwane padi'tte sadi ye tawone nadoḵmaan Jesus. Aḵ Annas - ḵangatuwane padi si awe yaḵon sissiyae mapatgan atte saadna taḵon ay nu daḵampun ogon aḵ siya ḵangatuwane padi si timpu we nadoḵmaan Jesus.

Sa Namuḵlitan Os Peter Ḵan Jesus

(Mat. 26:71-75; Mrk. 14:69-72; Luk. 22:58-62)

25Sisiḵad ḵad aḵ Simon Peter we an-anidu ḵananda, “Daḵampun ḵad ain aḵ siḵa osa'tta disipulun Jesus?”

Pinuḵlitan os Peter woḵ ḵanana, “Daḵanaḵpun.”

26Pune sadi, sa osa'tta sammilun ni ḵangatuwane padi ye agin ni binaḵag Peter ingana ḵanana, “Daḵampun ḵad ain aḵ siḵa innilaḵe buḻunna si mumuḻḻaan?” 27Inḵasin Peter pinuḵlitan. Pun daguse nanullaḵuḵ ḵawitan.

Sa Nipuḻangan Jesus Ḵan Pilate

(Mat. 27:1-2, 11-14; Mrk. 15:1-15; Luk. 23:1-5)

28Wiḵwiḵis ḵad, illawada'ḵ Jesus atte boḻoy Caiaphas woḵ inniyoyda'tte palas Gobernor Pilate. Yaḵon adipun nillumnoḵ da Judyu ta adida mibelang aḵ ḵaissaw yaḵon maḵaḵanda'tte Gayagayae ngannonda Nallausan.#18:28 Sa ugalin da Judyu sigun si religionda, nu lumnoḵda si boḻoy da Gentil, mibelangdae naḵaissawan. 29Pun lummawa'ḵ Pilate woḵ ḵananae nan-imus ḵan dida, “Ngai ipabasuḻyu si annae tagu?”

30Ḵanan da Judyu, “Nu daḵampun aḵ lawweng da ḵingwan ni annae tagu, adinipun oḵyan impuḻang ḵan siḵa.”

31Ḵanan Pilate, “Aḻanyu gay ta ḵuwisonyu sigun si ḵuwayu we lintog.”

Ḵanan da Judyu, “Yaḵon adipun miyunude ḵoddonganni ye mapatoy tagu.” 32Naḵwa da anna ta mituttuwa imbagan Jesus si mipanggob atte inonae matoy.#18:32 John 12:32-33.

33Pune sadi, nillumnoḵ os aḵ Pilate si palasna woḵ impaayagna'ḵ Jesus. Ḵanana, “Siḵa ḵamman Arin da Judyu?”

34Ḵanan Jesus, “Naḻpu ḵamman si somsomoḵnu sanate imusom baḵon nu awad udum aḵ nangibaga si mipanggob ḵan saḵon?”

35Summongbat aḵ Pilate woḵ ḵanana, “Judyuwaḵ ḵamman? Da ḵailiyam ya da papangat da papadi impuḻangda siḵa ḵan saḵon. Ngai ḵad ain ḵingwam?”

36Ḵanan Jesus, “Sa ḵaḻabbongaḵe ampangat daḵampun aḵ maḻpu si annae lubung. Nu maḻpu si annae lubung ḵaḻabbongaḵe ampangat, aaddi ye naḵagubat da disipuluḵ ta adiyaḵ oḵyan mipuḻang atta Judyu.”

37Ḵanan os Pilate, “Pun siḵa Ari?”

Summongbat aḵ Jesus woḵ ḵanana, “Tuttuwa sadi ye ḵanam. Te niyanaḵaḵ ya ummaliyaḵ si annae lubung ta taḵdoḻaḵ ḵatuttuwaan. Ḵad da ngaimane angipatog atte ḵatuttuwaan, tuttuwaonda da ibagaḵ.”

38Ḵanan Pilate, “Ngai ḵatuttuwaan?”

Imbagana ḵad sadi, lummawa ḵasin woḵ ḵanana'tta Judyu, “Naippun indasaḵ aḵ basuḻ ni annae tagu. 39Yaḵon awad de ugaliyu we ḵasapuḻane puḵayaḵ osa'tta baḻud si Gayagayae ngannonyu Nallausan. Pun pionyu we puḵayaḵ annae Arin da Judyu?”

40Ḵanandae nangiyipḵaw, “Adim aḵ Jesus puḵayan! Yaḵon aḵ Barabbas puḵayam!” Aḵ Barabbas ḵad tulisan.

Currently Selected:

John 18: kml

Highlight

Copy